Hi Yesu mampokoꞌoriꞌ haduo tokohu
9
1 Katoꞌo hi Yesu mehendeꞌ duanga moꞌawa hante topeguruNahi, honiꞌi mewutemohi mahuliꞌ nolou pe peꞌohaꞌaNa i bolaꞌ Kapenau. 2 Kohupaꞌralu itoꞌo, uwaꞌhi toaꞌ to mokowaꞌ haduo tokohu to ropoturu i aliꞌ, nolouhi pe hi Yesu. Nobahaꞌ hi Yesu pepoꞌohire kohingkiꞌ moꞌoriꞌne awara tiꞌo, Io mololitamo pe tokohu tiꞌo, Notiꞌi, “AnaꞌKu, ipokaroho lalima! Teꞌampunimo dosama.”3 Haꞌumbora guru agama to pahori lolitana hi Yesu tiꞌo mantiꞌi i lalira, “Toaꞌ hieꞌe mampononaꞌa Pueꞌ Ala. Io mampohibobali kuasaꞌNa hante kuasaꞌna Pueꞌ Ala!”
4 Angkana nobahaꞌ mpololeke hi Yesu hapo to uwaꞌ i lalira. Iomo horiana Notiꞌikihi, “Mahamporeꞌi hinaꞌ kodake mpololeke pekirimi? 5 Imboꞌina to mololihaꞌ, mantiꞌi ‘Teꞌampunimo dosama,’ ba ‘peꞌaro hei matengkaꞌmoko’? 6 Hinewowoꞌena hingkiꞌ Kupomombahakikei kuasaꞌne Anaꞌ Manusiaꞌ moꞌampuni dosa i duniaꞌ hieꞌe.” Katoꞌo mehahiliꞌmo hi Yesu pe tokohu tiꞌo, honiꞌi Notiꞌiki, “Petotiꞌimo, ilulumo aliꞌma, hei mahuliꞌmoko pe tambimu!” 7 Meꞌaromo mpuꞌu tokohu tiꞌo, honiꞌi mahuliꞌ nolou pe tambina.
8 Koroꞌokiꞌna toaꞌ to woriꞌ hapo to pewali tiꞌo, motehuꞌhi honiꞌi mampokodeꞌhi Pueꞌ Ala, alaꞌ Io mampomombahamo kuasaꞌNa pe manusiaꞌ!
Hi Yesu mowowoi hi Matius mewali topeguruNa
9 Uko tiꞌo, molaimo hi Yesu katoꞌo. Kolentuꞌana hi Yesu matengkaꞌ, Noꞌokiꞌ haduo toperuruꞌ sima mahura i peꞌohaꞌana. Konaꞌna hi Matius.a Notiꞌi hi Yesu pe io, “Metuntumoko pe Aku!” Hi Matius kaliuꞌ metotiꞌi, hei metuntu pe Io.
10 Katoꞌo hi Yesu hante topeguruNa nolouhi pe tambina hi Matius hingkeꞌna mangkahi moꞌawa-awa. Kolentuꞌara mangka, woriꞌhi toperuruꞌ sima hante toaꞌ ntaniꞌna to nirekeꞌhi toaꞌ to madosa hupaꞌhi woꞌo hei mangkahi moꞌawa hante hi Yesu. 11 Uwaꞌhi toParisi to pangkiꞌ tiꞌo, iomo horiana ropeꞌitanoki pe topegurunahi hi Yesu, “Mahamporeꞌi gurumi hinaꞌ mangka moꞌawa hante toperuruꞌ sima hei toaꞌ to madosa?”
12 Nohori hi Yesu peꞌitanore tiꞌo, iomo horiana Notiꞌikihi, “Toaꞌ to hawaꞌi mohakiꞌ, hawaꞌi moparaluꞌi sando. Angkana toaꞌ to mahakiꞌlu to paralu mampaliꞌ sando. 13 Mewaliꞌ, hangangaa ipekirikei moromiꞌ hapo palaihane Pohawaꞌna Pueꞌ Ala to teꞌukiꞌ waheꞌe:
‘To Kulei, hingkeꞌna marimakei pe hangko awami,
handoꞌio pinatuwuꞌ to nipopenomba pe Aku.’ ” \rq (Hos. 6:6)
Mewaliꞌ, hawaꞌA humei mowowoi toaꞌ to morekeꞌhi koꞌiora toaꞌ to moromiꞌ waliara, angkana humeiꞌA mowowoi toaꞌ to madosa.
Topeguruna hi Yesu hawaꞌhi maboki i tempona tene hi Yesu uwaꞌ moꞌawa hante iohi
14 Katoꞌo hupaꞌmohi haꞌumbora topegurune hi Yohanes Toperiu, nolouhi meꞌitano pe hi Yesu, rotiꞌi, “Mahamporeꞌi hinaꞌ ingka hante toParisi pokoka maboki, angkana topeguruMu hawaꞌi?”
15 Nohoniꞌhi hi Yesu moliu pandiri', Notiꞌi waheꞌe: “Tempona mosusaꞌ pepohamoko, toaꞌ to hupaꞌ i pepohamokoa tiꞌo hawaꞌhi wadi masusa lalire ane uwaꞌ tene i lumbura tomaꞌani to nipohamoko. Angkana hampiha tempo, tomaꞌani to nipohamoko hingkiꞌ niroa ka lumbura. I tempo tiꞌo honiꞌhi wadi maboki.”
16 Uko tiꞌo, hi Yesu mampowute womo rolangkaꞌ pandiri' Notiꞌi, “Hawaꞌi uwaꞌ haduo toaꞌ to modampelei baduꞌ to hohai hante wida to wolaꞌ, alaꞌ wida to wolaꞌ hingkiꞌ mengkuruꞌ wute moheuꞌ baduꞌ to hohai tiꞌo, horiana tetambai komoheuꞌne. 17 Hatoꞌo woꞌo, hawaꞌi moromiꞌ mantula anggoroꞌ to wolaꞌ i pamporideꞌa to hohai to niwali ka koliꞌ pinatuwuꞌ, alaꞌ anggoroꞌ to wolaꞌ hingkiꞌ mampomohepaꞌ pamporideꞌa to hohai tiꞌo, horiana anggoroꞌ hibobo, hei marugi woꞌo pamporideꞌane. Mewaliꞌ anggoroꞌ to wolaꞌ hangangaa nitula i pamporideꞌa to wolaꞌ, hingkeꞌna moromiꞌ lekiꞌ-lekiꞌna.”
Hi Yesu mampotuwuꞌ huliꞌ haduo oꞌanaꞌ
18 Kolentuꞌana tene hi Yesu mololita hante topegurunahi hi Yohanes Toperiu, hupaꞌmo haduo tadulako tambi penombahara toYahudi, ako melingkotuꞌ i hinarona hi Yesu merapiꞌ sulungi. Notiꞌiki, “Pueꞌ, anaꞌku towoweꞌe hongkoꞌlu mahi. Kuperapiꞌ hingkeꞌna noloumoki pe tambingku, Iperama hingkeꞌna tuwuꞌi huliꞌ.” 19 Mewaliꞌ hi Yesu hante topeguruNa metuntumohi mpuꞌu pe tadulako tiꞌo.
20-21 Kolentuꞌara matengkaꞌ, haduo towoweꞌe mangkododungkui hi Yesu. Towoweꞌe tiꞌo hampuluꞌ merontoꞌamo nohua nturusi meraꞌa. Notiꞌi i lalina, “Ane kuruntuimoꞌi jubaNe, bateꞌna moꞌoriꞌa.” Katoꞌo, io mangkododungkui hi Yesu ka tunduNa hei noruntui doe jubaNe.
22 Katoꞌo, hi Yesu mehahiliꞌ pe towoweꞌe tiꞌo honiꞌi Notiꞌiki, “AnaꞌKu, ipokaroho lalima! Moꞌoriꞌmoko alaꞌ mepoꞌohiko pe Aku.” Tempo tiꞌo woꞌo, towoweꞌe tiꞌo moꞌoriꞌ.
23 Katoꞌo ropololiumo patengkaꞌare wute i tambina tadulako tambi penombaha toYahudi. KohupaꞌNa itoꞌo, Noꞌokiꞌ woriꞌmohi toaꞌ to motulali mepododoli, hei uwaꞌhi woꞌo toaꞌ to maroaꞌ meꞌola. 24 Hi Yesu mololita, Notiꞌi, “Mesuwukei lekiꞌ kaseꞌe! Oꞌanaꞌ hieꞌe hawaꞌi mahi, angkana loleꞌolu.” Korohorinalu lolitonaNe tiꞌo, rokokereꞌilu. 25 IkoNopopesuwuralu ka tambi, mekahimo hi Yesu pe kamaraꞌna oꞌanaꞌ tiꞌo, honiꞌi Notiko korawene. Oꞌanaꞌ tiꞌo kaliuꞌ meꞌaro alaꞌ tuwuꞌmoꞌi huliꞌ. 26 Tandaꞌ kuasaꞌ to nowali hi Yesu tiꞌo tekareba i humanele woiꞌ tiꞌo.
Hi Yesu mampokoꞌoriꞌ roduo tobilo
27 Kopolainalu hi Yesu katoꞌo, uwaꞌ roduo tobilo to metuntu ngkamuri hei mewowoi-woihi nturusi, rotiꞌi, “Muleꞌna datu Daudi, Ipokarimaka wongkenaꞌ!”
28 Pekahinalu hi Yesu pe lali tambi, hupaꞌmohi tobilo to roduo tiꞌo pe Io. Noteneihi hi Yesu, “Ba ipoꞌohikei koꞌuwaꞌne kuasaꞌKu mampokoꞌoriꞌkei?”
Rohoniꞌ, “Kipoꞌohi, Pueꞌ!”
29 Katoꞌo Noramamo matare honiꞌi Notiꞌikihi, “Alaꞌ pepoꞌohimi, moꞌoriꞌmokei.” 30 Kaliuꞌ pangkiꞌhi. Hei nopakaꞌingaꞌihi hi Yesu, Notiꞌi, “Inioꞌ ipopololitakei pe hihimolu hapo to Kuwali hieꞌe.” 31 Angkana kehapohi noꞌopi hi Yesu, bateꞌnalu nolou ropekarebaiki pe humanele woiꞌ tiꞌo hapo to nowali hi Yesu i iohi.
Hi Yesu mampokoꞌoriꞌ haduo to hawaꞌi hohumbo mololita
32 Kopolairalu tobilo tiꞌo, hupaꞌ womohi pe hi Yesu toaꞌ to mangkomi haduo to hawaꞌi hohumbo mololita alaꞌ nopekahiꞌi tokodake. 33 Konopopesuwunalu hi Yesu tokodake tiꞌo, toaꞌ tiꞌo kaliuꞌ mololita. Ropohoko mpololeke toaꞌ to woriꞌ pangkiꞌ hapo to pewali tiꞌo, rotiꞌi, “Handoaꞌi kahampiha mewali to waheꞌe iseꞌe i Saraeli!” 34 Angkana toParisi hawaꞌhi mampoꞌohi koka Pueꞌ Alana kuasaꞌne hi Yesu. Rotiꞌi, “Toaꞌ tiꞌo mopakeꞌlu kuasaꞌna Belisiꞌ mampopesuwu tokodake.”
Komarimana hi Yesu pe toaꞌ to woriꞌ
35 Katoꞌo, hi Yesu hante topeguruNa matengkaꞌ womohi pe kota-kota hante bolaꞌ-bolaꞌ i woiꞌ Galilea. Hi Yesu mampowute Kareba Moromiꞌ noniuꞌ i poparentana Pueꞌ Ala, hei mepoturuꞌ i tambi-tambi penombaha. Mampokoꞌoriꞌ woꞌo toaꞌ ka hakiꞌra to molangkaꞌ-langkaꞌ hante to hawaꞌi manihoiꞌ wotare. 36 Marima laliNe pangkiꞌ toaꞌ to woriꞌ tiꞌo, alaꞌ wulihi. Hawaꞌi uwaꞌ toaꞌ to mosulungihi, hibalihi gimba to hawaꞌi nilambaꞌ. 37 Notiꞌi hi Yesu pe topeguruNa, “Toaꞌ tiꞌohi hibalihi kina to mangkemo. To hingkiꞌ nipekina woriꞌ, angkana to mampekina hangkokiuꞌluhi. 38 Iomo horiana hangangaa iperapiꞌkei pe Pueꞌ Ala tumpuna to nipekina, hingkeꞌna Norumbaꞌi topajamane nolou mampekina.”