Towoweꞌe to mosulungi hi Yesu
8
1 Hawaꞌi morue uko tiꞌo, hi Yesu nolou pe kota-kota to kodeꞌ hante to kokiuꞌ mampowute Kareba Moromiꞌ noniuꞌ i poparentana Pueꞌ Ala. Io ropoꞌowoni woꞌo topeguruNa to hampuluꞌ roduo. 2 Uwaꞌhi woꞌo haꞌumbora duo towoweꞌe to mampoꞌowoni hi Yesu. Towoweꞌe tiꞌo to nopokoꞌoriꞌ hi Yesu ka hakiꞌra hante ka konopekahiira lomoa. Konaꞌna to haduo, hi Maria to niwowoi woꞌo hi Madalena. Hi Maria tiꞌo to nopokoꞌoriꞌ hi Yesu hampiha ikonopekahiana pitu tokodake. 3 Haduo woꞌo iomo hi Yohana hantambina hi Kusa, topamporiana i lali tambina datu Herode. Hi Susana metuntu woꞌo moꞌawa hante woriꞌ towoweꞌe to ntaniꞌna. Lekiꞌ-lekiꞌra mosulungi hi Yesu hante topeguruNa ka doiꞌra hadoduora.Pandiriꞌ noniuꞌ i topohawori
4 Woriꞌhi toaꞌ to hupaꞌ ka bolaꞌ-bolaꞌ mampohidupaꞌkiꞌI hi Yesu. Kohupaꞌra toaꞌ to woriꞌ, nopowutemo hi Yesu halangkaꞌ lolita pandiri' notiꞌi, 5 “Uwaꞌ haduo topokineteꞌ to nolou mohawori. I tempona mohawori, uwaꞌ howoria to monawuꞌ i lala. Howoria tiꞌo nodihaꞌ-dihaꞌ toaꞌ hei nobingku tinti wute uko. 6 Uwaꞌ woꞌo howoria to monawuꞌ i woiꞌ to mowatu-watu. Howoria tiꞌo tuwuꞌ, angkana kaliuꞌ molau alaꞌ bani woiꞌne. 7 Uwaꞌ woꞌo howoria to monawuꞌ i lali rui. Howoria tiꞌo tuwuꞌ moꞌawa hante rui. Angkana noputuꞌ rui wute mahi. 8 Uwaꞌ woꞌo howoria to monawuꞌ i woiꞌ to molompoꞌ. Howoria tiꞌo moromiꞌ kotuwuꞌne wute mowuaꞌ, hanatu mpiha pewaline ka howoriana.”
Uko mampowute pandiri' tiꞌo, notiꞌi hi Yesu, “Moromiꞌ mpololeke ane ipoꞌilalikei hapo to ihorimokei!”
Hi Yesu mampokononto palaihana pandiri' topokineteꞌ
9 Uko tiꞌo topeguruna meꞌitano pe hi Yesu, hapo palaihana pandiri' tiꞌo. 10 Mehoniꞌ hi Yesu, “Hampiha, tewuni tene pepoturuꞌ noniuꞌ i poparentana Pueꞌ Ala. Hinewowoꞌena nopaꞌanimokei Pueꞌ Ala pekiri hingkeꞌna ibahaꞌkei palaihane pepoturuꞌ tiꞌo. Angkana i toaꞌ to woriꞌ, Kupoturuꞌhi hante pandiri', hingkeꞌna palaihana niwunikihi.
‘Kehapoꞌi roꞌokiꞌmo, angkana hawaꞌi robahaꞌ palaihane hapo to roꞌokiꞌ.
Kehapoꞌi rohori, angkana hawaꞌi robahaꞌ palaihana hapo to rohori.’
11 Hieꞌemo palaihane lolita pandiriꞌKu hingkonia, howoria to nihawori tiꞌo, palaihana Pohawaꞌna Pueꞌ Ala. 12 Uwaꞌhi toaꞌ to nipandiriꞌ hibali howoria to monawuꞌ i lala. Hawaꞌna Pueꞌ Ala ropehoromua mpuꞌu, angkana Belisiꞌ mampowuli lalira, horiana hawaꞌhi mepoꞌohi hei hawaꞌhi niposalamaꞌ. 13 Uwaꞌhi woꞌo toaꞌ to nipandiriꞌ hibali woiꞌ to mowatu-watu. Kopohorira pohawaꞌna Pueꞌ Ala, tuꞌu-tuꞌu motanaꞌ lalire. Mepoꞌohimohi, angkana pepoꞌohira tiꞌo hawaꞌi maroho, hibali huꞌa-huꞌa to hawaꞌi mowakaꞌ. Iomo hinaꞌ ane pahuahi komapori', himaꞌmohi mepoꞌohi. 14 Uwaꞌhi woꞌo toaꞌ to nipandiriꞌ hibali woiꞌ to nokotuwuꞌi rui. Iohi mampehoromua pohawaꞌna Pueꞌ Ala, angkana koꞌukoana bata-bataluhi hei kosugiꞌa duniaꞌ mohopiꞌ kotuwuꞌra horiana hawaꞌhi mowuaꞌ moromiꞌ. 15 Uwaꞌhi woꞌo toaꞌ to nipandiriꞌ hibali woiꞌ to molompoꞌ. Korohorinalu Pohawaꞌne Pueꞌ liu-liu rotorimo hei ropoꞌilali mpuꞌu. Wute mowuaꞌ i lali kotuwuꞌra.”
Pandiriꞌ noniuꞌ i palita
16 Hi Yesu mampololiu lolitaNa Notiꞌi, “Hawaꞌi uwaꞌ haduo toaꞌ to motutu palita honiꞌi notutuꞌi ba noporia i luaꞌna koi. Huluꞌ bateꞌna roporia i womboꞌ hingkeꞌna wantana roꞌokiꞌ lekiꞌ-lekiꞌna toaꞌ to mekahi pe tambi. 17 Hatoꞌo woꞌo, lekiꞌ-lekiꞌna pepoturuꞌKu to tewuni tene, bateꞌna hingkiꞌ mombaha. Hei lekiꞌ-lekiꞌna lolitangKu to tewuni bateꞌna hingkiꞌ tongawa.
18 Iomo hinaꞌ Kutiꞌikikei, nipehoromua moromiꞌ-romiꞌ pohawaꞌne Pueꞌ Ala. Toaꞌ to mangkodokoꞌi pobahaꞌ peleihana Pueꞌ Ala, hingkiꞌ tetambai pebahaꞌre wute robahaꞌ mpololeke. Angkana toaꞌ to hawaꞌhi mangkodokoꞌi pobahaꞌ peleihana Pueꞌ Ala, kehapoꞌi robahaꞌmo hangkiuꞌ, bateꞌna hawaꞌi modumbuꞌ alaꞌ hingkiꞌ niroa huliꞌ.”
Inoꞌna hi Yesu hante halaliNahi
19 I tempo tiꞌo, inoꞌna hi Yesu hante halalina hupaꞌhi, alaꞌ dokoꞌhi mampohidupaꞌki hi Yesu, angkana hawaꞌhi hohumbo mangkododungkuiꞌI nokomi koworiꞌna toaꞌ to uwaꞌ itoꞌo. 20 Uwaꞌ haduo toaꞌ to mololita pe hi Yesu notiꞌi, “Guru, inoꞌMu hante halaliMu, uwaꞌhi i huwali dokoꞌhi hidupaꞌ hante Ingko.”
21 Angkana notiꞌi hi Yesu, “Himolu to mampehoromua hante mowali pohawaꞌna Pueꞌ Ala, iohi halalingKa hante inoꞌKu.”
Hi Yesu mampopeꞌohaꞌ parowo to makaja
22 I haꞌandona hi Yesu hante topeguruNa mehendeꞌhi i duanga. Notiꞌikihi Yesu, “Noloumoki pe tinaꞌ hanupe rano.” Katoꞌo noloumohi mpuꞌu. 23 I lali duangara tiꞌo hi Yesu leꞌo. Hampale hupaꞌ parowo to makaja i rano morumpahi. Duangara norumpa ropoꞌ, koꞌukoana hingkiꞌ nobuhoꞌi uwai, hei hingkiꞌ mentoriꞌ. 24 TopeguruNa moluke hi Yesu rotiꞌi, “Guru! Guru! Sulungika. Hingkiꞌ horewuꞌki!”
Meꞌaromo hi Yesu, mokamoroki parowo hante balumba, katoꞌo meꞌohamo mpuꞌu parowo tiꞌo, hante hangkaꞌ-hangkaꞌ rano tiꞌo lolebaꞌ. 25 Katoꞌo, notiꞌi hi Yesu pe topeguruna, “Mahamporeꞌi hinaꞌ hawaꞌAkei ipoꞌohi?”
Lekiꞌ-lekiꞌna topeguruNa lomeniahi hei motehuꞌhi. Mololitahi, rotiꞌi haduo hei haduo, “Makuasaꞌ mpuꞌu toaꞌ hieꞌe! hingkoweꞌ parowo hante balumba motuntuni hawaꞌNa!”
Hi Yesu mampokoꞌoriꞌ haduo toGerasa
26 Katoꞌo mampololiumohi peduangara wute i woiꞌ Gerasa to uwaꞌ i tinaꞌ hanupena rano Galilea. 27-29 I woiꞌ Gerasa tiꞌo, uwaꞌ haduo toaꞌ to nopekahii lomoa to woriꞌ. Toaꞌ tiꞌo moruemo hawaꞌi nolei mebaduꞌ, hei hawaꞌi hiniꞌ meꞌohaꞌ i tambi, noleilu meꞌohaꞌ i woloꞌ watu petowua. Woriꞌ mpiha nopekahii lomoa kehapoꞌi nihiluꞌ hante rante hei nipodaꞌ, angkana rante tiꞌo bateꞌnalu nopudiꞌ-pudiꞌ, hei io mesilai nolou pe popada woꞌoni, alaꞌ nokomi kuasaꞌna lomoa to mampekahiꞌi.
Pengkohounalu hi Yesu ka duanga pe lerina, humeimo toaꞌ to nopekahii lomoa tiꞌo mampohidupaꞌkiꞌI. Konoꞌokiꞌnalu hi Yesu, mololitamo hei melingkotuꞌ i hinarona. Hi Yesu morumbaꞌhi lomoa tiꞌo hingkeꞌna mesuwuhi, angkana toaꞌ tiꞌo moloaꞌ, “Yesu anaꞌna Pueꞌ Ala to i tanti! Hingkiꞌ Ipohampoꞌa? Kuperapiꞌ hingkeꞌna anioꞌa wokae ipoperima-rima!”
30 Meꞌitano hi Yesu pe toaꞌ tiꞌo, “Himo konaꞌma?”
Mehoniꞌ, Legio. Legio palaihana “Sabuna”, alaꞌ woriꞌ mpololeke tokodake to mekahi. 31 Tokodake tiꞌo roperapiꞌ mpuꞌu pe hi Yesu hingkeꞌna inioꞌhi nipopesuwu nolou pe konihukuara tokodake.
32 Hawaꞌi moꞌela katoꞌo, uwaꞌhi boeꞌ harombonga kolentuꞌara mahuge i papina to mebobobiri. Roperapiꞌ lomoa tiꞌo hingkeꞌna norumbaꞌhi hi Yesu mekahi pe boeꞌ tiꞌo. Nopoꞌioꞌ hi Yesu perapiꞌre tiꞌo. 33 Katoꞌo mesuwumohi lomoa ka toaꞌ tiꞌo, hei liu-liuhi mekahi pe boeꞌ. Pekahira pe boeꞌ, mehilaimohi boeꞌ tiꞌo hei monawuꞌhi i tua liu pe lali rano, hei mahihi podu.
34 Koroꞌokiꞌna toaꞌ to mampoꞌodaꞌ boeꞌ hapo to mewali tiꞌo, mehilaimohi nolou pe bolaꞌ-bolaꞌ to dodungku mampowute hapo to pewali. 35 Uko tiꞌo tumpu bolaꞌ humeimohi pe hi Yesu dokoꞌhi pangkiꞌ hapo to mewali. Kohupaꞌra pe hi Yesu, pangkiꞌhi toaꞌ to nopekahii tokodake hingkonia, mahura dodungku i kapuꞌna hi Yesu mebaduꞌ hei pekirina monontomo. Iomo hinaꞌ motehuꞌhi. 36 Toaꞌ to pangkiꞌ hapo to nowali hi Yesu hingkonia ropololita pe awara hohumbo toaꞌ to nopekahii tokodake tiꞌo nopokoꞌoriꞌ hi Yesu 37 Iomo hinaꞌ lekiꞌ-lekiꞌna toaꞌ to i woiꞌ Gerasa merapiꞌ pe hi Yesu hingkeꞌna molai ka woiꞌra alaꞌ motehuꞌhi mpololeke. Katoꞌo mehendeꞌmo hi Yesu pe duanga moꞌawa hante topeguruNa hingkeꞌna molaihi mahuliꞌ.
38 Kolentuꞌana hi Yesu mehendeꞌ i duanga, toaꞌ to nopekahii lomoa hingkonia merapiꞌ hingkeꞌna metuntu pe Io. Angkana hawaꞌi nopoliu hi Yesu notiꞌi, 39 “Mahuliꞌmoko nolou pe tambimu hei ipololitakihi toaꞌ to habobolaꞌmu hapo to nowali Pueꞌ Ala pe ingko.” Noloumo mpuꞌu pe bolaꞌna mampowute hapo to nowali hi Yesu pe io.
Hi Yesu mampotuwuꞌ huliꞌ anaꞌna hi Yairu,
40 Ipahuliꞌna hi Yesu ka hanupe rano, motanaꞌmohi toaꞌ to woriꞌ mampohidupaꞌki, alaꞌ moruemo ropekau. 41 Hupaꞌmo woꞌo haduo tadulako tambi penombaha i bolaꞌ tiꞌo, konaꞌna hi Yairu. Konoꞌokiꞌnalu hi Yesu, melingkotuꞌmo i hinarona merapiꞌ hingkeꞌna hi Yesu nolou pe tambina, 42 alaꞌ anaꞌna towoweꞌe to hadoduona mohakiꞌ hei hingkiꞌ mahi. Umuruꞌna anaꞌna tiꞌo hampuluꞌ rontoꞌa.
Noloumo hi Yesu pe tambina hi Yairu, hei i lumbu lala woriꞌ toaꞌ momebihiꞌ-bihiꞌ motuntuniꞌI. 43 I lumbuna toaꞌ to woriꞌ tiꞌo, uwaꞌ haduo towoweꞌe, hampuluꞌ merontoꞌamo meraꞌa, hawaꞌi meꞌohaꞌ-ohaꞌ. Haꞌumbora mpihamo nipokuliꞌi, hawaꞌi uwaꞌ komoꞌoriꞌana. 44 Noloumo towoweꞌe tiꞌo mokododungkui hi Yesu ka tunduna hei noruntui doe jubaNa. Konoruntuinalu hampale moꞌoriꞌ hakiꞌne tiꞌo. 45 Meꞌitano hi Yesu, “Himo to moruntuiꞌA?”
Hawaꞌi uwaꞌ toaꞌ to mangakuꞌ, katoꞌo notiꞌi hi Peturuꞌ, “Guru, woriꞌ mpololeke toaꞌ to motuleliꞌiki, momebihiꞌ-bihiꞌmohi.”
46 Notiꞌi hi Yesu, “Bateꞌna uwaꞌ to moruntuiꞌA, alaꞌ Kubahaꞌ uwaꞌ kuasaꞌ to mesuwu ka wotangKu.” 47 Nobahaꞌmo towoweꞌe tiꞌo, konobahaꞌna hi Yesu waliana. Katoꞌo io mororidiꞌ nokomi komotehuꞌna, tolou melingkotuꞌ pe hinarona hi Yesu. Honiꞌi nopololitamo i hinarora toaꞌ to woriꞌ, tungkaihane morama baduꞌna hi Yesu hei komoꞌoriꞌnamo ka hakiꞌna. 48 Hi Yesu mololita pe towoweꞌe tiꞌo notiꞌi, “AnaꞌKu, moꞌoriꞌmoko alaꞌ mepoꞌohiko pe Aku. Mahuliꞌmoko i lali romiꞌ ngkotuwuꞌ.”
49 Kolentuꞌana tene hi Yesu mololita, hupaꞌ haduo suro ka tambina hi Yairu, notiꞌi pe hi Yairu, “Mahimo anaꞌma. Hampoliꞌmoko mampomasusa Guru.”
50 Konohorinalu hi Yesu lolitana tiꞌo, nopetiꞌiki pe hi Yairu, “Anioꞌko motehuꞌ! Ane mepoꞌohiko, anaꞌmu hingkiꞌ niposalamaꞌ.”
51 Kohupaꞌra i tambina hi Yairu, toaꞌ to woriꞌ hawaꞌhi nopoliu hi Yesu mekahi pe koturuana anaꞌ tiꞌo, sangadina hi Peturuꞌ, hi Yohanes, hi Yakobus hante inoꞌna hei umoꞌna anaꞌ tiꞌo to wadi mekahi. 52 Lekiꞌ-lekiꞌna toaꞌ to morampu itoꞌo mampeꞌolonihi anaꞌ to mahi tiꞌo. Angkana notiꞌi hi Yesu, “Hampoliꞌmokei meꞌola, anaꞌ hieꞌe hawaꞌi mahi angkana leꞌolu.”
53 Korohorina lolitaNe, rokokereiꞌIlu, alaꞌ robahaꞌ anaꞌ tiꞌo mahimo. 54 Uko tiꞌo, hi Yesu motikomo korawena anaꞌ tiꞌo hei notiꞌi, “AnaꞌKu meꞌaromoko!” 55 Anaꞌ tiꞌo meꞌinohaꞌmo huliꞌ, hei kaliuꞌ meꞌaro. Uko tiꞌo hi Yesu mampatiꞌikihi hingkeꞌna anaꞌ tiꞌo ropaꞌani mangka. 56 Lemeniahi mpololeke toduluna anaꞌ tiꞌo. Angkana noꞌopihi hi Yesu, hingkeꞌna anioꞌ ropololitaꞌi pe hihimolu hapo to pewali tiꞌo.