Pandiriꞌ noniuꞌ woiꞌ to nipohaworii haworia
4
1 Hampiha tempo, hi Yesu mepoturuꞌ womo i bota rano Galilea. Woriꞌhi mpololeke toaꞌ to nolou pe hi Yesu, alana momekawio-wiomohi, horiana Io mehendeꞌ duanga to i womboꞌ uwai, hei mahura itoꞌo, hei toaꞌ to woriꞌ metotiꞌihi i lorina. 2 Woriꞌ langkaꞌ to Nopoturuꞌkihi moliu i pandiri', Notiꞌi, 3 “Ipehoromuakei! Uwaꞌ haduo topokineteꞌ to nolou mohawori haworia i kineteꞌna. 4 I tempona mohawori, uwaꞌ haworia to monawuꞌ i lala. Dongkaꞌhi tinti, mabingku wute uko. 5 Uwaꞌ woꞌo howoria to monawuꞌ i woiꞌ to manonipaꞌ alaꞌ mowatuꞌi i luaꞌne. Howoria tiꞌo hantouꞌ kotuwuꞌne, alaꞌ manonipaꞌi woiꞌne. 6 Angkana ikonowantanalu ando, molau wute bani, alaꞌ hawaꞌi kuladu wakaꞌne. 7 Uwaꞌ woꞌo howoria to monawuꞌ i lali rui. Howoria tiꞌo tuwuꞌ moꞌawa hante rui, koꞌukoana noputuꞌ rui wute mahi, io horiana hawaꞌi mowuaꞌ. 8 Uwaꞌ woꞌo haworia to monawuꞌ i woiꞌ to molompoꞌ. Moromiꞌ kotuwuꞌne haworia tiꞌo. Kokodeꞌ-kodeꞌa wute mowuaꞌ. Uwaꞌ to tolu mpuluꞌ mpiha koworiꞌne ka howoriana, uwaꞌ to oni mpuluꞌ mpiha, uwaꞌ woꞌo to hanatu mpiha ka howoriana.” 9 Uko mampowute pandiri' tiꞌo, Notiꞌikimohi, “Moromiꞌ mpololeke ane ipoꞌilalikei hapo to ihorimokei!”Tungkaihana hi Yesu mopakeꞌ pandiri'
10 Uko tiꞌo, tempona hi Yesu hadoduona, toloumohi topeguruNe to hampuluꞌ meroduo hante topetuntuNa to ntaniꞌna ako meꞌitano pe Io, rotiꞌi, “Hapo palaihana pandiri' to Ipowute hingkonia?”
11 Notiꞌi hi Yesu, “Hampiha, tewuni tene poturuꞌ noniuꞌ i poparentana Pueꞌ Ala. Hinewowoꞌena nopaꞌanimokei Pueꞌ Ala pekiri hingkeꞌna ibahaꞌkei palaihane poturuꞌ tiꞌo. Angkana ane toaꞌ to hawaꞌi metuntu Aku, Kupoturuꞌhi moliu pandiri', 12 hingkeꞌna tebuhoꞌi to teꞌukiꞌ i lali Suraꞌ Mangkolehi to mantiꞌi waheꞌe:
‘Roꞌokiꞌlu, angkana hawaꞌi robahaꞌ palaihane hapo to roꞌokiꞌ.
Rohorilu, angkana hawaꞌi robahaꞌ tungkaihane hapo to rohori,
hingkeꞌna hawaꞌhi mahuliꞌ pe Pueꞌ Ala,
hei dosara teꞌampuni.’ ” \rq (Yes. 6:9-10)
Hi Yesu mampokonontokihi palaihana pandiri' noniuꞌ i iba langkaꞌ woiꞌ
13 Uko tiꞌo, hi Yesu mampatiꞌikihi, “Ane hawaꞌkei ibahaꞌ palaihane pandiri' to hingkenia, hohumbo koꞌibahaꞌnekei palaihane pandiri' to ntaniꞌna? 14 Topohawori tiꞌo, iomo to mampowute Pohawaꞌna Pueꞌ Ala. 15 Uwaꞌhi toaꞌ to nipandiriꞌ hibali woiꞌ to nipolalai. Rohorilu pohawaꞌne Pueꞌ Ala, angkana Belisiꞌ mampowuli lalira, koꞌukoana hamboaꞌmohi mampoꞌilali pohawaꞌna Pueꞌ Ala to rohorimo tiꞌo.
16 Uwaꞌhi woꞌo toaꞌ to nipandiriꞌ hibali woiꞌ to mowatu. Uluꞌra pahori pohawaꞌna Pueꞌ Ala, kaliuꞌ ropotanaꞌ. 17 Angkana pepoꞌohira hampaiꞌlu alaꞌ hawaꞌi maroho poꞌuwakaꞌne pohawaꞌna Pueꞌ Ala i lalira, iomo horiana hawaꞌhi mantaha. Ane nipoperima-rimahi ba nipomaporiꞌhi nokomi pepoꞌohira i pohawaꞌna Pueꞌ, tewolihi lalire, hei hamboaꞌmohi mepoꞌohi.
18 Uwaꞌhi woꞌo toaꞌ to nipandiriꞌ hibali woiꞌ to nokotuwuꞌi rui. Ropehoromua pohawaꞌne Pueꞌ hei robahaꞌ palaihane, 19 angkana mampekiriluhi nturusi kotuwuꞌra i duniaꞌ hieꞌe, mangkodokoꞌiluhi morampu luma ngkoduniaꞌ, hei woriꞌ langkaꞌ peleihare to kodake. Koꞌukoana alaꞌ lekiꞌna tiꞌo, pohawaꞌna Pueꞌ hawaꞌi lebaꞌ i lalira horiana hamboaꞌmo modumbuꞌ i lali kotuwuꞌra.
20 Uwaꞌhi woꞌo toaꞌ to nipandiriꞌ hibali woiꞌ to molompoꞌ. Kopahorira pohawaꞌna Pueꞌ Ala, rotorimo, ropoꞌilali mpololeke hei ropetuntui, horiana pohawaꞌna Pueꞌ Ala tiꞌo mowuaꞌ i lali kotuwuꞌra. Uwaꞌ to tolu mpuluꞌ mpiha koworiꞌne ka howoriana, uwaꞌ to oni mpuluꞌ mpiha, uwaꞌ woꞌo to hanatu mpiha koworiꞌne ka howoriana.”
Pandiriꞌ noniuꞌ i palita to nihobiꞌi
21 Mololita womo hi Yesu pe toaꞌ to woriꞌ, Notiꞌi, “Ba uwaꞌ toaꞌ to motutu palita i lali tambi honiꞌi nohobiꞌi kiri ba noporia i luaꞌ koi? Bateꞌna hawaꞌi uwaꞌ. Palita bateꞌna nibunta i womboꞌ, hingkeꞌna mowantai lekiꞌna ohi tambi. 22 Hatoꞌo woꞌo lekiꞌ-lekiꞌna pepoturuꞌKu to tewuni tene, bateꞌna hingkiꞌ mombaha. Hei lekiꞌ-lekiꞌna lolitangKu to tewuni bateꞌna hingkiꞌ tongawa. 23 Moromiꞌ mpololeke ane ingkei mampoꞌilali hapo to ihorikei.”
24 Notiꞌi womo hi Yesu, “Ipoꞌilalikei hapo to ihorimokei hieꞌe, alaꞌ ane ikodokoꞌikei pahori hante mampetuntui pohawaꞌKu, pedeꞌ woriꞌ to hingkiꞌ nopokonontokikei Pueꞌ Ala. 25 Toaꞌ to mangkodokoꞌi pobahaꞌ peleihana Pueꞌ Ala, hingkiꞌ tetambai pebahaꞌre wute robahaꞌ mpololeke. Angkana toaꞌ to hawaꞌhi mangkodokoꞌi pobahaꞌ peleihana Pueꞌ Ala, kehapoꞌi robahaꞌmo hangkiuꞌ, bateꞌna hawaꞌi modumbuꞌ alaꞌ hingkiꞌ niroa huliꞌ.”
Poparentana Pueꞌ Ala nipandiriꞌ hibali kotuwuꞌna haworia
26 Notiꞌi hi Yesu, “Ane Pueꞌ Ala moparenta i lalira toaꞌ, pewalina hibali pandiri' hieꞌe: Haduo toaꞌ mantudaꞌ kina i kineteꞌna. 27 Moromiꞌ wini ba ando, moromiꞌ i tempona turu ba i tempona meꞌaro, haworia tiꞌo tuwuꞌ nturusi wute kodeꞌ. Angkana hawaꞌi nobahaꞌ tumpu kineteꞌ hohumbo horiana haworia tiꞌo tuwuꞌ wute kodeꞌ. 28 Uluꞌ-uluꞌna woiꞌ tiꞌo mampopehupaꞌ taweꞌna, honiꞌi karuna. Uko katoꞌo, mowuaꞌmo, wute moꞌohi. 29 Ane mangkemoꞌi, tumpuna hingkiꞌ nolou mampekina kina tiꞌo, alaꞌ temponamoꞌi.”
Poparentana Pueꞌ Ala nipandiriꞌ hibali howoria sesawi to mororoi mpololeke
30 Notiꞌi hi Yesu, “Ane poparentana Pueꞌ Ala hupaꞌ i duniaꞌ, hohumbo pewaline? Poparentana Pueꞌ Ala wadi nipandiriꞌ hibali howoria sesawi to mororoi mpololeke. 31 Uwaꞌ to mohawori howoria tiꞌo i bota kineteꞌna. Howoria tiꞌo mororoi mpololeke, makaja komororoine ka lekiꞌ-lekiꞌna howoria to uwaꞌ i duniaꞌ. 32 Angkana ane nihaworiꞌi hingkiꞌ tuwuꞌ hei dingkaoꞌ ka loti ntaniꞌna. Tuwuꞌ mewali loti to mapongko, hei daꞌana nopehorai tinti.”
33 Hei woriꞌ tene pandiri' to nopakeꞌ hi Yesu mampowute pohawaꞌna Pueꞌ Ala i toaꞌ to woriꞌ. Nopaturuꞌhi motuntuni pebiaꞌna pebahaꞌra. 34 Hi Yesu poko mopakeꞌ pandiri' ane Nopoturuꞌhi. Angkana ane Io romo hante topeguruNahi, honiꞌi Nopokonontokihi lekiꞌ-lekiꞌna palaihane.
Hi Yesu mampopeꞌohaꞌ parowo to makaja
35 I ando tiꞌo woꞌo, kononewana, Notiꞌi hi Yesu pe topeguruNa, “Humeimokei, nolouki pe hanupe rano.” 36 Katoꞌo mehendeꞌmohi mpuꞌu pe duanga, honiꞌhi molai mampolihi toaꞌ to woriꞌ to i bota rano. Hei uwaꞌ woꞌo duanga to ntaniꞌnahi to metuntu i iohi.
37 Hawaꞌi morue katoꞌo, mampohidupaꞌkihi parowo to makaja. Duangara noripoꞌ balumba to kodeꞌ, wute duanga tiꞌo hingkiꞌ nobuhoꞌi uwai. 38 I tempo tiꞌo, hi Yesu leꞌo i pahohura to tinaꞌ i doena duanga, hei mopakeꞌ oluna to uwaꞌ itoꞌo. Topegurunahi tiꞌo moluke hi Yesu, rotiꞌi, “Guru! Mahamporeꞌi hinaꞌ hawaꞌKo tepe? Hingkiꞌ horewuꞌki!”
39 Katoꞌo hi Yesu meꞌaro, kaliuꞌ mokamoroki parowo hante balumba, Notiꞌi, “Peꞌohaꞌ parowo! Lebaꞌmoko balumba!” Meꞌohaꞌmo mpuꞌu parowo, hei rano tiꞌo kaliuꞌ lebaꞌ huliꞌ. 40 Uko tiꞌo, Io mantiꞌi pe topeguruNa, “Mahamporeꞌi hinaꞌ morokaꞌkei? Mahamporeꞌi hinaꞌ hawaꞌAkei ipoꞌohi?”
41 Lemeniahi mpololeke topeguruNe, horiana mometenei-teneihi, “Himoreꞌi toaꞌ hieꞌe? Howeꞌ parowo hante balumba motuntuni hawaꞌNa.”