Markus 3

Hi Yesu mampokoꞌoriꞌ toaꞌ i ando penombaha

1 Hampiha tempo, nolou womo hi Yesu mekahi pe lali tambi penombahara toYahudi. Itoꞌo, uwaꞌ haduo toaꞌ to mahi korawene hambali. 2 Uwaꞌhi woꞌo toParisi to mampaliꞌ komasalaꞌana hi Yesu. Iomo horiana rokamata nturusi ba hingkiꞌ majamaꞌI i ando penombaha. 3 Notiꞌi hi Yesu pe toaꞌ to mahi korawena hambali, “Humeiko metotiꞌi i hinaro,” 4 honiꞌi noteneihi hi Yesu, “Motuntuni atura agamanta, hapo to masipatoꞌ towali i ando penombaha: Mowaliki to moromiꞌ ba to kodake? Mosulungiki toaꞌ ba morokoꞌki toaꞌ?” Angkana hawaꞌhi mehoniꞌ, Monondiiꞌluhi. 5 Mewaliꞌ, handondoiha laline hi Yesu alaꞌ lalira morintodi. Nokomi kobukotaNa, Noꞌoꞌelehi mantuleliꞌ honiꞌi mantiꞌi pe toaꞌ to mahi korawena tiꞌo, “Onaꞌi humei korawema!” Konoꞌonaꞌnalu korawene, kaliuꞌ moꞌoriꞌ. 6 Katoꞌo molaimohi toParisi ka tambi penombaha, akohi mororapaꞌ hante toaꞌna datu Herode, ropaliꞌ lala hingkeꞌna hi Yesu nihukuꞌi mahi.

Woriꞌ toaꞌ nopokoꞌoriꞌ hi Yesu

7 Uko katoꞌo, hi Yesu hante topeguruNa molaihi nolou pe bota rano Galilea. Katoꞌo woriꞌhi toGalilea to metuntu pe Io hei woriꞌhi woꞌo toaꞌ to mehupaꞌ ka woiꞌ Yudea, 8 kota Yerusale, ka woiꞌ Idumea, ka hanupe uwai Yarade, hei uwaꞌ woꞌo to ka kota Tiru hante Sido. Woriꞌ mpololeke toaꞌ to nolou pe hi Yesu alaꞌ pahorimohi kareba noniuꞌ i lekiꞌ-lekiꞌna to Nowali. 9-10 Woriꞌ toaꞌ to hawaꞌi polido Nopokoꞌoriꞌ, horiana toaꞌ momekari-karimohi ako mangkododungkui hi Yesu hingkeꞌna motikohi hi Yesu.

Nokomi koworiꞌna toaꞌ, hi Yesu morumbaꞌ topeguruNa mampatimomo duanga Nopehendeꞌi, hingkeꞌna hawaꞌi bihiꞌ i lumbuna toaꞌ to woriꞌ.

11 Itoꞌo woꞌo uwaꞌhi toaꞌ to nopekahii tokodake. Ikopangkiꞌralu hi Yesu, kaliuꞌhi melingkotuꞌ metoungkaꞌ i kapuꞌNa, hei tokodake tiꞌo moloaꞌhi, rotiꞌi, “Ingkomo Anaꞌne Pueꞌ Ala!” 12 Angkana hi Yesu moꞌopihi mpuꞌu, hingkeꞌna inioꞌ ropetiꞌiki kohihimoNa.

Hi Yesu moꞌuwiꞌ hampuluꞌ meroduo suroNa

(Mat. 10:1-4; Luk. 6:12-16)

13 Uko tiꞌo, hi Yesu nolou pe peꞌohaꞌa to uwaꞌ i biri, hei mowowoi toaꞌ to hintotoꞌ hante peleihaNa, katoꞌo hupaꞌmohi mpuꞌu pe Io. 14 Kowuteralu itoꞌo, Io moꞌuwiꞌ hampuluꞌ meroduo toaꞌ ka lumbura to mewali suroNa, hei Notiꞌikihi, “Kuꞌuwiꞌkei hingkeꞌna ipoꞌowoniꞌAkei. Hingkiꞌ Kurumbaꞌkei nolou mampowute Kareba Moromiꞌ, 15 hei hingkiꞌ Kupaꞌanikei kuasaꞌ mampopesuwu lomoa.” 16-19 Hieꞌemo konaꞌre to hampuluꞌ meroduo tiꞌo:

Hi Simo to nokokeneꞌi hi Yesu hi Peturuꞌ;

hi Yakobus, anaꞌna hi Sebedeus,

hi Yohanes, hineeꞌna hi Yakobus (hi Yesu mokokoneꞌihi Boanege, palaihana: anaꞌ boluntuꞌ)^a

hi Andaria,

hi Pilipu,

hi Batolomeu,

hi Matius,

hi Toma,

hi Yakobus anaꞌna hi Alpeu,

hi Tadeu,

hi Simo toSeloꞌ,

hei hi Yudas Iskarioꞌ to mampobaluꞌ hi Yesu.

Hi Yesu hante Belsebul

(Mat. 12:22-32; Luk. 11:14-23)

20 Koꞌukona hi Yesu moꞌuwiꞌ suroNa, Io mahuliꞌ nolou pe tambi, hei woriꞌhi toaꞌ to mehupaꞌ morampu, koꞌukoana hi Yesu hante suroNa hamboaꞌmohi hampakaꞌ mangka. 21 Uwaꞌhi toaꞌ to mantiꞌi, “Io hamboaꞌmo mononto!” Iomo horiana halaliNa nolouhi moroa hi Yesu. 22 Uwaꞌhi woꞌo guru agama toYahudi to hupaꞌ ka kota Yerusale, mantiꞌi “Io nopekahii Belsebul, datuna lekiꞌ-lekiꞌna lomoa hei hante kuasaꞌna Belsebul tiꞌo to Nopake mapopolai lomoa.”

23 Iomo horiana nowowoihi hi Yesu hei Nopololitakihi haꞌumbora langkaꞌ pandiri'. Notiꞌi, “Wadireꞌi lomoa mampopesuwu hangko lomoana? 24 Rapaꞌna, ane uwaꞌi haduo datu, hei toaꞌna mosisalaꞌhi nturusi, kodatua tiꞌo hingkiꞌ mokero. 25 Ane tohantino mosisalaꞌ nturusi, potino tiꞌo hingkiꞌ mokero. 26 Hatoꞌo woꞌo i kodatua Belisiꞌ. Ane lomoa moꞌewa hangko lomoana, koꞌukoana kodatua Belisiꞌ mokero.

27 Belisiꞌ wadi nipandiriꞌ hibali haduo toaꞌ to maroho. Ane haduo toaꞌ to mekahi pe lali tambina toaꞌ to maroho hei mangkodokoꞌi manako ohi tambina, hangangaa nohiluꞌ duluna tumpu tambi tiꞌo, honiꞌi hohumbo noroa lumane. Hatoꞌo woꞌo Aku, ane mampopolaiꞌa tokodake, palaihana, Kunanimo Belisiꞌ.

28 Pehoromuakei moromiꞌ: lekiꞌ-lekiꞌna dosa hante lolita pesapuaka wadi niꞌampuni, 29 angkana himo to mosapuaka Inohaꞌ Mangkolehi, hawaꞌi niꞌampuni.” 30 Hi Yesu mantiꞌi hatoꞌo alaꞌ uwaꞌ to mantiꞌi Io nopekahii tokodake.

Hi Yesu hante halalina

(Mat. 12:46-50; Luk. 18:19-21)

31 Katoꞌo, hupaꞌmohi inoꞌNe hante halalina hi Yesu, angkana metotiꞌiluhi i howali tambi, hei morumbaꞌhi toaꞌ ako mowowoi hi Yesu. 32 I tempo tiꞌo, woriꞌ toaꞌ to mahura motuleliꞌi hi Yesu. Rotiꞌiki, “Guru, inoꞌMu hante halaliMu uwaꞌhi i howali, humeiKo ropaliꞌ.”

33 Nopeꞌitanoki hi Yesu, “Himo inoꞌKa hante halalingKu?” 34 Katoꞌo Io meꞌoꞌele pe toaꞌ to motuleliꞌI, hei mantiꞌi, “Ingkeimola inoꞌKa hante halalingKu. 35 Himolu to mowali peleihana Pueꞌ Ala, iomohila inoꞌKa hante halalingKu.”