Hi Yesu mampokoꞌoriꞌ haduo tokohu
2
1 Haꞌumbora ando uko tiꞌo, hi Yesu mahuliꞌ womo nolou pe bolaꞌ Kapenau. Tekarebamo koꞌuwaꞌne hi Yesu i lali tambi. 2 Iomo horiana woriꞌ toaꞌ to mehupaꞌ, hei buhaꞌhi i lali tambi tiꞌo. Howeꞌ wambaꞌ tambi tiꞌo buhaꞌ woꞌo toaꞌ. Tempo tiꞌo, hi Yesu mampowutekihi pohawaꞌna Pueꞌ Ala. 3 KolentuꞌaNa mololita, hupaꞌhi haꞌumbora duo toaꞌ mangkomi tokohu. Tokohu tiꞌo nokowaꞌ iba duo toaꞌ. 4 Angkana hawaꞌi uwaꞌ lalare nolou mangkododungkui hi Yesu, alaꞌ tambi tiꞌo buhaꞌ mpololeke hante toaꞌ. Iomo horiana ropeponeꞌki nolou pe dopiꞌ tambi, hei rohungkaꞌ dopiꞌne to uwaꞌ hipononto hi Yesu, honiꞌi roꞌulu tokohu tiꞌo hante koturuana. 5 IkoNoꞌokiꞌnalu hapo to rowali, nobahaꞌmo hi Yesu komarohone pepoꞌohira, Notiꞌi pe tokohu tiꞌo, “AnaꞌKu, teꞌampunimo dosama.”6 Uwaꞌhi woꞌo haꞌumbora duo guru agama toYahudi to mahura i lali tambi tiꞌo. Rotiꞌi i lalira, 7 “Podehoꞌ mpololeke toaꞌ hieꞌe mampononaꞌa Pueꞌ Ala! Io mampariwoiꞌ Pueꞌ Ala. Hawaꞌi uwaꞌ haduo toaꞌ to wadi moꞌampuni dosa, bateꞌnalu Pueꞌ Ala.”
8 Angkana i tempo tiꞌo kaliuꞌ nobahaꞌ hi Yesu hapo to uwaꞌ i lalira, iomo horiana Notiꞌikihi, “Mahamporeꞌi hinaꞌ hatoꞌo pampekirimi? 9 Imboꞌina to mololihaꞌ, nitiꞌi, ‘Teꞌampunimo dosama,’ ba ‘peꞌaro, ilulumo aliꞌma, hei matengkaꞌmoko’? 10 Angkana hinewowoꞌena hingkiꞌ Kupotongawakikei koꞌuwaꞌne kuasaꞌna Anaꞌ Manusiaꞌ moꞌampuni dosa i duniaꞌ.” 11 Katoꞌo Notiꞌi pe tokohu tiꞌo, “Meꞌaromoko! Ilulumo aliꞌma, honiꞌi mahuliꞌmoko!”
12 Meꞌaromo mpuꞌu tokohu tiꞌo, kaliuꞌ molulu aliꞌna, hei matengkaꞌ pe howali moliu i hinarona toaꞌ to woriꞌ. Koroꞌokiꞌnalu toaꞌ to woriꞌ hapo to pewali tiꞌo, ropolomenia hei mampokodeꞌhi Pueꞌ Ala, rotiꞌi, “Handoaꞌi tene kahampiha toꞌokiꞌ to waheꞌe!”
Hi Yesu mowowoi hi Lewi toperuruꞌ sima, mewali topeguruNa
13 Uko tiꞌo, nolou womo hi Yesu hante topeguruNa pe bota rano Galilea. Woriꞌ mpololeke toaꞌ to hupaꞌ pe Io, hei Nopaguruhi. 14 Kolentuꞌana hi Yesu matengkaꞌ, Io pangkiꞌ haduo toaꞌ to nikokeneꞌi hi Lewia anaꞌna hi Alpeu. Hi Lewi tiꞌo mahura i kantoroꞌna, meruruꞌ sima hei nopantiꞌiki hi Yesu, “Metuntumoko pe Aku!” Katoꞌo metotiꞌimo hi Lewi metuntu pe Io.
15 Uko tiꞌo, hi Yesu hante topeguruNa nolouhi pe tambina hi Lewi hei mangkahi moꞌawa-awa. Kolentuꞌara mangka, woriꞌhi toperuruꞌ sima hante toaꞌ ntaniꞌna to nirekeꞌhi toaꞌ to madosa mehupaꞌhi woꞌo hei mangkahi moꞌawa hante hi Yesu, alaꞌ woriꞌhi to metuntu pe Io. 16 Uwaꞌhi itoꞌo haꞌumbora duo guru agama Yahudi to motuntuni poturuꞌra toParisi. Koroꞌokiꞌnalu guru agama tiꞌo hi Yesu mangka moꞌawa hante toperuruꞌ sima hei toaꞌ to nirekeꞌhi madosa, meꞌitanohi pe topeguruNa rotiꞌi, “Mahamporeꞌi gurumi hinaꞌ mangka moꞌawa hante toperuruꞌ sima hante toaꞌ to madosa?”
17 Nohori hi Yesu lolitare, iomo horiana Notiꞌikihi, “Toaꞌ to hawaꞌi mohakiꞌ, hawaꞌhi moparaluꞌi sando. Toaꞌ to mahakiꞌlu moparaluꞌi sando. KohumeingKu hieꞌe hawaꞌA mowowoi toaꞌ to morekeꞌmo waliara moromiꞌ, angkana humeiꞌA mowowoi toaꞌ to madosa.”
Noniuꞌ paboki
18 Hampiha tempo, topegurunahi hi Yohanes Toperiu hante toParisi kolentuꞌara maboki, uwaꞌhi toaꞌ to nolou meꞌitano pe hi Yesu, rotiꞌi, “Topegurunahi hi Yohanes Toperiu pokohi maboki. Hatoꞌo woꞌo topegurunahi toParisi. Mewaliꞌ, mahamporeꞌi topeguruMa hinaꞌ hawaꞌhi maboki?”
19 Nohoniꞌhi hi Yesu moliu pandiri' hieꞌe, Notiꞌi, “Ane uwaꞌi tene tomaꞌani to nipohamoko, hapo to rowali tolorine: mosusaꞌhi ba mabokihi? Bateꞌna hawaꞌhi maboki. 20 Angkana hampiha tempo, tomaꞌani to nipohamoko tiꞌo hingkiꞌ niroa ka lumbura. Tempo tiꞌo honiꞌhi wae maboki.”
21 Uko tiꞌo, hi Yesu mampowute womo pandiri', Notiꞌi, “Hawaꞌi uwaꞌ haduo toaꞌ to modampelei baduꞌ to hohai hante wida to wolaꞌ, alaꞌ wida to wolaꞌ tiꞌo hingkiꞌ mengkuruꞌ, mampomohepaꞌ baduꞌ to hohai tiꞌo, koꞌukoana kokorobaa-robaa hepaꞌne. 22 Hatoꞌo woꞌo, hawaꞌi uwaꞌ toaꞌ to mantula anggoroꞌ to wolaꞌ i pebolaꞌanab to hohaimoꞌi. Anggoroꞌ to wolaꞌ bateꞌna hingkiꞌ mampomohepaꞌ pebolaꞌana to hohai hei hibobo angoroꞌne. Mewaliꞌ, anggoroꞌ to wolaꞌ hangangaa nitula i pebolaꞌana to wolaꞌ.”
Topeguruna hi Yesu majama i ando penombaha
23 Hampiha tempo i ando penombahana toYahudi, hi Yesu hante topeguruNa moliuhi i halimboꞌ kineteꞌ. Kolentuꞌara moliu i kineteꞌ tiꞌo, topeguruNa mokoti wuaꞌ gandum hei roꞌoka. 24 ToParisi to uwaꞌ itoꞌo meꞌitanohi pe hi Yesu, rotiꞌi, “Mahamporeꞌi topeguruMa hinaꞌ molungkaꞌihi atura agamanta? Majamahi i ando penombaha, alaꞌ mokotihi wuaꞌ gandum!”
25 Notiꞌi hi Yesu, “Kutiꞌikae kaꞌibasamokei pohawaꞌne Pueꞌ noniuꞌ hapo to nowali datu Daudi hante awanahi hampiha i tempora bilora! 26 I tempona hi Abiata mewali Tadulako Mpenomba ngkodeꞌ, hi Daudi mekahi pe lali Bambaruꞌ Penombahac, katoꞌo mangka roti to nipopenombamo pe Pueꞌ Ala, hei nopepaꞌaniki woꞌo pe topetuntunahi, hantaro to wadi mangka roti tiꞌo iomo tadulako mpenombaluhi.” 27 Uko tiꞌo, notiꞌi womo hi Yesu, “Pueꞌ Ala hawaꞌi mowali ando penomba hingkeꞌna mampomaporiꞌ toaꞌ, angkana Nowali ando penomba hingkeꞌna mosulungi toaꞌ. 28 Mewaliꞌ, Anaꞌ Manusiaꞌ makuasaꞌ mampokononto hapo to hawaꞌi wadi niwali hei hapo to wadi niwali i ando penomba.”