Pandiriꞌ noniuꞌ i haduo topobutusi hei haduo tobembaꞌ
18
1 Uko tiꞌo, hi Yesu mampowute halangkaꞌ lolita pandiri' pe topeguruNahi hingkeꞌna hawaꞌhi luleꞌ mekokae. 2 Notiꞌi Yesu, “I lali haꞌanu bolaꞌ, uwaꞌ haduo topobutusi to hawaꞌi mengkoruꞌ pe Pueꞌ Ala hei hawaꞌi woꞌo moꞌadaꞌi ba hihimolu. 3 I bolaꞌ tiꞌo, uwaꞌ woꞌo haduo towoweꞌe tobembaꞌ to poko mehupaꞌ pe topobutusi, mampowute kara-karana notiꞌi, ‘Sulungiꞌa kaiaꞌ. Ibutusi kara-karangka i komaniuꞌa hante poniꞌku.’4 Haꞌumbora mpiha topobutusi tiꞌo hawaꞌi motulunei tobembaꞌ tiꞌo. Notiꞌi lalina, ‘Kehapoꞌa hawaꞌa mengkoruꞌ pe Pueꞌ Ala hante hawaꞌa moꞌadaꞌi ba hihimolu, 5 agina kupoꞌioꞌmolu perapiꞌne tobembaꞌ hieꞌe hingkeꞌna hawaꞌa poko nopomasusa.’ ”
6 Uko tiꞌo, notiꞌi hi Yesu, “Ipoꞌilalikei hapo to notiꞌi topobutusi tiꞌo. Kehapoꞌi kodake laline, angkana hiniꞌ mosulungi tobembaꞌ to merapiꞌ sulungi pe io. 7 Mewaliꞌ, hapo tene Pueꞌ Ala bateꞌna mosulungi toaꞌNa to poko merapiꞌ rima pe Io ando wini. Ba ipekirikei, hingkiꞌ Nopeꞌoꞌoki duluna, honiꞌki Nosulungi Pueꞌ Ala? 8 Hawaꞌi! Bateꞌna liu Nosulungiki. Angkana ane mehupaꞌi huliꞌ Anaꞌ Manusiaꞌ, ba uwaꞌi tene intu Nohua toaꞌ to mepoꞌohi i lali duniaꞌ hieꞌe?”
Pandiriꞌ noniuꞌ i toParisi hante toperuruꞌ sima
9 Uko tiꞌo hi Yesu mampololita womo noniuꞌ i toaꞌ to mampetoromiꞌ, hei to mopariwoiꞌ toaꞌ ntaniꞌ. 10 Notiꞌi hi Yesu, “Uwaꞌ meroduo toaꞌ to nolou pe Tambina Pueꞌ Ala ako mekokae, haduo toParisi, hei haduo toperuruꞌ sima. 11 ToParisi tiꞌo metotiꞌimo hei mekokae i lalina notiꞌi, ‘Pueꞌ Ala, moꞌawerasiꞌa pe Ingko, alaꞌ hawaꞌa hibali toaꞌ ntaniꞌna to manako, to hawaꞌi mononto lalira, hei to mebualosi. Kutiꞌi awerasiꞌ pe Ingko alaꞌ hawaꞌa hibali toperuruꞌ sima tiꞌo. 12 Mabokiꞌa rompiha i lalina haminggu. Hei ka lekiꞌ-lekiꞌna wuaꞌna pajamangku, kupaꞌanikiKo hadolaꞌa ka to hampuluꞌ ka hapo to kuhua.’
13 Angkana toperuruꞌ sima tiꞌo, metotiꞌi ka moꞌelalu, hei hawaꞌi podehoꞌ menoaꞌ pe laniꞌ. Alaꞌ nobahaꞌ komadosane, io mororari bobariꞌna hei notiꞌi, ‘O Pueꞌ Ala! Ipokarimaꞌa kaiaꞌ, alaꞌ aku hieꞌe toaꞌ to madosaꞌa!’ ” 14 Notiꞌi womo hi Yesu, “Tuꞌu mpololeke to Kutiꞌikikei hieꞌe, toperuruꞌ sima tiꞌo mahuliꞌ hante Notorimomo Pueꞌ Ala hei tepekahimo toaꞌ to mononto i pampeꞌeleNa, angkana toParisi tiꞌo, hawaꞌi Notorimo Pueꞌ Ala. Alaꞌ hihimo to mampokokodeꞌ, hingkiꞌ Nopoꞌiwoiꞌ Pueꞌ Ala. Hei hihimo to mengkaꞌiwowoiꞌ, hingkiꞌ Nopokodeꞌ Pueꞌ Ala.”
Hi Yesu mobarakati oꞌanaꞌ
15 I hampiha tempo, uwaꞌhi toaꞌ to mangkomi anaꞌra pe hi Yesu hingkeꞌna notikohi hei Nobarakatihi. Koroꞌokiꞌnalu topeguruNa hapo to rowali toaꞌ to mehupaꞌ pe hi Yesu, rokamoroki. 16 Angkana oꞌanaꞌ tiꞌohi nowowoi hi Yesu, hei Notiꞌi pe topeguruNahi, “Tedehiluiae oꞌanaꞌ tiꞌo humei pe Aku. Inioꞌ niꞌopihi, alaꞌ hihimo to humei pe Aku hibali oꞌanaꞌ hieꞌe, iomohi to hingkiꞌ mewali toaꞌNa Pueꞌ Ala i lali kodatuaNa. 17 Tuꞌu lolitangKa hieꞌe, ane hawaꞌkei mengkoruꞌ pe Pueꞌ Ala hibali haduo oꞌanaꞌ, hawaꞌkei hingkiꞌ mewali toaꞌNa i lali kodatuaNa.”
Maporiꞌ mpuꞌu tosugiꞌ mekahi pe suruga
18 I hampiha tempo, uwaꞌ haduo tadulakona toYahudi to meꞌitano pe hi Yesu, notiꞌi, “Guru to moromiꞌ, hapo to hangangaa kuwali hingkeꞌna pahuaꞌa kotuwuꞌ to wolaꞌ to hawaꞌi mokoꞌukoa?”
19 Mehoniꞌ hi Yesu, “Mahamporeꞌi hinaꞌ itiꞌi Aku hieꞌe to moromiꞌA? Hawaꞌi uwaꞌ howeꞌ haduo to moromiꞌ, bateꞌnalu Pueꞌ Ala. 20 Ibahaꞌmo pohawaꞌne Pueꞌ to mantiꞌi waheꞌe: inioꞌ mebualosi, inioꞌ merorokoꞌ, inioꞌ manako, inioꞌ mololita wuti, hei niꞌadaꞌi inoꞌ hante umoꞌmi.”
21 Notiꞌi toaꞌ tiꞌo, “Lekiꞌ-lekiꞌna pohawaꞌ tiꞌo, umbiꞌnamo kupetuntui ka kokokiuꞌangku tene.”
22 Konohorinalu hi Yesu lolitane Notiꞌikimo, “Uwaꞌ tene halangkaꞌ to hangangaa iwali. Noloumoko dulu mampobaluꞌ lekiꞌ-lekiꞌna lumamu, hei hilina ipaꞌanikihi toaꞌ to merima-rima tuwuꞌra. Ane iwaliꞌi watoꞌo, hingkiꞌ ihua luma to i suruga. Uko tiꞌo, humeimoko metuntu pe Aku.” 23 Konohorinalu lolitane hi Yesu, masusa mpuꞌu laline alaꞌ sugiꞌi mpololeke.
24 Nobahaꞌ hi Yesu komasusane lalina, iomo hinaꞌ notiꞌi, “Maporiꞌ mpuꞌu toaꞌ tosugiꞌ mewali toaꞌna Pueꞌ Ala i lali kodatuaNa. 25 Mololihaꞌ tene hambaꞌa unta mekahi pe woloꞌ daruꞌ hintina tosugiꞌ mewali toaꞌna Pueꞌ Ala i lali kodatuaNa.”
26 Lekiꞌ-lekiꞌna toaꞌ to pahori lolitana hi Yesu lemeniahi, iomo hinaꞌ meꞌitanohi pe hi Yesu rotiꞌi, “Ane watoꞌoꞌi toaꞌ to hohumbo romo to pahua kosalamaꞌa?”
27 Mehoniꞌ hi Yesu, “Manusiaꞌ hawaꞌi nobiaꞌ mamposalamaꞌ wotana hadoduona. Ukonalu Pueꞌ Ala to nobiaꞌ mamposalamaꞌi.”
28 Katoꞌo notiꞌi hi Peturuꞌ, “Hade ingka hapomo to hingkiꞌ kihua? Alaꞌ mampolihimoka lekiꞌna hapo-hapongki hei metuntu Ingko.”
29 Iomo hinaꞌ notiꞌi hi Yesu pe topeguruNa, “Hingkeꞌ ibahaꞌkei, hihimo to mampolihi tambina, ba hantambina ba halalina ba toduluna ba anaꞌna nokomi pengkoruꞌna pe Pueꞌ Ala, 30 bateꞌna hingkiꞌ mantorimo harona melobi-lobi ka lekiꞌ-lekiꞌna hapo to nopolihi i duniaꞌ tempo hinewowoꞌena, hei pahua woꞌo kotuwuꞌ to wolaꞌ to hawaꞌi mokoꞌukoa i tempo to hingkiꞌ mehupaꞌ.”
Kotolu mpihana hi Yesu mampololita noniuꞌ kohingkiꞌ mahina
31 I hampiha tempo womo, hi Yesu mowowoi topeguruNa to hampuluꞌ meroduo morampu i peꞌohaꞌa to tepohida honiꞌi notiꞌikihi, “Ipehoromuakei moromiꞌ! Hinewowoꞌena nolouki pe Yerusale. I kota tiꞌo, hingkiꞌ tebuhoꞌi lekiꞌ-lekiꞌna to niꞌukiꞌ nabi-nabi noniuꞌ i Anaꞌ Manusiaꞌ. 32 Anaꞌ Manusiaꞌ hingkiꞌ nipewei pe toaꞌ to handoꞌiohi toYahudi. Hingkiꞌ nipokokeniꞌa, nipononaꞌa, hei niliku, 33 hingkiꞌ nilabehiꞌ, hei nirokoꞌ. Angkana ikotolu andona, Io hingkiꞌ tuwuꞌ huliꞌ.”
34 Angkana topeguruNe hawaꞌhi mpuꞌu robahaꞌ tungkaihaNa Yesu, alaꞌ palaihana lolitaNa tewuni tene pe iohi.
Yesu mampokoꞌoriꞌ haduo tobilo i Yeriko
35 Dodungkumo hi Yesu i bolaꞌ Yeriko, uwaꞌ haduo tobilo to mahura merapiꞌ-rapiꞌ i hiri lala. 36 Ikonohorinalu toaꞌ to woriꞌ moliu, meꞌitanomo notiꞌi, “Haporeꞌito to mewali?”
37 Mehoniꞌhi toaꞌ to woriꞌ, “Yesu toNasareꞌ, moliu!”
38 Konohorinalu tobilo tiꞌo lolitare, meꞌoꞌandomo notiꞌi, “Yesu, muleꞌna datu Daudi! Ipokarimaꞌa kaiaꞌ!” 39 Katoꞌo io rokamoroki toaꞌ to medulu rotiꞌi, “Mondiiꞌko!” Angkana tobilo tiꞌo pedeꞌ meꞌoꞌando-andolu nopokobue notiꞌi, “Muleꞌna datu Daudi! Ipokarimaꞌa kaiaꞌ!”
40 Meꞌohaꞌmo hi Yesu honiꞌi morumbaꞌ toaꞌ notiꞌi, “Komiꞌi humei tobilo tiꞌo!” Rokomimo mpuꞌu Pe hi Yesu, hei hi Yesu motenei tobilo tiꞌo Notiꞌi, 41 “Hapo to ikodokoꞌi Kuwali pe ingko?”
Mehoniꞌ tobilo tiꞌo, “Pueꞌ, kukodokoꞌi kaiaꞌ hingkeꞌna pangkiꞌa!”