Hi Yesu hante hi Sakeus
19
1 Hi Yesu matengkaꞌ moliu i kota Yeriko. 2 I kota Yeriko tiꞌo, uwaꞌ haduo tadulako toperuruꞌ sima tosugiꞌ, konaꞌna hi Sakeus. 3 Hi Sakeus tiꞌo mangkodokoꞌi pangkiꞌ hi Yesu. Angkana nokomi kododihuna, io hawaꞌi hohumbo pangkiꞌ hi Yesu, alaꞌ Nopoꞌilumbuiꞌi toaꞌ woriꞌ. 4 Iomo hinaꞌ hi Sakeus mehilai mampedului toaꞌ to woriꞌ, ako meponeꞌ i hangkaru loti ara hingkeꞌna nopangkiꞌ hi Yesu to hingkiꞌ moliu itoꞌo. 5 Kododungkunalu hi Yesu i loti peponeꞌana hi Sakeus, Io menoaꞌ honiꞌi notiꞌi, “Sakeus, mengkohoumoko hohiꞌ humei, alaꞌ ando hieꞌe hingkiꞌ holampiꞌA i tambimu.” 6 Katoꞌo hi Sakeus kaliuꞌ mengkohou, alaꞌ motanaꞌ laline mantorimo hi Yesu i tambina.7 Koroꞌokiꞌnalu toaꞌ to woriꞌ hapo to mewali tiꞌo, mangkonunuꞌhi, rotiꞌi, “Mahamporeꞌi hinaꞌ Io holampi i tambina toaꞌ to madosa?”
8 Kolentuꞌana hi Yesu i lali tambina hi Sakeus, metotiꞌimo hi Sakeus mantiꞌi, “Pueꞌ, dolaꞌ duana ka lekiꞌ-lekiꞌna lumangku hingkiꞌ kupaꞌanikihi toaꞌ to merima-rima tuwuꞌra. Hei hihimolu to kubagiuꞌ, hingkiꞌ kupopahuliꞌkihi iba mpiha koworiꞌne ka hapo to kubagiuꞌkimohi.”
9 Notiꞌi hi Yesu, “I ando hieꞌe, Pueꞌ Ala mamposalamaꞌko hante lekiꞌna ohina tambimu, alaꞌ ingko muleꞌna hi Burahima. 10 Anaꞌ Manusiaꞌ humei pe duniaꞌ, tungkaihaNa humei mampaliꞌ toaꞌ to moꞌela ka Pueꞌ Ala hei mamposalamaꞌhi ka pehuku dosa.”
Pandiriꞌ noniuꞌ doiꞌ bulawa
11 I tempona hi Yesu dodungkumo i Yerusale, pampekirira toaꞌ to woriꞌ, i tempona intu hi Yesu hupaꞌ i Yerusale, Io hingkiꞌ moparentamo hibali datu. Katoꞌo hi Yesu mampololiu womo lolitaNa hante pandiri' hieꞌe, 12 Notiꞌi, “Uwaꞌ haduo muleꞌne tokeiꞌ notungkai nolou pe woiꞌ to moꞌela hingkeꞌna niparilangkaꞌi mewali datu, hei uko niparilangkaꞌ, mahuliꞌlu intu pe woiꞌna. 13 Kohandoaꞌana tene molai, mowowoi dulu hawiꞌne to hampuluꞌ duo, hei haduo-haduo nopaꞌanihi hampepaꞌ doiꞌ bulawa hei notiꞌi, ‘Doiꞌ to kupaꞌanikei hieꞌe, hangangaa iwiliorikei hingkeꞌna ane mahuliꞌa intu humei moꞌanaꞌmo doiꞌka.’ 14 Angkana i bolaꞌna tokeiꞌ tiꞌo, uwaꞌhi woꞌo toaꞌ to mampokoiꞌi. Katoꞌo kopolainalu, morapaꞌmohi hingkeꞌna haꞌumbora suro nolou mampetiꞌiki pe datu ngkodeꞌ, hei rotiꞌi, ‘Datu, anioꞌ iparilangkaꞌi mewali datungki, alaꞌ hawaꞌi kilei!’
15 Kehapoꞌi rotiꞌi hatoꞌo, toaꞌ tiꞌo bateꞌnalu io niparilangkaꞌ, hei mahuliꞌmo nolou pe bolaꞌna. Kohupaꞌnalu, nowowoimohi hawiꞌne, hei nopeꞌitanokimo haꞌumbomo koworiꞌne anaꞌna doiꞌna. 16 To uluꞌ mehupaꞌ pe io notiꞌi, ‘Datu, hampepaꞌ doiꞌ bulawa to ipanikiꞌa hampiha, hampuluꞌmo anaꞌne.’
17 Notiꞌi datu tiꞌo, ‘Moromiꞌ mpuꞌu pajamama mowiliori doiꞌ to kupaꞌanikiko. Ingkomo hawiꞌ to moromiꞌ. Alaꞌ komonontomu i jama to kokiuꞌ, kuhiniko motadulakoi hampuluꞌ kota.’
18 Mehupaꞌ womo hawiꞌ koroduone hei mantiꞌi, ‘Datu, hampepaꞌ doiꞌ bulawa to ipanikiꞌa hampiha, limomo anaꞌne.’
19 Notiꞌi womo datu pe hawiꞌ to koroduona tiꞌo, ‘Moromiꞌ. Kuhiniko motadulakoi limo kota.’
20 Uko tiꞌo, hupaꞌ womo hawiꞌ to ka tolune. Notiꞌi, ‘Hieꞌemo doiꞌma datu. Kuputuꞌlu moromiꞌ i lali lesongku. 21 Motehuꞌa pe ingko alaꞌ kubahaꞌ ingko haduo toaꞌ to mohiaꞌ, moroa to handoꞌio hanumu, hei moroako wuaꞌna to handoꞌio pehuꞌamu.’
22 Notiꞌi datu, ‘Ingkomo hawiꞌ to kodake! Alaꞌ powiharomu, hingkiꞌ kuhukuko. Ibahaꞌlu aku hieꞌe toaꞌ to mohiaꞌa: aku moroaꞌa to handoꞌio hanungku hei aku moroaꞌa wuaꞌna to handoꞌio pehuꞌangku. 23 Mahamporeꞌi hinaꞌ hawaꞌi ipaꞌaniki toaꞌ to hiniꞌ mowuliori doiꞌ tiꞌo, hingkeꞌna noꞌuwaꞌ anaꞌne doiꞌku?’ 24 Uko tiꞌo, notiꞌi womo datu pe toaꞌ to metotiꞌi i hirina, ‘Roaꞌi doiꞌ to uwaꞌ i io! Ipaꞌaniki womo hawiꞌku to mampopoꞌanaꞌmo limo doiꞌ bulawa.’
25 Angkana iohi mantiꞌi, ‘Tua, io moꞌompuimo hampuluꞌ!’
26 Datu tiꞌo mehoniꞌ, ‘Hingkeꞌna ibahaꞌkei, toaꞌ to nipoꞌohi hante hapo to nipaꞌanikiꞌi, to uwaꞌ i io hingkiꞌ nitambaiki womo. Angkana toaꞌ to hawaꞌi nipoꞌohi, hapo to nipaꞌanikiꞌi kehapoꞌi hangkiuꞌlu, bateꞌna hingkiꞌ niroa huliꞌ ka io.’ 27 Uko tiꞌo notiꞌi womo datu tiꞌo, ‘Ikomikei humei lekiꞌ-lekiꞌne poniꞌku tota mampoꞌioꞌ koniparilangkaꞌku mewali datura. Lekiꞌ-lekiꞌra irokoꞌmohi i hinarongku!’ ”
Toaꞌ wori' mampokodeꞌ Pueꞌ Yesu
28 Koꞌukona hi Yesu mololita watoꞌo, Nopololiumo patengkaꞌane pe kota Yerusale. Io matengkaꞌ medulu ka toaꞌ ntaniꞌna to metuntu. 29 Dodungkumohi i bolaꞌ Bepage hante Betania to i Biri Saitu, hi Yesu morumbaꞌmo roduo topeguruNa medulu, 30 Notiꞌikihi, “Noloumokei pe bolaꞌ to tohinoroi. Ane wutekei itoꞌo, hingkiꞌ iꞌokiꞌkei hambaꞌa anaꞌ kalide to nipehiluꞌki, to handoaꞌi tene hampiha nipelambaꞌi. Iꞌuweꞌkei ka konihiluꞌana hei iruiꞌkiꞌAkei humei. 31 Ane uwaꞌ to meꞌitano pe ingkei mahamporeꞌi hinaꞌ iꞌuweꞌkei, itiꞌikikei waheꞌe, ‘Pueꞌ to mamparaluꞌino.’ ”
32 Noloumohi topeguruNe to roduo tiꞌo, rohuamo mpuꞌu hibali to notiꞌikihi hi Yesu. 33 Kolentuꞌara moꞌuweꞌ ka konipehiluꞌakina, tumpuna kalide meꞌitano, “Mahamporeꞌi hinaꞌ iꞌuweꞌkei?”
34 Mehoniꞌhi, “Pueꞌ to mamparaluiꞌi.”
35 Uko tiꞌo, kalide tiꞌo roruiꞌ nolou pe hi Yesu, rolampii hante baduꞌra, honiꞌi hi Yesu ropopelambaꞌmo. 36 Woriꞌ toaꞌ to mowuraꞌ widara i lumbu lala to hingkiꞌ nopoliuhi hi Yesu alaꞌ peꞌadaꞌira pe hi Yesu. 37 Dodungkumo i kota Yerusale munaꞌu ka Biri Saitu, lekiꞌ-lekiꞌra to metuntu motanaꞌhi mampokodeꞌ Pueꞌ Ala. Meꞌoꞌando-andomohi motanaꞌ hei mampokodeꞌhi Pueꞌ Ala, alaꞌ pangkiꞌmohi tandaꞌ kuasaꞌ to nowali hi Yesu. 38 Meꞌoꞌando-andohi, rotiꞌi,
“Pueꞌ Ala mobarakati Datu
to mehupaꞌ i lali konaꞌNa!
Moromiꞌmo huliꞌ pohintuwuꞌte hante Pueꞌ Ala.
Topokodeꞌmo Pueꞌ Ala i suruga!” \rq (Mas. 118:26)
39 Katoꞌo haꞌumbora toParisi i lumbura toaꞌ to woriꞌ mampatiꞌiki hi Yesu, “Guru, Itiꞌikihi mondiiꞌhi topeguruMa!”
40 Mehoniꞌ hi Yesu, “Kutiꞌikikei! Ane mondiiꞌhi topegurungKa, watu-watu hieꞌe hingkiꞌ meꞌoꞌando-andohi.”
Hi Yesu mampeꞌoloni Yerusale
41 Dodungkumo hi Yesu i Yerusale, Io mepopanto pe kota tiꞌo, hei Nopeꞌoloni, 42 Notiꞌi, “Mepokarimakei toYerusale! Moromiꞌ rahimo ane ando hieꞌe ibahaꞌkei hapo to mampohintuwuꞌkei hante Pueꞌ Ala. Angkana hinewoꞌena hawaꞌkei ibahaꞌ noniuꞌ tiꞌo. 43 I hampiha tempo, poniꞌmi hingkiꞌ molimbuꞌ bolaꞌmi hei mowali bente to maroho mantuleliꞌ, hei moꞌewakei ka imbo-imbolu. 44 Hingkiꞌ ropuꞌkei hante bolaꞌmi hei lekiꞌ-lekiꞌna ohina, wute hawaꞌi uwaꞌ haꞌanu watu to tehuntu i tambimi to melobi i peꞌohaꞌana. Lekiꞌ-lekiꞌna tiꞌo hangangaa mewali, alaꞌ hawaꞌkei ibahaꞌ ando kohupaꞌaNe Pueꞌ Ala mamposalamaꞌkei.”
Hi Yesu mekahi pe Tambina Pueꞌ Ala
45 Uko tiꞌo, hi Yesu mekahi pe Tambina Pueꞌ Ala. Itoꞌo Io mobue toaꞌ to mobaluꞌ-baluꞌ, 46 notiꞌikihi, “I lali SuraꞌNa Pueꞌ Ala to mangkolehi mantiꞌi waheꞌe, ‘TambingKu hieꞌe iomo Tambi pekokaeha.’ Angkana ipopewalilukei tambi porampuana topanako!”