Hi Yesu mampokoꞌoriꞌ toaꞌ to nopekahii tokodake
5
1 Uko katoꞌo, hi Yesu hante topeguruNa wutemohi i hanupe rano, i woiꞌ Gerasa. 2-3 Hangkoꞌlu pengkohoura ka duanga, hupaꞌmo haduo tomaꞌani to nopekahii tokodake mampohidupaꞌki hi Yesu. Toaꞌ tiꞌo meꞌohaꞌ i petowua hei hawaꞌi uwaꞌ to pobiaꞌ mohokiꞌi kehapoꞌi nihiluꞌ hante rante nokomi komarohona. 4 Woriꞌ mpiha kapuꞌne hante koraweꞌna nihiluꞌ hante rante, nobiaꞌlu nopudiꞌ-pudiꞌ. Iomo horiana hawaꞌi uwaꞌ toaꞌ to podehoꞌ mohokiꞌi. 5 Ando wini, io mokadodoroꞌlu i petowua hante i womboꞌ biri, moloaꞌ-loaꞌ hei mobeloi wotana hante watu. 6 Kopangkiꞌnalu hi Yesu ka moꞌela, mehilaimo ako modupaꞌI, honiꞌi melingkotuꞌ menomba i hinarona hi Yesu. 7-8 Hi Yesu mobue tokodake to mampekahii toaꞌ tiꞌo, Notiꞌi, “Pesuwu ka toaꞌ hieꞌe!”Angkana toaꞌ tiꞌo mololita nopokobue, notiꞌi, “Yesu, Anaꞌna Pueꞌ Ala to Makuasaꞌ! Haporeꞌi tungkaihaMa pe aku? Kuperapiꞌ i lali konaꞌna Pueꞌ Ala, inioꞌa Ipoperima-rima.”
9 Nopeꞌitanoki hi Yesu, “Himo konaꞌma?”
Mehoniꞌ, “Konaꞌku hi Legioa, alaꞌ woriꞌka to mekahi pe toaꞌ hieꞌe.” 10 Roperapiꞌ to kodake tiꞌo pe hi Yesu hingkeꞌna inioꞌhi Nobue ka peꞌohaꞌa tiꞌo.
11 Hawaꞌi moꞌela katoꞌo, uwaꞌhi boeꞌ to woriꞌ, to kolentuꞌara mahuge-huge i komomoneꞌa biri. 12 Roperapiꞌ tokodake tiꞌo pe hi Yesu, rotiꞌi, “Ipopekahika pe boeꞌ tiꞌo.” 13 Notiꞌi hi Yesu, “Noloumokei!” Katoꞌo mesuwumohi mpuꞌu tokodake tiꞌo hei kaliuꞌhi mekahi pe boeꞌ. Pekahira pe boeꞌ, mehilaihi boeꞌ tiꞌo ako mengkonawuꞌ i tua bota rano hei mahihi podu. Koworiꞌra to mahi kira-kira rosabu mbaꞌa.
14 Koroꞌokinalu toaꞌ to mampoꞌodaꞌ boeꞌ tiꞌo hapo to pewali, kaliuꞌhi mehilai nolou pe kota-kota hei pe bolaꞌ-bolaꞌ to dodungku mampowute hapo to roꞌokiꞌ tiꞌo. Iomo horiana noloumohi tumpu bolaꞌ mampeꞌele hapo to pewali. 15 Kowuteralu pe hi Yesu, roꞌokiꞌ toaꞌ to nopekahii lomoa to woriꞌ hingkenia, mahura hibalimo biasa, mebaduꞌ, hei monontomo pekirine. Iomo horiana morokaꞌhi. 16 Toaꞌ to pangkiꞌ mata hapo to nowali hi Yesu i tempo tiꞌo, mampololita pe toaꞌ to mehupaꞌ itoꞌo hapo to mewali i toaꞌ to nopekahii tokodake, hei hapo to mewali i boeꞌ. 17 Ikopahorira hapo to mewali tiꞌo, tumpu bolaꞌ moparuku hi Yesu molai ka woiꞌ Gerasa.
18 Kolentuꞌana hi Yesu mehendeꞌ i duanga, toaꞌ to nopekahii tokodake hingkenia merapiꞌ hingkeꞌna metuntuꞌi pe Io, 19 angkana hawaꞌi Nopoliu. Notiꞌikilu, “Mahuliꞌmoko nolou pe tambimu, ipololita pe toaꞌ to habobolaꞌmu hante pe halalimuhi hapo to nowali Pueꞌ Ala hei hohumbo komarimaNe pe ingko.” 20 Noloumo mpuꞌu toaꞌ tiꞌo pe woiꞌ Dekapoli,b mampowute hapo to nowali hi Yesu pe io. Hokohi lekiꞌ-lekiꞌne toaꞌ to pahori kareba tiꞌo.
Hi Yesu mampokoꞌoriꞌ haduo towoweꞌe to meraꞌa nturusi,
21 Hi Yesu hante topeguruNa mehendeꞌ womohi duanga, mahuliꞌ womo nolou pe hanupe rano Galilea. Kowuteralu itoꞌo, woriꞌ toaꞌ to nolou motuleliꞌi hi Yesu. Kolentuꞌana tene i bota rano, 22 hupaꞌmo haduo toaꞌ to nikokeneꞌi hi Yairu. Io haduo tadulako Tambi Penombaha toYahudi. 23 Melingkotuꞌ i hinarona hi Yesu hei merapiꞌ sulungi, notiꞌi, “Guru! Anaꞌku towoweꞌe kolentuꞌana mohakiꞌ ngkodeꞌ hei hingkiꞌ mahi. Kuperapiꞌ hingkeꞌna nolouki pe tambingku. Iperama hingkeꞌna nomoꞌoriꞌ hei hawaꞌi mahi.” 24 Noloumo hi Yesu metuntu hi Yairu. Woriꞌhi woꞌo toaꞌ to metuntu momebihiꞌ-bihiꞌmohi motuleliꞌi hi Yesu.
25 I lumbura toaꞌ to woriꞌ tiꞌo, uwaꞌ haduo towoweꞌe to hampuluꞌ merontoꞌamo nohua nturusi meraꞌa hawaꞌi moꞌoriꞌ hakiꞌne. 26 Woriꞌ mpihamo mepokuliꞌi pe sando, wute uko lumane nopobaluꞌ nopopobayari. Angkana hawaꞌi uwaꞌ komoꞌoriꞌane, wuliha tetambai hakiꞌne. 27-28 Konohorinalu hapo to ropololita toaꞌ noniuꞌ hi Yesu, notiꞌi i lalina, “Kehapoꞌi kuruntuilu jubaNe, bateꞌna moꞌoriꞌ hakiꞌka!” Katoꞌo noparuku mengkolohopiꞌ i lumbura toaꞌ to woriꞌ, mangkododungkui hi Yesu ka tunduNa, wute nohuamo mpuꞌu noruntui jubaNe. 29 Konoruntuinalu, kaliuꞌ meꞌohaꞌ raꞌane, hei nohoriki moꞌoriꞌmo ka hakiꞌna.
30 I tempo tiꞌo woꞌo, nohoriki hi Yesu uwaꞌ kuasaꞌ to mesuwu ka wotaNa. Mehahiliꞌmo pe toaꞌ to woriꞌ honiꞌi Nopeꞌitanoki, “Himo to moruntui jubangKa?”
31 Rotiꞌi topeguruNe, “Guru! Woriꞌ mpololeke toaꞌ to momebihiꞌ-bihiꞌ motuntuniKo. Mahamporeꞌi hinaꞌ Ipetanoki himo to moruntui jubaMa?” 32 Katoꞌo hi Yesu mehahiliꞌ mantuleliꞌ mampaliꞌ himo toaꞌ to moruntui jubaNe.
33 Nobahaꞌ towoweꞌe tiꞌo hapo to mewali i wotana. Mororidiꞌmo nokomi komorokaꞌna, honiꞌi io tolou melingkotuꞌ i hinarona hi Yesu hei mopangakuꞌ hapo to nowali hei hapo to mewali i wotana. 34 Notiꞌi hi Yesu pe towoweꞌe tiꞌo, “AnaꞌKu! Nokomi pepoꞌohimu i Aku, horiana moꞌoriꞌko. Hinewowoꞌena moꞌoriꞌmoko, mahuliꞌmoko hante kotanaꞌ lali.”
35 Kolentuꞌana tene hi Yesu mololita, hupaꞌmohi haꞌumbora toaꞌ ka tambina hi Yairu mampatiꞌiki hi Yairu, rotiꞌi, “Tua, anaꞌmu mahimo. Hampoliꞌmoko mampomasusa Guru.”
36 Konohorinalu hi Yesu hapo to rotiꞌi toaꞌ tiꞌo, Notiꞌiki hi Yairu, “Anioꞌko morokaꞌ! Mepoꞌohimoko!” 37 Nopololiumo hi Yesu patengkaꞌaNe angkana hawaꞌi Nopoliu toaꞌ to woriꞌ metuntu pe Io, sangadina hi Peturuꞌ, hi Yakobus hante hi Yohanes hineeꞌna hi Yakobus. 38 Kowuteralu i tambina hi Yairu, noꞌokiꞌ hi Yesu woriꞌ toaꞌ to mageo hei meꞌola merorima. 39 PekahiNa pe lali tambi, Notiꞌikihi, “Mahamporeꞌi hinaꞌ mageokei hei meꞌolakei? Io hawaꞌi mahi, angkana leꞌolu.” 40 Angkana rokokereiꞌIlu. Uko katoꞌo, norumbaꞌmo hi Yesu lekiꞌ-lekiꞌna toaꞌ mesuwu pe howalihi, honiꞌi mekahimo hi Yesu hante inoꞌna hei umoꞌna moꞌawa hante totolu topeguruna hi Yesu pe konipowatana anaꞌ tiꞌo. 41-42 Umuruꞌna oꞌanaꞌ tiꞌo hampuluꞌ rontoꞌamo. Notikomo hi Yesu korawene, hei mantiꞌi, “Talita kum!” Palaihana “AnaꞌKu meꞌaromoko!” Meꞌaromo oꞌanaꞌ tiꞌo hei kaliuꞌ matengkaꞌ. Lekiꞌ-lekiꞌna toaꞌ to itoꞌo lemeniahi pangkiꞌ hapo to mewali. 43 Angkana hi Yesu moꞌopihi hingkeꞌna inioꞌ ropetiꞌi-tiꞌiki hapo to Nowali tiꞌo, hei Notiꞌikihi, “Paꞌanikei mangka anaꞌ tiꞌo.”