Pandiriꞌ noniuꞌ i topokineteꞌ
13
1 I ando tiꞌo woꞌo, molaimo hi Yesu ka tambi nolou mahura pe bota rano Galilea. 2 Woriꞌ mpololeke toaꞌ nolou motuleliꞌiꞌI, iomo horiana Io ako mehendeꞌ pe duanga honiꞌi mahura. Toaꞌ to woriꞌ tiꞌo metotiꞌihi i bota rano, 3 katoꞌo hi Yesu mampowutekihi woriꞌ langkaꞌ poturuꞌ moliu pandiri'. Notiꞌi, “Hampiha tempo, uwaꞌ haduo topokineteꞌ to nolou mohawori. 4 I tempona mohawori, uwaꞌ howoria to monawuꞌ i woiꞌ to morintodi to nopolalai toaꞌ. Hupaꞌ tinti mabingku howoria tiꞌo wute uko. 5 Uwaꞌ woꞌo howoria to monawuꞌ i woiꞌ to manonipaꞌ alaꞌ mowatuꞌi i luaꞌne. Howoria tiꞌo magasiꞌ kotuwuꞌne alaꞌ manonipaꞌi woiꞌne. 6 Angkana ikonowantanalu ando, molau wute bani, alaꞌ hawaꞌi kuladu wakaꞌne. 7 Uwaꞌ woꞌo howoria to monawuꞌ i lali rui. Howoria tiꞌo tuwuꞌ moꞌawa hante rui, koꞌukoana noputuꞌ rui wute mahi. 8 Angkana uwaꞌ woꞌo howoria to monawuꞌ i woiꞌ to molompoꞌ, tuwuꞌ moromiꞌ horiana mowuaꞌ. Uwaꞌ to hanatu mpiha koworiꞌna ka howoriana, uwaꞌ to oni mpuluꞌ mpiha, hei uwaꞌ woꞌo to tolu mpuluꞌ mpiha.”9 Uko mampowute pandiri' tiꞌo, hi Yesu mampatiꞌikihi, “Moromiꞌ mpololeke ane ipoꞌilalikei hapo to ihorimokei!”
Tungkaihana hi Yesu mampowute pandiri'
10 Dongkaꞌmohi topeguruNe, hei haduo ka lumbura meꞌitano pe hi Yesu, notiꞌi, “Guru, hapo tungkaihaMa mampoturuꞌ toaꞌ to woriꞌ moliu pandiri'?”
11 Nohoniꞌ hi Yesu, “Hampiha, tewowuni tene poturuꞌ noniuꞌ i poparentana Pueꞌ Ala. Angkana hinewowoꞌena nopaꞌanimokei Pueꞌ Ala pekiri hingkeꞌna ibahaꞌkei palaihane poturuꞌ tiꞌo. Ane toaꞌ to woriꞌ, hawaꞌhi nopaꞌani Pueꞌ Ala pekiri noniuꞌ palaihana poturuꞌ tiꞌo. 12 Angkana toaꞌ to mangkodokoꞌi pobahaꞌ peleihana Pueꞌ Ala, hingkiꞌ tetambai pebahaꞌre wute robahaꞌ mpololeke. Angkana toaꞌ to hawaꞌhi mangkodokoꞌi pobahaꞌ peleihana Pueꞌ Ala, kehapoꞌi robahaꞌmo hangkiuꞌ, bateꞌna hawaꞌi modumbuꞌ alaꞌ hingkiꞌ niroa huliꞌ. 13 Iomo horiana Kupakeꞌ pandiri' ane mampoturuꞌA toaꞌ to woriꞌ, alaꞌ:
‘Roꞌokiꞌlu angkana hawaꞌi robahaꞌ hapo palaihane to roꞌokiꞌ.
Rohorilu angkana hawaꞌi robahaꞌ tungkaihane hapo to ropehoromua.’
14 To rowali toaꞌ hinewowoꞌena mobuhoꞌi hapo to nopowute nabi Yesaia hampiha to mantiꞌi waheꞌe:
‘Hingkiꞌ iꞌokiꞌkei, angkana hawaꞌi hingkiꞌ ibahaꞌkei hapo to mewali.
Hingkiꞌ ihorikei, angkana hawaꞌi hingkiꞌ ibahaꞌkei palaihane hapo to ihorikei,
15 alaꞌ lalimi morintodimo,
tolinami itutuꞌikei hei matami ipiriꞌkei.
Iwalikei hatoꞌo hingkeꞌna hawaꞌkei pangkiꞌ hapo to Kuwali,
hawaꞌkei mampehoromua lolitangKu,
hei lalimi hawaꞌi pobahaꞌ.
Ane iwalikei hatoꞌo hawaꞌkei hingkiꞌ mahuliꞌ pe Aku,
hei hawaꞌkei hingkiꞌ Kuposalamaꞌ.’ ” \rq (Yes. 6:9-10)
16 Nopololiu womo hi Yesu lolitaNe pe topeguruNahi, Notiꞌi, “Angkana ingkei, morasiꞌmokei mpololeke, alaꞌ iꞌokiꞌmokei hapo to Kuwali hei ipehoromuamokei poturuꞌKa. 17 Tuꞌu mpololeke to Kutiꞌikikei: hampiha uwaꞌhi woriꞌ nabi hante toaꞌ to moromiꞌ i pampeꞌelena Pueꞌ to mangkodokoꞌihi pangkiꞌ hapo to iꞌokiꞌkei i tempo hieꞌe, angkana hawaꞌi roꞌokiꞌ. Mangkodokoꞌihi mpololeke mampehoromua hapo to ihorikei hinewowoꞌena angkana hawaꞌi rohori.”
Hi Yesu mampokononto palaihana pandiri' noniuꞌ i topokineteꞌ
18 “Ipehoromuakei! Kutiꞌikikei hapo palaihane pandiri' topokineteꞌ tiꞌo. 19 Woiꞌ to nipolalai nipandiriꞌ toaꞌ to mampehoromua mpololeke Pohawaꞌna Pueꞌ Ala noniuꞌ hohumbo poparentaNa, angkana hawaꞌi robahaꞌ palaihane. Dongkaꞌmo Belisiꞌ morompoꞌi Pohawaꞌna Pueꞌ Ala tiꞌo ka lalira.
20 Woiꞌ to mowatu nipandiriꞌ toaꞌ to mampehoromua Pohawaꞌna Pueꞌ Ala, hei tuꞌu-tuꞌu motanaꞌ lalira mampehoromua. 21 Angkana hawaꞌi moꞌuwakaꞌ Pohawaꞌne Pueꞌ Ala i lalira, iomo horiana hawaꞌhi mantaha. I tempora nipoperima-rimahi ba nipomaporiꞌhi nokomi pepoꞌohira i Pohawaꞌna Pueꞌ, hingkiꞌ hohiꞌhi maꞌoruꞌ ka pepoꞌohira.
22 Woiꞌ to kedui, nipandiriꞌ toaꞌ to mampehoromua Pohawaꞌna Pueꞌ Ala, angkana mampekiriluhi kotuwuꞌra i duniaꞌ, hei mangkodokoꞌiluhi morampu luma poduniaꞌ. Iomo horiana rokolembulihaki Pohawaꞌne Pueꞌ Ala, hei hawaꞌi modumbuꞌ i lali kotuwuꞌra.
23 Woiꞌ to molompoꞌ, nipandiriꞌ toaꞌ to mampehoromua hei mampoꞌilali Pohawaꞌna Pueꞌ Ala. I toaꞌ tiꞌo, Pohawaꞌna Pueꞌ Ala mowuaꞌ. Uwaꞌ to mowuaꞌ hanatu mpiha ka howoriana, uwaꞌ to mowuaꞌ oni mpuluꞌ mpiha ka howoriana, hei uwaꞌ woꞌo to mowuaꞌ tolu mpuluꞌ mpiha ka howoriana.”
Pandiriꞌ noniuꞌ donaꞌ to i lumbuna kina
24 Nopowute womo hi Yesu halangkaꞌ pandiri' i toaꞌ to woriꞌ, Notiꞌi, “Poparentana Pueꞌ Ala hibali pandiri' hieꞌe: haduo tumpu kineteꞌ morumbaꞌ toaꞌna nolou mohawori tinudaꞌ to moromiꞌ i kineteꞌna. 25 I halumbu wini, kolentuꞌara leꞌo, hupaꞌmo poniꞌne tumpu kineteꞌ tiꞌo mohawori wowuni wuaꞌ donaꞌ i kineteꞌ tiꞌo, honiꞌi molai. 26 Tuwuꞌmo mpuꞌu kina tiꞌo moꞌawa hante donaꞌ wutehi mowuaꞌ, honiꞌi robahaꞌ koꞌuwaꞌne donaꞌ. 27 Mewaliꞌ noloumohi topajamane mampatiꞌiki tumpu kineteꞌ tiꞌo, ‘Tua, handoꞌioreꞌi howoria to moromiꞌ to ihaworio? Ka imboreꞌi humei donaꞌ tiꞌo?’
28 Nohoniꞌ tumpu kineteꞌ, ‘Tiꞌo bateꞌna to nowali poniꞌku.’
Katoꞌo, rotiꞌi womo topajamane, ‘Ane hatoꞌoꞌi, hohumbo ane nolouka mowutu donaꞌ to tuwuꞌ moꞌawa hante kina tiꞌo?’
29 Nohoniꞌ tumpu kineteꞌ, ‘Inioꞌ, alaꞌ ane iwutukei donaꞌne, hingkiꞌ mowutu woꞌo kinane. 30 Itedehimolukei tuwuꞌ moꞌawa hante kina, wute hupaꞌ tempona mekina. I tempo tiꞌo, hingkiꞌ kurumbaꞌhi topekina mowutu duluna donaꞌ tiꞌo, rorampu, hei rohiluꞌ honiꞌi nihunu. Uko tiꞌo, honiꞌi rorampu wae kinane, honiꞌi roporia i lali buhoꞌ.’ ”
Rolangkaꞌ pandiri' sesawi hante ragi
31 Uko tiꞌo, hi Yesu mampowute womo halangkaꞌ pandiri' pe toaꞌ to woriꞌ, Notiꞌi, “Poparentana Pueꞌ Ala wadi nipandiriꞌ hibali howoria sesawi to mororoi mpololeke. Uwaꞌ to mohawori howoria tiꞌo i kineteꞌna. 32 Howoria tiꞌo makaja mpololeke komororoine ka lekiꞌ-lekiꞌna howoria to uwaꞌ i duniaꞌ. Angkana ane nihaworiꞌi hingkiꞌ tuwuꞌ hei dingkaoꞌ ka huꞌa-huꞌa ntaniꞌna. Tuwuꞌ mewali mapongko, hei daꞌana nopehorai tinti.”
33 Uwaꞌ womo halangkaꞌ pandiri' to Nopowute pe toaꞌ to woriꞌ, Notiꞌi, “Poparentana Pueꞌ Ala hibali ragiꞌ to nopakeꞌ towoweꞌe mokalo tinampu to woriꞌ. Ragiꞌ tiꞌo, kehapoꞌi hangkiuꞌlu, wadi mampopembiaꞌ lekiꞌ-lekiꞌna tinampu to nilaboꞌ.”
34 Ane hi Yesu mampoturuꞌ toaꞌ to woriꞌ, poko mopakeꞌ pandiri'. 35 Mewaliꞌ, tebuhoꞌimo lolita hieꞌe to noꞌukiꞌ haduo nabi hampiha:
“Hingkiꞌ Kupoturuꞌhi moliu pandiri'.
Hingkiꞌ Kupowutekihi poturuꞌ to tewowuni mepongka i pewaliana duniaꞌ.” \rq (Mas. 78:2)
Hi Yesu mampokononto palaihana pandiri' donaꞌ to i lumbuna kina
36 Uko tiꞌo, hi Yesu mampolihi toaꞌ to woriꞌ hei nolou mekahi pe lali tambi. Noloumohi topeguruNe mangkododungkuiꞌI, rotiꞌi, “Guru, Itiꞌikika hapo palaihane pandiri' donaꞌ to i lumbuna kina.”
37 Nohoniꞌ hi Yesu, “Tumpu kineteꞌ to mohawori tinudaꞌ to moromiꞌ, palaihana Anaꞌ Manusiaꞌ. 38 Kineteꞌ, palaihana duniaꞌ hieꞌe. Tinudaꞌ to moromiꞌ, palaihana toaꞌ to mewalimohi anaꞌna Pueꞌ Ala i lali PoparentaNa. Donaꞌ, palaihana toaꞌ to metuntu pe Belisiꞌ. 39 Poniꞌna tumpu kineteꞌ to mohawori donaꞌ, iomo Belisiꞌ. Tempo mekina, palaihana ando pobutusi i kotutuana duniaꞌ. Hei topekina, palaihana malaꞌeka. 40 Hibali donaꞌ rorampu hei nihunu, hatoꞌo woꞌo to hingkiꞌ mewali i ando pobutusi i kotutuana duniaꞌ. 41 Anaꞌ Manusiaꞌ hingkiꞌ morumbaꞌ malaꞌekaNa nolou morampu lekiꞌ-lekiꞌna to mepomonawuꞌ hei toaꞌ to kodake ka lumbura toaꞌNa. 42 Lekiꞌ-lekiꞌna toaꞌ tiꞌo hingkiꞌ nitubehi pe lali api to mamua nturusi. Itoꞌo, hingkiꞌ meꞌolahi nturusi hei maporiꞌ mpololeke rohori. 43 Angkana toaꞌ to moromiꞌ i pampeꞌelena Pueꞌ, hingkiꞌ mewantahi hibali ando i lali poparentana Pueꞌ Ala Umoꞌra. Moromiꞌ mpololeke ane ipoꞌilalikei hapo to ihorimokei!”
Poparentana Pueꞌ Ala meliu mpololeke ka to ntaniꞌna
44 Notiꞌi hi Yesu, “Poparentana Pueꞌ Ala hibali bulawa to tetawu i lali woiꞌ, nohua haduo toaꞌ, hei kaliuꞌ notawu huliꞌ honiꞌi mahuliꞌ. Nokomi komotanaꞌna, liu ako mampobaluꞌ lekiꞌ-lekiꞌna lumana, honiꞌi nopopehili woiꞌ ikoꞌuwaꞌana bulawa tiꞌo.
45 Hatoꞌo woꞌo, poparentana Pueꞌ Ala hibali pandiri' hieꞌe: Uwaꞌ haduo topobaluꞌ-baluꞌ to mampaliꞌ mutiara to moromiꞌ mpololeke. 46 Konohuanalu haꞌanu mutiara to masuliꞌ mpololeke hilina, liu ako mampobaluꞌ lekiꞌ-lekiꞌna lumana, honiꞌi nopopehili mutiara tiꞌo.”
Pandiriꞌ noniuꞌ i jalaꞌ to koroba
47 “Poparentana Pueꞌ Ala hibali jalaꞌ to koroba nipelubaꞌ pe lali rano. Woriꞌ langkaꞌ bouꞌ mekahi pe lali jalaꞌ tiꞌo. 48 Ikobuhaꞌnalu jalaꞌne tiꞌo, noꞌoreꞌmo pe lorina, honiꞌi topojalaꞌ mahuramohi moꞌuwiꞌ bouꞌ. To moromiꞌ roporia i pamporideꞌana, to hawaꞌi moromiꞌ rotube. 49 Hatoꞌo woꞌo i ando pobutusi i kotutuana duniaꞌ: malaꞌeka hingkiꞌ nolouhi mampohida toaꞌ to kodake lalira hante toaꞌ to moromiꞌ i pampeꞌelena Pueꞌ Ala. 50 Toaꞌ to kodake lalira hingkiꞌ nitube pe lali api to mamua nturusi. Itoꞌo, hingkiꞌ meꞌolahi nturusi hei maporiꞌ mpololeke rohori.”
Pandiriꞌ noniuꞌ i luma to hohai hante luma to wolaꞌ
51 Uko tiꞌo, hi Yesu meꞌitano pe topeguruNahi, Notiꞌi, “Ba ibahaꞌkei palaihane lekiꞌ-lekiꞌna pandiri' to Kupowutekikei hingkenia?”
Rohoniꞌ, “Kibahaꞌlu.”
52 Katoꞌo, Notiꞌiki womohi, “Ane hatoꞌoꞌi, moromiꞌ. Mewaliꞌ, hingkiꞌ ibahaꞌkei woꞌo palaihane pandiri' hieꞌe: lekiꞌ-lekiꞌna guru-guru agama to pobahaꞌ palaihana noniuꞌ poparentana Pueꞌ Ala, wadi nipandiriꞌ hibali tumpu tambi to mampasuwu luma to hohai hante luma to wolaꞌ ka pamporiahana.”a
Hi Yesu hawaꞌi ropoꞌohi toNasareꞌ
53 Koꞌukona hi Yesu mampowute lekiꞌ-lekiꞌna pandiri' tiꞌo, Io molaimo katoꞌo, 54 nolou pe bolaꞌNa i Nasareꞌ. Itoꞌo hi Yesu mampoturuꞌ toaꞌ i tambi penombahara toYahudi. Lomeniahi toaꞌ to mampehoromua lolitaNa, hei mometenei-teneihi, “Himoreꞌito to mampoturuꞌ toaꞌ hieꞌe horiana hatoꞌo kopobahaꞌNe? Hei himo to mampaꞌaniꞌI kuasaꞌ mowali tandaꞌ kuasaꞌ to mepohele? 55 To tobahaꞌlu Io anaꞌnalu basi. InoꞌNa hi Maria. Hei halaliNahi: hi Yakobus, hi Yusuf, hi Simo hante hi Yudas. 56 HalaliNahi towoweꞌe meꞌohaꞌhi woꞌo moꞌawa ingkiꞌ iseꞌe. Hohumbo horiana uwaꞌ kuasaꞌNe mepoturuꞌ hei mowali tandaꞌ kuasaꞌ to mepohele?”