Yesus dinangkap
18:1-11
(Mat. 26:47-56; Mrk. 14:43-50; Luk. 22:47-53)
18
Lakaꞌ Yesus badoꞌa, Ia ampus man murit-murit-Nya kaꞌ sabarang sunge Kidron. Diꞌkoa ada kabon jaitun, Yesus man murit-murit-Nya tamaꞌ kaꞌ kabon koa. 2 Yudas pangianat koa, nauꞌan kaꞌ tampat koa; jukut Yesus dah sering bakomoꞌ diꞌkoa man murit-murit-Nya. 3 Lalu Yudas ampus kaꞌ tampat koa ngincakng sakalompok tantara Romawia man basangahe urakng pangawal Rumah Kudus Allah nang di imam-imam kapalaꞌ man urakng-urakng Parisi nyuruh. Ia kaꞌ koa ngincakng sinjata, lantera man coloꞌ. 4 Yesus dah nauꞌan samua nang jajiaꞌ kaꞌ diriꞌ-Nya. Jaji Ia nyamakiꞌ urakng-urakng kaꞌ koa man batanyaꞌ: “Sae nang kitaꞌ ngagoꞌiꞌ?” 5 Sahut nya kaꞌ koa: “Yesus, urakng Nasaret.” Kata-Nya kaꞌ ia kaꞌ koa: “Akulah Ia.” Yudas nang ngianatiꞌ-Nya badiri diꞌkoa sama-sama man ia kaꞌ koa. 6 Takaꞌ Ia bakata kaꞌ ia kaꞌ koa: “Akulah Ia,” ia kaꞌ koa tapundur lalu tumakng kaꞌ tanah. 7 Lalu Yesus batanyaꞌ agiꞌ kaꞌ ia kaꞌ koa: “Sae keꞌ nang kitaꞌ ngagoꞌiꞌ?” Sahut nya kaꞌ koa: “Yesus, urakng Nasaret.” 8 Sahut Yesus: “Dah Ku-madahatn kaꞌ kitaꞌ, Akulah Ia. Kadeꞌ Aku nang kitaꞌ ngagoꞌiꞌ biaratnlah ia kaꞌ kea dari.” 9 Man pakataatn-Nya koa ganaplah ahe nang dah di-Nya ngataatn sanapeꞌnya: “Dari ia kaꞌ koa nang Kitaꞌ nyarahatn kaꞌ Aku, inaꞌ saurakng pun nang Ku-biaratn binasa.b” 10 Waꞌtu koa, Simon Petrus ngincakng lading, lalu mabut lading koa dari sarakngnya man marakng tarenyekng nang sabalah kanan amba ulutn Imam Agung koa sampe putus. Dama amba koa Malkus. 11 Kata Yesus kaꞌ Simon Petrus: “Tamaꞌan kaꞌ sarakngnya ladingnyu koa; Aku arus nyocok cawan kasingsaraatn nang di Apaꞌ mareꞌatn kaꞌ Aku.”cYesus dingincakng ngadap Hanas
18:12-27
(Mat. 26:57-75; Mrk. 14:53-72; Luk. 22:54-71)
12 Lalu parajurit-parajurit Romawi man komandannyad man pangawal-pangawal Rumah Kudus Allah nang dipamimpin-pamimpin Yahudi nyuruh nangkap man ngikat Yesus. 13 Mula-mula ia kaꞌ koa ngincakng Yesus ngadap Hanas, datuꞌ Kayapas. Kayapas nian Imam Agung kaꞌ tahutn koa. 14 Man Kayapaslah nang mareꞌ nasehat kaꞌ pamimpin-pamimpin Yahudi, kadeꞌ labih baik sekoꞌ urakng mati untuꞌ samua bangsa Yahudi.e
15 Simon Petrus man saurakng murit lain nunaꞌan Yesus. Murit koa kanal kaꞌ Imam Agung man ia tamaꞌ sama-sama man Yesus kaꞌ alaman istana Imam Agung, 16 tapi Petrus nunggu kaꞌ luar, kaꞌ samak pintu. Lalu murit lain tadi, nang nganal Imam Agung, mulakng kaꞌ luar, ngomong man nangbini panjaga pintu; lalu murit koa ngincakng Petrus tamaꞌ. 17 Palayan nangbini nang nyaga pintu koa bakata kaꞌ Petrus: “Bukeꞌ keꞌ kao ugaꞌ murit Urakng koa?” Sahut Petrus: “Bukeꞌ!” 18 Samintara koa amba-amba man panjaga-panjaga Rumah Kudus Allah dah marungkutn api, barang miah dingin waꞌtu koa; man ia kaꞌ koa ngangatiꞌ tubuh nya kaꞌ koa kaꞌ samak api koa. Petrus badiri ngangatiꞌ tubuhnya sama-sama man ia kaꞌ koa.
19 Lalu mulaiꞌlah Imam Agung nanyaiꞌ Yesus tentang murit-murit-Nya man tentang ajaran-Nya. 20 Sahut Yesus kaꞌ ia: “Aku ngomong tarus tarang kaꞌ teaꞌ urakng rami: Aku kaja ngajar kaꞌ rumah-rumah tampat sumbayang man kaꞌ alaman Rumah Allah, tampat samua urakng Yahudi bakomoꞌ; aku naꞌ suah ngomong nosok-nosok, 21 jaji ngahe kitaꞌ nanyaꞌiꞌ Aku? Tanyaꞌiꞌlah ia kaꞌ koa nang dah nangngar Aku ngajar. Pasti ia kaꞌ koa nauꞌan ahe nang Ku-ngataatn.” 22 Takaꞌ Yesus bakata lekoa, saurakng dari pangawal diꞌkoa nampar-Nya man bakata: “Sidi barani Kao bakata lekoa kaꞌ Imam Agung!” 23 Sahut Yesus: “Kadeꞌ Aku ngataatn hal nang salah, padahatn kaꞌ dian ahe salahnya! Tapi kadeꞌ nang Ku-ngataatn koa ingkaꞌ banar, ngahe kao nampar Aku?” 24 Lalu Hanas nyuruh urakng ngincakng Yesus kaꞌ Kayapas, Imam Agung koa. Kokot-Nya masih tatap dingikat.
25 Simon Petrus masih badiri ngangatiꞌ tubuh. Kata urakng-urakng diꞌkoa kaꞌ ia: “Inaꞌ keꞌ kao ugaꞌ saurakng murit-Nya?” Ia basangkal, katanya: “Bukeꞌ!” 26 Saurakng amba Imam Agung koa, kaluarga dari urakng nang tarenyekngnya di Petrus natak koa bakata: “Ku neleꞌ kao kaꞌ kabon koa tadi sama-sama man Urakng koa. Banarkan?” 27 Lalu Petrus basangkal agiꞌ man takaꞌ koalah manok ningkook.
Yesus kaꞌ adapatn Pilatus
18:28-38a
(Mat. 27:1-2, 11-14; Mrk. 15:1-5; Luk. 23:1-5)
28 Alapm-alapm sidi ia kaꞌ koa ngincakng Yesus dari rumah Kayapas kaꞌ istana gubernur. Urakng-urakng Yahudi inaꞌ tamaꞌ kaꞌ dalapm istana, biar ia kaꞌ koa inaꞌ jaji najis secara agama; jukut ia kaꞌ koa maoꞌ makatn makanan ari raya Paska. 29 Jadi, Pilatus ampus kaꞌ luar namuiꞌ ia kaꞌ koa man batanyaꞌ: “Ahe nang kitaꞌ nuduhatn kaꞌ Urakng nian?” 30 Sahut nya kaꞌ koa: “Kadeꞌ Ia bukeꞌ saurakng panjahat, kami inaꞌ nyarahatnnaꞌ Nya kaꞌ kitaꞌ!” 31 Kata Pilatus kaꞌ ia kaꞌ koa: “Incaknglah Ia man akimiꞌ nurut ukum Torat kitaꞌ.” Kata urakng-urakng Yahudi kaꞌ koa: “Kami inaꞌ mulih ngukum mati urakng.” 32 Jaji ganaplah pakataatn Yesus nang Nya ngataatn untuꞌ madahatn lemae caranya Ia matiaꞌ.f
33 Pilatus tamaꞌ agiꞌ kaꞌ istana man nyaruꞌ Yesus, lalu batanyaꞌ: “Ahe keꞌ Kao raja urakng Yahudi?” 34 Sahut Yesus: “Ahe keꞌ kitaꞌ ngataatn hal koa dari ati kitaꞌ babaro, ato urakng lain nang ngataatnnya kaꞌ kitaꞌ tentang Aku?” 35 Sahut Pilatus: “Aku bukeꞌ urakng Yahudi! Bangsa-Nyu babaro man imam-imam kapalaꞌ nang dah nyarahatn Kao kaꞌ aku; ahe keꞌ nang dah di-Nyu manjawat?” 36 Sahut Yesus: “Karajaan-Ku bukeꞌ dari dunia nian; kadeꞌ karajaan-Ku dari dunia nian, pasti amba-amba-Ku dah malawan, biar Aku ame disarahatn kaꞌ urakng-urakng Yahudi. Tapi karajaan-Ku bukeꞌ dari dunia nian.” 37 Lalu kata Pilatus kaꞌ Ia: “Jaji Kitaꞌ raja.” Sahut Yesus: “Kitaꞌ nang ngataatn kadeꞌ Aku raja. Untuꞌ koalah Aku dimaranakatn man untuꞌ koalah Aku atakng kaꞌ dalapm dunia, biar Aku basaksi tentang kabanaran; tiap urakng nang barasal dari kabanaran nangngaratn suara-Ku.” 38a Pilatus batanyaꞌ kaꞌ Ia: “Ahe ratinya kabanaran koa?”
Pilatus ngukum mati Yesus
18:38b–19:16a
(Mat. 27:15-31; Mrk. 15:6-20; Luk. 23:13-25)
38b Lakaꞌ bakata lekoa, Pilatus kaluar agiꞌ namuiꞌ urakng-urakng Yahudi man bakata kaꞌ ia kaꞌ koa: “Aku inaꞌ namu kasalahatn ahe pun kaꞌ Urakng nian. 39 Tapi nurut kabiasaan kitaꞌ kadeꞌ ari raya Paska aku mebasatn saurakng untuꞌ kitaꞌ. Maoꞌ keꞌ kitaꞌ, kadeꞌ aku ngalapasatn raja urakng Yahudi untuꞌ kitaꞌ?” 40 Kampak urakng-urakng Yahudi kaꞌ koa: “Ame Urakng nian, tapi Barabas!” Barabas koa saurakng parampok.