Yesus kaꞌ adapatn Pilatus
15:1-15
15
Alapm arinya imam-imam kapalaꞌ man sigana pamimpin Yahudi, guru-guru agama man sigana Sidang Agama dah bolat pakatnya. Ia kaꞌ koa ngikat Yesus lalu ngincakng-Nya man nyarahatn-Nya kaꞌ Pilatus gubernur nagari Roma. 2 Pilatus batanyaꞌ kaꞌ Yesus, “Kitaꞌ keꞌ raja urakng Yahudi?” Sahut Yesus, “Lea koa jakata kitaꞌ.” 3 Lalu imam-imam kapalaꞌ ngalaporatn manyak tuduhatn kasalahatn tentang Yesus. 4 Pilatus batanyaꞌ agiꞌ kaꞌ Yesus jakatanya, “Nanaꞌ keꞌ Kitaꞌ pane nyahut? Dangngar manyak sidi nang dinuduhatn kaꞌ Kitaꞌ!” 5 Tapi Yesus sidi baiꞌ nyahut, sampe-sampe Pilatus sidi heran.6 Tiap tahutn ari raya Paska kaꞌ Yerusalem, ada kabiasaan ngalapasatn saurakng tahanan nurutiꞌ kamaoꞌan masarakat. 7 Kaꞌ dalapm pinjara, kaꞌ antara pambarontak-pambarontak nang manjawat pambunuhan kaꞌ waꞌtu karusuhan, ada saurakng badama Barabas. 8 Lalu urakng rami atakng man mintaꞌ kaꞌ Pilatus biar ia ngalapasatn saurakng tahanan lea biasanya. 9 Pilatus batanyaꞌ kaꞌ ia kaꞌ koa, “Maoꞌ keꞌ kitaꞌ kadeꞌ aku ngalapasatn raja urakng Yahudi nian?” 10 Tagal Pilatus dah nauꞌan kadeꞌ imam-imam kapalaꞌ nyarahatn Yesus koa kaꞌ ia tagal rusiꞌ ati. 11 Tapi imam-imam kapalaꞌ ngasut urakng rami mintaꞌ kaꞌ Pilatus kadeꞌ Barabas dibebasatn untuꞌ ia kaꞌ koa, bukeꞌnya Yesus. 12 Lalu Pilatus batanyaꞌ agiꞌ kaꞌ ia kaꞌ koa, “Kadeꞌ lea koa, ahe nang ku panjawataꞌ kaꞌ Yesus nang di kitaꞌ nyabut raja urakng Yahudi nian?” 13 Tagal koa ia kaꞌ koa bangampakatn agiꞌ, jakatanya, “Salipatn Ia!” 14 Lalu Pilatus batanyaꞌ kaꞌ ia kaꞌ koa, “Tapi ahe keꞌ kajahatan-Nya?” Lalu ia kaꞌ koa siaꞌ miah bangampakatn, “Salipatn maꞌan Ia!” 15 Tagal Pilatus maoꞌ ngarepoatnaꞌ ati urakng rami koa, ia mebasatn Barabas untuꞌ ia kaꞌ koa. Lakaꞌ koa Yesus dinyambuk lalu dinyarahatn untuꞌ disalipatn.
Yesus dingoloꞌ-ngoloꞌ
15:16-20a
(Mat. 27:27-31; Yoh. 19:2-3)
16 Jaji tantara-tantara kaꞌ koa ngincakng Yesus tamaꞌ kaꞌ samiꞌ tampat sidang pangadilan kaꞌ dalapm istana. Lalu dinyaruꞌ samua tantara koa biar bakomoꞌ diꞌ koa. 17 Yesus dimareꞌ jubah ungu dimakeatn kaꞌ tubuh-Nya, lalu tantara-tantara kaꞌ koa nganyam mahkota duri man dimakeatn kaꞌ kapala-Nya. 18 Lakaꞌ koa ia kaꞌ koa bapuraꞌ-puraꞌ hormat kaꞌ Yesus, jakatanya, “Salam, O raja urakng Yahudi!” 19 Ia kaꞌ koa mangkongiꞌ kapala-Nya man buluh, ugaꞌ ngalujahiꞌ-Nya man balutut nyambah-Nya. 20a Lakaꞌ ngoloꞌ-ngoloꞌ Yesus, ia kaꞌ koa mukaꞌ jubah ungu kaꞌ tubuh-Nya, lalu makeatn agiꞌ baju-Nya.
Yesus dinyalip
15:20b-32
20b Lalu Yesus dingincakng kaluas untuꞌ disalipatn. 21 Takaꞌ ia kaꞌ koa tagah bajalatn, ia kaꞌ koa batamu man saurakng badama Simon apaꞌ Aleksander man Rupus dari desa Kirene, ia baruꞌ atakng dari luar kota. Tantara Roma koa maksa Simon mikut kayu salip Yesus.
22 Ia kaꞌ koa ngincakng Yesus kaꞌ tampat nang badama Golgota, nang ratinya, Tampat Tangkoraꞌ. 23 Lalu ia kaꞌ koa mareꞌ anggur bacampur gatah puhutn mur kaꞌ Yesus, tapi Ia baiꞌ nyocoknya. 24 Lakaꞌ koa ia kaꞌ koa makulatn Yesus kaꞌ kayu salip, lalu baundi untuꞌ nantuatn sae-sae jaꞌ nang namuaꞌ pakean-Nya.a
25 Yesus dimakulatn kaꞌ kayu salip jam sambilan alapm. 26 Kaꞌ atas kayu salip-Nya dimakulatn satatak papatn nang batulisan, “Raja Urakng Yahudi alasan Ia dingukum.”
27 Ia kaꞌ koa ugaꞌ makulatn dua urakng parampok kaꞌ kayu salip barage man Yesus, saurakng kaꞌ sabalah kanan-Nya man saurakng agiꞌ kaꞌ sabalah kebaꞌ-Nya [ 28 Lea koalah ganap ayat Kitap Suci nang babunyi, “Yesus koa masok etongan kaꞌ antara panjahat-panjahat.”]
29 Urakng-urakng nang lewat diꞌkoa ngina-Nya, man sambil mageleng kapala ia kaꞌ koa bakata, “O Kitaꞌ nang maoꞌ ngarobohatnnaꞌ Rumah Kudus Allah dalapm waꞌtu talu ari.b 30 Coba turutn dari kayu salip koa man salamatatn diriꞌ Kitaꞌ babaro!” 31 Lea koa ugaꞌ imam-imam kapalaꞌ man guru-guru agama ngoloꞌ Yesus. Ia kaꞌ koa bakata sekoꞌ man nang lain, “Ia nyalamatatn urakng lain, tapi Ia inaꞌ baya nyalamatatn diriꞌ-Nya babaro. 32 Kadeꞌ Ia banar-banar Karistus Raja Panyalamat, raja bangsa Israel, coba Ia turutn dari kayu salip koa, biar kami neleꞌ man pucayaꞌ kaꞌ Ia!” Kadua urakng nang dimakulatn kaꞌ kayu salip man Yesus koa pun ngina Yesus ugaꞌ.
Yesus mati
15:33-41
(Mat. 27:45-56; Luk. 23:44-49; Yoh. 19:28-30)
33 Bamula jam dua balas tangah ari, tiba-tiba sigana abut nang kaꞌ tampat koa patakng sampe jam talu gumareꞌ. 34 Kaꞌ jam talu koa Yesus ngampak man suara nang nyaring, “Eloi, Eloi, lama sabakhtanic?” Nang ratinya, “Allah-Ku, Allah-Ku ngahe Kitaꞌ ningalatn Aku?”d 35 Sangahe urakng nang ada badiri diꞌkoa nangngar kampak Yesus koa, lalu bakata, “Dangngar, Ia nyaruꞌ nabi Elia!” 36 Lakaꞌ koa saurakng atakng batalamaꞌ ngincakng bunga karang, ia make sabatakng buluh di nya nyalupatn kaꞌ dalapm anggur masapm lalu nyoloꞌatn kaꞌ molot Yesus, man bakata, “Diriꞌ tunggu man neleꞌnya ahe keꞌ Elia nurunannaꞌ-Nya dari salib koa.”e 37 Lalu Yesus ngampak man suara nang nyarikng Ia mutusatn sengat-Nya. 38 Takaꞌ koa ugaꞌ tirai nang bagantukng kaꞌ dalapm Rumah Kudus Allah koa rantak jaji dua dari atas sampe kaꞌ babah.f 39 Perwira tantara nang badiri kaꞌ adapatn salib koa, neleꞌ leamae Yesus mati. Ia bakata, “Sidi banar urakng nian Anak Allah!”
40 Ada ugaꞌ sangahe urakng nangbini neleꞌ dari jauh, kaꞌ antaranya koa Maria Magdalena, Maria (uweꞌ Yoses man Yakobus nang giꞌ mudaꞌ) man ugaꞌ Salome.g 41 Ia kaꞌ koa ingkaꞌ dah suah nunaꞌan Yesus man ngalayaniꞌ-Nya waꞌtu kaꞌ Galilea. Man rami agiꞌ diꞌkoa nangbini-nangbini lain nang dah atakng kaꞌ Yerusalem barage man Yesus.
Yesus dinyubur
15:42-47
(Mat. 27:57-61; Luk. 23:50-56; Yoh. 19:38-42)
42 Samintara dah siaꞌ gumareꞌ, man ari koa ari persiapanaꞌ Sabat ampaginya. 43 Tagal koa saurakng nang badama Yusup, nang asalnya dari kota Arimatea, ia saurakng dari anggota Sidang Agama. Ia urakng nang baik man dihormatiꞌ urakng nang giꞌ tagah ngantiꞌatn arinya Allah bamulaaꞌ marentah jaji Raja. Ia maranian diriꞌnya ngadap Pilatus mintaꞌ mayat Yesus. 44 Pilatus heran nangngar kadeꞌ Yesus dah mati sanapeꞌ malam. Lalu ia nyaruꞌ perwira tantara man batanyaꞌ sidi keꞌ Yesus koa dah mati. 45 Lakaꞌ Pilatus nangngar laporan perwira tantara koa kadeꞌ Yesus koa dah batol mati, Pilatus ngijinan Yusup naap mayat Yesus. 46 Yusup pun mali kaen putih dari lenan alush, ia nurunan mayat Yesus dari kayu salip lalu mungkusnya man kaen koa. Lalu ia nguringan Yesus kaꞌ dalapm subur nang dinabok kaꞌ dalapm bukit batu. Lakaꞌ koa ia maringkatn batu nutupiꞌ pintu subur koa. 47 Maria Makdalena man Maria uweꞌ Yoses koa neleꞌ ugaꞌ leamae mayat Yesus dingalakaꞌatn kaꞌ dalapm subur koa.