INJIL LUKAS
Pamulaatn
Kitap Injil nang di Lukas nyonteng madahatn tentang Yesus Raja Panyalamat nang di Tuhan Allah nyanjiatn untuꞌ urakng Israel man untuꞌ sigana talino. Nang nyontengan kitap nian badama Lukas, saurakng tabip nang ngayukngiꞌ Paulus kaꞌ pajalanan ngesahatn Kabar nang Gagas (Kolose 4:14; 2 Timotius 4:11; Filemon 24). Mula-mula, Lukas naliti pakataatn man gesah kaidupatn Yesus dari urakng nang sama-sama man Yesus (1:1-2). Dah lakaꞌ naliti sigananya koa, Lukas nyontengan Kitap Injil nian.
Kaꞌ dalapm Kitap Injil nian, Lukas nyalasatn tujuan Yesus atakng kaꞌ dunia lea nian: “untuꞌ ngagoꞌ man nyalamatatnnaꞌ urakng nang sasat maraga idupnya” (19:10). Yesus atakng kaꞌ dunia untuꞌ ngadaatn kasalamatatn untuꞌ sigana talino, bukeꞌ untuꞌ urakng Yahudi ihan (baca 2:10; 2:30-32; 3:6; 24:47). Kadeꞌ diriꞌ maca Kitap Injil nian, sidi jalas kasih-Nya Tuhan Yesus kaꞌ sigana urakng nang masikin idupnya (baca 6:10; 7:22; 14:12-13; 21:1-4), man kaꞌ urakng nang badosa (baca 5:30; 7:37-50; 15:1-2). Ia ugaꞌ nojokatn kabaikatn ati-Nya kaꞌ nangbini, nang kaꞌ jaman koa inaꞌ diparadatatn (baca 7:11-17; 8:2-3; 10:38-42; 13:10-13; 21:1-4; 23:27-31), man ugaꞌ kaꞌ kamudaꞌ-kamudaꞌ (baca 8:41-42, 54-55; 9:38-42; 9:46-48; 18:15-17).