Yesus mulakng idup dari kamatiatn
16:1-8
(Mat. 28:1-10; Luk. 24:1-12; Yoh. 20:1-10)
16
Takaꞌ ari Sabat dah lewat, Maria Makdalena man Maria uweꞌ Yakobus man Salome mali ramuan-ramuan untuꞌ minyakiaꞌ bangke Yesus. 2 Alapm-alapm sidi takaꞌ mataari baruꞌ tarabit kaꞌ ari minggu koa, ia kaꞌ koa ampus kaꞌ pasuburatn. 3 Sambil kaꞌ pajalanan ia kaꞌ koa bakata sekoꞌ man nang lain, “Sae nang baya mantoꞌ diriꞌ maringkatn batu ayaꞌ nang jaji panutup subur koa?” 4 Tapi takaꞌ ia kaꞌ koa neleꞌ kaꞌ samak subur koa, batu panutup nang ayaꞌ koa dah tageser. 5 Lalu ia kaꞌ koa tamaꞌ kaꞌ dalapm subur koa, ia kaꞌ koa neleꞌ ada saurakng nangbujakng nang bapakean putih duduk kaꞌ sabalah kanan subur koa, ia kaꞌ koa miah takajut. 6 Tapi urakng koa bakata kaꞌ ia kaꞌ koa, “Ame galiꞌ! Kitaꞌ ngagoꞌiꞌ Yesus urakng Nasaret, nang di makulatn kaꞌ kayu salip koa. Ia dah mulakng idup. Teleꞌ! Nian tampat nya kaꞌ koa nguringan Yesus. 7 Tapi ampeatn ampuslah, padahatn kaꞌ murit-murit-Nya man Petrus, Ia nyintoloꞌiaꞌ kitaꞌ kaꞌ Galilea. Di koa kitaꞌ neleꞌaꞌ-Nya, lea ahe nang dah di-Nya madahatn kaꞌ kitaꞌ.”a 8 Lalu nangbini-nangbini kaꞌ koa daꞌ ningalatn subur koa, tagal ia kaꞌ koa sidi kagaliꞌanan. Man ia kaꞌ koa inaꞌ barani bakata ahe-ahe kaꞌ sae pun tagal galiꞌ.Man baganceh nangbini-nangbini kaꞌ koa nyampeatn samua pasatn koa kaꞌ Petrus man ayungannya. Lakaꞌ koa Yesus babaro ngiripm murit-murit-Nya ngesahatn dari timur kaꞌ barat barita nang suci nang pasti jaji tentang kasalamatan nang inaꞌ bakatampusatn koa.
Yesus sangahe kali madahatn diriꞌ-Nya man ngiripm murit-murit-Nya
Yesus tarangkat kaꞌ saruga
16:9-20
9 [Ari minggu koa, alapm-alapm sidi Yesus dah mulakng idup dari kamatiatn. Mula-mula ia madahatn diriꞌ-Nya kaꞌ Maria Magdalena. Yesus suah ngoser tujuh setan dari nya koa. 10 Lalu nangbini koa ampus bapadah kaꞌ ayungannya, nang suah nunaꞌan Yesus. Waꞌtu koa, ia kaꞌ koa tagah bakanang man ngeakiꞌ Yesus. 11 Tapi takaꞌ ia kaꞌ koa nangngar kadeꞌ Yesus dah mulakng idup man Maria dah suah neleꞌ-Nya, ia kaꞌ koa inaꞌ pucayaꞌ.
12 Inaꞌ lama lakaꞌ koa Yesus neleꞌatn diriꞌ-Nya kaꞌ dua urakng pangikut-Nya man cara nang lain, takaꞌ nyadua tagah kaꞌ pajalanan kaꞌ sabuah kampokng. 13 Lalu nyadua koa mulakng man madahiꞌ ayungannya nang lain tapi ayungannya nang lain koa inaꞌ pucayaꞌ kaꞌ nyadua koa.
14 Ahirnya Yesus neleꞌatn diriꞌ-Nya kaꞌ kasabalas murit-Nya nang giꞌ tagah makatn. Yesus nagur ia kaꞌ koa tagal ia kaꞌ koa sidi karas kapala man baiꞌ pucayaꞌ kadeꞌ Yesus dah mulakng idup biarpun dah dimadahiꞌ disangahe urakng saksi mata. 15 Lalu Yesus bakata kaꞌ ia kaꞌ koa, “Ampuslah kaꞌ sigana aiꞌ tanah man gesahatn Kabar Baik nang dari Allah kaꞌ sigana talino.b 16 Sae nang pucayaꞌ man dibaptis ia kaꞌ koa disalamatatnnaꞌ, tapi sae nang inaꞌ pucayaꞌ diukumaꞌ. 17 Tanda-tanda nian nyarataiaꞌ urakng-urakng nang pucayaꞌ kaꞌ Aku, ia kaꞌ koa ngoser setan-setan make dama-Ku, ia kaꞌ koa ngomongngaꞌ make bahasa-bahasa nang inaꞌ suah dipalajariꞌ. 18 Kadeꞌ ia kaꞌ koa nyingiꞌiꞌ ular ato nyocok racutn, ia kaꞌ koa inaꞌ cilaka. Kadeꞌ ia kaꞌ koa ngangkat kokot kaꞌ urakng-urakng nang sakit, urakng-urakng kaꞌ koa jaji samuh.”
19 Lakaꞌ Yesus bakata lea koa kaꞌ ia kaꞌ koa, tarangkatlah Ia kaꞌ saruga, lalu duduk kaꞌ sabalah kanan Allah.c 20 Ia kaꞌ koa pun ampus ngesahatn Kabar Baik kaꞌ sigana aiꞌ tanah, man Tuhan Yesus nyarataiꞌ ia kaꞌ koa masing-masing man manjawat manyak kaajaipatn nang jaji bukti kadeꞌ kabar kasalamatan nang ia kaꞌ koa ngesahatn koa sidi banar. Amin.]