Yesus mulakng idup
(Mat. 28:1-10; Mrk. 16:1-8; Yoh. 20:1-10)
24
Kaꞌ ari Minggu,
takaꞌ giꞌ bukaꞌ kalapm,
nangbini kaꞌ koa ampus kaꞌ subur Yesus ngincakng ramuan-ramuan nang dah di nya kaꞌ koa nyiapatn.
2 Ia kaꞌ koa neleꞌ batu panutup subur koa dah bageser.
3 Lalu ia kaꞌ koa tamaꞌ kaꞌ dalapm subur koa,
tapi nanaꞌ neleꞌ mayat Tuhan Yesus kaꞌ diꞌkoa.
4 Giꞌ tagah ia kaꞌ koa badiri kabingungan mikiriꞌ jukut koa,
tiba-tiba dua urakng man pakean nang basaho badiri kaꞌ samak ia kaꞌ koa.
5 Ia kaꞌ koa sidi kagaliꞌanan,
lalu balutut man muha ngadap kaꞌ tanah.
Takaꞌ koa ugaꞌ dua urakng koa bakata kaꞌ ia kaꞌ koa,
“Ngahe kitaꞌ ngagoꞌ urakng nang idup kaꞌ antara urakng nang mati?
6 Ia inaꞌ ada kaꞌ dian.
Ia dah mulakng idup!
Ingat boh ahe nang dah di Nya ngataatn kaꞌ kitaꞌ waꞌtu Ia masih kaꞌ Galilea,
7 kadeꞌ Anak Manunsia arus disarahatn kaꞌ urakng badosa,
lalu disalipatn,
tapi kaꞌ ari nang katalu Ia mulakngaꞌ idup.”
8 Lalu taringatlah nangbini-nangbini koa kadeꞌ Yesus dah suah bakata lekoa.
9 Lalu ia kaꞌ koa ningalatn subur koa ampus kaꞌ kasabalas murit Yesus man kanaꞌ pangikut-Nya nang lain,
ngesahatn sigana ahe nang dah jaji.
10 Nangbini-nangbini nang bapadah kaꞌ rasul-rasul Yesus koa:
Maria dari desa Magdala,
Yohana,
man Maria uweꞌ Yakobus,
man nangbini nang lainnya nang sama-sama man ia kaꞌ koa.
11 Tapi rasul-rasul kaꞌ koa nyangka kadeꞌ nangbini-nangbini koa hanya ngesahatn nang bukeꞌ-bukeꞌ.
Ia kaꞌ koa inaꞌ pucayaꞌ kaꞌ gesah nangbini kaꞌ koa.
12 Tapi Petrus badiri lalu batilamaꞌ notok subur koa,
nya moboꞌ kaꞌ dalapm subur koa kaen kapan ihan nang ada.
Petrus sidi kaheranan,
lalu pulakng sambil batanyaꞌ-tanyaꞌ kaꞌ dalapm atinya tentang ahe nang dah jaji koa.
Kaꞌ tangah maraga notok Emaus
13 Kaꞌ ari koa ugaꞌ,
dua urakng pangikut Yesus bajalatn ampus kaꞌ soteꞌ desa nang badama Emaus,
kira-kira sabalas kilometer jauhnya dari Yerusalem.
14 Sambil bajalatn nyadua ngomongan sigana ahe nang dah jaji koa.
15 Takaꞌ nyadua ngomongan ahe nang dah jaji koa man batukar pikiran,
batol ihan Yesus nang atakng man bajalatn sama-sama man nyadua.
16 Ia dua neleꞌ Yesus tapi intah lemae nyadua inaꞌ kanal kaꞌ Yesus.
17 Lalu Yesus batanyaꞌ,
“Ahe nang kitaꞌ ngomongan kaꞌ tangah maraga nian?”
Ia kaꞌ koa badiapm,
bamuha susah.
18 Lalu saurakng dari nyadua nang badama Kleopas,
batanyaꞌ kaꞌ Yesus,
“Kitaꞌ geꞌ sekoꞌ-sekoꞌnya urakng asing kaꞌ Yerusalem,
nang inaꞌ nauꞌan ahe nang dah jaji kaꞌ Yerusalem ahir-ahir nian?”
19 Tanyaꞌ Yesus,
“Ahe nang dah jaji?”
Sahut nyadua,
“Sigana hal nang dah jaji kaꞌ Yesus urakng dari Nasaret,
Ia koa nabi.
Kata-kata-Nya man ahe nang dah Nya manjawat sidi bakuasa baik kaꞌ mata Tuhan Allah maoꞌpun kaꞌ mata sigana urakng.
20 Tapi imam-imam kapalaꞌ man pamimpin-pamimpin bangsa diriꞌ nyarahatn Ia untuꞌ diukum mati,
man cara makulatn-Nya kaꞌ kayu salip.
21 Padahal kami ngarapatn kadeꞌ Ialah nang mebasatnnaꞌ bangsa Israel!
Tapi ari nian,
dah katalu arinya sigananya koa dah jaji.
22 Man ugaꞌ alapm tadi sangahe urakng nangbini dari kalompok kami nang manjawat kami takajut.
Jukut tagah giꞌ bukaꞌ kalapm ia kaꞌ koa dah ampus kaꞌ subur,
23 tapi nanaꞌ namu mayat Yesus kaꞌ subur.
Lalu nangbini kaꞌ koa mulakng man bapadah,
kadeꞌ ia kaꞌ koa neleꞌ malaekat-malaekat nang bakata kadeꞌ Yesus mulakng idup.
24 Sangahe urakng dari kami lalu ampus kaꞌ subur man neleꞌ,
ahe nang dah di nangbini kaꞌ koa ngataatn memang banar.
Tapi ia kaꞌ koa inaꞌ neleꞌ Yesus.”
25 Lalu Yesus bakata kaꞌ ia kaꞌ koa,
“Kitaꞌ sidi bodo!
Sidi babal kitaꞌ untuꞌ mucayaꞌiꞌ sigana nang udah di naꞌ nabi ngataatn!
26 Bukeꞌ geꞌ Raja Panyalamat arus ngalamiaꞌ doloꞌ kasingsaraatn koa,
baruꞌ sampe kaꞌ arinya Ia dijunyukng tingi?”
27 Lakaꞌ koa Yesus nyalasatn kaꞌ ia kaꞌ koa sigana ahe nang taconteng kaꞌ dalapm Alkitap tentang diriꞌ-Nya,
bamula dari Torat Musa man kitap nabi-nabi.
28 Takaꞌ ia kaꞌ koa dah samak man desa nang dinuju,
leanya Yesus maoꞌ narusatn pajalanan-Nya.
29 Tapi ia kaꞌ koa nahan-Nya.
“Bamalam kaꞌ tampat kami,”
jakata nyadua koa kaꞌ Yesus,
“ampeatn dah amper malam man dah patakng parimpasa ugaꞌ.”
Jaji Yesus tamaꞌ untuꞌ bamalam kaꞌ tampatnya kaꞌ koa.
30 Waꞌtu makatn man ia kaꞌ koa Yesus naap roti,
ngucap sukur kaꞌ Tuhan Allah,
lalu nyempak-nyempak roti koa man mareꞌatnnya kaꞌ ia kaꞌ koa.
31 Tiba-tiba ia kaꞌ koa sadar kadeꞌ koalah Yesus.
Tapi Yesus langit dari paneleꞌanannya kaꞌ koa.
32 Lalu katanya kaꞌ ayukngnya koa,
“Inaꞌ geꞌ ati diriꞌ karepoatn takaꞌ Ia ngomong man diriꞌ kaꞌ tangah maraga tadi,
takaꞌ Ia nyalasatn isiꞌ Alkitap kaꞌ diriꞌ?”
33 Waꞌtu koa ugaꞌ ia kaꞌ koa lumpat man mulakng kaꞌ Yerusalem.
Diꞌkoa,
dua urakng koa namuiꞌ kasabalas murit nang giꞌ tagah bakomoꞌ man pangikut Yesus nang lainnya.
34 Pangikut-pangikut nang ada kaꞌ Yerusalem koa madahatn kaꞌ dua urakng koa,
“Tuhan Yesus banar-banar dah mulakng idup man dah neleꞌatn diriꞌ-Nya kaꞌ Simon!”
35 Kadua pangikut Yesus nang baruꞌ atakng koa ugaꞌ ngesahatn pangalaman nyadua kaꞌ pajalanan,
man lemae nyadua kanal kaꞌ Yesus takaꞌ Ia nyempak-nyempak roti.
Yesus neleꞌatn diriꞌ-Nya kaꞌ pangikut-pangikut-Nya
(Mat. 28:16-20; Mrk. 16:14-18; Yoh. 20:19-23; Kis. 1:6-8)
36 Takaꞌ ia kaꞌ koa giꞌ tagah bagesah,
tiba-tiba Yesus badiri kaꞌ tangah-tangahnya kaꞌ koa man bakata,
“Kiraꞌnya baati nang damelah kitaꞌ!”
37 Ia kaꞌ koa takajut man kagaliꞌanan,
nya pikir ia kaꞌ koa neleꞌ antu.
38 Tapi Yesus bakata,
“Amelah kitaꞌ galiꞌ,
Amelah kitaꞌ jaji ragu.
39 Teleꞌ langan-Ku man paha-Ku.
Nian Aku,
bukeꞌ antu lea nang kitaꞌ nyangka.
Jangkam man telelah,
Aku bainsiꞌ man batulakng,
tapi antu inaꞌ bainsiꞌ man batulakng.”
40 Yesus bakata lekoa sambil neleꞌatn langan man paha-Nya kaꞌ ia kaꞌ koa.
41 Ia kaꞌ koa giꞌ napeꞌ pucayaꞌ tagal sidi karepoatn man heran.
Waꞌtu koa ugaꞌ,
Yesus batanyaꞌ kaꞌ ia kaꞌ koa,
“Ahe geꞌ kitaꞌ ada bapamakanan kaꞌ dian?”
42 Ia kaꞌ koa mareꞌatn kaꞌ Yesus satatak ikatn panggang.
43 Yesus naap ikatn koa,
lalu makatniꞌnya kaꞌ adapatnnya kaꞌ koa.
44 Lakaꞌ koa Yesus bakata kaꞌ ia kaꞌ koa,
“Takaꞌ Aku masih sama-sama man kitaꞌ dah Kumadahatn kaꞌ kitaꞌ,
kadeꞌ sigana ahe nang taconteng tentang Aku kaꞌ dalapm kitap-kitap Torat Musa,
kaꞌ kitap nabi-nabi,
man Masmur,
arus jaji.”
45 Udah koa Yesus mukaꞌ pikirannya kaꞌ koa untuꞌ ngarati Alkitap.
46 Lalu Yesus bakata kaꞌ ia kaꞌ koa,
“Kaꞌ dalapm Alkitap taconteng kadeꞌ Raja Panyalamat arus singsaraaꞌ,
man arus mulakngaꞌ idup dari kamatiatn kaꞌ ari nang katalu.
47 Man ugaꞌ,
utusan-utusan Raja Panyalamat koa arus ngesahatn kabar nian,
kadeꞌ talino arus baranti babuat dosa,
man ugaꞌ kadeꞌ Tuhan Allah ngamponiꞌ dosa.
Kabar koa arus digesahatn kaꞌ sigana bangsa bamula dari Yerusalem.
48 Kitaꞌlah saksi-saksi dari sigananya nian.
49 Man Aku babaro ngiripmaꞌ kaꞌ kitaꞌ ahe nang dah di Apaꞌ nyanjiatn.
Tapi kitaꞌ arus tatap nunggu kaꞌ kota nian sampe kitaꞌ narimaꞌaꞌ kuasa dari Tuhan Allah.”
Yesus tarangkat kaꞌ Saruga
(Mrk. 16:19-20; Kis. 1:9-11)
50 Lakaꞌ koa Yesus maba ia kaꞌ koa kaluas dari kota nyatuk kaꞌ samak Betania.
Diꞌkoa Yesus ngangkat langan-Nya,
lalu mareꞌ tuah kaꞌ ia kaꞌ koa.
51 Giꞌ tagah Ia mareꞌ tuah kaꞌ ia kaꞌ koa,
Yesus tarangkat kaꞌ saruga,
bapisah man murit-murit-Nya.
52 Ia kaꞌ koa balutut nyambah Yesus,
lalu mulakng kaꞌ Yerusalem baati nang sidi miah repo,
53 man kaja muji-muji Tuhan Allah kaꞌ Rumah Kudus Tuhan Allah.