KABAR BAIK NANG DI
YOHANES
NYAMPEATN
Pangantar
Kaꞌ dalapm Kabar Baik nang di Yohanes nyampeatn nian, Yohanes nyalasatn kadeꞌ Yesus koa Pakataatn Allah nang salama-lamanya nang dah jaji talino man badiapm kaꞌ antara diriꞌ. Lea nang di nyampeatn kaꞌ dalapm buku nian, Kabar Baik nian di nyontengan biar nang macanya baya pucayaꞌ kadeꞌ Yesuslah Raja Panyalamat nang di nyanjiatn. Ia Anak Allah babaro. Ugaꞌ biar lewat pucayaꞌ kaꞌ Ia, ia kaꞌ koa namu idup (20:31).
Lakaꞌ pendahuluan nang madahatn kadeꞌ Pakataatn Allah nang salama-lamanya koalah Yesus, bagian pamulaꞌatn buku nian ngesahatn manyak hal-hal ajaip nang Nya manjawat. Hal-hal ajaip koa nojokatn kadeꞌ Yesuslah Raja Panyalamat nang dinyanjiatn, Ia Anak Allah. Masing-masing gesah tentang hal-hal ajaip disarataiꞌ man pakataatn-pakataatn antara Tuhan Yesus man urakng-urakng. Dari pakataatn-pakataatn koa jalaslah ahe nang di hal-hal ajaip koa madahatn. Kaꞌ dalapm bagian nian dinyalasatn kadeꞌ ada urakng nang pucayaꞌ kaꞌ Yesus man jaji murit-Nya, tapi ada ugaꞌ nang nantakng Ia man baiꞌ pucayaꞌ kaꞌ Ia.
Pasal 13-17 nyalasatn lemae akrapnya Yesus man murit-murit-Nya kaꞌ waꞌtu malam takaꞌ Ia ditangkapaꞌ, man lemae Ia nyiapatn sarata nguatatn ati murit-murit malam koa. Pasal-pasal pangabisatn nang nyalasatn tentang lemae Yesus dinangkap man dingadiliꞌ, lemae Ia dinyalip, mati man mulakng idup agiꞌ dari kamatiatn, man lemae Ia madahatn diriꞌ-Nya kaꞌ murit-murit-Nya lakaꞌ Ia mulakng idup.
Gesah tentang nangbini nang katamuan giꞌ tagah babayaꞌ (8:1-11), dimasokatn man tanda kurung pasagi barang manyak naskah man terjemahan-terjemahan jaman deꞌe inaꞌ masokatn gesah koa, tapi nang lain-lainnya masokatnnya kaꞌ manyak tampat.
Dalapm bukunya nian Yohanes nekankan pamareꞌ, idup nang sabatolnya man salamanya nang di Allah mareꞌatn lewat Karistus. Pamareꞌ koa dah mulaiꞌ kaꞌ dunia, man baya dialamiꞌ di urakng-urakng nang narimaꞌ Yesus jaji maraga kaꞌ Allah, nang madahatn Allah, man nang mareꞌ idup. Ciri kusus Yohanes, parumpamaan-parumpamaan nang nya naap dari hal-hal saari-ari untuꞌ nojokatn kabanaran-kabanaran rohani, misalnya: aiꞌ, roti, tarakng, panyaga domba man dombanya, puhutn anggur man buahnya.
Isiꞌ
Pamulaatn 1:1-18
Yohanes Pamaptis man urakng-urakng nang pamulaatn jaji pangikut Yesus 1:19-51
Palayanan Yesus kaꞌ tangah-tangah masarakat 2:1; 12:50
Ari pangabisatn kaꞌ Yerusalem man samak Yerusalem 13:1; 19:42
Yesus mulakng idup dari kamatiatn man neleꞌatn diriꞌ-Nya 20:1-31
Panutup: Yesus neleꞌatn diriꞌ-Nya agiꞌ kaꞌ Galilea 21:1-25