GESAH RASUL-RASUL
Pangantar
Gesah Rasul-Rasul nian sambungan kitap Kabar Baik nang di Lukas nyampeatn. Tujuan Gesah Rasul-Rasul nian nyelasatn lea mae pangikut-pangikut Yesus man pimpinan Roh Allah ngabaratn Kabar Baik tentang Yesus “Kaꞌ Yerusalem, saluruh Yudea, kaꞌ Samaria, man sampe kaꞌ ujukng aiꞌ tanah” (1:8). Kitap nian ngesahatn tentang pajalanan umat Karisten nang dimulaiꞌ kaꞌ antara urakng Yahudi lalu sampe jaji agama kaꞌ saluruh dunia. Urakng nang nyontengan buku nian marasa sidi palaluꞌ manjawat urakng pucayaꞌ kaꞌ urakng nang macanya kadeꞌ urakng-urakng Karisten bukeꞌlah bahaya politik ngancuratnaꞌ pamarentahan nagari Roma, tapi agama Karisten koa ngalangkapiꞌ agama Yahudi. Gesah Rasul-Rasul baya dibagi jaji talu bagian. Kaꞌ dalapm talu bagian koa kateleꞌanan luasnya wilayah kaꞌ di mae Kabar Baik tentang Yesus dingabaratn man gareja dimadiri: (1) Pamulaꞌatn pajalanan umat Karisten kaꞌ Yerusalem lakaꞌ Yesus tarangkat kaꞌ saruga. (2) sampe kaꞌ binua-binua Palestina; man (3) sampe kaꞌ binua nang labih luas agiꞌ kaꞌ nagari-nagari kaꞌ gunara Laut Tengah sampe kaꞌ Roma. Soteꞌ hal nang beda man paling panting kaꞌ dalapm kitap Gesah Rasul-Rasul nian yakoa pakarajaatn Roh Allah nang atakng man koasa kaꞌ urakng-urakng pucayaꞌ kaꞌ Yerusalem kaꞌ waꞌtu ari Pantekosta. Kaꞌ dalapm saluruh kajadian-kajadian nang taconteng kaꞌ dalapm kitapꞌ nian kateleꞌananlah kadeꞌ Roh Allah koa tarus mimpin man nguatatn gareja man pamimpin-pamimpinnya. Gesah nang diajaratn di agama Karisten kaꞌ waꞌtu-waꞌtu pamulaꞌatn nian dimanjawat jaji labih ringkas dalapm sabuah kotbah. Peristiwa-peristiwa nang taconteng kaꞌ dalapm kitap nian nojokatn ugaꞌ sidi bakoasanya gesah koa kaꞌ dalapm kaidupatn urakng-urakng Karisten man kaꞌ dalapm ikatan persaudaraan gereja.
Isiꞌ
Persiapan ontoꞌ pemberitaan 1:1-26
a. Parentah nang pangabisatn man janji mpat kaꞌ Tuhan Yesus 1:1-14
b. Pangganti Yudas 1:15-26
Pemberitaan kaꞌ Yerusalem 2:1; 8:3
Pemberitaan kaꞌ Yudea man Samaria 8:4; 12:25
Palayanan Paulus 13:1; 28:31
a. Pajalanan nang pamulaꞌatn ontoꞌ ngabaratn Kabar Baik 13:1; 14:28
b. Bahaump kaꞌ Yerusalem 15:1-35
c. Pajalanan kadua ontoꞌ ngabaratn Kabar Baik 15:36; 18:22
d. Pajalanan katalu ontoꞌ ngabaratn Kabar Baik 18:23; 21:16
e. Paulus sebagai tahanan ka Yerusalem, Kaisarea, man Roma 21:17; 28:31