GESAH RASUL-RASUL
Roh Kudus dinyanjiatn
1:1-5
1
Bapak Teopilus nang tahormat, kaꞌ dalapm bukuku nang doloꞌ dah ku nyalasatn, sigana ahe nang di Yesus ngarajaatn man di-Nya ngajaratn. 2 Sampe kaꞌ ari Ia tarangkat kaꞌ saruga. Sanapeꞌnya koa, Ia man kuasa Roh Kudus dah mareꞌ parentah-parentah kaꞌ rasul-rasul-Nya nang Nya milih. 3 Ia mati, lalu mulakng idup. Lalu salamaꞌ ampat puluh ari Ia pancah neleꞌatn diriꞌ-Nya man cara nang batol-batol kateleꞌatn kaꞌ rasul-rasul koa, kadeꞌ Ia batol-batol mulakng idup. Ia kaꞌ koa neleꞌ Yesus, Yesus ngomong man ia kaꞌ koa tentang leamae Allah marentah jaji Raja. 4 Lea koa ugaꞌ waꞌtu Yesus bakomoꞌ man naꞌ ayungannya, Ia mareꞌ parentah kaꞌ ayungannya, jakata-Nya: “Ame Tingngalatn Yerusalem. Tunggu jaꞌ, sampe Apaꞌ-Ku mareꞌ ahe nang dah di-Nya nyanjiatn nang dah Ku madahatn kaꞌ kitaꞌ doloꞌ koa.a 5 Kadeꞌ Yohanes maptis man aiꞌ, tapi inaꞌ lama agiꞌ kitaꞌ di baptisaꞌ man Roh Kudus Allah.”bYesus tarangkat kaꞌ saruga
1:6-11
6 Takaꞌ rasul-rasul kaꞌ koa bakomoꞌ sama-sama man Yesus, ayukngnya batanyaꞌ: “Tuhan, ahe keꞌ ampeatn Kitaꞌ maoꞌ madiriatn agiꞌ pamarentahan untuꞌ bangsa Israel?”
7 Tapi Yesus nyahut, “Kitaꞌ inaꞌ palalu naꞌuan kamile waꞌtunya koa jadiaꞌ, kahe Apaꞌ-Ku nang bahak nantuatnnya. 8 Tapi kitaꞌ narimaꞌaꞌ kuasa Roh Kudus Allah, sagaꞌ Roh Kudus dah atakng kaꞌ kitaꞌ man kitaꞌ jajiaꞌ saksi-Ku kaꞌ Yerusalem, kaꞌ sigana Yudea, Samaria sampe kaꞌ ujukng aiꞌ tanah.”c
9 Lakaꞌ Yesus bakata lea koa, Ia tarangkat kaꞌ saruga kaꞌ adapatn matanya kaꞌ koa, man rahuꞌ nutupiꞌnya dari paneleꞌanan nya kaꞌ koa.d 10 Takaꞌ nya kaꞌ koa giꞌ tagah neleꞌ kaꞌ langit, waꞌtu Yesus tarangkat, tiba-tiba dua urakng bapakean putih badiri kaꞌ sabalah nya kaꞌ koa, 11 Lalu bakatalah urakng badua tadi: “O urakng-urakng Galilea, ngahe keꞌ kitaꞌ badiri maꞌan neleꞌ kaꞌ langit koa? Yesus nang kitaꞌ neleꞌ tarangkat kaꞌ saruga koa, Ia atakngngaꞌ agiꞌ kaꞌ dunia nian, lea nang kitaꞌ neleꞌ tadi.”
Rasul-rasul naatiꞌ man ngantiꞌatn janji Roh Kudus Allah
1:12-14
12 Lalu rasul-rasul kaꞌ koa, mulakng agiꞌ kaꞌ Yerusalem mpat kaꞌ Bukit nang disabut Bukit Jaitun, nang jauhnya kira-kira sakilo meter dari Yerusalem. 13 Dah atakng kaꞌ kota Yerusalem koa, naꞌayungannya, ampus kaꞌ tampatnya bamalam, lalu naik kaꞌ samiꞌ loteng. Naꞌ rasul-rasul kaꞌ koa badama Petrus, man Yohanes, Yakobus man Andreas, Pilipus man Tomas, Bartolomeus man Matius, Yakobus anak Alpius, eSimon urakng Selot man Yudas anak Yakobus.f 14 Rasul-rasul kaꞌ koa badoꞌa saati sapikir. Ia kaꞌ koa ugaꞌ badoꞌa sama-sama man Maria, uweꞌ Yesus man kamarkapala-Nya man nangbini-nangbini nang lain.
Panganti Yudas
1:15-26
15 Sangahe ari lakaꞌ koa nang nunaꞌan Karistus bakomoꞌ kurang-labih saratus dua puluh urakng, lalu Petrus pun badiri man bakata kaꞌ ayungannya, jakatanya, 16 Page samadiꞌatn, ahe nang taconteng kaꞌ dalapm Alkitap, arus tajaji. Deꞌe Roh Kudus dah banubuat ngalaluiꞌ Daut tentang Yudas, pamimpin urakng-urakng nang nangkap Yesus koa. 17 Deꞌe Yudas koa salah sekoꞌ dari diriꞌ, ia koa dah dimilih ugaꞌ untuꞌ ikut karaja man diriꞌ. 18 Lalu Magunaꞌan duit kajahatatnnya koa, Yudas dah mali sabalah tanah, lalu ia jantuꞌ tatiharap, sampe parutnya tabure, samua isiꞌ parutnya bakaluaratn.g 19 Samua urakng nang badiapm kaꞌ Yerusalem dah nauꞌan kaꞌ gesah koa, koa tagalnya kaꞌ dalapm bahasa ayukngnya abut koa dimareꞌ dama: Hakal Dama, nang ratinya ‘tanah darah’ 20 “Kaꞌ Kitap Masmur dah taconteng, lea nian:
‘Biarlah tampatnya badiapm jaji sunyiꞌ,
kaꞌ dalapmnya inaꞌ baurakng.’ Ada ugaꞌ taconteng lea nian,
‘Biarlah urakng lain nang ngantinya untuꞌ ngalayaniꞌ Allah.’h
21 Tagal koa, arus ada saurakng untuꞌ nganti Yudas. Tapi, ia aruslah urakng nang sanapeꞌnya kaja ikut kaꞌ dalapm pakomoꞌan diriꞌ, nang ampus sama-sama man Yesus kaꞌ maeaꞌ maꞌan, 22 bamula dari baptisan Yohanes sampe kaꞌ ari Yesus tarangkat kaꞌ saruga ningalatn kami, untuꞌ jaji saksi man kami tentang Yesus mulakng idup.”i
23 Lalu Ia kaꞌ koa ngusulatn dua urakng: Urakng-urakng koa, Yusup nang dinyabut Barsabas nang ugaꞌ dinyabut Yustus, man Matias. 24 Ayungannya kaꞌ koa badoꞌa jakatanya: “O Allah, Kitaꞌ nang nauꞌan ati talino, Kitaꞌ kiraꞌnya nojokatn kaꞌ kami, sae nyadua nian nang Kitaꞌ pilih.” 25 Untuꞌ narimaꞌ jabatan palayanan rasul nang dah di Yudas ninggalatn nang dah jantuꞌ kaꞌ tampat nang wajar untuꞌnya. 26 Lalu nya badua koa di ngundi, undian koa kana kaꞌ Matias, jaji Matias koa dinambahatn kaꞌ etongan kasabalas urakng rasul koa.