Yesus mulakng idup dari antara urakng mati
20:1-10
(Mat. 28:1-10; Mrk. 16:1-8; Luk. 24:1-12)
20
Kaꞌ ari minggu, takaꞌ abut giꞌ miah alapm, ampuslah Maria Makdalena kaꞌ subur koa man ia neleꞌ kadeꞌ batu panutup subur koa dah bageser. 2 Lalu ia batalamaꞌ namuiꞌ Simon Petrus man saurakng murit nang lain nang di Yesus ngasihiꞌ, man bakata kaꞌ ia kaꞌ koa: “Urakng-urakng dah naap Tuhan dari suburnya man kami inaꞌ nauꞌan kaꞌ mae Ia dingalakaatn.”3 Lalu Petrus man murit nang lain koa ampus kaꞌ subur. 4 Kaduanya batalamaꞌ sama-sama, tapi murit nang lain koa labih capat dari Petrus sampe-sampe ia nang doloꞌ namus kaꞌ subur koa. 5 Ia moboꞌ kaꞌ dalapm subur koa man neleꞌ kain putih ihan di koa, tapi ia inaꞌ tamaꞌ. 6 Lalu ataknglah Simon Petrus ugaꞌ nyusul ia man langsung tamaꞌ kaꞌ dalapm subur koa. Ia neleꞌ kain putih ihan di koa. 7 Tapi kain nang dimulatatn kaꞌ kapala Yesus inaꞌ ada kaꞌ samak kain putih koa; tapi dah bagolong kaꞌ tampat lain. 8 Lakaꞌ koa tamaꞌlah ugaꞌ murit nang labih doloꞌ atakng tadi. Ia neleꞌ man pucayaꞌ. 9 Barang salamaꞌ koa ia kaꞌ koa napeꞌ ngarati isiꞌ Kitap Suci kadeꞌ Ia (Tuhan Yesus) arus mulakng idup dari antara urakng mati. 10 Lalu pulaknglah kadua murit koa kaꞌ rumah.
Yesus neleꞌatn diriꞌ-Nya kaꞌ Maria Makdalena
20:11-18
11 Maria Makdalena badiri kaꞌ depan subur sambil ngeak man neleꞌ kaꞌ dalapm subur, 12 lalu ia neleꞌ dua malaekat bapakean putih. Ia kaꞌ koa duduk kaꞌ tampat bakas bangke Yesus, nang sekoꞌ kaꞌ ujukng kapala-Nya man nang sekoꞌnya agiꞌ kaꞌ ujukng paha-Nya. 13 Malaekat-malaekat koa batanyaꞌ: “Weꞌ, ngahe kitaꞌ ngeak?” Sahut Maria: “Bangke Tuhanku dah diurakng naap, man aku inaꞌ nauꞌan Ia dingalakaatn kaꞌ mae.” 14 Lakaꞌ bakata lekoa, ia neleꞌ kaꞌ balakang man neleꞌ Yesus badiri diꞌkoa. Tapi Maria inaꞌ nauꞌan kadeꞌ nang koa Yesus. 15 Yesus batanyaꞌ kaꞌ ia: “Weꞌ, ngahe kitaꞌ ngeak? Kitaꞌ ngaggoiꞌ sae?” Maria nyangka Ia koa tukang kabon, jaji ia bakata: “Paꞌ, kadeꞌ Kitaꞌ nang mindahatn Ia dari dian, tolong padahatn kaꞌ aku diꞌmae Kitaꞌ ngalakaꞌatn-Nya, biar aku baya naap-Nya.” 16 Yesus bakata kaꞌ ia: “Maria!” Maria malek kaꞌ Yesus lalu bakata make bahasa Ibrani: “Rabuni!” ratinya Guru. 17 Kata Yesus kaꞌ ia: “Ame singiꞌiꞌ Aku, jukut Aku napeꞌ ampus kaꞌ Apaꞌ. Tapi ampuslah kaꞌ sodara-sodara-Ku, man padahatn kadeꞌ ampeatn Aku ampus kaꞌ Apaꞌ diriꞌ man Allah diriꞌ.” 18 Maria Makdalena ampus man bakata kaꞌ murit-murit-Nya: “Aku dah neleꞌ Tuhan, man Ia ugaꞌ dah madahatn hal-hal nian kaꞌ aku.”
Yesus neleꞌatn diriꞌ-Nya kaꞌ murit-murit-Nya
20:19-23
19 Kaꞌ ari minggu koa ugaꞌ, takaꞌ dah malam, murit-murit Yesus bakomoꞌ kaꞌ sabuah rumah man pintu-pintu nang takunci, jukut ia kaꞌ koa galiꞌ kaꞌ pamimpin-pamimpin Yahudi. Tiba-tiba Yesus atakng man badiri kaꞌ tangah-tangah nya kaꞌ koa man bakata: “Salam, man ati nang panuh dame untuꞌ kitaꞌ.” 20 Lakaꞌ bakata lekoa, Ia nojokatn kokot man parut-Nya kaꞌ ia kaꞌ koa. Waꞌtu murit-murit koa neleꞌ Tuhan, ia kaꞌ koa sidi karepoatn. 21 Lalu Yesus bakata kaꞌ ia kaꞌ koa sakali agiꞌ: “Salam, man ati nang panuh dame untuꞌ kitaꞌ, lea Apaꞌ ngiripm Aku, lekoa ugaꞌ ampeatn Aku ngiripm kitaꞌ.”a 22 Lakaꞌ bakata lea koa Yesus nyiupatn sengat-Nya kaꞌ ia kaꞌ koa man bakata: “Tarimaꞌlah Roh Kudus. 23 Kadeꞌ kitaꞌ ngamponiꞌ dosa urakng, Allah ugaꞌ ngamponiꞌnya. Kadeꞌ kitaꞌ inaꞌ ngamponiꞌ dosa urakng, Allah ugaꞌ inaꞌ ngamponiꞌnya.”b
Yesus ngomong man Tomas
20:24-29
24 Tapi Tomas, saurakng dari kadua balas murit koa, nang dinyabut ugaꞌ Didimus, inaꞌ sama-sama man ia kaꞌ koa takaꞌ Yesus atakng diꞌkoa. 25 Jaji kata murit-murit nang lain koa kaꞌ ia: “Kami dah neleꞌ Tuhan!” Tapi Tomas bakata kaꞌ ia kaꞌ koa: “Sanapeꞌ aku neleꞌ bakas pakul kaꞌ kokot-Nya, sanapeꞌ aku nyangkaman jariku kaꞌ bakas pakul koa, man nyangkaman kokotku kaꞌ bakas tumbak nang kaꞌ parut-Nya, sabebetpun aku inaꞌ pucayaꞌaꞌ.”
26 Saminggu lakaꞌ koa murit-murit Yesus ada agiꞌ kaꞌ tampat koa, man Tomas ada ugaꞌ diꞌkoa. Samua pintu takunci. Tapi Yesus atakng man badiri kaꞌ tangah-tangah nya kaꞌ koa, lalu bakata: “Salam man ati nang dame untuꞌ kitaꞌ.” 27 Lalu Yesus bakata kaꞌ Tomas: “Teleꞌlah kokot-Ku, man ajokatnlah jarinyu kaꞌ dian. Jangkamlah bakas lukaꞌ kaꞌ parut-Ku nian. Ame kao inaꞌ pucayaꞌ agiꞌ, tapi pucayaꞌlah!” 28 Tomas bakata kaꞌ Yesus: “Tuhanku man Allahku!” 29 Kata Yesus kaꞌ ia: “Kao pucayaꞌ barang dah neleꞌ Aku? Sidi karepoatnlah urakng-urakng nang inaꞌ neleꞌ Aku tapi pucayaꞌ.”
Tujuan Kabar Baik nian dinyontengan
20:30-31
30 Masih manyak agiꞌ hal-hal ajaip lain nang di Yesus manjawat kaꞌ depan mata murit-murit-Nya, nang inaꞌ dinyontengan kaꞌ dalapm kitap nian, 31 tapi samuanya nang dinyontengan nian, biar kitaꞌ pucayaꞌ kadeꞌ Yesuslah Raja Panyalamat, Anak Allah; man tagal kitaꞌ pucayaꞌ kaꞌ Yesus, kitaꞌ namu idup dalapm dama-Nya.