19
Lalu Pilatus marentahatn ngincakng Yesus kaluar man nyambuk-Nya. 2 Parajurit-parajurit nganyam mahkota dari akar baduri, lalu masangnya kaꞌ kapala Yesus. Lakaꞌ koa ia kaꞌ koa makeatn jubah bawarna ungu kaꞌ Ia, 3 man sambil maju kaꞌ depan ia kaꞌ koa bakata: “Salam raja urakng Yahudi!” Lalu ia kaꞌ koa nampariꞌ muha Yesus.4 Lakaꞌ koa Pilatus kaluar agiꞌ man bakata kaꞌ ia koa: “Teleꞌlah, aku ngincakng Ia kaluar kaꞌ kitaꞌ, biar kitaꞌ nauꞌan kadeꞌ aku inaꞌ namu kasalahatn ahe pun kaꞌ Ia.” 5 Lalu Yesus kaluar, bamahkota duri man bajubah ungu. Kata Pilatus kaꞌ ia kaꞌ koa: “Teleꞌlah Urakng koa?” 6 Takaꞌ imam-imam kapalaꞌ man pangawal-pangawal koa neleꞌ Ia, ia kaꞌ koa bangampakatn: “Salipatn Ia, salipatn Ia!” Kata Pilatus kaꞌ ia kaꞌ koa: “Kitaꞌ babaro ngincakng Ia man nyalipatn Ia; barang aku naꞌ namu kasalahatn ahe pun kaꞌ Ia.” 7 Urakng-urakng Yahudi koa nyahut: “Manurut ukum kami, Ia arus diukum mati barang Ia ngakoꞌiꞌ diriꞌ-Nya Anak Allah.”
8 Takaꞌ Pilatus nangngar ia kaꞌ koa bakata lekoa, ia siaꞌ galiꞌ. 9 Jaji ia tamaꞌ agiꞌ kaꞌ dalapm istana man lakaꞌ Yesus dingincakng tamaꞌ, Pilatus batanyaꞌ kaꞌ Ia: “Dari mae asal Kitaꞌ?” Tapi Yesus baiꞌ nyahut. 10 Jaji Pilatus bakata agiꞌ: “Baiꞌ keꞌ Kitaꞌ ngomong man aku? Kitaꞌ nauꞌan kadeꞌ aku bakoasa mebasatn Kitaꞌ, man bakoasa ugaꞌ makulatn Kitaꞌ kaꞌ kayu salip. 11 Sahut Yesus: “Kitaꞌ inaꞌ ngampuꞌ koasa kaꞌ Aku, kadeꞌ Allah inaꞌ mareꞌatn koasa koa kaꞌ kitaꞌ. Tagal koa urakng nang nyarahatn Aku kaꞌ kitaꞌ, labih ayaꞌ dosanya dari pada kitaꞌ.” 12 Takaꞌ Pilatus nangngar koa, ia barusaha untuꞌ ngalapasatn Yesus. Tapi urakng-urakng Yahudi mangkaꞌ kampak: “Kadeꞌ kitaꞌ mebasatn Ia, kitaꞌ bukeꞌ ayukng Kaisar! Urakng nang ngakoꞌ diriꞌnya raja, ia ngalawan Kaisar!”
13 Takaꞌ Pilatus nangngar pakataan koa, ia nyuruh ngincakng Yesus kaluar, lalu ia duduk kaꞌ karusi pangadilan kaꞌ tampat nang badama “Lante Batu,” dalapm bahasa Ibrani Gabata. 14 Ari koa ari persiapan ari raya Paska, kira-kira jam dua balas siakng. Pilatus bakata kaꞌ urakng-urakng koa: “Teleꞌlah raja kitaꞌ!” 15 Lalu ia kaꞌ koa ngampak, bakata: “Bunuh Ia! Bunuh Ia! Salipatn Ia!” Pilatus batanyaꞌ: “Ahe keꞌ kitaꞌ maoꞌ, aku nyalipatn raja kitaꞌ?” Sahut imam-imam kapalaꞌ: “Cuman Kaisar raja kami!” 16a Ahirnya Pilatus nyarahatn Yesus kaꞌ ia kaꞌ koa untuꞌ disalipatn.
Yesus dinyalip
19:16b-27
16b Ia kaꞌ koa ngincakng Yesus untuꞌ di salip. 17 Yesus kaluar man mikut kayu salip-Nya babaro kaꞌ tampat nang badama Tampat Tangkoraꞌ, dalapm bahasa Ibrani disabut Golgota. 18 Kaꞌ diꞌkoa ia kaꞌ koa makulatn Yesus kaꞌ kayu salip. Sirage man Ia ugaꞌ dinyalipatn dua urakng nang lain, kaꞌ sabalah kebaꞌ man kaꞌ sabalah kanan, Yesus kaꞌ tangah-tangah. 19 Pilatus nyuruh masang ugaꞌ tulisan kaꞌ atas kayu salip koa, bunyinya: “Yesus dari Nasaret, Raja urakng Yahudi.” 20 Manyak urakng Yahudi maca tulisan koa, barang tampat Yesus dinyalip koa samak man kota; man kata-kata koa dinyonteng make bahasa Ibrani, Latin, man Yunani. 21 Lalu kata imam-imam kapalaꞌ urakng Yahudi kaꞌ Pilatus: “Ame kitaꞌ nyontengan, ‘Raja urakng Yahudi’, tapi contenganlah, ‘Urakng nian bakata, Akulah Raja urakng Yahudi.’” 22 Sahut Pilatus: “Ahe nang ku nyontengan, tatap taconteng.”
23 Lakaꞌ parajurit-parajurit koa makulatn Yesus kaꞌ kayu salip, ia kaꞌ koa naap pakean-Nya. Pakean koa nya magi ampat: kajah namu soteꞌ. Ia kaꞌ koa ugaꞌ naap jubah-Nya. Jubah koa naꞌ bajahit, dinanun dari atas sampe kaꞌ babah. 24 Prajurit-prajurit koa bakata sekoꞌ man nang lain: “Ame diriꞌ tatak-tatak jubah nian. Injeꞌ diriꞌ baundi untuꞌ nantuatn sae nang namuaꞌnya.” Hal koa jaji manuhiꞌ ahe nang dah taconteng kaꞌ dalapm Kitap Suci:
‘Ia kaꞌ koa mahagiatn pakean-Ku kaꞌ antara nya kaꞌ koa
man baundi untuꞌ jubah-Ku.’
Hal koa dah di parajurit-parajurit kaꞌ koa manjawat. 25 Kaꞌ samak kayu salip Yesus, badiri uweꞌ Yesus, sodara uweꞌ-Nya, Maria bini Klopas, man Maria Magdalena. 26 Takaꞌ Yesus neleꞌ uweꞌ-Nya man saurakng murit nang di-Nya ngasihiꞌ kaꞌ sampingnya, bakatalah Ia kaꞌ uweꞌ-Nya: “Weꞌ, anggaplah ia anak kitaꞌ!” 27 Lalu Yesus bakata kaꞌ murit-Nya koa: “Anggaplah ia uweꞌnyu.” Waꞌtu koa murit koa narimaꞌ uweꞌ Yesus untuꞌ badiapm kaꞌ rumahnya.
Yesus mati
19:28-30
(Mat. 27:45-50; Mrk. 15:33-37; Luk. 23:44-46)
28 Yesus nauꞌan kadeꞌ ampeatn samuanya dah lakaꞌ, man biar ahe nang taconteng kaꞌ dalapm Kitap Suci baya tajaji. Ia bakata: “Aku aus.” 29 Diꞌkoa ada tapayatn binsiꞌ man aiꞌ anggur masapm. Lalu parajurit-parajurit nyalupatn bunga karang kaꞌ dalapm anggur masapm, baruꞌ nusukatnnya kaꞌ satangke hisopa, lalu dinyoloꞌatnnya kaꞌ molot Yesus. 30 Lakaꞌ Yesus nyacapiꞌ sabebet anggur masapm koa, Ia bakata: “Dah lakaꞌ.” Lalu Yesus ngogoꞌatn kapala-Nya man Ia pun mati.
Saurakng tantara nikam parut Yesus man tumbak
19:28-30
31 Ari koa ari persiapan ari Sabat man ari Raya Paskah man biar bangke-bangke koa inaꞌ bagantukng kaꞌ kayu salip, barang Sabat koa ari raya nang kusus. Jaji ataknglah urakng-urakng Yahudi kaꞌ Pilatus man mintaꞌ kaꞌ ia biar paha urakng-urakng koa dipatahatn man mayatnya dituruntatn. 32 Lalu parajurit-parajurit koa ampus doloꞌ matahatn paha dari kadua urakng nang dinyalip man Yesus koa; 33 Tapi takaꞌ ia kaꞌ koa sampe kaꞌ Yesus, ia kaꞌ koa neleꞌ kadeꞌ Yesus dah mati, lalu ia kaꞌ koa inaꞌ matahatn paha-Nya. 34 Tapi saurakng dari parajurit koa numbak parut Yesus man tumbak, kaluaslah darah man aiꞌ. 35 Urakng nang neleꞌ babaro hal koa nang basaksi man kasaksiannya banar. Man ia nauꞌan kadeꞌ ia ngataatn kabanaran biar kitaꞌ ugaꞌ pucayaꞌ. 36 Hal koa terjaji biar ganap ahe nang taconteng kaꞌ dalapm Kitap Suci: “Inaꞌ soteꞌ pun dari tulakng-Nya dipatahatnnaꞌ.”b 37 Kaꞌ dalapm Kitap Suci ugaꞌ taconteng: “Ia kaꞌ koa neleꞌaꞌ Ia nang dah dinya kaꞌ koa numbak.”c
Yesus dinyubur
19:38-42
(Mat. 27:57-61; Mrk. 15:42-47; Luk. 23:50-56)
38 Lakaꞌ koa Yusup dari kota Arimatea mintaꞌ ijin kaꞌ Pilatus, untuꞌ naap bangke Yesus. Yusup nosok-nosok jukut ia galiꞌ kaꞌ pamimpin Yahudi barang ia murit Yesus. Pilatus ngijinan ia, jaji ia ampus naap bangke Yesus. 39 Nikodemus nang deꞌe suah atakng kaꞌ Yesus waꞌtu malam, ampus ugaꞌ man Yusup. Nikodemus ngincakng ramuan mur man binyak garu, kira-kira talu puluh kilo manyaknya.d 40 Kadua urakng koa naap bangke Yesus, lalu mungkus-Nya man kain putih, man mareꞌ-Nya ramuan wangi koa manurut cara urakng Yahudi basubur. 41 Kaꞌ samak tampat Yesus disalip koa ada sabuah taman. Kaꞌ taman koa ada sabuah subur baharu, nang giꞌ inaꞌ suah dipake untuꞌ nyubur urakng. 42 Barang subur koa samak man ari Sabat pun amper mulaiꞌ, jaji ia kaꞌ koa nyubur Yesus diꞌkoa.