Yohanes 17

Yesus badoꞌa untuꞌ murit-murit-Nya

17:1-26

Lakaꞌ bakata lekoa, Yesus ningkadah kaꞌ langit lalu badoꞌa: “Apaꞌ, ampeatn dah namus waꞌtunya. Muliaatnlah Anak Kitaꞌ, biar Anak Kitaꞌ pun muliaatn Kitaꞌ. 2 Sama lea Kitaꞌ dah mareꞌatn koasa kaꞌ Anak kaꞌ atas sigana talino, lekoa ugaꞌ Anak mareꞌatnnaꞌ idup nang salamanya kaꞌ sigana talino nang dah Kitaꞌ mareꞌatn kaꞌ Anak. 3 Nianlah idup nang salamanya, kadeꞌ ia kaꞌ koa nganal Kitaꞌ, sekoꞌ-sekoꞌnya Allah nang banar, man nganal Yesus Karistus nang dah Kitaꞌ ngiripm. 4 Aku dah muliaatn Kitaꞌ kaꞌ aiꞌ tanah man nyelesaiatn pakarajaatn nang Kitaꞌ mareꞌatn kaꞌ Aku untuꞌ Ku-panjawat. 5 Ampeatn, O Apaꞌ! Bareꞌ Aku kamuliaatn kaꞌ sisi Kitaꞌ, kamuliaatn nang Ku-ngampuꞌ man Kitaꞌ, sanapeꞌ dunia dinampaꞌ.

6 Aku dah madahatn dama Kitaꞌ kaꞌ samua urakng nang Kitaꞌ mareꞌatn kaꞌ Aku kaꞌ dunia. Ia kaꞌ koa Kitaꞌ ngampuꞌ man Kitaꞌ dah mareꞌatn ia kaꞌ koa kaꞌ Aku man ia kaꞌ koa dah nurutiꞌ pakataatn Kitaꞌ. 7 Ampeatn ia kaꞌ koa nauꞌan kadeꞌ samua nang Kitaꞌ mareꞌatn kaꞌ Aku mpat dari Kitaꞌ. 8 Barang sigana pakataatn nang Kitaꞌ nyampeatn kaꞌ Aku dah Ku-nyampeatn kaꞌ ia kaꞌ koa man ia kaꞌ koa dah narimaꞌnya. Ia kaꞌ koa nauꞌan banar-banar kadeꞌ Aku atakng dari Kitaꞌ man ia kaꞌ koa pucayaꞌ kadeꞌ Kitaꞌlah nang ngiripm Aku. 9 Aku badoꞌa untuꞌ nya kaꞌ koa. Bukeꞌ untuꞌ dunia Aku badoꞌa, tapi untuꞌ ia kaꞌ koa, nang dah Kitaꞌ mareꞌatn kaꞌ Aku. Barang ia kaꞌ koa nang di Kitaꞌ ngampuꞌ 10 man sigana nang di Ku-ngampuꞌ di Kitaꞌ ngampuꞌ ugaꞌ man nang di Kitaꞌ ngampuꞌ di Ku-ngampuꞌ ugaꞌ; man Aku dah dimuliaatn kaꞌ dalapm nya kaꞌ koa. 11 Aku inaꞌ ada agiꞌ kaꞌ dunia, tapi ia kaꞌ koa masih ada kaꞌ dunia, man Aku atakng kaꞌ Kitaꞌ. O Apaꞌ nang kudus, piharalah ia kaꞌ koa dalapm dama Kitaꞌ, dama Kitaꞌ nang dah Kitaꞌ mareꞌatn kaꞌ Aku, biar ia kaꞌ koa jaji soteꞌ sama lea Diriꞌ. 12 Salamaꞌ Aku sama-sama man ia kaꞌ koa, Aku dah mihara ia kaꞌ koa dalapm dama Kitaꞌ nang dah Kitaꞌ mareꞌatn kaꞌ Aku; Aku dah nyaga ia kaꞌ koa man inaꞌ ada saurakng pun dari nya kaꞌ koa nang mati salama-lamanya salain ia nang dah dinantuatn untuꞌ mati salama-lamanya, biar diganapiꞌ nang taconteng kaꞌ dalapm Kitap Suci. 13 Tapi ampeatn Aku atakng kaꞌ Kitaꞌ man Aku ngataatn samuanya nian samintara Aku masih ada kaꞌ dalapm dunia, biar panuhlah karepoatn-Ku kaꞌ dalapm diriꞌ nya kaꞌ koa. 14 Aku dah mareꞌatn pirman Kitaꞌ kaꞌ ia kaꞌ koa man dunia teget kaꞌ ia kaꞌ koa; barang ia kaꞌ koa bukeꞌ dari dunia, sama lea Aku bukeꞌ dari dunia. 15 Aku inaꞌ mintaꞌ, biar Kitaꞌ naap ia kaꞌ koa dari dunia, tapi biar Kitaꞌ ngalinukngiꞌ ia kaꞌ koa dari nang jahat. 16 Ia kaꞌ koa nang dah Kitaꞌ mareꞌatn kaꞌ Aku, bukeꞌ dari dunia; sama lea Aku bukeꞌ dari dunia. 17 Jajiatnlah ia kaꞌ koa kudus nang di Kitaꞌ ngampuꞌ lewat kabanaran; Pirman Kitaꞌ koalah kabanaran. 18 Sama lea Kitaꞌ dah ngiripm Aku kaꞌ dalapm dunia, lekoa ugaꞌ Aku dah ngiripm ia kaꞌ koa kaꞌ dalapm dunia; 19 man Aku ngudusatn diriꞌ-Ku untuꞌ ia kaꞌ koa, biar ia kaꞌ koa pun dikudusatn lewat kabanaran.

20 Bukeꞌ untuꞌ ia kaꞌ koa ihan Aku badoꞌa, tapi ugaꞌ untuꞌ urakng-urakng nang pucayaꞌ kaꞌ Aku lewat kasaksian nya kaꞌ koa; 21 biar ia kaꞌ koa samua jaji soteꞌ, sama lea Kitaꞌ, O Apaꞌ, kaꞌ dalapm Aku man Aku kaꞌ dalapm Kitaꞌ, biar ia kaꞌ koa ugaꞌ kaꞌ dalapm Diriꞌ, biar dunia pucayaꞌ kadeꞌ Kitaꞌlah nang dah ngiripm Aku. 22 Aku dah mareꞌatn kaꞌ ia kaꞌ koa kamuliaatn nang Kitaꞌ mareꞌatn kaꞌ Aku, biar ia kaꞌ koa jaji soteꞌ, sama lea Diriꞌ soteꞌ. 23 Aku kaꞌ dalapm ia kaꞌ koa, man Kitaꞌ kaꞌ dalapm Aku biar ia kaꞌ koa batol-batol soteꞌ, biar dunia nauꞌan kadeꞌ Kitaꞌ nang ngiripm Aku man kadeꞌ Kitaꞌ ngasihiꞌ ia kaꞌ koa, sama lea Kitaꞌ ngasihiꞌ Aku.

24 Apaꞌ, Aku maoꞌ biar diꞌmae pun Aku ada, ia kaꞌ koa ada sama-sama man Aku, ia kaꞌ koa nang dah Kitaꞌ mareꞌatn kaꞌ Aku, biar ia kaꞌ koa neleꞌ kamuliaatn-Ku nang dah Kitaꞌ mareꞌatn kaꞌ Aku; barang Kitaꞌ dah ngasihiꞌ Aku sanapeꞌ dunia di nampaꞌ. 25 Apaꞌ nang adil, memang dunia inaꞌ kanal kaꞌ Kitaꞌ, tapi Aku kanal kaꞌ Kitaꞌ, man ia kaꞌ koa nauꞌan kadeꞌ Kitaꞌlah nang dah ngiripm Aku; 26 man Aku dah madahatn dama Kitaꞌ kaꞌ ia kaꞌ koa man Aku madahatnnaꞌnya, biar kasih nang Kitaꞌ mareꞌatn kaꞌ Aku ada kaꞌ dalapm nya kaꞌ koa man Aku kaꞌ dalapm nya kaꞌ koa.”