Tahan kaꞌ dalapm kasingsaraatn
16:1-4a
16
Yesus bakata: “Samuanya nian Ku-ngataatn kaꞌ kitaꞌ biar kitaꞌ ame ningalatn kapucayaꞌatn kitaꞌ kaꞌ Aku. 2 Kitaꞌ dikaluaratnnaꞌ dari rumah-rumah tampat sumbayang. Man atakngngaꞌ waꞌtunya kadeꞌ urakng nang munuh kitaꞌ nyangkaaꞌ ia manjawat nang banar kaꞌ Allah. 3 Ia kaꞌ koa manjawataꞌ hal koa, barang ia kaꞌ koa inaꞌ kanal kaꞌ Apaꞌ maoꞌ pun kaꞌ Aku. 4a Tapi samuanya nian Ku-kataatn kaꞌ kitaꞌ. Biar kadeꞌ atakng waꞌtunya kitaꞌ ingat kadeꞌ Aku dah ngataatnnya kaꞌ kitaꞌ.”Pakarajaatn Roh Panolong
16:4b-15
4b Kata Yesus agiꞌ: “Hal nian naꞌ Ku-kataatn kaꞌ kitaꞌ dari pamulaꞌatn, jukut salamaꞌ nian Aku masih sama-sama man kitaꞌ, 5 tapi ampeatn Aku ampus kaꞌ Ia nang dah ngiripm Aku; man inaꞌ ada saurakng pun kaꞌ antara kitaꞌ nang batanyaꞌ kaꞌ Aku: kaꞌ mae Kitaꞌ ampus? 6 Tapi tagal Aku ngataatn hal nian kaꞌ kitaꞌ, ati kitaꞌ jaji kasal. 7 Tapi Aku ngataatn nang sabatolnya kaꞌ kitaꞌ: Labih baguna untuꞌ kitaꞌ, kadeꞌ Aku ampus. Barang kadeꞌ Aku inaꞌ ampus, Roh Panolong akoa inaꞌ atakngaꞌ kaꞌ kitaꞌ. Tapi kadeꞌ Aku ampus, Aku ngiripmaꞌ Roh Panolong kaꞌ kitaꞌ. 8 Kadeꞌ Roh Panolong koa atakng, Ia matakatnnaꞌ kaꞌ dunia rati sabatolnya dari dosa, dari kabanaran man dari ukuman Allah; 9 dari dosa, barang ia kaꞌ koa tatap inaꞌ pucayaꞌ kaꞌ Aku; 10 dari kabanaran, barang Aku ampus kaꞌ Apaꞌ man kitaꞌ inaꞌ neleꞌaꞌ Aku agiꞌ; 11 dari ukuman, barang panguasa dunia nian dah dingukum.
12 Giꞌ manyak hal nang arus Ku-kataatn kaꞌ kitaꞌ, tapi ampeatn kitaꞌ napeꞌ mangkeh narimaꞌnya. 13 Tapi kadeꞌ Roh Kabanaran koa atakng, Ia ngirikngaꞌ kitaꞌ kaꞌ dalapm sigana kabanaran. Barang Ia inaꞌ bakata-kata dari diriꞌ-Nya babaro, tapi sigana hal nang di-Nya dangngar koalah nang di-Nya kataatnnaꞌ man Ia ngesahatnnaꞌ kaꞌ kitaꞌ hal-hal nang atakngngaꞌ. 14 Roh Kabanaran muliaatnnaꞌ Aku, barang Ia ngesahatnnaꞌ kaꞌ kitaꞌ ahe nang di-Nya tarimaꞌ dari Ku. 15 Samua hal nang di Apaꞌ ngampuꞌ, Aku ugaꞌ ampuꞌnya; tagal koa Aku bakata kaꞌ kitaꞌ: Roh Kabanaran koa ngesahatnaꞌ kaꞌ kitaꞌ ahe nang di-Nya tarimaꞌ dari Ku.”
Kasusahatn doloꞌ baruꞌ karepoatn
16:16-33
16 Yesus bakata: “Sabantar ihan agiꞌ kitaꞌ inaꞌ neleꞌ Aku, man ugaꞌ sabantar agiꞌ kitaꞌ neleꞌaꞌ Aku.” 17 Nangngar hal koa basangahe urakng dari murit-Nya bakata kaꞌ sekoꞌ man nang lainnya: “Ahe ratinya Ia bakata kaꞌ diriꞌ, ‘sabantar ihan agiꞌ kitaꞌ inaꞌ neleꞌaꞌ Aku, man ugaꞌ sabantar agiꞌ kitaꞌ neleꞌaꞌ Aku? Man Aku ampus kaꞌ rumah Apaꞌ?’” 18 Ia kaꞌ koa batanyaꞌ maꞌan: “Ahe ratinya, ‘Sabantar’? Diriꞌ inaꞌ ngarati ahe maksut-Nya!” 19 Yesus nauꞌan, kadeꞌ ia kaꞌ koa maoꞌ batanyaꞌ kaꞌ Ia, lalu Ia bakata kaꞌ ia kaꞌ koa: “Tadi Ku-ngataatn, ‘Sabantar ihan agiꞌ kitaꞌ inaꞌ neleꞌ Aku, man ugaꞌ sabantar ihan agiꞌ kitaꞌ neleꞌaꞌ Aku.’ Koa keꞌ nang kitaꞌ masoꞌalatn kaꞌ antara kitaꞌ? 20 Pucayaꞌlah, kitaꞌ nangisaꞌ man kasal, tapi dunia karepoatnnaꞌ, kitaꞌ kasusahatnnaꞌ, tapi kasusahatn koa naꞌe barubahaꞌ jaji karepoatn. 21 Kadeꞌ saurakng nangbini amper baranak, ia susah, jukut dah waꞌtunya ia kasakitatn. Tapi waꞌtu anaknya kaluar, ia lupa kaꞌ kasakitatnnya barang karepoatn kadeꞌ saurakng kamudaꞌ lahir kaꞌ dalapm dunia. 22 Lekoa ugaꞌ man kitaꞌ, ampeatn basusah ati, tapi Aku batamuaꞌ agiꞌ man kitaꞌ. Jaji ati kitaꞌ karepoatnnaꞌ man inaꞌ saurakng pun baya naap karepoatn koa dari atinyu. 23 Kaꞌ ari koa, kitaꞌ inaꞌ batanyaꞌ ahe-ahe agiꞌ kaꞌ Aku. Pucayaꞌlah: Ahe jaꞌ nang kitaꞌ mintaꞌ kaꞌ Apaꞌ kaꞌ dalapm dama-Ku, koa dibareꞌatnnaꞌ Apaꞌ kaꞌ kitaꞌ. 24 Sampe ampeatn nian kitaꞌ napeꞌ mintaꞌ ahe-ahe kaꞌ dalapm dama-Ku. Mintaꞌlah, man kitaꞌ narimaꞌaꞌ, biar karepoatn kitaꞌ panuh.
25 Samuanya nian Ku-ngataatn kaꞌ kitaꞌ make parumpamaan. Atakngngaꞌ waꞌtunya naꞌe Aku inaꞌ agiꞌ bakata-kata kaꞌ kitaꞌ inaꞌ make parumpamaan tapi tarus tarang ngesahatn Apaꞌ kaꞌ kitaꞌ. 26 Kaꞌ ari koa kitaꞌ mulih badoꞌa langsung kaꞌ Apaꞌ untuꞌ bapintaꞌ hal-hal nang muliaatn dama-Ku. Jaji inaꞌ palalu agiꞌ Aku nang nyampeatn permintaan kitaꞌ koa kaꞌ Apaꞌ-Ku, 27 barang Apaꞌ babaro ngasihiꞌ kitaꞌ, tagal kitaꞌ dah ngasihiꞌ Aku man pucayaꞌ, kadeꞌ Aku atakng dari Allah. 28 Aku atakng dari Apaꞌ man Aku atakng kaꞌ dalapm dunia; Aku ningalatn dunia pulaꞌ man mulakng kaꞌ Apaꞌ.”
29 Kata murit-murit-Nya: “Teleꞌ, ampeatn Kitaꞌ tarus tarang bakata-kata man Kitaꞌ inaꞌ make parumpamaan. 30 Ampeatn kami nauꞌan, kadeꞌ Kitaꞌ nauꞌan sigana hal man inaꞌ palalu saurakng pun nanyaꞌan ahe-ahe kaꞌ Kitaꞌ. Tagal koa kami pucayaꞌ kadeꞌ Kitaꞌ atakng dari Allah.” 31 Sahut Yesus kaꞌ ia kaꞌ koa: “Pucayaꞌ keꞌ kitaꞌ ampeatn? 32 Teleꞌ! Waꞌtunya atakngngaꞌ, malah dah atakng, kitaꞌ badariatnnaꞌ ningalatn Aku. Kitaꞌ pulakngngaꞌ kaꞌ rumah kitaꞌ. Tapi Aku inaꞌ babaro barang Apaꞌ ada sama-sama man Aku. 33 Samuanya koa Ku-ngataatn kaꞌ kitaꞌ, biar kitaꞌ ngampuꞌ ati nang panuh dame kaꞌ dalapm Aku. Kaꞌ dunia kitaꞌ singsaraaꞌ. Tapi kuatatnlah ati kitaꞌ, Aku dah ngalahatn dunia!”