Yesus puhutn anggur nang banar
15:1-8
15
Yesus bakata agiꞌ kaꞌ murit-murit-Nya: “Akulah puhutn anggur nang banar, man Apaꞌ-Kulah nang nanam, mihara, man nang ngampuꞌnya. 2 Tiap dahatn-Ku nang inaꞌ babuah, di Apaꞌ-Ku tatak, man tiap dahatn nang babuah, di Apaꞌ-Ku parasehatn biar ia labih manyak babuah. 3 Kitaꞌ ingkaꞌ dah baraseh man ajaran nang dah Ku-ngataatn kaꞌ kitaꞌ. 4 Badiapmlah kaꞌ dalapm-Ku man Aku kaꞌ dalapm kitaꞌ. Sama lea dahatn anggur inaꞌ baya babuah dari diriꞌnya babaro, kadeꞌ ia inaꞌ badiapm kaꞌ puhutn anggur, lekoa ugaꞌ kitaꞌ inaꞌ baya babuah, kadeꞌ inaꞌ badiapm kaꞌ dalapm Aku. 5 Akulah puhutn anggur man kitaꞌlah dahatn-dahatnnya. Sae jaꞌ nang badiapm kaꞌ dalapm Aku man Aku kaꞌ dalapmnya, ia babuah manyak, jukut kaꞌ luar Aku kitaꞌ inaꞌ baya manjawat ahe-ahe. 6 Sae jaꞌ nang inaꞌ badiapm man Aku, ia dibuakng kaꞌ luar lea dahatn nang dah karikng. Lalu di urakng ngumpuratn man ditunu kaꞌ dalapm api. 7 Kadeꞌ kitaꞌ badiapm man Aku, man pakataatn-pakataatn-Ku badiapm kaꞌ dalapm kitaꞌ, mintaꞌlah ahe jaꞌ nang kitaꞌ maoꞌiꞌ, kitaꞌ narimaꞌaꞌnya. 8 Kadeꞌ kitaꞌ babuah manyak, Apaꞌ-Ku dimuliaatnaꞌ, lekoalah nojokatn kitaꞌ murit-Ku.”Parentah untuꞌ kajah bakasihiꞌ
15:9-17
9 “Lea Apaꞌ dah ngasihiꞌ Aku, lekoa ugaꞌlah Aku dah ngasihiꞌ kitaꞌ; diapmlah kaꞌ dalapm kasih-Ku koa. 10 Kadeꞌ kitaꞌ nurutiꞌ parentah-Ku, kitaꞌ badiapmaꞌ kaꞌ dalapm kasih-Ku, lea Aku nurutiꞌ parentah Apaꞌ-Ku man diapm kaꞌ dalapm kasih-Nya.
11 Samuanya koa Ku-ngataatn kaꞌ kitaꞌ, biar karepoatn-Ku ada kaꞌ dalapm kitaꞌ man karepoatn kitaꞌ panuh. 12 Nianlah parentah-Ku, biar kitaꞌ kajah bakasihiꞌ, lea Aku dah ngasihiꞌ kitaꞌ.a 13 Inaꞌ ada kasih nang labih ayaꞌ dari pada kasih urakng nang mareꞌatn nyawanya untuꞌ ayukng-ayukngnya. 14 Kitaꞌlah ayukng-ayukng-Ku, kadeꞌ kitaꞌ manjawat ahe nang Ku-parentahatn kaꞌ kitaꞌ. 15 Aku inaꞌ nyabut kitaꞌ agiꞌ amba, barang amba inaꞌ nauꞌan, ahe nang dituannya panjawat. Tapi Aku nyabut kitaꞌ ayukng-ayukng-Ku, jukut Aku dah madahiꞌ kitaꞌ samuanya nang dah Ku-nangngar dari Apaꞌ-Ku. 16 Bukeꞌ kitaꞌ nang milih Aku, tapi Akulah nang milih kitaꞌ. Aku dah natapatn kitaꞌ, biar kitaꞌ ampus man ngasilatn buah man buah kitaꞌ koa tatap; biar ahe nang kitaꞌ pintaꞌ kaꞌ Apaꞌ kaꞌ dalapm dama-Ku, Ia mareꞌatnnaꞌnya kaꞌ kitaꞌ. 17 Nianlah parentah-Ku kaꞌ kitaꞌ: kasihiꞌlah sekoꞌ man nang lainnya.”
Dunia teget kaꞌ Yesus man murit-murit-Nya
15:18-27
18 “Kadeꞌ dunia teget kaꞌ kitaꞌ, ingatlah ia dah labih doloꞌ teget kaꞌ Aku dari pada kitaꞌ. 19 Sakiraꞌnya kitaꞌ dari dunia nian, tantulah kitaꞌ dikasihiaꞌ dunia nian nang dinya ngampuꞌ. Tapi kitaꞌ bukeꞌ dari dunia nian, jukut Aku dah milih kitaꞌ dari dunia nian, koalah tagalnya dunia teget kaꞌ kitaꞌ. 20 Ingatlah ahe nang dah Ku-ngataatn kaꞌ kitaꞌ: saurakng amba inaꞌ labih panting dari pada tuannya. Kadeꞌ ia kaꞌ koa dah nganiaya Aku, ia kaꞌ koa ugaꞌ nganiayaaꞌ kitaꞌ; kadeꞌ ia kaꞌ koa dah nurutiꞌ ajaran-Ku, ia kaꞌ koa ugaꞌ nurutiaꞌ pakataatn kitaꞌ.b 21 Samuanya koa, dinya kaꞌ koa panjawataꞌ kaꞌ kitaꞌ, barang kitaꞌ pangikut-Ku, jukut ia kaꞌ koa inaꞌ nganal Ia nang dah ngiripm Aku. 22 Sakiraꞌnya Aku inaꞌ atakng man inaꞌ madahatn kaꞌ ia kaꞌ koa, ia kaꞌ koa inaꞌ badosa. Tapi ampeatn ia kaꞌ koa inaꞌ baalasan agiꞌ man dosa nya kaꞌ koa. 23 Sae jaꞌ nang teget kaꞌ Aku, ia teget ugaꞌ kaꞌ Apaꞌ-Ku. 24 Sakiraꞌnya kaꞌ tangah-tangah ia kaꞌ koa, Aku inaꞌ manjawat hal-hal nang naꞌ suah di urakng lain panjawat, ia kaꞌ koa inaꞌ badosa. Tapi ampeatn ia kaꞌ koa dah neleꞌ ahe nang dah Ku-manjawat, man ia kaꞌ koa teget kaꞌ Aku maoꞌ pun kaꞌ Apaꞌ-Ku. 25 Tapi pirman nang taconteng kaꞌ dalapm ukum Torat nya kaꞌ koa arus diganapiꞌ: ia kaꞌ koa teget kaꞌ Aku inaꞌ baalasan.c