Rumah Apaꞌ
14:1-14
14
Yesus bakata kaꞌ murit-murit-Nya: “Ame gulinsah atinyu; pucayaꞌ kaꞌ Allah, pucayaꞌlah ugaꞌ kaꞌ Aku. 2 Kaꞌ rumah Apaꞌ-Ku manyak tampat badiapm. Aku ampus kaꞌ naun nyiapatn tampat untuꞌ kitaꞌ. Aku inaꞌ bakata lekoa kaꞌ kitaꞌ, kadeꞌ koa inaꞌ banar. 3 Kadeꞌ Aku dah ampus kaꞌ koa man nyiapatn tampat untuꞌ kitaꞌ, Aku mulakngngaꞌ man ngincakng kitaꞌ kaꞌ tampat-Ku; biar kaꞌ tampat diꞌmae Aku ada, kaꞌ koa pun kitaꞌ ada. 4 Kaꞌ tampat Aku ampus, kitaꞌ nauꞌan maraga koa.” 5 Kata Tomas kaꞌ Yesus: “Tuhan, kami inaꞌ nauꞌan kaꞌ mae Kitaꞌ ampus; jaji lemae kami nauꞌan maraga kaꞌ koa?” 6 Kata Yesus kaꞌ ia: “Akulah maraga, kabanaran man idup. Inaꞌ saurakng pun baya atakng kaꞌ Apaꞌ, kadeꞌ inaꞌ lewat Aku. 7 Kadeꞌ sakiraꞌnya kitaꞌ kanal kaꞌ Aku, pasti kitaꞌ ugaꞌ kanal kaꞌ Apaꞌ-Ku; ampeatn nian kitaꞌ kanal kaꞌ Ia man kitaꞌ dah neleꞌ Ia.”8 Kata Pilipus kaꞌ Ia: “Tuhan, tojokatnlah Apaꞌ koa kaꞌ kami, koa dah cukup untuꞌ kami.” 9 Kata Yesus kaꞌ ia: “Dah sangahe lama Aku sama-sama man kitaꞌ, masih ugaꞌ kao inaꞌ kanal kaꞌ Aku, Pilipus? Sae nang dah neleꞌ Aku, ia dah neleꞌ Apaꞌ; lemae kao dapat bakata: tojokatnlah Apaꞌ koa kaꞌ kami. 10 Naꞌ pucayaꞌ keꞌ kao, kadeꞌ Aku soteꞌ man Apaꞌ, Apaꞌ soteꞌ man Aku? Ahe nang Ku-ngataatn kaꞌ kao, inaꞌ Ku-kataatn dari diriꞌ-Ku-babaro, tapi Apaꞌ nang soteꞌ man Aku, Ialah nang ngarajaatn samua pakarajaatn-Nya. 11 Pucayaꞌlah kaꞌ Aku, kadeꞌ Aku man Apaꞌ soteꞌ; ato sainaꞌ-inaꞌnya, pucayaꞌlah kaꞌ pakarajaatn-pakarajaatn nang dah Ku-manjawat. 12 Sasidinya, sae jaꞌ nang pucayaꞌ kaꞌ Aku, ia kaꞌ koa manjawataꞌ samua pakarajaatn-pakarajaatn nang dah Ku-manjawat. Man bukeꞌ koa ihan, ia kaꞌ koa ugaꞌ manjawataꞌ hal-hal ajaip nang labih ayaꞌ dari koa; jukut Aku ampus kaꞌ Apaꞌ. 13 Man ahe jaꞌ nang kitaꞌ pintaꞌ kaꞌ dalapm dama-Ku, koa Ku-panjawataꞌ untuꞌ kitaꞌ, biar Apaꞌ dimuliaatn kaꞌ dalapm Anak. 14 Ahe jaꞌ nang kitaꞌ mintaꞌ kaꞌ dalapm dama-Ku, Ku-panjawataꞌ.”
Yesus nyanjiatn Roh Kudus
14:15-31
15 “Kadeꞌ kitaꞌ ngasihiꞌ Aku, kitaꞌ nurutiaꞌ parentah-parentah-Ku. 16 Aku mintaꞌaꞌ kaꞌ Apaꞌ, man Ia mareꞌatnnaꞌ kaꞌ kitaꞌ saurakng Panolong nang lain, biar Ia nyarataiꞌ kitaꞌ salama-lamanya, 17 Ia koalah Roh Kudus nang madahatnnaꞌ kabanaran tentang Allah. Dunia inaꞌ baya narimaꞌ Ia, jukut dunia inaꞌ neleꞌ Ia man inaꞌ kanal kaꞌ Ia. Tapi kitaꞌ kanal kaꞌ Ia, jukut Ia nyarataiꞌ kitaꞌ man badiapmmaꞌ kaꞌ dalapm kitaꞌ.
18 Aku inaꞌ ningalatnnaꞌ kitaꞌ lea umang piatu. Aku mulakngngaꞌ agiꞌ kaꞌ kitaꞌ. 19 Inaꞌ lama agiꞌ dunia naꞌ neleꞌaꞌ Aku. Tapi kitaꞌ neleꞌaꞌ Aku, jukut Aku idup, man kitaꞌ pun idupaꞌ. 20 Waꞌtu koalah kitaꞌ nauꞌanaꞌ, kadeꞌ Aku soteꞌ man Apaꞌ-Ku man kitaꞌ soteꞌ man Aku, Aku soteꞌ man kitaꞌ.
21 Sae nang narimaꞌ parentah-parentah-Ku man manjawatnya, ialah nang ngasihiꞌ Aku. Apaꞌ-Ku ngasihiaꞌ urakng nang ngasihiꞌ Aku. Aku pun ngasihiaꞌ urakng koa man nyataatnnaꞌ diriꞌ-Ku kaꞌ ia.” 22 Yudas (maksutnya bukeꞌ Yudas Iskariot), bakata kaꞌ Ia: “Tuhan, ahe tagalnya Kitaꞌ maoꞌ madahatn diriꞌ Kitaꞌ kaꞌ kami, man bukeꞌ kaꞌ dunia?” 23 Sahut Yesus: “Urakng nang ngasihiꞌ Aku, ia nurutiaꞌ ajaran-Ku. Apaꞌ-Ku ngasihiaꞌ ia. Apaꞌ man Aku atakngaꞌ kaꞌ ia man badiapm man ia. 24 Sae jaꞌ nang inaꞌ ngasihiꞌ Aku, ia inaꞌ nurutiꞌ ajaran-Ku; man ajaran nang kitaꞌ dangngar koa, bukeꞌlah dari Aku, tapi dari Apaꞌ nang ngiripm Aku.
25 Samuanya koa Ku-ngataatn kaꞌ kitaꞌ salamaꞌ Aku giꞌ sama-sama man kitaꞌ. 26 Tapi Roh Kudus, Panolong nang di Apaꞌ-Ku ngiripm atas dama-Ku, Ialah nang ngajaratn samua hal kaꞌ kitaꞌ man ngingatiꞌ kitaꞌ kaꞌ samuanya nang dah Ku-madahatn kaꞌ kitaꞌ.
27 Ati nang dame, Ku-tingalatn untuꞌ kitaꞌ. Kadamean ati-Ku, Ku-bareꞌatn kaꞌ kitaꞌ. Man ahe nang Ku-bareꞌatn kaꞌ kitaꞌ inaꞌ lea nang di dunia bareꞌatn kaꞌ kitaꞌ. Ame gulinsah man galiꞌ atinyu. 28 Kitaꞌ dah nangngar kadeꞌ Aku dah bakata kaꞌ kitaꞌ: ‘Aku ampusaꞌ, tapi naꞌe Aku mulakng agiꞌ kaꞌ kitaꞌ.’ Sakiraꞌnya kitaꞌ ngasihiꞌ Aku, kitaꞌ tantu karepoatnnaꞌ jukut Aku ampus kaꞌ Apaꞌ-Ku, barang Apaꞌ labih panting dari pada Aku. 29 Ampeatn ugaꞌ Aku ngataatnnya kaꞌ kitaꞌ sanapeꞌ hal koa jaji, biar kitaꞌ pucayaꞌ kadeꞌ hal koa jaji. 30 Aku inaꞌ agiꞌ manyakaꞌ ngomong man kitaꞌ, jukut panguasa dunia nian tagah atakng. Ia inaꞌ bakoasa sabebet pun kaꞌ diriꞌ-Ku, 31 tapi dunia arus nauꞌan kadeꞌ Aku ngasihiꞌ Apaꞌ man kadeꞌ Aku manjawat samua hal lea nang di Apaꞌ parentahatn kaꞌ Aku.
Lumpatlah, injeꞌlah diriꞌ tingngalatn tampat nian.”