Yesus nyasah paha murit-murit-Nya
13:1-20
13
Sanapeꞌ ari raya Roti Inaꞌ Baragi, Yesus nauꞌan kadeꞌ dah waꞌtunya Ia ningalatn dunia nian untuꞌ mulakng kaꞌ Apaꞌ-Nya. Yesus ngasihiꞌ murit-murit-Nya nang Nya ngampuꞌ kaꞌ dunia, man Ia tatap ngasihiꞌ ia kaꞌ koa sampe pangabisatn. 2 Takaꞌ Yesus man murit-murit-Nya tagah makatn sama-sama, Ibalis pamimpin setan-setan dah babisik kaꞌ dalapm ati Yudas Iskariot, anak Simon, rencana untuꞌ ngianatiꞌ Ia. 3 Yesus nauꞌan, kadeꞌ Apaꞌ-Nya dah nyarahatn samuanya kaꞌ Ia man kadeꞌ Ia atakng dari Allah man mulakngngaꞌ agiꞌ kaꞌ Allah. 4 Lalu lumpatlah Yesus man mukaꞌ jubah-Nya. Ia naap dari kaen man ngikatatnnya kaꞌ pingakng-Nya. 5 Lalu Ia nontongan aiꞌ kaꞌ dalapm baskom man mulaiꞌ nyasah paha murit-murit-Nya lalu ngasatnya man kaen nang Nya ngikatatn kaꞌ pingakng-Nya. 6 Lalu sampelah Ia kaꞌ Simon Petrus. Kata Petrus kaꞌ Ia: “Tuhan, Kitaꞌ nyasahaꞌ pahaku?” 7 Sahut Yesus kaꞌ Ia: “Ahe nang Ku-manjawat, kao inaꞌ nauꞌan ampeatn, tapi naꞌenya kao ngaratiaꞌ.” 8 Kata Petrus kaꞌ Ia: “Sampe kamile pun Kitaꞌ inaꞌaꞌ nyasah pahaku.” Sahut Yesus: “Kadeꞌ Aku inaꞌ nyasah pahanyu, kao bukeꞌ murit-Ku.” 9 Nangngar mpa koa Simon Petrus bakata kaꞌ Yesus: “Tuhan, ame cuman pahaku jaꞌ tapi kokot man kapalaku ugaꞌ!” 10 Kata Yesus kaꞌ ia: “Sae jaꞌ nang dah maniꞌ, ia heaꞌ nyasah tubuhnya agiꞌ kacoali pahanya, barang ia dah baraseh samuanya. Kitaꞌ nian dah baraseh tapi inaꞌ samuanya” 11 Jukut Ia sanapeꞌnya dah nauꞌan, sae nang ngianatiaꞌ-Nya. Tagal koalah Yesus bakata: “Kitaꞌ nian dah baraseh tapi inaꞌ samuanya”12 Lakaꞌ Yesus nyasah paha murit-murit-Nya, Ia make agiꞌ jubah-Nya man mulakng kaꞌ tampat-Nya agiꞌ. Lalu Ia bakata kaꞌ ia kaꞌ koa: “Ngarati keꞌ kitaꞌ kaꞌ ahe nang Ku-manjawat kaꞌ kitaꞌ?a 13 Kitaꞌ nyaruꞌ Aku, Guru man Tuhan, kata kitaꞌ koa tapat, jukut ingkaꞌ Akulah Guru man Tuhan. 14 Jaji kadeꞌ Aku Tuhan man Guru kitaꞌ: nyasah paha kitaꞌ, kitaꞌ arus ugaꞌ kajah nyasah paha kitaꞌ. 15 Barang Aku dah mareꞌ conto kaꞌ kitaꞌ, biar kitaꞌ ugaꞌ manjawat sama lea nang dah Ku-panjawat kaꞌ kitaꞌ. 16 Aku bakata kaꞌ kitaꞌ, sabatolnya saurakng amba inaꞌlah labih tingngi kadudukatnnya dari tuannya, atopun saurakng utusan dari pada urakng nang ngiripmnya.b 17 Kadeꞌ kitaꞌ nauꞌan samuanya nian, sidi reponya kitaꞌ, kadeꞌ kitaꞌ manjawatnya.
18 Ahe nang Ku-ngataatn nian bukeꞌlah samuanya tentang kitaꞌ. Aku nauꞌan sae-sae nang dah Ku-milih. Tapi ahe nang dah taconteng kaꞌ dalapm Kitap Suci arus jaji: ‘Urakng nang makatn roti man Aku, ngalawanaꞌ Aku.’c 19 Hal koa Ku-sampeatn kaꞌ kitaꞌ ampeatn sanapeꞌ tajaji, biar kadeꞌ hal koa tajaji naꞌe, kitaꞌ pucayaꞌaꞌ kadeꞌ Akulah Iad. 20 Sasidinya Aku bakata kaꞌ kitaꞌ, sae jaꞌ nang narimaꞌ urakng nang Ku-ngiripm, ia narimaꞌ Aku, man sae jaꞌ nang narimaꞌ Aku, ia narimaꞌ Ia nang ngiripm Aku.”e
Yesus ngataatn sae nang ngianatiaꞌ Ia
13:21-30
(Mat. 26:21-25; Mrk. 14:18-21; Luk. 22:21-23)
21 Lakaꞌ Yesus bakata lekoa Ia jaji sidi miah kasal ati. Lalu Ia bakata: “Sabatolnya Aku bakata kaꞌ kitaꞌ, saurakng dari antara kitaꞌ ngianatiaꞌ Aku.” 22 Murit-murit kaꞌ koa bateleꞌ-teleꞌ, ia kaꞌ koa ragu-ragu sae nang di-Nya maksut. 23 Saurakng kaꞌ antara murit Yesus, yakoa murit nang Nya ngasihiꞌ, nyanar kaꞌ samak-Nya, kaꞌ sabalah kanan-Nya. 24 Kaꞌ murit koa, Simon Petrus mareꞌ kode man bakata: “Tanyaꞌlah sae nang Nya maksut!” 25 Lalu murit nang duduk samak Yesus koa malek man bakata kaꞌ Ia: “Tuhan, sae ia koa?” 26 Sahut Yesus: “Urakng nang Ku-mareꞌ roti nang Ku-nyalupatn kaꞌ dalapm mangkok, ialah urakngnya.” Lalu Yesus naap roti, nyalupatnnya kaꞌ dalapm mangkok; lalu mareꞌatnya kaꞌ Yudas, anak Simon Iskariot. 27 Lakaꞌ Yudas narimaꞌ roti koa, Ibalis pamimpin setan-setan ngoasaiꞌ atinya. Lalu Yesus bakata kaꞌ Yudas Iskariot: “Panjawatlah ganceh ahe nang maoꞌ nyu panjawat.” 28 Tapi inaꞌ ada saurakng pun dari antara nya kaꞌ koa nang duduk makatn koa ngarati, ahe nang di Yesus ngataatn kaꞌ Yudas koa. 29 Ada nang nyangka, Yesus nyuruh Yudas mali kapalaluatn untuꞌ ari raya koa, ato mareꞌ sabebet duit kaꞌ urakng kodo jukut Yudas koa bendahara. 30 Lakaꞌ narimaꞌ roti koa Yudas pun dari. Waꞌtu koa ari dah malam.
Parentah nang baharu
13:31-35
31 Lakaꞌ Yudas Iskariot dari, bakatalah Yesus: “Ampeatn Aku Anak Manunsia dimuliaatn man Allah dimuliaatn kaꞌ dalapm Anak Manunsia. 32 Tagal Allah narimaꞌ kamuliaatn lewat Ia, Allah ugaꞌ muliaatnnaꞌ Anak Manunsia lewat diriꞌ-Nya babaro. Hal koa jajiaꞌ sacapatnya.” 33 Yesus bakata agiꞌ: “Sodara-sodara nang Ku-ngasihiꞌ, Aku badiapm man kitaꞌ cuman sabantar ihan. Kitaꞌ ngagoꞌiaꞌ Aku, tapi lea nang dah Ku-ngataatn kaꞌ pamimpin-pamimpin Yahudi: lekoa ugaꞌ Ku-ngataatn kaꞌ kitaꞌ; kaꞌ tampat Aku ampus kitaꞌ inaꞌ baya atakng.f
34 Aku mareꞌatn parentah baharu kaꞌ kitaꞌ, kasihiꞌlah sekoꞌ man nang lain. Lea Aku ngasihiꞌ kitaꞌ, lekoa ugaꞌ kitaꞌ arus kajah bakasihiꞌ.g 35 Kadeꞌ kitaꞌ kajah bakasihiꞌ, samua urakng nauꞌanaꞌ kadeꞌ kitaꞌ murit-murit-Ku.”
Petrus basangkal kadeꞌ ia kanal kaꞌ Yesus
13:36-38
(Mat. 26:31-35; Mrk. 14:27-31; Luk. 22:31-34)
36 Simon Petrus bakata kaꞌ Yesus: “Tuhan, kaꞌ mae keꞌ Kitaꞌ ampus?” Sahut Yesus: “Kaꞌ tampat Aku ampus, kao inaꞌ baya nunaꞌan Aku ampeatn, tapi naꞌe kao nunaꞌannaꞌ Aku.” 37 Kata Petrus kaꞌ Ia: “Tuhan, ngahe aku inaꞌ baya nunaꞌan Kitaꞌ ampeatn? Aku mareꞌatnnaꞌ nyawaku untuꞌ Kitaꞌ!” 38 Sahut Yesus: “Kao mareꞌatnnaꞌ nyawanyu, kaꞌ Aku? Sasidinyanya Aku bakata kaꞌ kao, sanapeꞌ manok ningkoꞌok, kao dah nyangkal Aku talu kali.”