Yesus ngutus dua balas murit-Nya
(Mat. 10:5-15; Mrk. 6:7-13)
9
Yesus nyaruꞌ kadua balas murit-Nya,
lalu mareꞌ kuasa kaꞌ ia kaꞌ koa untuꞌ ngoser setan man nyamuhatn panyakit.
2 Lakaꞌ koa Yesus nyuruh ia kaꞌ koa ampus nyamuhatn urakng sakit man ngesahatn Kabar nang Gagas lemae Tuhan Allah marentah jaji Raja.
3 Jakata Yesus kaꞌ ia kaꞌ koa,
“Ame kitaꞌ ngincakng ahe-ahe kaꞌ pajalanan:
ame ngincakng tungkat,
ngincakng tas,
ngincakng bahata,
ngincakng duit,
man ame ngincakng pasalinan.
4 Kaꞌ rumah diꞌmae maan kitaꞌ ditarimaꞌ,
badiapmlah kaꞌ diꞌkoa sampe kitaꞌ ninggalatn kota koa.
5 Man kaꞌ kota diꞌmae kitaꞌ inaꞌ ditarimaꞌ,
takaꞌ kitaꞌ ninggalatn kota koa,
kiboatnlah dabu nang kaꞌ paha kitaꞌ koa.
Nian jaji paringatan untuꞌ urakng kaꞌ kota koa,
kadeꞌ Tuhan Allah ngukumaꞌ ia kaꞌ koa.”
6 Naꞌ murit Yesus barangkat,
lalu ampus kaꞌ desa-desa untuꞌ ngesahatn Kabar nang Gagas mpat kaꞌ Tuhan Allah,
man nyamuhatn urakng sakit kaꞌ mae-mae.
Herodes man Yesus
(Mat. 14:1-12; Mrk. 6:14-29)
7 Takaꞌ Herodes,
nang marentah kaꞌ Galilea,
nangar sigana ahe nang dah jaji koa,
ia kabingungan.
Jukut ada nang bakata kadeꞌ Yesus koa Yohanes Pamaptis nang dah mulakng idup agiꞌ.
8 Ada ugaꞌ nang bakata kadeꞌ nabi Eliaa dah atakng agiꞌ.
Urakng lain pulaꞌ bakata kadeꞌ ada sekoꞌ nabi dari nabi-nabi nang kaꞌ jaman deꞌe dah idup agiꞌ.
9 Herodes bakata,
“Aku dah nyuruh urakng nangkadas tageꞌ Yohanes.
Tapi Yesus nian,
sae sabatolnya?
Ada manyak nang ku nangar tentang Ia.”
Tagal koa Herodes barusaha neleꞌaꞌ Yesus.
Yesus mareꞌ makatn lima ribu urakng
(Mat. 14:13-21; Mrk. 6:30-44; Yoh. 6:1-14)
10 Dua balas urakng naꞌ rasul-Nya koa mulakng agiꞌ kaꞌ Yesus,
man ngesahatn sigana nang dah di nya kaꞌ koa manjawat.
Lakaꞌ koa Yesus maba naꞌ rasul-Nya koa ampus kaꞌ kota Betsaida untuꞌ nyauhiꞌ urakng rami.
11 Tapi takaꞌ urakng rami kaꞌ koa nauꞌan Yesus ampusaꞌ kaꞌ abut koa,
ia kaꞌ koa nunaꞌan Yesus.
Yesus narimaꞌ ia kaꞌ koa,
lalu ngomong kaꞌ ia kaꞌ koa tentang lemae Tuhan Allah marentah jaji Raja.
Man Ia ugaꞌ nyamuhatn urakng sakit kaꞌ antara urakng-urakng koa.
12 Takaꞌ mataari dah mulaiꞌ tingalapm,
kadua balas murit Yesus atakng kaꞌ Ia man bakata,
“Paꞌ Guru,
tampat nian sunyiꞌ.
Labih baik Kitaꞌ nyuruh urakng-urakng kaꞌ kea pulakng ngagoꞌ pamakanan man tampat untuꞌ bamalam kaꞌ kampokng-kampokng man kaꞌ desa-desa kaꞌ sakitar nian.”
13 Tapi Yesus nyahut,
“Kitaꞌ jaꞌ nang mareꞌ ia kaꞌ koa makatn.”
Naꞌ murit Yesus bakata,
“Nang ada kaꞌ kami kahe lima eteꞌ roti man dua ekoꞌ ikatn ihan.
Ahe geꞌ kami arus ampus mali pamakanan untuꞌ sigana urakng kaꞌ kea?”
14 Kaꞌ diꞌkoa ada kira-kira lima ribu urakng nanglaki.
Yesus bakata kanaꞌ murit-Nya,
“Suruh urakng-urakng kaꞌ koa duduk bakalompok,
kira-kira lima puluh urakng sakalompok.”
15 Naꞌ murit Yesus koa manjawat ahe nang di Yesus ngataatn kaꞌ ia kaꞌ koa.
Sigana urakng kaꞌ koapun badudukatn.
16 Lalu Yesus naap lima eteꞌ roti man dua ekoꞌ ikatn koa,
lakaꞌ koa Ia ningkadah kaꞌ langit basukur batarimaꞌkasih kaꞌ Tuhan Allah.
Lakaꞌ koa Ia nyempak roti man ngojek ikatn make kokot-Nya,
lalu mareꞌatnnya kanaꞌ murit-Nya untuꞌ dibagi-bagi kaꞌ urakng rami koa.
17 Sigana urakng kaꞌ koa makatn sampe kanyang.
Lalu naꞌ murit Yesus ngomoꞌan labih pamakanan koa,
manyaknya dua balas bakul.
Petrus ngakoꞌiꞌ kadeꞌ Yesus Raja Panyalamat
(Mat. 16:13-19; Mrk. 8:27-29)
18 Waꞌtu koa,
takaꞌ Yesus badoa babaro,
naꞌ murit-Nya atakng kaꞌ Ia.
Yesus batanyaꞌ kaꞌ ia kaꞌ koa,
“Jakata urakng,
Aku nian sae?”
19 Ia kaꞌ koa nyahut,
“Ada nang bakata Yohanes Pamaptis.
Ada ugaꞌ nang bakata nabi Elia,
nang lain bakata salah sekoꞌ nabi jaman deꞌe nang dah idup agiꞌ.”
20 Yesus batanyaꞌ,
“Tapi manurut kitaꞌ babaro Aku nian sae?”
Petrus nyahut,
“Kitaꞌlah Raja nang di Tuhan Allah nyanjiatn.”
21 Lalu Yesus maiꞌan naꞌ murit-Nya,
“Ame boh padahatn hal koa kaꞌ saepun.”
Yesus ngomong tentang kasingsaraatn man kamatiatn-Nya
22 Yesus bakata ugaꞌ,
“Anak Manunsia memang arus manyak singsara man dinolak di naꞌ pamimpin urakng Yahudi,
man di imam-imam kapalaꞌ,
sarata ugaꞌ di naꞌ guru agama Yahudi.
Ia dibunuhaꞌ,
tapi ari nang katalu dibangkitatnnaꞌ agiꞌ.”
23 Lakaꞌ koa Yesus bakata kaꞌ sigana urakng nang ada kaꞌ diꞌkoa,
“Urakng nang maoꞌ jaji murit-Ku arus ngalupaatn kapantingannya babaro,
mikut salipnya tiap ari,
man nunaꞌan Aku.
24 Sae nang barusaha nyaga idupnya kaꞌ dunia nian,
ia inaꞌ namu idup nang salamanya.
Tapi sae nang nyarahatn sigana idupnya tagal jaji murit-Ku,
ia namuaꞌ idup salamanya.
25 Ahe untukngnya urakng nang ngampuꞌ sigana isiꞌ dunia nian,
kadeꞌ ia ngarusak diriꞌnya man kailangan idup nang salamanya?
26 Kadeꞌ urakng supeꞌ ngakoꞌiꞌ diriꞌnya jaji murit-Ku man supeꞌ nurutiꞌ pangajaran-Ku,
Anak Manunsia ugaꞌ supeꞌ ngakoꞌiꞌ urakng koa kaꞌ waꞌtu Ia atakng ana.
Ia atakngaꞌ man kuasa-Nya nang miah tingi,
man kuasa Apaꞌ-Nya,
sarata ugaꞌ kuasa malaekat-malaekat nang suci!
27 Dangar boh:
kaꞌ antara urakng kaꞌ dian,
ada nang napeꞌ matiaꞌ sanapeꞌ ia kaꞌ koa neleꞌaꞌ Tuhan Allah marentah jaji Raja.”
Yesus kateleꞌatn basaho kaꞌ bukit
(Mat. 17:1-8; Mrk. 9:2-8)
28 Kira-kira lapan ari lakaꞌ Yesus ngajaratn pangajaran-Nya koa,
Ia maba Petrus,
Yohanes,
man Yakobus kaꞌ atas sabuah bukit untuꞌ badoa.
29 Samintara Yesus badoa kaꞌ diꞌkoa,
muha-Nya barubah man pakean-Nya jaji basaho sidi putih.
30-31 Tiba-tiba dua urakng neleꞌatn diriꞌnya basaho nang tarakng mpat kaꞌ saruga,
ia koa Musa man nabi Elia.
Ia kaꞌ koa ngomong man Yesus,
tentang kamatiatn-Nya nang inaꞌ lama agiꞌ Yesus jalatniaꞌ kaꞌ Yerusalem pas lea nang di Tuhan Allah nantuatn.
32 Petrus man ayukng-ayukngnya dah tatidur.
Takaꞌ ia kaꞌ koa lumpat,
ia kaꞌ koa neleꞌ Yesus basaho,
man dua urakng koa nang badiri samak Yesus.
33 Takaꞌ kadua urakng koa ningalatnnaꞌ Yesus,
Petrus bakata kaꞌ Yesus,
“Paꞌ Guru,
sidi reponya kami kaꞌ dian.
Biaratn kami madiri talu buah dango:
sabuah untuꞌ Kitaꞌ,
sabuah untuꞌ Musa,
nang sabuah agiꞌ untuꞌ Elia.”
Tapi Petrus inaꞌ nauꞌan kaꞌ ahe nang nya ngataatn.
34 Takaꞌ Petrus giꞌ ngomong,
daꞌ atakng rahuꞌ ngalingkupiꞌ ia kaꞌ koa,
sampe ia kaꞌ koa kagaliꞌanan.
35 Lalu kadangaratn suara mpat kaꞌ rahuꞌ koa bakata,
“Nianlah Anak-Ku nang Kumilih.
Dangaratn boh Ia!”
36 Lakaꞌ suara koa baranti,
ia kaꞌ koa neleꞌ Yesus babaro kaꞌ diꞌkoa.
Naꞌ murit Yesus tadiapm neleꞌ sigananya koa.
Waꞌtu koa naꞌ Petrus,
Yohanes man Yakobus napeꞌ ngesahatn kaꞌ saepun,
sigana ahe nang dah nya neleꞌ koa.
Yesus nyamuhatn kamudaꞌ nang kamasokatn setan
(Mat. 17:14-18; Mrk. 9:14-27)
37 Ampaginya Yesus man katalu murit-Nya turutn mpat kaꞌ bukit koa,
man urakng manyak atakng kaꞌ Yesus.
38 Saurakng nanglaki mpat kaꞌ tangah-tangah urakng manyak koa ngampak,
“Paꞌ Guru,
bantoꞌlah anakku,
ia anak tungalku!
39 Ia kaja di setan nyarang.
Kadeꞌ setan koa nyarang ia,
ia ngampak man tubuhnya bakaroꞌatn sampe molotnya bapopoꞌ.
Setan koa tarus nyiksa ia man baiꞌ kaluas kaꞌ ia!
40 Aku dah mintaꞌ kanaꞌ murit Kitaꞌ ngoser setan koa,
tapi ia kaꞌ koa inaꞌ mampu.”
41 Yesus nyahut,
“He kitaꞌ urakng nang inaꞌ pucayaꞌ,
urakng nang batabiat jahat,
sampe kamile agiꞌ Aku arus ada man kitaꞌ,
sabar kaꞌ tabiat kitaꞌ?
Incakng kamudaꞌnyu koa kaꞌ dian!”
42 Samintara kamudaꞌ koa bajalatn notok Yesus,
setan koa ngampasatn ia man manjawat tubuhnya bakaroꞌatn.
Tapi Yesus marentahatn setan koa kaluas,
takaꞌ koa ugaꞌ kamudaꞌ koa jaji samuh.
Lalu kamudaꞌ koa dinyarahatn kaꞌ apaꞌnya.
43 Sigana urakng kaheranan neleꞌ kuasa Tuhan Allah nang miah tingi.
Yesus ngomong agiꞌ tentang kamatiatn-Nya
(Mat. 17:22-23; Mrk. 9:30-32)
Waꞌtu urakng-urakng masih kaheranan neleꞌ samua nang dah di Nya manjawat, Yesus bakata kanaꞌ murit-Nya,
44 “Paratiatn boh sidi-sidi man ame lupa kaꞌ pakataatn-Ku nian:
Anak Manunsia disarahatnnaꞌ kaꞌ kuasa talino.”
45 Tapi naꞌ murit Yesus inaꞌ ngarati kaꞌ pakataatn Yesus koa.
Hal koa dinosokatn kaꞌ ia kaꞌ koa,
biar ia kaꞌ koa inaꞌ ngarati.
Tapi ia kaꞌ koa galiꞌ nanyaꞌan hal koa kaꞌ Yesus.
Sae nang paling panting
(Mat. 18:1-5; Mrk. 9:33-37)
46 Kaꞌ antara naꞌ murit Yesus timul patangkaratn,
sae kaꞌ antaranya kaꞌ koa nang paling panting.
47 Yesus nauꞌan pikirannya kaꞌ koa,
tagal koa Yesus nyangiꞌi kokot sekoꞌ kamudaꞌ enek,
mabanya badiri kaꞌ samak-Nya.
48 Lalu Ia bakata kanaꞌ murit-Nya,
“Urakng nang narimaꞌ kamudaꞌ nian tagal Aku,
barati narimaꞌ Aku.
Man urakng nang narimaꞌ Aku narimaꞌ Tuhan Allah nang ngutus Aku.
Jukut urakng nang dinganggap inaꞌ barati kaꞌ antara kitaꞌ,
ia koalah nang paling panting!”
Urakng nang bukeꞌ murit Yesus ngoser setan
49 Yohanes bakata,
“Paꞌ Guru,
kami neleꞌ urakng ngoser setan man dama Kitaꞌ,
kami maiꞌan ia,
jukut ia bukeꞌ dari diriꞌ.”
50 Jakata Yesus kaꞌ Yohanes man kanaꞌ murit nang lainnya,
“Ame baiꞌatn ia,
jukut urakng nang inaꞌ balawan man kitaꞌ,
barati bapihak kaꞌ kitaꞌ.”
Yesus dinolak kaꞌ kampokng urakng Samaria
51 Takaꞌ dah samak waꞌtunya Yesus diangkataꞌ kaꞌ saruga,
Ia mutusatn untuꞌ ampus kaꞌ Yerusalem.
52 Ia nyuruh sangahe urakng ampus untuꞌ nyiapatn sigana ahe nang palalu untuꞌ Yesus,
sanapeꞌ Ia ampus kaꞌ daerah koa.
Lalu urakng-urakng nang di Nya nyuruh koa ampus man tamaꞌ kaꞌ soteꞌ kampokng kaꞌ Samaria.
53 Tapi urakng-urakng kaꞌ kampokng koa baiꞌ narimaꞌ Yesus,
jukut dah ditauꞌatn tujuan Yesus koa ampusaꞌ kaꞌ Yerusalem.
54 Waꞌtu Yakobus man Yohanes dua murit Yesus nauꞌan tentang hal koa,
ia kaꞌ koa bakata,
“Tuhan,
ahe geꞌ Tuhan maoꞌ,
kami mintaꞌ api turutn mpat kaꞌ langit untuꞌ minaꞌsaatn urakng-urakng kampokng nian?”
Urakng-urakng nang maoꞌ jaji murit Yesus
(Mat. 8:19-22)
57 Samintara Yesus man naꞌ murit-Nya narusatn pajalanan,
ada urakng nang bakata kaꞌ Ia,
“Paꞌ Guru,
aku maoꞌ nunaꞌanaꞌ Kitaꞌ kaꞌ mae maan Kitaꞌ ampus!”
58 Yesus nyahut,
“Legoh ada batampat untuꞌ badiapm,
burukng ada basarakng,
tapi Anak Manunsia inaꞌ batampat untuꞌ nguringan kapalanya.”
59 Lalu Yesus bakata kaꞌ sekoꞌ urakng nang lain,
“Injeꞌ tunaan Aku.”
Tapi urakng koa bakata,
“Paꞌ Guru,
biaratn aku pulakng doloꞌ nyuburaꞌ apaꞌku.”
60 Yesus nyahut,
“Biarlah urakng mati nyubur sabayaatnnya urakng mati.
Tapi kao,
ampuslah man gesahatn kabar kadeꞌ Tuhan Allah udah bamula marentah jaji Raja.”
61 Ada ugaꞌ urakng nang lain bakata,
“Paꞌ Guru,
aku maoꞌ nunaꞌanaꞌ Kitaꞌ,
tapi biaratn aku bapadahaꞌ doloꞌ kaꞌ kaluarga ku.”
62 Yesus bakata kaꞌ urakng koa,
“Urakng nang dah bamula nabas kaꞌ uma,
tapi neleꞌ kaꞌ balakang,
inaꞌ pantas jaji anggota umat nang di Tuhan Allah marentah.”