Nangbini-nangbini nang mantoꞌ Yesus
8
Inaꞌ lama lakaꞌ koa,
Yesus ampus kaꞌ kota-kota man kaꞌ kampokng-kampokng,
untuꞌ nyampeatn Kabar nang Gagas kadeꞌ Tuhan Allah dah bamula marentah jaji Raja.
Kadua balas murit Yesus nunaꞌan-Nya.
2 Lekoa ugaꞌ man sangahe urakng nangbini nang dah Yesus nyamuhatn dari setan man dari panyakit.
Ia koa Maria nang dinyabut Makdalena (tujuh setan dah Yesus ngaluaratn mpat kaꞌ ia);
3 ugaꞌ Yohana,
bini Kusa nang jaji kapalaꞌ pagawai istana Herodes;
Susana,
man manyak agiꞌ nangbini nang lain.
Nangbini kaꞌ koa make duitnya babaro,
untuꞌ mantoꞌ Yesus man murit-murit-Nya.
Parumpamaan urakng nang bahuma
(Mat. 13:1-9; Mrk. 4:1-9)
4 Urakng-urakng tarus baꞌatangan kaꞌ Yesus mpat kaꞌ kota-kota.
Waꞌtu koa dah manyak urakng bakomoꞌ,
Yesus ngesahatn parumpamaan kaꞌ urakng-urakng koa.
Lea nian:
5 “Sekoꞌ urakng nang bahuma ampus ngamuratn banih.
Takaꞌ nya ngamur,
banih koa ada nang jantuꞌ kaꞌ maraga,
lalu di urakng matinyakatn man di burukng makatniꞌ.
6 Ada ugaꞌ nang jantuꞌ kaꞌ tampat nang babatu-batu.
Takaꞌnya dah camak banih koa,
daꞌ layuꞌ jukut tanahnya karikng.
7 Ada ugaꞌ banih nang jantuꞌ kaꞌ tangah rompoꞌ baduri.
Rompoꞌ baduri koa tumuh sama-sama man banih koa,
banih koa nyangapet sampe mati.
8 Tapi ada ugaꞌ banih nang jantuꞌ kaꞌ tanah nang gagas,
lalu tumuh,
babuah saratus kali lipat.”
Dah lakaꞌ ngesahatn parumpamaan koa,
Yesus bakata nyarikng,
“Dangar edoꞌ-edoꞌ boh ahe nang Ku ngataatn koa tadi!”
Alasan ngahe Yesus make parumpamaan
(Mat. 13:10-17; Mrk. 4:10-12)
9 Naꞌ murit Yesus batanyaꞌ kaꞌ Ia ahe ratinya parumpamaan koa.
10 Jakata Yesus nyahutiꞌnya,
“Kitaꞌ dah dimareꞌ kapanean untuꞌ nauꞌan rahasia lemae Tuhan Allah marentah jaji Raja.
Tapi urakng-urakng lain dingajar man parumpamaan,
biar ia kaꞌ koa neleꞌ,
tapi inaꞌ nauꞌan ahe nang tajaji;
man ia kaꞌ koa nangar,
tapi inaꞌ ngarati.”
Yesus nyalasatn parumpamaan urakng nang bahuma
(Mat. 13:18-23; Mrk. 4:13-20)
11 “Nian ratinya parumpamaan koa:
Banih ratinya pakataatn Tuhan Allah.
12 Takaꞌ banih jantuꞌ kaꞌ maraga,
ia koa lea urakng-urakng nang nangar pakataatn Tuhan Allah.
Tapi Ibalis pamimpin setan-setan atakng ngarampas pakataatn Tuhan Allah koa mpat kaꞌ ati urakng kaꞌ koa,
biar ia kaꞌ koa ame pucayaꞌ man disalamatatn.
13 Takaꞌ banih jantuꞌ kaꞌ tanah nang babatu-batu,
ia koa lea urakng nang waꞌtu nangar pakataatn Tuhan Allah,
nya narimaꞌ karepoatn.
Tapi pakataatn Tuhan Allah koa inaꞌ baakar kaꞌ dalapm atinya kaꞌ koa.
Ia kaꞌ koa pucayaꞌ sabantar ihan,
waꞌtu cobaan atakng ia kaꞌ koa ningalatn kapucayaatnnya kaꞌ Tuhan Allah.
14 Takaꞌ banih jantuꞌ kaꞌ tangah rompoꞌ nang baduri,
ia koa lea urakng-urakng nang nangar pakataatn Tuhan Allah.
Tapi ia kaꞌ koa kuatir kaꞌ idupnya,
man ugaꞌ maoꞌ idup mewah man sanang kaꞌ dalapm dunia nian.
Sigananya koa ngapet ia kaꞌ koa.
Tagal koa,
urakng-urakng kaꞌ koa,
inaꞌ ngasilatn buah nang masak.
15 Takaꞌ banih jantuꞌ kaꞌ tanah nang gagas,
ia koa lea urakng nang nangar pakataatn Tuhan Allah,
lalu norohiꞌnya kaꞌ dalapm ati nang baik man jujur.
Ia kaꞌ koa batahan sampe ngasilatn buah.”
Kulita nang dinutup man tapayatn
16 “Inaꞌ ada urakng nang nyalaatn kulita lalu nutupnya man tapayatn,
geꞌ ngalakaꞌatnnya kaꞌ babah tampat tidur.
Tapi ia ngantunganaꞌ kulita koa kaꞌ dinikng,
biar urakng nang tamaꞌ kaꞌ rumah koa baya neleꞌ tarakngnya.
17 Lekoa ugaꞌ sigana nang dinosokatn,
pasti kateleꞌatnnaꞌ,
man sigana nang dinutup-nutupiꞌ pasti tabukaaꞌ man urakng-urakng nauꞌanaꞌ.
18 Tagal koa paratiatn sidi-sidi boh cara kitaꞌ nangar pakataatn Tuhan Allah.
Jukut urakng nang nangar pakataatn koa,
Tuhan Allah manjawataꞌ ia labih ngarati agiꞌ.
Tapi urakng nang baiꞌ nangar,
nang ia mikir ia ngarati,
nang koa ugaꞌ ditaapaꞌ kaꞌ ia.”
Uweꞌ man kamarkapala Yesus
(Mat. 12:46-50; Mrk. 3:31-35)
19 Uweꞌ man kamarkapala Yesus atakng ugaꞌ kaꞌ Yesus,
tapi ia kaꞌ koa naꞌ baya nyamakiꞌ-Nya,
jukut urakng rami.
20 Tagal koa ada urakng nang bakata kaꞌ Yesus,
“Paꞌ Guru,
uweꞌ man kamarkapala Kitaꞌ ada kaꞌ luas.
Ia kaꞌ koa maoꞌ batamuaꞌ man Kitaꞌ.”
21 Tapi Yesus bakata kaꞌ urakng rami koa,
“Urakng-urakng nang nangar pakataatn Tuhan Allah man nang nyalanannya,
ia kaꞌ koa nang Aku anggap uweꞌ man kamarkapala-Ku.”
Yesus madiaman nyaru
(Mat. 8:23-27; Mrk. 4:35-41)
22 Ari koa Yesus man naꞌ murit-Nya naik kaꞌ parahu balayaraꞌ.
Jakata Yesus kaꞌ ia kaꞌ koa,
“Injeꞌ diriꞌ ampus kaꞌ sabarang dano.”
Tagal koa ia kaꞌ koa barangkat.
23 Giꞌ tagah balayar,
Yesus tatidur.
Daꞌ atakng nyaru nang kuat kaꞌ dano koa.
Aiꞌ mulaiꞌ tamaꞌ kaꞌ dalapm parahu,
nang manjawat ia kaꞌ koa bahayaaꞌ.
24 Naꞌ murit Yesus ampus ngunak-Nya.
Ia kaꞌ koa bakata kaꞌ Yesus,
“Paꞌ Guru,
Paꞌ Guru,
diriꞌ matiaꞌ!”
Yesus lumpat lalu nyuruh nyaru man galombang nang kuat koa,
“Diapm!”
Nyaru man galombang nang kuat koa tapadiapm,
lalu dano jaji sidi tanang.
25 Lakaꞌ koa Yesus bakata kanaꞌ murit-Nya,
“Ngahe kitaꞌ inaꞌ pucayaꞌ kaꞌ Aku?”
Ia kaꞌ koa jaji kaheranan man galiꞌ,
lalu bakata kaꞌ sabayaatnya,
“Sae sabatolnya urakng nian?
Nyaru man galombang pun,
ngasiꞌ kaꞌ parentah-Nya!”
Yesus nyamuhatn urakng nang kamasokatn setan
(Mat. 8:28-34; Mrk. 5:1-20)
26 Yesus man naꞌ murit-Nya tarus balayar sampe kaꞌ tanah urakng Gerasa sabarang dano Galilea.
27 Dah sampe kaꞌ sabarang,
Yesus naik kaꞌ darat,
Ia di nanglaki nang kamasokatn setan ngatakngiꞌ.
Urakng koa dari kota,
dah lama ia inaꞌ bapakean man inaꞌ badiapm kaꞌ rumah,
ia badiapm kaꞌ subur ihan.a
28 Takaꞌ neleꞌ Yesus ia ngampak sujut kaꞌ adapatn Yesus sirage bakata,
“Yesus,
Anak Tuhan Allah nang Miah Bakuasa!
Kitaꞌ kaheaꞌ aku nian?
Aku mohon ame aku dipajara!”
29 Urakng nang kamasokatn setan koa bakata mpakoa,
jukut Yesus baruꞌ ugaꞌ nyuruh setan koa kaluas mpat kaꞌ urakng koa.
Setan koa kaja masokiꞌ urakng koa.
Biarpun dijaga man dingarante kokot man pahanya,
ia mampu mutusatn rantenya koa.
Lalu setan koa ngincakngnya kaꞌ padang paser.
30 Yesus batanyaꞌ kaꞌ urakng koa,
“Sae damanyu?”
Jakata setan koa,
“Damaku Legionb,”
jukut,
manyak setan nang dah tamaꞌ kaꞌ urakng koa.
31 Setan-setan koa mintaꞌ sidi kaꞌ Yesus biar Yesus ame ngoser ia kaꞌ koa kaꞌ dalapm jurang maut.
32 Kaꞌ samak tampat koa ada manyak babotn nang giꞌ tagah ngagoꞌ pamakanan kaꞌ tabikng bukit koa.
Setan-setan koa mintaꞌ sidi kaꞌ Yesus,
biar Yesus miaratnnya tamaꞌ kaꞌ babotn-babotn koa.
Yesus miaratnnya.
33 Setan-setan koapun kaluas mpat kaꞌ urakng koa,
tamaꞌ kaꞌ babotn-babotn koa.
Lalu babotn-babotn kaꞌ koa badariatn kaꞌ sisi arokng man batarajunan kaꞌ dalapm dano lalu mati tingalapm.
34 Naꞌ panyaga babotn koa neleꞌ ahe nang dah jaji koa,
ia kaꞌ koa batilamaꞌ kaꞌ kota man kaꞌ sakulilikng kampokng ngesahatn kabar koa.
35 Urakng-urakng bakaluasatn neleꞌaꞌ ahe nang dah tajaji koa,
lalu atakng kaꞌ Yesus.
Ia kaꞌ koa neleꞌ urakng nang dah bebas dari kuasa setan koa tagah duduk samak paha Yesus.
Urakng koa dah bapakean man pikirannya dah waras.
Urakng rami nang neleꞌnya koa jaji bagaliꞌatn.
36 Urakng-urakng nang neleꞌ kajadian koa ngesahatnnya kaꞌ urakng-urakng lain,
lemae urakng nang kamasokatn setan koa dinyamuhatn.
37 Lalu sigana panduduk daerah Gerasa sidi bapintaꞌ kaꞌ Yesus supaya Ia ningalatn abut koa,
jukut sigana urakng kaꞌ koa sidi bagaliꞌatn.
Jaji Yesus naik kaꞌ parahu balayaraꞌ agiꞌ.
38 Urakng nang dah bebas dari kuasa setan koa bapintaꞌ kaꞌ Yesus biar ia diporongan ampus man Yesus.
Tapi Yesus nyuruh ia pulakng,
jakata Yesus kaꞌ ia koa,
39 “Pulakng jaꞌ kaꞌ rumahnyu man gesahatn ahe nang dah di Tuhan Allah panjawat kaꞌ kao.”
Jaji urakng koa pulakng kaꞌ kotanya,
ngesahatn ahe nang dah Yesus panjawat kaꞌ ia sampe kaꞌ palosok-palosok kota koa.
Yesus ngidupatn anak Yairus man nyamuhatn nangbini nang sakit pandarahan
(Mat. 9:18-26; Mrk. 5:21-43)
40 Takaꞌ Yesus mulakng kaꞌ sabarang dano,
urakng rami nyambut Ia karepoatn.
Jukut urakng kaꞌ koa tagah nunggu-nunggu Ia.
41 Lalu kapalaꞌ rumah tampat sumbayang nang badama Yairus,
atakng kaꞌ Yesus sujut kaꞌ adapatn-Nya.
Ia mintaꞌ sidi supaya Yesus atakng kaꞌ rumahnya,
42 jukut anak tungalnya nangbini nang baumur dua balas tahutn,
amper mati.
Samintara Yesus bajalatn kaꞌ rumah Yairus,
urakng rami bapeset-peset.
43 Kaꞌ antara urakng nang bapeset-peset koa,
ada nangbini nang dah dua balas tahutn sakit pandarahan,
tapi inaꞌ ada nang baya nyamuhatnnya.
44 Nangbini koa nyamakiꞌ Yesus dari balakang,
lalu ia nyangkam ujukng jubah Yesus.
Takaꞌ koa ugaꞌ pandarahan nangbini koa samuh.
45 Yesus batanyaꞌ,
“Sae nang nyantuh Aku?”
Sigana urakng nyangkal.
Lalu Petrus bakata,
“Paꞌ Guru,
sidi manyak urakng nang bapeset-peset kaꞌ sakulilikng Kitaꞌ.”
46 Yesus bakata,
“Tapi ada urakng nang singaja nyantuh Aku.
Aku nauꞌan,
jukut ada kuasa nang kaluas mpat kaꞌ Aku.”
47 Nangbini koa sadar kadeꞌ ahe nang dah nya manjawat koa katauꞌanan.
Ia kagaliꞌanan sampe basiragotatn atakng basujut kaꞌ Yesus.
Lalu ia ngesahatn kaꞌ adapatn sigana urakng,
ngahe ia nyantuh Yesus,
man takaꞌ koa ugaꞌ panyakitnya jaji samuh.
48 Yesus bakata kaꞌ ia,
“Anak-Ku,
tagal kao pucayaꞌ kaꞌ Aku,
kao samuh.
Pulaknglah baati nang dame.”
49 Samintara Yesus giꞌ ngomong,
sekoꞌ urakng nang mpat kaꞌ rumah Yairus,
atakng kaꞌ Yairus,
nang waꞌtu koa sama-sama man Yesus.
Jakata urakng koa,
“Anak kitaꞌ nangbini dah nanaꞌ,
ame agiꞌ kitaꞌ nyusahiꞌ Paꞌ Guru,
nyuruh Ia atakng kaꞌ rumah.”
50 Takaꞌ Yesus nangar koa,
Ia bakata kaꞌ Yairus,
“Ame galiꞌ.
Picayaꞌ jaꞌ kaꞌ Aku,
man anaknyu mulakngaꞌ idup agiꞌ.”
51 Dah sampe kaꞌ rumah Yairus,
Yesus inaꞌ miaratn sekoꞌpun tamaꞌ man Ia,
kahe Petrus,
Yohanes,
Yakobus man uweꞌ apaꞌ kamudaꞌ koa ihan.
52 Sigana urakng tagah ngeakiꞌ kamatiatn kamudaꞌ koa.
Tapi Yesus bakata,
“Ame ngeak!
Kamudaꞌ koa inaꞌ mati.
Ia kahe tidur!”
53 Urakng kaꞌ koa ngalakatn Yesus,
jukut ia kaꞌ koa nauꞌan kadeꞌ anak Yairus nangbini koa dah nanaꞌ.
54 Lakaꞌ koa Yesus nyangiꞌiꞌ kokot kamudaꞌ koa man bakata,
“Lumpatlah nak!”
55 Tali sengat kamudaꞌ koa mulakng agiꞌ kaꞌ ia,
takaꞌ koa ugaꞌ kamudaꞌ koa lumpat.
Lakaꞌ koa Yesus nyuruh urakng kaꞌ koa mareꞌ kamudaꞌ koa makatn.
56 Urakng tuha kamudaꞌ koa sidi kaheranan.
Tapi Yesus maiꞌan urakng kaꞌ koa ngesahatn ahe nang dah jaji koa kaꞌ saepun.