Yesus nyambuhatn urakng kaꞌ ari Sabat
3:1-6
(Mat. 12:9-14; Luk. 6:6-11)
3
Lalu Yesus tamaꞌ agiꞌ kaꞌ rumah tampat sumbayang. Diꞌ koa ada saurakng nang mati sabalah kokotnya. 2 Basangahe urakng Yahudi maratiatnniꞌ Yesus, kadeꞌ Yesus nyamuhatnnaꞌ urakng koa kaꞌ ari Sabat, biar ia kaꞌ koa baya nyalahatn Yesus. 3 Kata Yesus kaꞌ urakng nang mati sabalah kokotnya koa, “Keatn, badirilah kaꞌ tangah!” 4 Lalu Ia batanyaꞌ kaꞌ urakng-urakng nang ada diꞌkoa, “Manurut ukum Torat, diriꞌ mulih manjawat ahe kaꞌ ari Sabat? Babuat baik ato babuat jahat? Nyalamatatn urakng ato munuhnya?” tapi ia kaꞌ koa badiapm maꞌan. 5 Man parasaan bera Yesus neleꞌ urakng-urakng kaꞌ sakulilikng-Nya, tapi Ia kasal ati ugaꞌ, tagal ia kaꞌ koa sidi miah karas kapala. Lalu Ia bakata kaꞌ urakng koa, “Joloꞌatn kokotnyu.” Urakng koa nyoloꞌatn kokotnya, man kokotnya koa pun jaji samuh. 6 Jaji kaluarlah urakng-urakng Parisi dari rumah tampat sumbayang koa lalu baganceh-ganceh bahaupm man sangahe urakng pandukung Herodian, untuꞌ munuh Yesus.Yesus nyamuhatn rami urakng
3:7-12
7 Lalu Yesus man murit-murit-Nya ningalatn tampat koa, ampus kaꞌ Dano Galilea. Rami urakng dari propinsi Galilea, Yudea, 8 dari Yerusalem, Idumea, dari sabarang Yordan, man dari daꞌerah Tirus man Sidon nunaꞌan-Nya. Ia kaꞌ koa atakng kaꞌ Yesus tagal ia kaꞌ koa nangngar tentang hal-hal nang dah di-Nya manjawat. 9 Ia nyuruh murit-murit-Nya nyiapatn sabuah parahu untuꞌ-Nya, biar Ia ame sampe kana pesetatn diꞌ urakng rami kaꞌ diꞌkoa.a 10 Tagal Ia dah nyamuhatn rami urakng, sampe samua nang basakitatn bapeset-peset barusaha nyamakiꞌ Yesus biar baya nyangkam-Nya. 11 Man urakng-urakng nang katamaan roh jahat, kadeꞌ tateleꞌ kaꞌ Ia, tarus jaꞌ sujut kaꞌ adapatn-Nya man ngampak, “Kitaꞌlah Anak Allah!” 12 Tapi Yesus miah maiꞌan roh-roh jahat koa madahatn sae Ia.
Yesus milih duabalas rasul
3:13-19
(Mat. 10:1-4; Luk. 6:12-16)
13 Lakaꞌ koa Yesus maba urakng-urakng nang di-Nya milih naik kaꞌ atas bukit, urakng-urakng kaꞌ koa pun nunaꞌan-Nya. 14 Lalu Yesus natapatn dua balas urakng, nang ugaꞌ Nya nyabut rasul-rasul untuꞌ nyarataiꞌ-Nya. Ia ngiripm urakng-urakng koa untuꞌ ngesahatn Kabar Baik 15 man Ia mareꞌ kaꞌ ia kaꞌ koa kuasa untuꞌ ngoser setan-setan. 16 Nian lah dama kaduabalas rasul koa, Simon nang Yesus mareꞌ dama Petrus, 17 Yakobus man Yohanes anak Sebedeus, nya dua koa adiꞌ baradiꞌ. Nyamadiꞌ koa Yesus mareꞌ dama ugaꞌ Boanerges, nang barati anak guntur, 18 Lalu Andreas, Pilipus, Bartolomeus, Matius, Tomas, Yakobus anak Alpeus, Tadeus, Simon urakng Selot, 19 man Yudas Iskariot, nang ngianatiꞌ Ia.
Yesus man Beelsebul
3:20-30
(Mat. 12:22-32; Luk. 11:14-23)
20 Lalu Yesus man pangikut-pangikut-Nya tamaꞌ kaꞌ sabuah rumah. Tapi urakng rami atakng agiꞌ bakomoꞌ, sampe-sampe Yesus man murit-murit-Nya inaꞌ sampat makatn. 21 Urakng-urakng bakata, “Ia dah gila!” Man takaꞌ page waris-Nya nangngar hal koa, ia kaꞌ koa ampus untuꞌ naap-Nya. 22 Man guru-guru agama Yahudi nang atakng dari Yerusalem bakata, “Ia katamaꞌan Beelsebul! Man kuasa pamimpin setan-setan Ia ngoser setan.”b 23 Yesus nyaruꞌ ia kaꞌ koa, lalu bakata kaꞌ ia kaꞌ koa make parumpamaan; “Lea mae Ibalis pamimpin setan-setan baya ngoser setan-setan, 24 kadeꞌ soteꞌ nagari tapacah-pacah, nagari koa inaꞌ baya batahan, 25 man kadeꞌ soteꞌ rumah tangaꞌ tapacah-pacah, rumah tangaꞌ koa inaꞌ baya batahan. 26 Lea koa ugaꞌ lah kadeꞌ Ibalis marontak ngalawan diriꞌnya babaro man kadeꞌ ia tabagi-bagi, ia inaꞌ baya batahan, pasti lanyapaꞌ. 27 Tapi inaꞌ saurakngpun baya namaꞌiꞌ rumah urakng nang kuat untuꞌ ngarampas haratanya kadeꞌ inaꞌ diikat doloꞌ urakng kuat koa. Lakaꞌ koa, baruꞌlah ia baya ngarampok rumah koa. 28 Aku bakata kaꞌ kitaꞌ, Sabatolnya samua dosa man hojat ahe pun nang ditalino ngataatn diamponiaꞌ 29 Tapi kadeꞌ urakng ngina Roh Kudus Allah, dosanya inaꞌ baya di amponiꞌ. Tagal hinaan koa lah urakng koa arus nanggong dosanya salama-lamanya.”c 30 Yesus bakata lea koa tagal ia kaꞌ koa madahatn kadeꞌ Ia katamaan roh jahat.
Yesus man kamarkapala-Nya
3:31-35
(Mat. 12:46-50; Luk. 8:19-21)
31 Lalu ataknglah Maria uweꞌ Yesus man adiꞌ baradiꞌ Yesus. Samintara ia kaꞌ koa badiri kaꞌ luar, ia kaꞌ koa nyuruh urakng nyaruꞌ Yesus. 32 Waꞌtu koa rami urakng nang duduk ngulilikngiꞌ Ia, ia kaꞌ koa bakata kaꞌ Yesus, “Teleꞌ, uweꞌ man adiꞌ baradiꞌ Kitaꞌ ada kaꞌ luar, man barusaha namuiꞌ Kitaꞌ.” 33 Sahut Yesus kaꞌ ia kaꞌ koa, “Sae uweꞌ-Ku man sae adiꞌ baradiꞌ-Ku?” 34 Ia neleꞌ kaꞌ urakng-urakng nang duduk kaꞌ sakulilikng-Nya koa man bakata, “Kitaꞌ nian lah uweꞌ-Ku man adiꞌ baradiꞌ-Ku! 35 Urakng-urakng nang manjawat kamaoꞌan Allah, ia kaꞌ koa lah adiꞌ baradiꞌ-Ku nanglaki man nangbini, man uweꞌ-Ku.”