Yesus nyamuhatn urakng elat
2:1-12
(Mat. 9:1-8; Luk. 5:17-26)
2
Dah lewat sangahe ari, Yesus mulakng agiꞌ kaꞌ Kapernaum, kadangngaratnlah kabar kaꞌ maeaꞌ maꞌan, kadeꞌ Ia ada kaꞌ rumah. 2 Lalu rami urakng atakng bakomoꞌ-komoꞌ sampe inaꞌ ada agiꞌ tampat, bahkan kaꞌ pamobok pun dah inaꞌ muat. Samintara Ia nyampeatn Pakataatn Allah kaꞌ ia kaꞌ koa, 3 ataknglah basangahe urakng nang ngincakng saurakng nanglaki nang elat nang di ampat urakng nangkon make tandu. 4 Tapi ia kaꞌ koa inaꞌ baya ngincakngnya kaꞌ Yesus barang urakng rami diꞌkoa, lalu ia kaꞌ koa mongkar atap nang kaꞌ atas Yesus; dah tabukaꞌ atap koa ia kaꞌ koa nuruntatn urakng elat koa man tandu tampatnya gurikng. 5 Takaꞌ Yesus neleꞌ kapucayaꞌatn nya kaꞌ koa, bakatalah Ia kaꞌ urakng nang elat koa, “O anak-Ku, dosanyu dah diamponiꞌ” 6 Tapi diꞌkoa ada ugaꞌ duduk sangahe urakng guru agama Yahudi, ia kaꞌ koa bakata kaꞌ dalapm atinya, 7 “Ngahe urakng nian bakata lea koa? Ia ngina Allah. Sae nang baya ngamponiꞌ dosa talino kadeꞌ bukeꞌ Allah babaro?” 8 Tapi waꞌtu koa ugaꞌ Yesus nauꞌan pikiran nya kaꞌ koa. Lalu Ia bakata, “Ngahe kitaꞌ batanyaꞌ-tanyaꞌ lea koa kaꞌ dalapm ati kitaꞌ? 9 Mae nang labih mudah Aku bakata kaꞌ urakng elat nian, dosanyu dah diamponiꞌ, ato keꞌ ngataatn, lumpatlah, angkatlah tikarnyu man bajalatnlah 10 Tapi biar kitaꞌ nauꞌan, kadeꞌ kaꞌ dunia nian Anak Manunsia bakuasa ngamponiꞌ dosa.” Bakatalah Ia kaꞌ urakng nang elat koa, 11 “Lumpatlah, angkat tikarnyu man pulaknglah kaꞌ rumahnyu!” 12 Lalu urakng elat koa badiri, naap tikarnya man bajalatn kaluar. Samua urakng diꞌkoa neleꞌ hal koa marasa heran. Ia kaꞌ koa muji Allah man bakata, “Giꞌ inaꞌ suah diriꞌ neleꞌ hal lea nian.”Lewi panagih pajak nunaꞌan Yesus
2:13-17
(Mat. 9:9-13; Luk. 5:27-32)
13 Lakaꞌ koa Yesus ampus agiꞌ kaꞌ tapi dano Galilea, man sigana urakng rami atakng kaꞌ Yesus, lalu Yesus ngajar ia kaꞌ koa. 14 Samintara Yesus bajalatn diꞌkoa, Ia neleꞌ saurakng panagih pajak badama Lewi, anak Alpeus, tagah duduk kaꞌ kantor pajak. “Tunaꞌanlah Aku,” kata Yesus kaꞌ ia. Lalu Lewi badiri man nunaꞌan Yesus. 15 Waꞌtu Yesus tagah makatn kaꞌ rumah Lewi, ataknglah rami panagih pajak man urakng-urakng nang badosa ikut ugaꞌ makatn sama-sama man Yesus man murit-murit-Nya. Tagal rami urakng nang nunaꞌan Yesus. 16 Waꞌtu guru-guru agama dari golongan Parisi neleꞌ, kadeꞌ Yesus makatn man panagih pajak man urakng-urakng badosa koa, bakatalah ia kaꞌ koa kaꞌ murit-murit-Nya, “Ngahe Ia makatn barage man panagih pajak man urakng-urakng nang badosa?” 17 Yesus nangngar pakataatnnya kaꞌ koa lalu nyahut, “Bukeꞌ urakng ringakng nang malaluatn mantari, tapi urakng sakit; Aku atakng bukeꞌ untuꞌ nyaruꞌ urakng banar, tapi urakng nang badosa.”
Hal tentang bapuasa
2:18-22
(Mat. 9:14-17; Luk. 5:33-39)
18 Kaꞌ soteꞌ ari, takaꞌ murit-murit Yohanes man murit-murit urakng Parisi tagah bapuasa, ataknglah urakng-urakng man bakata kaꞌ Yesus, “Ngahe murit-murit Yohanes man murit-murit urakng Parisi bapuasa, tapi murit-murit Kitaꞌ inaꞌ?” 19 Sahut Yesus, “Aku man murit-murit-Ku lea panganten nang laki man ayukng-ayukngnya, kaꞌ gawe panganten. Kaꞌ gawe panganten ahe keꞌ, ayukng-ayunkng nyu bapuasaaꞌ kadeꞌ panganten nang laki giꞌ sama-sama man ia kaꞌ koa? Pasti inaꞌ. 20 Tapi atakngngaꞌ waꞌtunya panganten nang laki koa di taapaꞌ dari ia kaꞌ koa, man kaꞌ waꞌtu koalah ia kaꞌ koa bapuasaaꞌ. 21 Nanaꞌ ada urakng nang nambal kaen bontoꞌ man kaen nang baharu. Tagal kaen panambal koa susutaꞌ man ngojek baju koa, lalu siaꞌ ayaꞌaꞌ kojek baju koa. 22 Lea koa ugaꞌ inaꞌ saurakngpun nginsiꞌatn anggur nang baharu kaꞌ dalapm kantong kulit nang tuha, tagal kadeꞌ lea koa anggur koa ngojekatnnaꞌ kantong koa, sampe-sampe anggur koa man kantongnya dua-duanya tabuakng. Anggur nang baharu aruslah di isiꞌatn kaꞌ dalapm kantong nang baharu ugaꞌ.”
Murit-murit mebet gandum kaꞌ ari Sabat
2:23-28
(Mat. 12:1-8; Luk. 6:1-5)
23 Kaꞌ soteꞌ ari Sabat, takaꞌ Yesus bajalatn ngalintasiꞌ uma gandum, murit-murit-Nya mulaiꞌ mebet begeꞌ gandum.a 24 Lalu urakng-urakng Parisi bakata kaꞌ Yesus, “Teleꞌ! Ngahe ia kaꞌ koa ngalanggar aturan nang inaꞌ baya dipanjawat kaꞌ ari Sabat?” 25 Sahut Yesus, “Inaꞌ suah keꞌ kitaꞌ maca ahe nang di Daut manjawat, takaꞌ ia man urakng-urakng nang nunaꞌannya kakurangan makanan man kaparatn,b 26 Daut tamaꞌ kaꞌ dalapm Rumah Allah waꞌtu Abyatar manjabat jaji imam Agung lalu ia makatnniꞌ roti nang di remahan kaꞌ Allah nang inaꞌ mulih dimakatn kacoali di imam-imam ihan tapi Daut mareꞌatnya ugaꞌ kaꞌ pangikut-pangikutnya?”c 27 Lalu kata Yesus agiꞌ, “Aturan ari Sabat dimuat untuꞌ mantoꞌ talino, bukeꞌ aturan ari sabat nang ngatur talino. 28 Jaji Anak Manunsia koa bakuasa natapatn ahe nang mulih man nang inaꞌ mulih kaꞌ ari Sabat.”