Yesus milih murit-murit-Nya
(Mat. 4:18-22; Mrk. 1:16-20)
5
Waꞌtu koa,
Yesus badiri kaꞌ tapi dano Genesaret.
Manyak urakng batunaꞌ-tunaꞌ nangaraꞌ barita nang mpat kaꞌ Tuhan Allah.
2 Yesus neleꞌ dua buah parahu kaꞌ tapi dano koa,
pangagoꞌ-pangagoꞌ ikatn koa dah baturunan mpat kaꞌ parahu-parahunya kaꞌ koa,
man ugaꞌ giꞌ tagah banyasahatniꞌ jalanya.
3 Yesus naik kaꞌ sabuah parahu,
parahu koa nuꞌ Simon,
lalu Yesus nyuruh Simon nyorong parahunya koa agiꞌ jauh kaꞌ tanggah dano.
Yesus duduk kaꞌ dalapm parahu untuꞌ ngajar urakng manyak.
4 Dah lakaꞌ ngajar,
Ia bakata kaꞌ Simon,
“Bakayuhlah kaꞌ tampat nang dalapm,
man tabakatn jalanyu untuꞌ naap ikatn.”
5 Sahut Simon,
“Paꞌ Guru,
samalaman kami susah payah bagagoꞌ,
tapi naꞌ namu sekoꞌpun!
Tapi Kitaꞌ nang nyuruh,
naꞌ ngahelah aku nabakatn jalaku agiꞌ.”
6 Lakaꞌ ia kaꞌ koa nabakatn jalanya,
ia kaꞌ koa namu sidi manyak ikatn sampe jalanya koa mulaiꞌ rojek.
7 Tagal koa ia kaꞌ koa ngalambe naꞌ ayungannya kaꞌ parahu nang sabuah mintaꞌ bantoꞌ.
Ayukng-ayukngnya atakng mantoꞌ manuhan dua buah parahu koa man ikatn sampe parahu koa amper karapm.
8 Takaꞌ Simon Petrus neleꞌ nang mpakoa,
ia basujud ngarendahatn diriꞌnya kaꞌ adapatn Yesus,
man daꞌ bakata,
“Tingalatn aku,
Tuhan!
Barang aku urakng badosa!”
9 Simon Petrus bakata mpakoa tagal ia man sigana ayukng-ayukngnya kaheranan neleꞌ manyaknya ikatn nang nya namu.
10 Lekoa ugaꞌ ayukng sakaraja Simon,
naꞌ Yakobus man Yohanes koa anak Sebedeus kaheranan.
Yesus bakata kaꞌ Simon,
“Ame galiꞌ!
Bamula ampeatn,
kao ngincakngaꞌ urakng atakng kaꞌ Aku,
lea urakng ngagoꞌ ikatn.”
11 Simon manaꞌ ayukng-ayukngnya narik parahu-parahu koa kaꞌ tapi dano,
udah koa ningalatn sigananya koa nunaꞌan Yesus.
Yesus nyamuhatn sekoꞌ urakng nang dibangkakng
(Mat. 8:1-4; Mrk. 1:40-45)
12 Ari koa,
Yesus ada kaꞌ soteꞌ kota.
Diꞌkoa ada sekoꞌ urakng nanglaki nang tubuhnya bapanyakit kulit,
dibangkakng.
Takaꞌ ia neleꞌ Yesus,
ia basujud ngarendahatn diriꞌnya kaꞌ adapatn Yesus man bapintaꞌ,
katanya,
“Paꞌ guru,
kadeꞌ Kitaꞌ maoꞌ Kitaꞌ baya nyamuhatn aku!”
13 Yesus nyameh urakng koa man bakata,
“Aku maoꞌ,
samuhlah!”
Takaꞌ koa ugaꞌ panyakitnya samuh.
14 Udah koa Yesus maiꞌan urakng koa ngesahatn hal koa kaꞌ saepun,
kata-Nya,
“Ampuslah kaꞌ imam agama Yahudi,a
biar ia nauꞌan kadeꞌ kao dah samuh.
Dah koa ampus mareꞌ persembahan kaꞌ Tuhan Allah,
lea ahe nang taconteng kaꞌ parentah Tuhan Allah deꞌe,
untuꞌ muktiatn kaꞌ urakng-urakng kadeꞌ kao sidi dah samuh.”
15 Tapi gesah ahe nang dah Yesus manjawat koa kadangaratn kaꞌ mae-mae maan,
manyak urakng atakng untuꞌ nangaraꞌ ajaran-Nya man ugaꞌ mintaꞌ di Yesus samuhatn.
16 Lakaꞌ koa Yesus ampus badoa kaꞌ tampat nang sunyiꞌ.
Yesus nyamuhatn urakng nang elat
(Mat. 9:1-8; Mrk. 2:1-12)
17 Kaꞌ soteꞌ ari takaꞌ Yesus giꞌ tagah ngajar,
ada sangahe urakng Parisi man guru-guru agama Yahudi duduk kaꞌ diꞌkoa.
Ia kaꞌ koa atakng mpat kaꞌ Yerusalem,
man mpat kaꞌ sigana kampokng-kampokng nang kaꞌ Galilea man kaꞌ Yudea.
Kuasa Tuhan Allah ada kaꞌ Yesus untuꞌ nyamuhatn urakng-urakng sakit.
18 Kaꞌ waꞌtu koa ada sangahe urakng nang nangukng urakng nang elat man jampana.
Ia kaꞌ koa barusaha ngincakng urakng nang elat koa kaꞌ dalapm rumah biar baya ngalakaꞌatnnya kaꞌ adapatn Yesus.
19 Tapi naꞌ ayukngannya inaꞌ baya ngincakngnya tamaꞌ,
tagal urakng sidi rami kaꞌ dalapm rumah koa.
Tagal koa naꞌ ayukngannya naikatn urakng nang elat koa kaꞌ atas atap rumah.
Baruꞌ naꞌ ayukngannya mongkar atap rumah koa man nurunan urakng elat koa man jampananya kaꞌ adapatn Yesus kaꞌ tangah-tangah urakng rami koa.
20 Takaꞌ Yesus neleꞌ sidi ayaꞌ imannya kaꞌ koa,
Yesus bakata kaꞌ urakng koa,
“Yukng,
dosanyu dah dingamponiꞌ.”
21 Guru-guru agama Yahudi man urakng-urakng Parisi mulaiꞌ bakata kaꞌ dalapm atinya,
“Barani-barani sidi urakng nian ngina Tuhan Allah.
Sae nang mulih ngamponiꞌ dosa,
kadeꞌ bukeꞌ Tuhan Allah ihan?”
22 Yesus nauꞌan ahe nang di nya kaꞌ koa mikiriꞌ,
sampe Ia bakata,
“Ngahe kitaꞌ batanyaꞌ-tanyaꞌ mpakoa kaꞌ dalapm ati kitaꞌ?
23 Mae geꞌ nang sidi mudah dingataatn,
‘Dosanyu dah dingamponiꞌ,’
ato geꞌ ‘Lumpat man bajalatnlah!’?
24 Tapi ampeatn Aku maoꞌ muktiatnnaꞌ kaꞌ kitaꞌ kadeꞌ kaꞌ atas aiꞌ tanah nian Anak Manunsiab bakuasa untuꞌ ngamponiꞌ dosa.”
Lalu Yesus bakata kaꞌ urakng elat koa,
“Lumpatlah,
angkat tikarnyu,
man pulaknglah!”
25 Urakng koa daꞌ lumpat kaꞌ adapatn sigana urakng kaꞌ koa,
lalu ngangkat tikarnya,
man pulakng sambil muji Tuhan Allah.
26 Sigana urakng kaꞌ koa tacangang sidi,
lalu muji Tuhan Allah.
Man parasa galiꞌ ia kaꞌ koa bakata:
“Ari nian kami dah neleꞌ kajadian nang sidi manjawat heran.”
Yesus nyaruꞌ Lewi jaji murit-Nya
(Mat. 9:9-13; Mrk. 2:13-17)
27 Lakaꞌ koa Yesus kaluas man neleꞌ panagih pajak,
badama Lewi,
tagah duduk kaꞌ tampat ia biasa nagih pajak.
Yesus bakata kaꞌ ia,
“Injeꞌ tunaan Aku.”
28 Lewi badiri ningalatn samuanya,
lalu nunaꞌan Yesus.
29 Udah koa Lewi manjawat gawe kaꞌ rumahnya untuꞌ Yesus.
Rami panagih-panagih pajak man urakng-urakng lain nang makatn sirage man ia koa.
30 Urakng-urakng Parisi man guru-guru agama Yahudi garungut-garungut,
lalu bakata kanaꞌ murit Yesus,
“Ngahe kitaꞌ samua makatn nyocok man panagih pajak man urakng-urakng nang badosa nang lainnya?”
31 Yesus nyahut,
“Urakng nang sehat nanaꞌ palalu tabip;
kahe urakng nang sakit ihan.
32 Aku atakng bukeꞌ untuꞌ nyaruꞌ urakng-urakng nang nganggap diriꞌnya dah baik,
tapi urakng-urakng nang badosa biar ia kaꞌ koa badiapm badosa man mulakng kaꞌ Tuhan Allah.”
Hal bapuasa
(Mat. 9:9-13; Mrk. 2:13-17)
33 Urakng-urakng kaꞌ koa bakata agiꞌ kaꞌ Yesus,
“Murit-murit Yohanes kaja bapuasa man badoa,
lekoa ugaꞌ naꞌ murit urakng Parisi,
tapi murit-murit Kitaꞌ makatn man nyocok.”
34 Yesus nyahut man parumpamaan,
“Salama panganten nanglaki giꞌ ada man tamu-tamunya,
tantu ia kaꞌ koa inaꞌ kitaꞌ nyuruh bapuasa kaꞌ pesta panganten koa.
35 Tapi atakngaꞌ waꞌtunya urakng-urakng naapaꞌ paksa panganten nanglaki,
mpat kaꞌ teaꞌ tamu-tamunya,
waꞌtu koalah ia kaꞌ koa baruꞌ bapuasaaꞌ.”
36 Lalu Yesus ngesahatn parumpamaan kaꞌ ia kaꞌ koa lea nian,
“Nanaꞌ ada urakng nang nambal baju nang lama man kojekatn baju nang barahu.
Barang ia ngojek baju nang barahu koa,
agiꞌ ugaꞌ saput panambal nang barahu koa inaꞌ cocok man baju nang lama.
37 Lekoa ugaꞌ inaꞌ ada urakng nang nginsiꞌatn aiꞌ anggur nang barahu kaꞌ dalapm kantong kulit nang bakas,
jukut aiꞌ anggur nang barahu koa macahatnnaꞌ kantong koa.c
Jaji aiꞌ anggurnya tabuakng,
man kantongnya rusak.
38 Aiꞌ anggur nang barahu arus diinsiatn kaꞌ kantong nang barahu ugaꞌ.
39 Lekoa ugaꞌ inaꞌ ada urakng nang maoꞌ nyocok aiꞌ anggur nang barahu lakaꞌ nyocok aiꞌ anggur nang lama.
Jukut kata urakng koa,
‘Aiꞌ anggur nang lama koa labih nyaman.’”d