Yesus di Ibalis nyobaiꞌ
(Mat. 4:1-11; Mrk. 1:12-13)
4
Yesus dinguasaiꞌ Roh Tuhan Allah lalu Ia ningalatn Sungeꞌ Yordan.
Roh Tuhan Allah ngincakng Yesus kaꞌ padang paser.
2 Kaꞌ diꞌkoa Ibalis pamimpin setan-setan nyobaiꞌ Yesus ampat puluh ari lamanya.
Salama koa Ia inaꞌ makatn ahe-ahe.
Jaji dah lakaꞌ ampat puluh ari koa Ia miah tarasa kaparatn.
3 Takaꞌ koa Ibalis daꞌ bakata,
“Kadeꞌ Kitaꞌ Anak Allah suruhlah batu nian jaji roti.”
4 Yesus nyahutiꞌnya,
“Kaꞌ dalapm Kitap Suci ada taconteng,
‘Bukeꞌ man roti maan talino idup.’” a
5 Lakaꞌ koa Ibalis ngincakng Yesus kaꞌ tampat nang miah tingi,
man sakajap mata Ibalis nojokatn kaꞌ Yesus sigana pamarentahan nang ada kaꞌ dunia.
6 Jakata Ibalis koa,
“Ku bareatnnaꞌ sigana pamarentahan man kakayaatn nian kaꞌ Kitaꞌ.
Jukut sigana pamarentahan nian dah dinyarahatn kaꞌ aku,
man tasarah aku kaꞌ saeaꞌ maan aku maoꞌ mareꞌatnnya.
7 Jaji tagal koa sigananya nian Kitaꞌ ngampuꞌaꞌnya,
kadeꞌ Kitaꞌ nyambah kaꞌ aku.”
8 Jakata Yesus nyahutiꞌnya,
“Kaꞌ dalapm Kitap Suci ada taconteng,
‘Kao arus nyambah Tuhan Allahnyu,
jukut kaꞌ Tuhan Allahnyu ihan kao pantas nyambah.’”b
9 Lakaꞌ koa Ibalis ngincakng Yesus kaꞌ Yerusalem,
ia nampatatn Yesus kaꞌ atas pamumukng Rumah Kudus Tuhan Allah sirage bakata,
“Kadeꞌ Kitaꞌ Anak Allah jantuꞌatnlah diriꞌ Kitaꞌ kaꞌ babah naun.
10 Jukut kaꞌ dalapm Kitap Suci ada taconteng,
‘Tuhan Allah nyuruhaꞌ malaekat-malaekat-Nya nyaga Kitaꞌ edoꞌ-edoꞌ.’c
11 Man ugaꞌ,
‘malaekat-malaekat-Nya koa nyamutiaꞌ Kitaꞌ man kokotnya biar paha Kitaꞌ inaꞌ tarantak kaꞌ batu.’”d
12 Sahut Yesus,
“Kaꞌ dalapm Kitap Suci ada taconteng,
‘Ame nyobaiꞌ Tuhan,
Allahnyu.’”e
13 Dah lakaꞌ Ibalis nyobaiꞌ Yesus make sigana cara,
ia ningalatn Yesus sambil ngantiatn ari nang tapat.
Yesus mulakng kaꞌ Galilea
(Mat. 4:12-17; Mrk. 1:14-15)
14 Roh Tuhan Allah nguasaiꞌ Yesus,
Ia mulakng kaꞌ wilayah Galilea.
Man gesah tentang diriꞌ-Nya koa nyabar kaꞌ sigana abut koa.
15 Ia ngajar kaꞌ rumah-rumah tampat sumbayang urakng Yahudi man sigana urakng muji Ia.
Yesus inaꞌ ditarimaꞌ kaꞌ Nasaret
(Mat. 13:53-58; Mrk. 6:1-6)
16 Yesus daꞌ ampus ugaꞌ kaꞌ desa Nasaret tampat Ia dingayaꞌatn.
Lea biasanya,
waꞌtu ari Sabatf Yesus ampus kaꞌ rumah tampat sumbayang.
Ia badiri macaaꞌ Kitap Suci.
17 Yesus dimareꞌ golongan kitap nabi Yesaya,
Ia mukaꞌ Kitap koa,
Nya namu ayat nang bunyinya lea nian:
18 “Roh Tuhan Allah ada kaꞌ Aku,
tagal Ia dah ngangkat Aku untuꞌ nyampeatn
Kabar nang Gagas kaꞌ urakng-urakng nang kodo.
Ia dah ngutus Aku untuꞌ nyampeatnnaꞌ pasatn
kadeꞌ urakng-urakng nang dipinjara dilapasatnnaꞌ,
urakng-urakng nang butaꞌ jajiaꞌ mincarakng,
man urakng-urakng nang jaji budak dibebasatnnaꞌ.
19 Man Ia ugaꞌ dah ngutus Aku nyampeatn kabar
kadeꞌ dah atakng tahutn diꞌmae Tuhan Allah nojokatn kamurahatn ati-Nya untuꞌ umat-Nya.”g
20 Lakaꞌ koa Yesus ngolong kitap koa sirage ugaꞌ Nya mareꞌatn kaꞌ urakng nang tugasnya ngomosiꞌ kitap-kitap.
Yesus daꞌ duduk ngajaratnnaꞌ isiꞌ kitap koa.
Sigana urakng nang kaꞌ dalapm rumah tampat sumbayang koa neleꞌ kaꞌ Ia.
21 Takaꞌ koa ugaꞌ Yesus mulaiꞌ ngomong kaꞌ urakng rami kaꞌ koa.
Kata-Nya:
“Ari nian ugaꞌ ahe nang taconteng,
man nang Ku maca tadi kaꞌ dalapm Kitap nian dah jajih takaꞌ kitaꞌ nangaratnnya.”
22 Pakataatn-pakataatn nang Yesus ngomongan koa sidi edoꞌ,
sampe-sampe sigana urakng kaꞌ koa kaheranan man muji Ia.
Urakng kaꞌ koa bakata,
“Bukeꞌ geꞌ Ia nian anak Yusup?”
23 Takaꞌ koa ugaꞌ Yesus bakata kaꞌ ia kaꞌ koa,
“Pasti ba kitaꞌ ngataatn papatah lea nian kaꞌ Aku:
‘Tabip,
bore ba diriꞌnyu babaro.
Panjawat boh tanda ajaip nang koa ugaꞌ,
kaꞌ tampat asalnyu nian,
lea ahe nang dah Kitaꞌ manjawat nang kami nangar kaꞌ kota Kapernaum!’”
24 Jakata Yesus agiꞌ,
“Sabatolnya,
inaꞌ ada nabi nang dihormatiꞌ kaꞌ kampokngnya babaro.
25 Dangar boh:
kaꞌ jaman nabi Elia,
takaꞌ nanaꞌ ujatn talu tahutn satangah lamanya,
tajaji kaparatn nang sidi miah kaꞌ sigana nagari koa.
Waꞌtu koa manyak janda-janda nang kaꞌ Israel.
26 Biargeꞌ mpakoa Tuhan Allah inaꞌ nyuruh Elia ampus kaꞌ sekoꞌ urakngpun janda-janda Israel kaꞌ koa.
Tapi Tuhan Allah nyuruhnya ampus kaꞌ Sarpat kaꞌ tanah Sidon untuꞌ mantoꞌ sekoꞌ urakng janda nang bukeꞌ bangsa Israel.
27 Lekoa ugaꞌ kaꞌ jaman nabi Elisa ada manyak urakng Israel nang bapanyakit kulit nang sidi digaliꞌatn.
Tapi inaꞌ sekoꞌpun urakng Israel nang di Elisa samuhatn,
kahe Naaman urakng Siria ihan nang di nya nyamuhatn.”
28 Sigana urakng nang ada kaꞌ rumah tampat sumbayang koa bera sidi nangar gesah koa.
29 Urakng kaꞌ koa daꞌ badiri sarata ugaꞌ ngoser Yesus kaluas mpat kaꞌ kota koa man ngincakng-Nya kaꞌ tabikng gunung,
diꞌmae kotanya kaꞌ koa dibangun.
Ia kaꞌ koa bakira nyorongaꞌ Yesus kaꞌ dalapm arokng.
30 Tapi Yesus bajalatn kaꞌ tangah-tangah urakng kaꞌ koa,
lakaꞌ koa Ia dari.
Urakng nang kasarongan setan
31 Dah koa Yesus ampus kaꞌ kota Kapernaum nang kaꞌ wilayah Galilea.
Kaꞌ koa Ia ngajar urakng-urakng kaꞌ ari Sabat.
32 Urakng kaꞌ koa kaheranan neleꞌ caranya Ia ngajar,
jukut Ia ngomong sidi miah bakuasa.
33 Kaꞌ rumah tampat sumbayang koa ada sekoꞌ urakng nang dinguasaiꞌ setan.
Urakng koa ngampak-ngampak.
34 Jakatanya:
“Yesus urakng Nasaret,
ahe nang Kitaꞌ maoꞌ panjawat kaꞌ kami?
Kitaꞌ atakng yak ngukumaꞌ kami?
Aku nauꞌan sae Kitaꞌ,
Kitaꞌ nang kudus nang di Tuhan Allah ngutus.”
35 Tapi Yesus ngaok setan koa,
jakatanya:
“Diapm!
Kaluas kao mpat kaꞌ urakng nian!”
Takaꞌ koa ugaꞌ setan koa ngampasatn urakng koa kaꞌ adapatn sigana urakng nang rami,
udah koa kaluas mpat kaꞌ urakng koa man inaꞌ nyakitiꞌnya.
36 Man sigana urakng jaji kaheranan,
sirage ugaꞌ bakata kaꞌ sabayaatnnya,
“Sidi miah bakuasa pakataatn-pakataatn-Nya,
sampe-sampe setan kaꞌ koa bakaluasatn tagal di parentah-Nya!”
37 Sigana ahe nang Yesus manjawat koa kadangaratn kaꞌ sigana wilayah koa.
Yesus nyamuhatn manyak urakng
(Mat. 8:14-17; Mrk. 1:29-34)
38 Yesus ningalatn rumah tampat sumbayang koa,
lalu ampus kaꞌ rumah Simon.
Datuꞌ Simon nangbini giꞌ kana panyakit angat tubuh.
Urakng-urakng kaꞌ koa bapintaꞌ kaꞌ Yesus,
supaya Ia nyamuhatn datuꞌ Simon nangbini koa.
39 Yesus nyamakiꞌ datuꞌ Simon koa,
daꞌ Nya ngoser panyakit datuꞌ Simon koa.
Panyakitnya koa daꞌ jaji samuh,
datuꞌ Simon nangbini koa daꞌ lumpat man daꞌ nyiapatn pamakanan untuꞌnya kaꞌ koa.
40 Takaꞌ ari mulaiꞌ gumareꞌ,
sigana urakng ngincakng pagewarisnya nang barongkoꞌatn,
nang bamacam-macam panyakit kaꞌ Yesus.
Yesus nyangkam sekoꞌ-sekoꞌ urakng nang barongkoꞌatn koa,
urakng kaꞌ koa daꞌ jaji samuh.
41 Setan-setanpun kaluas mpat kaꞌ manyak urakng kaꞌ koa,
sirage bangampakatn,
“Kitaꞌ Anak Allah!”
Tapi Yesus ngaok setan koa,
maiꞌan nya ngomong jukut setan kaꞌ koa nauꞌan kadeꞌ Yesus ihan Raja nang di Tuhan Allah ngutus.
Yesus nyimpadoatn kabar nang edoꞌ kaꞌ dalapm rumah-rumah tampat sumbayang
42 Takaꞌ ari mulaiꞌ alapm Yesus ningalatn kota Kapernaum koa daꞌ ampus kaꞌ tampat nang sunyiꞌ.
Urakng-urakng mulaiꞌ ngagoꞌiꞌ Ia,
takaꞌ nya batamu man Yesus urakng kaꞌ koa mintaꞌ Yesus ame ningalatn ia kaꞌ koa.
43 Kahe mpakoa Yesus bakata,
“Kabar nang Gagas lemae Tuhan Allah marentah jaji Raja arus Ku sampeatn ugaꞌ kaꞌ kota-kota dangan.
Jukut untuꞌ koalah Tuhan Allah ngutus Aku kaꞌ dunia.”
44 Tagal koa,
Yesus nyampeatn Kabar nang Gagas koa kaꞌ dalapm rumah-rumah tampat sumbayang kaꞌ sigana wilayah Yudea.