Yesus inaꞌ ditarimaꞌ kaꞌ Nasaret kampokng alaman-Nya
6:1-6a
(Mat. 13:53-58; Luk. 4:16-30)
6
Dari tampat koa, Yesus pulakng sama-sama man murit-murit-Nya kaꞌ kampokng alaman-Nya. 2 Kaꞌ ari Sabat Ia mulaiꞌ ngajar kaꞌ rumah tampat sumbayang. Sidi miah rami urakng kaꞌ diꞌkoa. Waꞌtu urakng-urakng koa nangngar pangajaran Yesus, ia kaꞌ koa sidi heran. Ia kaꞌ koa bakata, “Dari mae urakng nian namu samuanya koa? Kabijaksanaan lea ahe nian nang ada kaꞌ Ia? Leamae Ia baya manjawat hal nang ajaip? 3 Inaꞌ keꞌ Yesus nian tukang kayu, anak Maria, adiꞌ baradiꞌ Yakobus, Yoses, Yudas man Simon? Man adiꞌ baradiꞌ-Nya nangbini pun ugaꞌ ada kaꞌ dian.” Lalu ia kaꞌ koa kacewa man nolak-Nya. 4 Lalu Yesus bakata kaꞌ ia kaꞌ koa, “Saurakng nabi dihormatiꞌ kaꞌ samua kampokng, kacoali kaꞌ kampokng alamannya, man kaꞌ antara kamarkapalanya man page warisnya.”a 5 Kaꞌ tampat koa Yesus inaꞌ baya manjawat soteꞌpun hal-hal nang ajaip, kacoali nyamuhatn basangahe urakng sakit make cara nyangkamnya. 6a Yesus sidi heran kaꞌ ia kaꞌ koa inaꞌ pucayaꞌ kaꞌ Ia.Yesus ngiripm kaduabalas rasul
6:6b-13
(Mat. 10:5-15; Luk. 9:1-6)
6b Lalu Yesus bajalatn dari desa kaꞌ desa sambil ngajar.
7 Ia nyaruꞌ kaduabalas murit koa man ngiripm ia kaꞌ koa badua-badua. Ia mareꞌ kuasa kaꞌ murit-murit-Nya koa kuasa untuꞌ ngoser setan-setan. 8 Man bapasatn kaꞌ ia kaꞌ koa biar ame ngincakng ahe-ahe kaꞌ dalapm pajalanannya, kacoali tungkat. Ame ngincakng pamakanan, tas man duit.b 9 Mulih make sapatu tapi inaꞌ mulih make dua balah baju. 10 Ia ugaꞌ bakata, “Kadeꞌ kitaꞌ tamaꞌ kaꞌ sabuah rumah, badiapmlah diꞌkoa sampe kitaꞌ ningalatn kota koa. 11 Tapi kadeꞌ urakng-urakng kaꞌ koa nolak kitaꞌ ato baiꞌ nangngar ahe nang kitaꞌ ngajaratn, tingalatnlah kota koa. Man waꞌtu kitaꞌ barangkat kiboatn dabu kaꞌ pahanyu, jaji tanda kadeꞌ kitaꞌ lapas tangan kadeꞌ ia kaꞌ koa basalah man di Allah ukumaꞌ.”c 12 Lalu ampuslah ia kaꞌ koa ngesahatn kadeꞌ urakng-urakng arus batobat, 13 man ia kaꞌ koa ngoser manyak setan, nolesatn binyak jaitun kaꞌ urakng nang sakit man nyamuhatn ia kaꞌ koa.d
Yohanes Pamaptis dibunuh
6:14-29
(Mat. 14:1-12; Luk. 9:7-9)
14 Raja Herodes ugaꞌ nangngar tentang Yesus, tagal dama-Nya dah dikanal man urakng-urakng bakata, “Yesus koa lah Yohanes Pamabtis nang dah lumpat dari antara urakng mati, koalah tagalnya kuasa-kuasa koa bakaraja kaꞌ dalapm-Nya.”e 15 Ada ugaꞌ nang lain bakata, “Ia koa nabi Elia!” Nang lain agiꞌ bakata, “Ia koa saurakng nabi sama lea nabi-nabi nang deꞌe.” 16 Takaꞌ Herodes nangngar koa, ia bakata, “Pasti nian Yohanes Pamaptis nang deꞌe dah ku nyuruh tangkadas kapalanya. Ampeatn ia dah mulakng idup!”
17 Tagal deꞌe nya ingkaꞌ Herodeslah nang nyuruh urakng nangkap Yohanes man namaꞌannya kaꞌ dalapm pinjara. Herodes babuat lea koa tagal Herodias, bini Pilipus adiꞌ baradiꞌnya nang Herodes naap bini,f 18 Tagal Yohanes suah nagur Herodes, “Inaꞌ mulih kao panganten man bini adiꞌ baradiꞌnyu koa!” 19 Koa tagalnya Herodias dandam kaꞌ Yohanes man sidiꞌ maoꞌ munuh Yohanes, tapi ia inaꞌ baya manjawat hal koa. 20 Tagal Herodes dah nyuruh urakng nyaga baik-baik kasalamatan Yohanes kaꞌ dalapm pinjara, tagal ia galiꞌ kaꞌ Yohanes. Ia nauꞌan Yohanes saurakng nang baik man kudus nang di Allah ngiripm. Man Herodes ugaꞌ suka nagar Yohanes kadeꞌ ia ngomong, biargeꞌ atinya gulinsah.
21 Ahirnya Herodias namu kasampatan kaꞌ ari ulang tahutn Herodes. Takaꞌ koa Herodes manjawat gawe untuꞌ samua pajabat tingi karajaan, perwira-perwira man tokoh-tokoh masarakat Galilea. 22 Kaꞌ gawe koa anak dara Herodias nari, man tariannya koa sidi ngarepoatn ati Herodes man tamu-tamunya. Raja Herodes bakata kaꞌ anak dara koa, “Mintaꞌ jaꞌ kaꞌ aku aheaꞌ maꞌan, pasti ku bareꞌatn kaꞌ kao” 23 Lalu raja basumpah kaꞌ ia, “Ahe jaꞌ nang nyumintaꞌ ku bareꞌatnnaꞌ kaꞌ kao, sakalipun saparoh karajaanku!” 24 Kamudaꞌ koa ampus kaꞌ uweꞌnya lalu batanyaꞌ, “Ahe nang arus ku pintaꞌ?” sahut uweꞌnya, “Kapala Yohanes Pamaptis!” 25 Lalu ganceh-ganceh ia ampus kaꞌ raja man mintaꞌ, “Aku maoꞌ, biar ampeatn ugaꞌ kitaꞌ bareꞌatn kaꞌ aku kapala Yohanes Pamaptis kaꞌ atas ceper!” 26 Lalu sidi susah ati raja, tapi tagal sumpahnya man tagal tamu-tamunya ia inaꞌ nolaknya. 27 Jaji ia langsung marentahatn pangawalnya naap kapala Yohanes Pamaptis. Pangawal koa ampus kaꞌ pinjara lalu nangkadas kapala Yohanes. 28 Lalu ia ngincakng kapala Yohanes koa kaꞌ atas ceper man nyarahatnnya kaꞌ nang dara koa, man nangdara koa mareꞌatnya kaꞌ uweꞌnya.
29 Waꞌtu murit-murit Yohanes nangngar hal koa, ia kaꞌ koa naap mayat Yohanes, lalu nyuburnya.
Yesus mareꞌ makatn lima ribu urakng
6:30-44
(Mat. 14:13-21; Luk. 9:10-17; Yoh. 6:1-13)
30 Rasul-rasul nang di Yesus ngiripm koa mulakng man bakomoꞌ agiꞌ kaꞌ Yesus. Ia kaꞌ koa ngalaporatn kaꞌ Yesus samua nang dah dinya kaꞌ koa manjawat man ngajaratn. 31 Lalu Yesus bakata kaꞌ ia kaꞌ koa, “Injeꞌlah diriꞌ kaꞌ tampat sunyiꞌ, biar diriꞌ sabaya diriꞌ ihan, biar diriꞌ baya ngadih sabantar!” Tagal ingkaꞌ sidi rami urakng nang baatangan man bapulangan, sampe-sampe Yesus man murit-muritnya pun inaꞌ sampat makatn. 32 Lalu barangkat lah ia kaꞌ koa make parahu kaꞌ tampat nang sunyiꞌ. 33 Tapi rami urakng nang dah neleꞌ ia kaꞌ koa ningalatn tampat koa, man nauꞌan sae ia kaꞌ koa. Jadi, dari samua kota kaꞌ binua koa, urakng-urakng babatalamaꞌan ampus lewat darat nyintoloꞌiꞌ Yesus man murit-muritnya kaꞌ koa. 34 Takaꞌ Yesus turutn dari parahu, Ia neleꞌ sidi rami urakng. Ia kasihatn kaꞌ ia kaꞌ koa, tagal ia kaꞌ koa lea domba nang inaꞌ bapanjaga. Lalu Ia pun mulaiꞌ ngajaratn manyak hal kaꞌ ia kaꞌ koa.g
35 Takaꞌ ari dah gumareꞌ, murit-murit-Nya bakata kaꞌ Ia, “Ari dah gumareꞌ man tampat nian jauh dari kampokng. 36 Labih baik Kitaꞌ suruh urakng-urakng nian pulakng biar ia kaꞌ koa baya mali makanan kaꞌ desa-desa man kaꞌ kampokng-kampokng sakitar dian.” 37 Tapi sahut Yesus, “Kitaꞌ jaꞌ nang mareꞌ ia kaꞌ koa makatn.” Sahutnya kaꞌ koa, “Inaꞌ mungkin! Dari mae kami baya namu dua ratus kapikng duit perak untuꞌ mali makanan untuꞌ mareꞌ makatn urakng sarami nian?” 38 Lalu tanyaꞌ Yesus, “Sangahe eteꞌ roti nang ada kaꞌ kitaꞌ? Coba teleꞌ.” Dah lakaꞌ ia kaꞌ koa neleꞌnya, ia kaꞌ koa bakata, “Lima eteꞌ roti man dua ekoꞌ ikatn.” 39 Lalu Yesus nyuruh samua urakng kaꞌ koa duduk bakalompok-kalompok kaꞌ atas rumput nang ijo. 40 Lalu duduklah ia kaꞌ koa bakalompok-kalompok, ada nang saratus urakng ada nang lima puluh urakng. 41 Lalu Yesus naap lima roti man dua ekoꞌ ikatn koa, lalu ningkadah kaꞌ langit basukur batarimaꞌ kasih kaꞌ Allah. Lakaꞌ koa, Ia nyempak-nyempak roti koa lalu mareꞌatnnya kaꞌ murit-murit-Nya biar dibagiatn kaꞌ samua urakng di koa. Man dua ekoꞌ ikatn koa dimagi-magiatn ugaꞌ kaꞌ samua urakng. 42 Man ia kaꞌ koa samuanya makatn sampe kanyang. 43 Lalu murit-murit ngomoꞌan loaꞌ makanan koa, samuanya ada dua balas bakul. 44 Nanglaki nang makatn roti koa samuanya bajumbalah kira-kira lima ribu urakng napeꞌ taretong nangbini man kamudaꞌ-kamudaꞌ.
Yesus bajalatn kaꞌ atas aiꞌ
6:45-52
(Mat. 14:13-21; Yoh. 6:16-21)
45 Lakaꞌ koa Yesus langsung nyuruh murit-murit-Nya naik kaꞌ parahu man barangkat labih doloꞌ kaꞌ sabarang, kaꞌ Betsaida, samintara koa Ia nyuruh urakng rami koa pulakng. 46 Lalu Ia babaro ampus kaꞌ bukit untuꞌ badoꞌa 47 Takaꞌ ari dah malam, parahu murit-muritnya dah kaꞌ tangah dano, sedangkan Yesus masih kaꞌ darat. 48 Yesus neleꞌ sidi payahnya ia kaꞌ koa ngayuh parahunya tagal nyaru balawanan arah man parahu. Tagal koa, kira-kira jam talu malam, Yesus atakng kaꞌ ia kaꞌ koa bajalatn kaꞌ atas aiꞌ. Man Ia bajalatn saolah-olah ngalintasaꞌ ia kaꞌ koa. 49 Waꞌtu ia kaꞌ koa neleꞌ Yesus bajalatn kaꞌ atas aiꞌ ia kaꞌ koa ngira kadeꞌ Yesus koa antu, lalu ia kaꞌ koa mangkaꞌ kampak 50 Tagal ia kaꞌ koa samua neleꞌ-Nya man sidi miah takajut. Tapi langsung Yesus ngomong kaꞌ ia kaꞌ koa, “Tananglah! nian Aku. Ame galiꞌ!” 51 Lalu Ia naik kaꞌ parahu nya kaꞌ koa, man nyaru koa pun jaji tadoꞌ. Murit-murit Yesus sidi heran. 52 Biarpun dah neleꞌ hal-hal ajaip nang Yesus manjawat man lima roti dua ekoꞌ ikatn koa, ia kaꞌ koa tatap giꞌ napeꞌ ugaꞌ ngarati sae Yesus sabatolnya, tagal ati man pikiran nya kaꞌ koa masih tatutup.
Yesus nyamuhatn urakng-urakng sakit kaꞌ Genesaret
6:53-56
(Mat. 14:34-36)
53 Waꞌtu namus kaꞌ sabarang dano, ia kaꞌ koa batambat kaꞌ tapi dano Genesaret. 54 Takaꞌ ia kaꞌ koa kaluar dari parahu, urakng-urakng kaꞌ koa neleꞌ kadeꞌ nang atakng koa Yesus. 55 Lalu Ia kaꞌ koa babatalamaꞌan kaꞌ sigana daꞌerah koa bapadah kadeꞌ Yesus dah mulakng. Lalu urakng-urakng kaꞌ koa ngincakng urakng nang sakit kaꞌ Yesus sambil nangkonnya make tandu kaꞌ maeaꞌ maꞌan ia kaꞌ koa nangngar kabar kadeꞌ Yesus ada. 56 Kaꞌ mae jaꞌ Ia ampus, kaꞌ desa-desa, kaꞌ kota-kota, kaꞌ kampokng-kampokng, urakng-urakng nguringan urakng sakit kaꞌ pasar sambil bapintaꞌ sidi, biar ia kaꞌ koa diijinan nyangkam jubah Yesus biar gaꞌ ujukngnya. Lalu samua urakng nang nyangkamnya jaji samuh.