Yesus nyamuhatn urakng nang kamasokatn setan dari Gerasa
5:1-20
(Mat. 8:28-34; Luk. 8:26-39)
5
Lalu sampelah Yesus man murit-murit-Nya, kaꞌ sabarang dano, kaꞌ daꞌerah urakng Gerasa. 2 Baruꞌ jaꞌ Yesus turutn dari parahu, ataknglah saurakng nang kamasokatn setan dari pasuburatn namuiꞌ Ia. 3 Urakng koa diapm kaꞌ pasuburatn man inaꞌ ada saurakngpun nang sanggup ngikatnya, biar pun make rante. 4 Waꞌtu paha man kokotnya di ngikat man rante basi, rante koa nyamutusatn, rante nang kaꞌ kokotnya koa nya mutusatn man rante nang kaꞌ pakahe koapun ugaꞌ dinya ngampasatn sampe ancur. Inaꞌ ada saurakng pun nang mampu ngamanan nya. 5 Siakng malam ia ulakng-ulakng kaꞌ teaꞌ subur man kaꞌ bukit-bukit sambil kampak-kampak man mangkongiꞌ diriꞌnya make batu. 6 Takaꞌ ia neleꞌ Yesus dari jauh, ia batalamaꞌ notok Yesus, lalu sujut nyambah kaꞌ adapatn Yesus. 7 Setan koa ngampak man bakata, “O Yesus, Anak Allah nang miah bakuasa, ahe urusan Kitaꞌ man aku? Demi Allah, amelah nyiksa aku!” 8 Ia bakata lekoa tagal sanapeꞌnya Yesus suah bakata kaꞌ ia, “Setan! Kaluar kao dari urakng nian!” 9 Lalu Yesus batanyaꞌ agiꞌ kaꞌ ia, “Sae damanyu?” Kata urakng koa, “Aku Legion, tagal kami manyak.” 10 Ia sidi bapintaꞌ kaꞌ Yesus biar ame ngansar setan-setan koa kaluar dari daꞌerah koa.11 Waꞌtu koa, kaꞌ tabikng bukit koa sidi manyak jalu nang tagah bagagoꞌ makatn. 12 Setan-setan koa sidi bapintaꞌ kaꞌ Yesus katanya, “Suruhlah kami tamaꞌ kaꞌ dalapm babotn-babotn koa.” 13 Man Yesus satuju. Jadi, setan-setan koa kaluar dari urakng koa lalu tamaꞌ kaꞌ babotn-babotn koa. Kabatn babotn koa jumbalahnya kira-kira samuanya dua ribu ekoꞌ samuanya tarajutn kaꞌ tapi jurang kaꞌ dalapm dano koa man mati lamas samuanya.
14 Jaji panjaga-panjaga babotn-babotn koa neleꞌ ahe nang dah jaji koa, ia kaꞌ koa batilamaꞌ kaꞌ kota man kaꞌ kampokng-kampokng sakitar koa sambil ngesahatn hal koa. Lalu kaluarlah urakng-urakng untuꞌ neleꞌ ahe nang dah jaji koa. 15 Ia kaꞌ koa atakng kaꞌ Yesus, lalu neleꞌ urakng nang tadinya kamasokatn setan koa, tagah duduk diꞌkoa. Ia dah bapakean, man pikirannya dah baik. Tagal koa ia kaꞌ koa jaji sidi galiꞌ kaꞌ Yesus. 16 Urakng-urakng nang dah neleꞌ babaro hal koa ngesahatn kaꞌ ia kaꞌ koa tentang ahe nang dah jaji kaꞌ urakng nang kamasokatn setan koa, man tentang babotn-babotn koa. 17 Lalu panduduk daꞌerah koa mintaꞌ biar Yesus ningngalatn daꞌerah koa.
18 Waꞌtu Yesus naik kaꞌ dalapm parahu, urakng nang tadinya kamasokatn setan koa mintaꞌ kaꞌ Yesus biar ia mulih nunaꞌan-Nya. 19 Tapi Yesus inaꞌ satuju, kata-Nya, “Pulaknglah man bareꞌ nauꞌan kaꞌ page warisnyu ahe nang dah Allah manjawat, Ia sidi kasihatn kaꞌ kao!” 20 Urakng koa pun ampus man mulaiꞌ ngesahatn kaꞌ daꞌerah Dekapolis ahe nang dah Yesus manjawat kaꞌ ia. Samua urakng sidi heran nangngarnya.
Yesus ngidupatn anak Yairus dari kamatiatn man nyamuhatn nangbini nang sakit pandarahan
5:21-43
(Mat. 9:18-26; Luk. 8:40-56)
21 Udah koa Yesus nyabarang agiꞌ kaꞌ sabarang dano, kaꞌ tapi dano koa rami urakng nang atakng ngarumuniꞌ Ia. 22 Ataknglah saurakng nang badama Yairus. Ia saurakng kapalaꞌ rumah tampat sumbayang kaꞌ kota koa. Takaꞌ ia neleꞌ Yesus, ia sujud kaꞌ adapatn-Nya, 23 man bapintaꞌ sidi, “Paꞌ, anakku nangbini sakit parah man amper mati, bantoꞌ ataknglah man jamehlah biar ia samuh man tatap idup!” 24 Lalu ampuslah Yesus man Yairus. Rami urakng nang nunaꞌan Ia, sampe bapeset-peset kaꞌ samak-Nya.
25 Kaꞌ teaꞌ urakng koa ada saurakng nangbini nang dah dua balas tahutn lamanya sakit pandarahan. 26 Nangbini koa sidi singsara. Samua kakayaatnnya dah abis dimake untuꞌ barobat kaꞌ mantari-mantari, tapi inaꞌ ada nang bisa nyamuhatnnya, malahan panyakitnya siaꞌ parah. 27 Nangbini koa dah manyak nangngar kabar tentang Yesus. Jaji ia nunaꞌan Yesus dari balakang kaꞌ teaꞌ urakng-urakng rami koa man nyangkam jubah-Nya. 28 Tagal ia bapikir, “Kadeꞌ kujameh jaꞌ jubah-Nya, aku pasti samuhaꞌ!” 29 Waꞌtu ia nyangkam jubah-Nya koa, pandarahannya langsung baranti man ia marasa kadeꞌ tubuhnya dah inaꞌ sakit agiꞌ. 30 Kaꞌ waꞌtu koa ugaꞌ Yesus marasa kadeꞌ ada kuasa nang kaluar dari diriꞌ-Nya. Ia malek kaꞌ urakng nang rami koa man batanyaꞌ, “Sae nang nyangkam jubah-Ku?” 31 Murit-murit-Nya nyahut, “Paꞌ Guru Kitaꞌ neleꞌ leamae urakng nian bapeset-peset samak Kitaꞌ, tapi Kitaꞌ batanyaꞌ, Sae nang nyangkam Aku?” 32 Tapi Yesus tarus jaꞌ maratiatnniꞌ sakulilikng-Nya ngagoꞌiꞌ urakng nang dah nyangkam jubah-Nya. 33 Nangbini koa nauꞌan ahe nang dah jaji kaꞌ diriꞌnya, kagaliꞌanan man basiragotatn ia atakng kaꞌ Yesus ngakoꞌiꞌ samuanya. 34 Lalu Yesus bakata kaꞌ nangbini koa, “Anak-Ku, tagal kao pucayaꞌ kaꞌ Aku, kao sidi-sidi dah samuh! Pulaknglah baati nang dame. Kao dah samuh!”
35 Samintara Yesus masih ngomong, sangahe urakng atakng dari rumah Yairus. Man bakata kaꞌ ia, “Anak kitaꞌ dah mati, ame agiꞌ kitaꞌ nyusahiꞌ Paꞌ Guru” 36 Yesus ugaꞌ nangngar kabar koa tapi Ia inaꞌ maduliatn ahe nang dinya kaꞌ koa ngataatn, Yesus bakata kaꞌ Yairus, “Ame galiꞌ pucayaꞌ jaꞌ!” 37 Lalu Yesus bajalatn tarus, tapi Ia inaꞌ ngijinan saurakngpun ngikutiꞌ-Nya kacoali Petrus, Yakobus nyamadiꞌ Yohanes. 38 Takaꞌ ia kaꞌ koa namus kaꞌ rumah Yairus, Yesus neleꞌ urakng-urakng riuh man bangeakatn 39 Lalu Yesus tamaꞌ man bakata kaꞌ ia kaꞌ koa, “Ngahe kitaꞌ mangkaꞌ keak? Kamudaꞌ koa inaꞌ mati, tapi tidur!” 40 Tapi ia kaꞌ koa ngalakatn Yesus.
Lalu Ia ngoser urakng-urakng kaꞌ koa kaluar, Ia maba uweꞌ, apaꞌ kamudaꞌ koa man katalu murit-Nya tamaꞌ kaꞌ dalapm kamar kamudaꞌ koa. 41 Yesus nyingiꞌiꞌ kokot kamudaꞌ koa lalu bakata kaꞌ ia, “Talita kum,” ratinya, “Kamudaꞌ nangbini Aku bakata kaꞌ kao, lumpatlah!” 42 Kamudaꞌ koa dah baumur dua balas tahutn. Takaꞌ koa ugaꞌ, kamudaꞌ koa lumpat man bajalatn. Samua urakng nang neleꞌ hal koa jaji sidi heran! 43 Tapi Yesus sidi maiꞌan biar ia kaꞌ koa ame madahatn hal koa kaꞌ saepun, lalu kata-Nya, “Bareꞌ kamudaꞌ koa makatn.”