Parumpamaan urakng nang bahuma
4:1-20
(Mat. 13:1-23; Luk. 8:4-15)
4
Kaꞌ soteꞌ ari Yesus ngajar agiꞌ kaꞌ tapi dano Galilea. Sidi rami urakng atakng ngarumuniꞌ Ia. Tagal koa Ia ampus duduk kaꞌ parahu nang batambat diꞌkoa, man urakng nang rami koa badiriatn kaꞌ tapi dano koa.a 2 Lalu Yesus ngajar manyak hal kaꞌ Ia kaꞌ koa man make parumpamaan. Lea nianlah Ia ngajar urakng rami koa. 3 “Dangngarlah, ada urakng nang bahuma ampus ngamuratn banih. 4 Waꞌtu ia ngamuratn banih koa, ada banih nang jantuꞌ kaꞌ tapi maraga, lalu ataknglah burukng man matokiꞌ banih koa sampe abis. 5 Sabagian agiꞌ jantuꞌ kaꞌ tanah nang babatu-batu, nang tanahnya sabebet, lalu banih koa pun camak, barang tanahnya koa sabebet. 6 Tapi takaꞌ mataari tarabit, layuꞌlah ia man jaji karikng tagal inaꞌ baurat. 7 Sabagian agiꞌ jantuꞌ kaꞌ tangah rompoꞌ baduri, lalu siaꞌ ayaꞌlah rompoꞌ baduri koa ngapet camak banih koa sampe mati, sampe ia inaꞌ babuah. 8 Man sabagian agiꞌ jantuꞌ kaꞌ tanah nang gambur, ia bacamak sidi gadok man babuah, asilnya ada nang talu puluh kali lipat, ada nang anam puluh kali lipat, ada nang saratus kali lipat.” 9 Lakaꞌ Yesus ngesahatn parumpamaan koa, Ia bakata, “Kitaꞌ batarenyekng, dangngaratnlah!”10 Takaꞌ Yesus babaro, pangikut-pangikut-Nya man kaduabalas murit-Nya batanyaꞌ kaꞌ Ia ahe ratinya parumpamaan koa. 11 Sahut-Nya, “Kaꞌ kitaꞌ dah dimadahiꞌ rati rahasia lemae Allah marentah jaji Raja, tapi kaꞌ urakng-urakng luar diajar man parumpamaan, 12 biar
ia kaꞌ koa neleꞌ, tapi inaꞌ nauꞌan ahe nang jadi;
man ia kaꞌ koa nangngar, tapi inaꞌ ngarati,
biar ia kaꞌ koa ame babalik man namu pangamponan.”b
13 Lalu Yesus bakata agiꞌ kaꞌ ia kaꞌ koa, “Inaꞌ keꞌ kitaꞌ ngarati kaꞌ parumpamaan nian? Kadeꞌ mpa koa lemae kitaꞌ baya ngarati kaꞌ parumpamaan-parumpamaan nang lain? 14 Urakng nang ngamuratn banih koa, urakng nang ngesahatn Kabar Baik. 15 Banih nang jantuꞌ kaꞌ tapi maraga ia koa, urakng-urakng nang nangngar kabar tentang lemae Allah marentah jaji Raja. Tapi Ibalis pamimpin setan-setan atakng ngarampas pakataatn Allah nang baruꞌ di ngamur kaꞌ dalapm atinya koa. 16 Lea koa ugaꞌ nang di ngamur kaꞌ tanah nang babatu-batu, koalah urakng-urakng nang nangngar pakataatn Allah koa man atinya langsung karepoatn narimaꞌnya, 17 tapi ia kaꞌ koa inaꞌ baurat man tahan sabantar ihan. Waꞌtu ia kaꞌ koa ngalamiꞌ kasusahatn ato kana aniaya tagal nunaꞌan ajaran Kabar Baik koa, ia kaꞌ koa langsung ninggalatn Allah. 18 Banih nang jantuꞌ kaꞌ tangah rompoꞌ baduri koa ibarat urakng-urakng nang nangngar Kabar Baik koa, 19 tapi kuatir kaꞌ kaidupatnnya. Ia kaꞌ koa sidi maoꞌaꞌ idup bamewah-mewah man ngunyar ahe nang ngarepoatn atinya kaꞌ koa. Samua kamaoꞌan koa lea rumput nang baduri ngapet Kabar Baik koa sampe-sampe inaꞌ ngasilatn ahe pun kaꞌ dalapm kaidupatnnya kaꞌ koa. 20 Man ahirnya nang dingamuratn kaꞌ tanah nang edoꞌ, koa lah urakng nang nangngar man nyambutiꞌ Kabar Baik koa lalu babuah, ada nang talu puluh kali lipat, ada nang anam puluh kali lipat, ada nang saratus kali lipat.”
Parumpamaan tentang pulita man ukuran
4:21-25
21 Lalu Yesus bakata kaꞌ ia kaꞌ koa, “Urakng nang ngincakng pulita bukeꞌ biar ditampatatn kaꞌ babah tapayatn ato kaꞌ babah tampat tidur, tapi di gantungan kaꞌ tapi dinikng.c 22 Lea koa ugaꞌ inaꞌ ada soteꞌpun nang dinosokatn nang inaꞌ kateleꞌanannaꞌ man inaꞌ ada soteꞌ pun rahasia nang inaꞌ tabungkaraꞌ.d 23 Sae batarenyekng, dangngaratnlah!”
24 Kata Yesus agiꞌ, “Paratiatniꞌlah biar kitaꞌ ngarati samua ajaran-Ku, tagal leamae kitaꞌ barusaha maoꞌ ngarati kaꞌ ajaran-Ku, lea koa ugaꞌlah Allah nambahatnnaꞌ kamampuan kaꞌ kitaꞌ untuꞌ labih ngarati agiꞌ. Lea koa ugaꞌlah, Ia nambahatnnaꞌ labih manyak agiꞌ pangaratian.e 25 Saeaꞌ maꞌan nang nangngaratn pangajaran-Ku, di bareꞌaꞌ pamahaman labih mayak. Tapi untuꞌ saeaꞌ maꞌan nang inaꞌ nangngaratn pangajaran-Ku, lea koa ugaꞌ sabebet pamahaman nang di nya ngampuꞌ di taapaꞌ ugaꞌ dari nya.”f
Parumpamaan tentang banih nang tumuh
4:26-29
26 Lalu kata Yesus agiꞌ, “Lea nian lah hal Karajaan Allah koa, saumpama urakng nang ngamuratn banih kaꞌ tanah. 27 Lalu malam ari ia tidur man siakng arinya ia lumpat, samintara banih-banih koa siaꞌ tumuh man jaji ayaꞌ. Tapi leamae caranya banih koa tumuh man jaji ayaꞌ, urakng koa inaꞌ nauꞌan. 28 Tanah koalah nang ngaluaratn asil, mula-mula tangkenya, bunganya lalu buahnya nang labat. 29 Man kadeꞌ buah koa dah masak, urakng koa pun mulaiꞌ nganyinya, tagal dah sampe musim bahanyi.”g
Parumpamaan tentang banih sawi
4:30-34
(Mat. 13:31-35; Luk. 13:18-19)
30 Kata Yesus agiꞌ, “Supaya labih jelas, Aku nambahatn parumpamaan agiꞌ untuꞌ nojokatn gambaran tentang karajaan Allah. 31 Karajaan Allah lea begeꞌ sawi nang dingamur kaꞌ tanah. Biarpun begeꞌ sawi koa nang paling enek dari begeꞌ tanaman lain kaꞌ aiꞌ tanah nian. 32 Tapi kadeꞌ ditanam begeꞌ sawi koa, tumuh jaji lea puhutn nang paling ayaꞌ kaꞌ kabon. Nang ngaluaratnnaꞌ dahatn-dahatn nang ayaꞌ, sampe-sampe burukng-burukng pun baya basarakng man balinukng kaꞌ babahnya.”
33 Yesus ngesahatn pakataatn dari Allah kaꞌ ia kaꞌ koa make manyak parumpamaan lea koa, pas man ahe nang baya dinya kaꞌ koa ngarati. 34 Yesus gia make parumpamaan kadeꞌ ngajar urakng-urakng koa. Tapi kadeꞌ ia man pangikut-pangikut-Nya ihan, Ia nyalasatn samuanya kaꞌ ia kaꞌ koa.
Yesus madiaman nyaru
4:35-41
(Mat. 8:23-27; Luk. 8:22-25)
35 Kaꞌ gumareꞌ ari koa ugaꞌ waꞌtu mataari dah tingalapm, Yesus bakata kaꞌ pengikut-Nya, “Injeꞌlah diriꞌ balayar kaꞌ sabarang dano.” 36 Ia kaꞌ koa pun barangkat ninggalatn urakng rami make parahu nang tadi di Yesus make untuꞌ ngajar. Waꞌtu koa ugaꞌ ada urakng-urakng nang naik parahu lain nunaꞌan ia kaꞌ koa. 37 Inaꞌ sangahe lama balayar ataknglah nyaru nang sidi miah kuat. Galumbang mulaiꞌ ngampas parahu sampe-sampe aiꞌ tamaꞌ kaꞌ parahu man parahu koa amper karapm 38 Tapi Yesus tagah tidur kaꞌ bagian balakang parahu, ia nguringan kapala-Nya kaꞌ atas bantal. Murit-murit-Nya ngunak-Nya. Ia kaꞌ koa bakata, “Paꞌ Guru, ahe keꞌ kitaꞌ inaꞌ paduli, diriꞌ cilakaaꞌ?” 39 Yesus lumpat lalu nyuruh nyaru man galumbang nang kuat koa badiapm, jakata-Nya, “Diapm man tananglah!” Nyaru man galumbang nang kuat koa tapadiapm, lalu dano jaji sidi tanang. 40 Lalu Yesus bakata kaꞌ ia kaꞌ koa, “Ngahe kitaꞌ sidi galiꞌ? Ngahe kitaꞌ inaꞌ pucayaꞌ?” 41 Ia kaꞌ koa jaji sidi galiꞌ man bakata, “Sae urakng nian, sampe-sampe nyaru man dano pun ngasiꞌ kaꞌ Ia?”