Kadeꞌ inaꞌ baranti babuat dosa kitaꞌ cilakaaꞌ
13
Waꞌtu koa basangahe urakng ngesahatn kaꞌ Yesus tentang urakng-urakng Galilea nang di Pilatus nyuruh bunuh,
takaꞌ ia kaꞌ koa nyambaleh laok untuꞌ mareꞌ persembahan kaꞌ Tuhan Allah.
2 Yesus nyahutiꞌ ia kaꞌ koa,
“Pasti kitaꞌ sangka urakng-urakng Galilea nian labih ayaꞌ dosanya daripada sigana urakng Galilea nang lain,
tagal ia kaꞌ koa ngalami naseb koa.
3 Inaꞌ!
Sabatolnya,
kadeꞌ kitaꞌ inaꞌ baranti babuat dosa man mulakng kaꞌ Tuhan Allah,
sigana kitaꞌ binasaaꞌ ugaꞌ lea ia kaꞌ koa.
4 Lalu lemae man nang lapan balas urakng nang mati kana timpaꞌ manara samak kolam Siloam?
Pasti kitaꞌ sangka ugaꞌ,
ia kaꞌ koa labih ayaꞌ kasalahatnnya daripada sigana urakng nang diapm kaꞌ Yerusalem.
5 Inaꞌ!
Sabatolnya,
kadeꞌ kitaꞌ inaꞌ baranti babuat dosa man mulakng kaꞌ Tuhan Allah,
sigana kitaꞌ binasaaꞌ ugaꞌ lea ia kaꞌ koa.”
Parumpamaan tentang puhutn araꞌ nang inaꞌ babuah
6 Lalu Yesus ngomongan parumpamaan nian:
“Ada sekoꞌ urakng nang ngampuꞌ puhutn araꞌ nang tumuh kaꞌ kabon anggurnya,
man ia atakng ngagoꞌ buah puhutn koa,
tapi inaꞌ namunya.
7 Lalu ia bakata kaꞌ pangurus kabon anggur koa,
‘Teleꞌ boh,
dah talu tahutn aku atakng ngagoꞌ buah puhutn araꞌ nian man aku inaꞌ namunya.
Tabakng jaꞌ puhutn nian,
toaꞌ-toaꞌ untuꞌ ahe ia idup!’
8 Sahut urakng koa,
‘Tuan,
biaratnlah ia idup tahutn nian agiꞌ,
aku nyangkutaꞌ tanah kaꞌ sakulilikngnya man mareꞌaꞌnya pupuk.
9 Mungkin tahutn depan ia babuah;
kadeꞌnya nanaꞌ,
baruꞌ ditabakng jaꞌ.’”
Yesus nyamuhatn urakng kaꞌ ari Sabat
10 Kaꞌ soteꞌ ari Sabat,
ari diꞌmae urakng Yahudi babadiaman karaja,
Yesus tagah ngajar kaꞌ salah soteꞌ rumah tampat sumbayang.
11 Kaꞌ diꞌkoa ada sekoꞌ nangbini nang dah lapan balas tahutn sakit tagal kamasokatn setan.
Nangbini koa bongkok pingakngnya sampe inaꞌ pane badiri cagat.
12 Tateleꞌ kaꞌ nangbini koa,
Yesus nyaruꞌ daꞌ bakata,
“Uweꞌ,
panyakit kitaꞌ dah samuh.”
13 Yesus nyameh nangbini koa,
nangbini koa daꞌ badiri cagat lalu muji Tuhan Allah.
14 Tapi kapalaꞌ rumah tampat sumbayang koa bera tagal Yesus nyamuhatn urakng kaꞌ ari Sabat.
Lalu ia bakata kaꞌ urakng manyak,
“Ada anam ari untuꞌ bakaraja.
Tagal koa ataknglah kaꞌ salah soteꞌ ari koa untuꞌ disamuhatn,
tapi ame kaꞌ ari Sabat!”
15 Tuhan nyahutiꞌ ia koa,
“Woy!
Kitaꞌ urakng munapik.
Kaꞌ ari Sabat urakng-urakng ngalapasatn lembu ato keledainya mpat kaꞌ kandang,
man ngincakngnya kaluas untuꞌ mareꞌaꞌnya aiꞌ cocok.
16 Nangbini katurunan Abraham nian dah lapan balas tahutn di Ibalis pamimpin setan-setan ngikat.
Tantunya ia arus dilapasatn dari ikatatnnya koa biargeꞌ kaꞌ ari Sabat!”
17 Waꞌtu Yesus bakata lekoa,
sigana urakng nang munsuhiꞌ Ia marasa supeꞌ.
Tapi sigana urakng rami karepoatn tagal sigana nang ajaip,
nang dah di Yesus manjawat.
Parumpamaan begeꞌ sawi
(Mat. 13:31-32; Mrk. 4:30-32)
18 Yesus bakata,
“Kadeꞌ Tuhan Allah marentah jaji Raja,
Aku ngumpamaanaꞌnya lea nian:
19 Ia lea begeꞌ sawi,a
nang di urakng nanam kaꞌ umanya.
Begeꞌ sawi koa tumuh jaji puhutn,
man burukng-burukng basarakng kaꞌ dahatn-dahatnnya.”
Parumpamaan Ragi
(Mat. 13:33)
20 Yesus bakata agiꞌ,
“Make ahe Aku dapat ngumpamaan kadeꞌ Tuhan Allah marentah jaji Raja?
21 Pamarentahan-Nya koa saumpama ragi nang di sekoꞌ nangbini ngaduk kaꞌ dalapm tapukng gandum ampat puluh liter.
Biargeꞌ raginya sabebet tapi tapukng gandum koa jaji ngamakng samuannya.”
Sae nang disalamatatn
(Mat. 7:13-14, 21-23)
22 Lalu Yesus bajalatn dari kota kaꞌ kota man dari desa kaꞌ desa sambil ngajar man narusatn pajalanan-Nya kaꞌ Yerusalem.
23 Man ada sekoꞌ urakng nang batanyaꞌ kaꞌ Yesus,
“Tuhan,
ahe geꞌ sabebet ihan urakng nang disalamatatnnaꞌ?”
Sahut Yesus kaꞌ urakng-urakng diꞌkoa,
24 “Bajuanglah untuꞌ tamaꞌ kaꞌ pintu nang sampet koa!
Dangar boh,
manyak urakng nang barusaha untuꞌ tamaꞌ tapi inaꞌ dapat.
25 Takaꞌ tuan rumah dah lumpat lalu nutup pintunya,
kitaꞌ badiriꞌaꞌ kaꞌ luar man narodok-narodok pintu sambil bakata,
‘Tuan bukaiꞌlah pintu!’
Ia nyahutiaꞌ kitaꞌ,
‘Aku inaꞌ nauꞌan dari mae kitaꞌ atakng.’
26 Tapi kitaꞌ bakataaꞌ,
‘Kami udah makatn man nyocok kaꞌ adapatn Kitaꞌ,
man Kitaꞌ ugaꞌ dah ngajar kaꞌ maraga-maraga kota kami.’
27 Tapi Ia bakataaꞌ kaꞌ kitaꞌ,
‘Aku inaꞌ nauꞌan dari mae kitaꞌ atakng.
Darilah kaꞌ naun ame kaꞌ adapatn-Ku,
kitaꞌ urakng nang manjawat kajahatatn!’”
28 Jakata Yesus agiꞌ,
“Ana kitaꞌ neleꞌaꞌ Abraham,
Ishak man Yakup man sigana nabi kaꞌ tampat diꞌmae Tuhan Allah marentah jaji Raja.
Waꞌtu koa kitaꞌ ngeakaꞌ man sidi miah singsaraaꞌ barang kitaꞌ ihan ditabakatnnaꞌ kaluas.
29 Manyak urakng atakngaꞌ mpat kaꞌ timur,
barat,
utara man selatan,
man ia kaꞌ koa dudukaꞌ makatn kaꞌ tampat diꞌmae Tuhan Allah marentah jaji Raja.
30 Sabatolnya ada urakng nang dinganggap inaꞌ panting ampeatn,
naꞌe ngampuꞌaꞌ tampat nang panting.
Man urakng nang dah ngampuꞌ tampat nang panting ampeatn,
naꞌe jajiaꞌ urakng nang hina.”
Yesus kasihatn kaꞌ Yerusalem
(Mat. 23:37-39)
31 Ari koa ugaꞌ,
ada sangahe urakng Parisi atakng kaꞌ Yesus man bakata,
“Ame badiapm kaꞌ dian!
Ampus kaꞌ tampat lain,
jukut Herodes maoꞌ munuh Kitaꞌ.”
32 Yesus nyahut,
“Ampus bareꞌ nauꞌan kaꞌ asuꞌ liarb koa,
‘Ari nian man ampagi Aku ngoser setan man nyamuhatn urakng sakit,
tapi ari katalu Aku ngabisatnnaꞌ pakarajaatn-Ku.’
33 Kahepun lekoa Aku arus narusatn ugaꞌ pajalanan-Ku kaꞌ Yerusalem ari nian,
ampagi man lusaꞌnya agiꞌ,
jukut inaꞌ baik sekoꞌ urakng nabi dibunuh kaꞌ luar Yerusalem.
34 Kitaꞌ urakng-urakng Yerusalem!
Nabi-nabi kitaꞌ bunuh!
Urakng-urakng nang di Tuhan Allah ngutus kitaꞌ tabakiꞌ make batu sampe mati!
Dah sangahe kali Aku maoꞌ ngapakng sigana panduduknyu lea uyukng ngalinukngiꞌ anak-anaknya kaꞌ babah seapnya,
tapi kitaꞌ baiꞌ!
35 Tagal koa Tuhan Allah inaꞌ agiꞌ nyarataiꞌ kitaꞌ.
Dangar boh,
mulaiꞌ ampeatn kitaꞌ nanaꞌ neleꞌaꞌ Aku agiꞌ,
sampe kitaꞌ bakata,
‘Dibarakatiꞌ Ia nang atakng,
nang di Tuhan Allah ngutus.’”