Yesus nyamuhatn urakng sakit
14
Kaꞌ soteꞌ ari Sabat Yesus ampus makatn kaꞌ rumah saurakng pamimpin urakng Parisi.
Diꞌkoa pakomoꞌan urakng-urakng Parisi maratiatn Yesus untuꞌ ngagoꞌ kasalahatn-Nya.
2 Man inaꞌ disangka-sangka ataknglah kaꞌ Yesus saurakng nang sakit bosokng nang paha man kokotnya bangkak-bangkak.
3 Lalu Yesus batanyaꞌ kaꞌ guru-guru agama Yahudi man urakng-urakng Parisi nang ada kaꞌ diꞌkoa,
“Manurut ukum agama diriꞌ,
mulih geꞌ inaꞌ,
diriꞌ nyamuhatn urakng kaꞌ ari Sabat?”
4 Ia kaꞌ koa samuanya diapm.
Lalu Yesus nyangiꞌiꞌ kokot urakng sakit koa man nyamuhatnnya man nyuruhnya pulakng.
5 Lakaꞌ koa Yesus bakata kaꞌ urakng-urakng koa,
“Kadeꞌ kamudaꞌ kitaꞌ geꞌ sapi kitaꞌ nang jantuꞌ kaꞌ dalapm kolam,
biarpun ari koa ari Sabat,
pasti ba kitaꞌ ugaꞌ ngangkataꞌnya.”
6 Tapi inaꞌ saurakngpun bisa nyahutiꞌ Yesus tentang hal koa.
Inaꞌ sombong man suka mareꞌ
7 Yesus neleꞌ ada tamu-tamu nang atakng ngagoꞌ tampat duduk paling kaꞌ depan.
Tagal koa Yesus mareꞌ parumpamaan nian kaꞌ sigana ia kaꞌ koa.
8 “Kadeꞌ kitaꞌ diundang kaꞌ gawe panganten,
ame boh duduk kaꞌ tampat nang paling kaꞌ depan.
Jukut ada kamungkinan ampuꞌ rumah dah ngundang urakng lain nang labih tahormat daripada kitaꞌ.
9 Ame sampe tuan rumah koa,
nang ngundang kitaꞌ man ia,
notok kitaꞌ man bakata,
‘Bareꞌlah tampat nian kaꞌ urakng nang baruꞌ atakng naun.’
Lalu kitaꞌ jaji kasupeꞌatn man tapaksa ampus duduk kaꞌ tampat nang paling kaꞌ balakang.
10 Tapi,
kadeꞌ kitaꞌ dingundang,
ampuslah duduk kaꞌ tampat nang paling balakang.
Mungkin ampuꞌ rumah atakngaꞌ man bakata kaꞌ kitaꞌ,
‘Yukng,
injeꞌ diriꞌ duduk kaꞌ depan.’
Lekoalah kao narimaꞌaꞌ hormat kaꞌ depan mata sigana tamu-tamu nang lain.
11 Jukut saepun nang ningian diriꞌnya,
Tuhan Allah ngarendahatnnaꞌ urakng koa man saepun ngarendahatn diriꞌnya,
Tuhan Allah ningianaꞌ urakng koa.”
12 Lalu jakata Yesus kaꞌ ampuꞌ rumah koa,
“Kadeꞌ kitaꞌ ngundang urakng untuꞌ makatn kaꞌ rumahnyu,
amelah biasaatn ngalap ayukngnyu,
adiꞌ baradiꞌnyu,
pagewarisnyu,
geꞌ tetangganyu nang kaya ihan.
Jukut ana ia kaꞌ koa ngundang kitaꞌ ugaꞌ,
man lekoa ugaꞌ kitaꞌ namu balasan kaꞌ ahe nang kitaꞌ panjawat.
13 Jaji kadeꞌ kitaꞌ bagawe,
alaplah urakng kodo,
urakng cacat,
urakng elat,
man urakng butaꞌ.
14 Kitaꞌ dibarakatiaꞌ jukut urakng-urakng koa inaꞌ bisaaꞌ malas kabaikatnnyu.
Tapi takaꞌ urakng-urakng nang ngasiꞌ kaꞌ Tuhan Allah mulakng idup agiꞌ,
kaꞌ waꞌtu koalah kabaikatnnyu di Tuhan Allah balasaꞌ.”
Parumpamaan gawe nang ayaꞌ
(Mat. 22:1-10)
15 Nangar pakataatn Yesus koa,
saurakng dari tamu-tamu koa bakata kaꞌ Yesus,
“Sidi untukng urakng nang makatnnaꞌ barage man Tuhan Allah takaꞌ Ia atakng jaji Raja!”
16 Tapi Yesus nyahutiꞌ urakng koa man parumpamaan lea nian,
“Kaꞌ soteꞌ waꞌtu ada saurakng nang bagaweaꞌ ayaꞌ man ngundang manyak urakng.
17 Takaꞌ gawe koa dah siap,
ampuꞌ gawe koa nyuruh amba ulutnnya ampus kaꞌ urakng-urakng nang diundang tadi man bakata,
‘Dah mulih atakng sigananya dah siap!’
18 Tapi sigana urakng nang dingundang koa,
baalasan untuꞌ inaꞌ atakng kaꞌ gawe koa,
ada nang bakata,
‘Aku baruꞌ jaꞌ mali sabidang uma,
man palalu ampus ngawahiaꞌnya.
Jaji aku inaꞌ bisa atakng.
Maap boh.’
19 Nang lain bakata,
‘Aku baruꞌ mali lima pasang sapi,
man maoꞌ nyoba sapi-sapi koa untuꞌ majakaꞌ tanah kaꞌ uma.
Maap boh aku naꞌ bisa atakng.’
20 Nang lain agiꞌ bakata,
‘Aku baruꞌ jaꞌ lakaꞌ panganten,
tagal koa aku inaꞌ baya atakng.’
21 Amba ulutnnya koa pulakng man bapadah kaꞌ tuannya urakng nang dingundang koa naꞌ bisa atakng.
Tuannya koa sidi bera,
lalu bakata kaꞌ amba ulutnnya,
‘Kadeꞌ lekoa gacehiꞌlah ampus kaꞌ maraga-maraga man kaꞌ sempang-sempang kaꞌ kota koa.
Incaknglah kaꞌ keatn urakng kodo,
urakng cacat,
urakng butaꞌ,
man urakng elat.’
22 Lakaꞌ koa amba ulutnnya nang dinyuruh koa tadi atakng man bapadah,
‘Tuan,
parentah tuan dah dinyalanan,
tapi masih manyak tampat duduk nang kosong.’
23 Lalu tuan koa bakata,
‘Ampuslah,
kaꞌ maraga-maraga ayaꞌ man kaꞌ sempang-sempang kaꞌ luar kota,
man suruhlah urakng-urakng atakng,
biar rumahku panuh.
24 Dangar boh!
Inaꞌ saurakngpun kaꞌ antara urakng-urakng nang dah nolak undanganku tadi koa,
marasaaꞌ pamakanan kaꞌ gawe ku nian.’”
Sigananya arus ditingalatn untuꞌ nunaꞌan Yesus
(Mat. 10:37-38)
25 Kaꞌ soteꞌ ari,
takaꞌ manyak urakng giꞌ nunaꞌan Yesus,
Yesus malek man bakata kaꞌ urakng kaꞌ koa,
26 “Kadeꞌ urakng atakng kaꞌ Aku,
tapi sidi miah ngasihiꞌ uweꞌnya,
apaꞌnya,
bininya,
anak-anaknya,
pagewarisnya,
malah diriꞌnya babaro daripada Aku,
ia inaꞌ bisa jaji pangikut-Ku.
27 Kitaꞌ nang maoꞌ jaji pangikut-Ku,
kitaꞌ arus singsara sampe mati lea urakng nang mikul salip,
man nunaꞌan Aku.
Kadeꞌ inaꞌ,
kitaꞌ naꞌ mungkin jaji pangikut-Ku.
28 Kadeꞌ saurakng dari kitaꞌ maoꞌ madiriaꞌ soteꞌ manara,
tantu ia dudukaꞌ ngareken ongkosnya dohoꞌ biar ia nauꞌan ahe geꞌ duitnya cukup untuꞌ nyajiatnnaꞌ manara koa geꞌ inaꞌ.
29 Jukut kadeꞌ ia inaꞌ dapat nyajiatn manara koa,
padahal pondasinya dah dimanjawat,
lalu sigana urakng nang dah neleꞌ pakarajaatn koa ngalakatn man ngolesatnnya.
30 Ia kaꞌ koa bakataaꞌ,
‘Urakng nian pane bamula madiri pondasinya ihan,
tapi inaꞌ mampu nyajiatnnya!’
31 Kadeꞌ saurakng raja nang ngampuꞌ sapuluh ribu tantara,
maoꞌ baparangaꞌ man raja nang lain,
nang ngampuꞌ dua puluh ribu tantara,
tantu raja koa dudukaꞌ bapikir dohoꞌ ahe geꞌ ia cukup mangkeh untuꞌ ngalawanaꞌ munsuhnya koa.
32 Kadeꞌ ia bapikir ia inaꞌ mangkeh,
tantu waꞌtu munsuhnya koa giꞌ jauh,
ia dah ngiripm utusannya untuꞌ mintaꞌ badame.
33 Lekoa ugaꞌlah man kitaꞌ samua,
kitaꞌ arus bapikir dohoꞌ.
Kadeꞌ kitaꞌ maoꞌ jaji pangikut-Ku,
kitaꞌ arus ningalatn dohoꞌ sigana nang di kitaꞌ ngampuꞌ.”
Gareꞌ nang panat
(Mat. 5:13; Mrk. 9:50)