Parumpamaan domba nang ilang
(Mat. 18:12-14)
15
Waꞌtu koa,
manyak panagih pajak man urakng-urakng nang dinganggap inaꞌ baik kaꞌ masarakat,
atakng nangaratnnaꞌ Yesus.
2 Urakng-urakng Parisi man guru-guru agama Yahudi inaꞌ suka.
Ia kaꞌ koa bakata,
“Ih,
Urakng nian narimaꞌ urakng-urakng nang inaꞌ baik,
malah makatn man ia kaꞌ koa.”
3 Tagal koa Yesus ngesahatn kaꞌ ia kaꞌ koa parumpamaan lea nian:
4 “Kadeꞌ ada dari antara kitaꞌ nang ngampuꞌ saratus ekoꞌ domba,
tapi salah sekoꞌ domba koa sasat,
ahe geꞌ nang di nya panjawataꞌ?
Ia pasti ningalatnnaꞌ domba nang sambilan puluh sambilan nang kaꞌ teaꞌ rumput koa,
man ngagoꞌiꞌ domba nang tasasat koa sampe tamu.
5 Takaꞌ ia namuan agiꞌ domba koa,
ia sidi repo sampe nya ngubaꞌ domba koa kaꞌ bahunya,
6 lalu ngincakngnya pulakng.
Lakaꞌ koa ia nyaruꞌ ayukng-ayukngnya man tetangga-tetangganya,
man bakata,
‘Injeꞌ diriꞌ barepo-repo.
Jukut dombaku nang ilang koa dah ku tamu agiꞌ.’
7 Dangar boh:
lekoa ugaꞌlah,
takaꞌ saurakng badosa dah baranti babuat dosa,
Tuhan Allah man sigana nang kaꞌ saruga sidi miah karepoatn daripada kaꞌ sigana sambilan puluh sambilan urakng nang dah baik man nang nanaꞌ palalu baranti babuat dosa.”
Parumpamaan duit nang ilang
8 Jakata Yesus agiꞌ,
“Saandainya saurakng nangbini ngampuꞌ sapuluh duit perak,
lalu ilang soteꞌ.
Ahe geꞌ nang ia panjawataꞌ?
Ia nyalaatnnaꞌ kulita man nyapu rumahnya untuꞌ ngagoꞌiꞌ kaꞌ kea kaꞌ naun sampe tamu duitnya koa.
9 Takaꞌ ia namuan duitnya koa,
ia nyaruꞌ ayukng-ayukngnya man tetangga-tetangganya,
lalu bakata,
‘Aku sidi repo jukut duitku nang ilang koa dah tamu agiꞌ.
Injeꞌ diriꞌ barepo-repo!’
10 Pucayaꞌlah!
Lekoa ugaꞌlah malaekat Tuhan Allah repo kadeꞌ saurakng badosa dah baranti babuat dosa.”
Parumpamaan kamudaꞌ nang ilang
11 Jakata Yesus agiꞌ,
“Ada saurakng nang bakamudaꞌ dua urakng nanglaki.
12 Nang bungsu bakata kaꞌ apaꞌnya,
‘Apaꞌ bareꞌatnlah kaꞌ aku ampeatn nian bagiatnku dari kakayaatn diriꞌ.’
Lalu apaꞌnya magi-magiatn harata kakayaatnnya koa kaꞌ antara kadua kamudaꞌnya koa.
13 Inaꞌ lama lakaꞌ koa kamudaꞌ nang bungsu koa nyual bagiatnnya koa,
lalu ampus kaꞌ nagari nang jauh.
Kaꞌ naun ia ngabisatn duitnya man idup nang bapoya-poya.
14 Takaꞌ duitnya dah abis samua,
kaꞌ nagari koa kana baho kaparatn nang sidi miah,
man ia pun mulaiꞌ malarat idupnya.
15 Lalu ia ampus bakaraja kaꞌ urakng kampokng di koa,
nang nyuruh ia nyaga babotnnya kaꞌ parokng.
16 Ia sidi miah batol kaparatn sampe maoꞌ makatniaꞌ pamakanan babotn-babotn koa.
Biarpun ia sidi miah kaparatn,
nanaꞌ saurakngpun nang maoꞌ mareꞌ pamakanan kaꞌ ia.
17 Jaji ia sadar man bakata,
‘Urakng-urakng nang bakaraja kaꞌ apaꞌku balimpah-limpah pamakanannya,
man aku kaꞌ dian amper mati kaparatn!
18 Aku pulakngaꞌ man ampus kaꞌ apaꞌku,
man ngomongaꞌ kaꞌ ia:
Apaꞌ,
aku dah badosa kaꞌ Tuhan Allah man kaꞌ Apaꞌ.
19 Aku inaꞌ pantas agiꞌ disabut anak kitaꞌ.
Anggap jaꞌ aku pakaraja kitaꞌ.’
20 Lalu ia bajalatn pulakngaꞌ kaꞌ apaꞌnya.
Masih jauh dari rumahnya,
apaꞌnya dah neleꞌ ia.
Lalu tagaraklah ati apaꞌnya tagal kasihatn kaꞌ ia,
apaꞌnya batilamaꞌ namuiꞌnya,
lalu nya ngapakng man nya ngidung.
21 Jakata kamudaꞌ koa,
‘Apaꞌ,
aku dah badosa kaꞌ Tuhan Allah man kaꞌ kitaꞌ.
Aku inaꞌ pantas agiꞌ disabut anak kitaꞌ.’
22 Tapi apaꞌnya nyaruꞌ palayan-palayannya man bakata,
‘Gaceh!
Taaplah pakean nang paling gagas,
man pakeatnlah kaꞌ ia.
Pakeatnlah cincitn kaꞌ jarinya,
man sapatu kaꞌ pahanya.
23 Lakaꞌ koa taaplah anak sapi nang gamok man sambalehlah.
Diriꞌ makatnnaꞌ man barepo-repoaꞌ.
24 Tagal kamudaꞌku nian saolah-olah dah mati,
ampeatn idup agiꞌ;
ia dah ilang tapi ampeatn dah pulakng agiꞌ.’
Jaji mulaiꞌlah ia kaꞌ koa bagawe.
25 Waꞌtu koa,
kamudaꞌnya nang tuha giꞌ tagah kaꞌ uma.
Takaꞌ ia pulakng man sampe kaꞌ samak rumah,
ia nangar suara musik man tari-tariatn.
26 Lalu kamudaꞌ nang tuha nian tadi nyaruꞌ saurakng palayannya,
lalu bakata,
‘Ada ahe nian kaꞌ rumah?’
27 Lalu palayan koa nyahut,
‘Adiꞌ kitaꞌ dah pulakng!
Man apaꞌ kitaꞌ dah nyuruh nyambaleh anak sapi nang gamok,
tagal kamudaꞌnya koa dah mulakng agiꞌ kaꞌ ia man kaadaan nang salamat.’
28 Kamudaꞌ nang tuha koa miah bera sidi sampe ia baiꞌ tamaꞌ kaꞌ rumah.
Lalu apaꞌnya kaluas man mujuk ia tamaꞌ.
29 Lalu kamudaꞌ nang tuha koa bakata,
‘Batahutn-tahutn lamanya aku bakaraja mati-matiaꞌ untuꞌ kitaꞌ.
Naꞌ suah aku mantah parentah kitaꞌ.
Ahe geꞌ nang dah ada kitaꞌ mareꞌatn kaꞌ aku?
Sekoꞌ kambing pun naꞌ suah kitaꞌ mareꞌatn untuꞌ aku bagawe man ayukng-ayukngku!
30 Kamudaꞌ kitaꞌ koa dah ngabisatn kakayaatn kitaꞌ man nangbini nang naꞌ banar,
tapi sakali ia pulakng,
kitaꞌ nyambalehatn anak sapi nang gamok koa untuꞌ ia!’
31 Jakata apaꞌnya,
‘Anakku,
kao ada maan kaꞌ dian man aku.
Sigana nang ku ngampuꞌ nang koa nuꞌnyu ugaꞌ.
32 Tapi diriꞌ arus bagawe man barepo-repo,
tagal adiꞌnyu nian saolah-olah dah mati,
tapi ampeatn idup agiꞌ;
ia dah ilang tapi ampeatn dah pulakng agiꞌ.’”