9
Yesus bakata agiꞌ, “Aku bakata kaꞌ kitaꞌ, sasidinya kaꞌ antara kitaꞌ nang atakng kaꞌ dian inaꞌ matiaꞌ sanapeꞌ ia kaꞌ koa neleꞌ kadeꞌ Allah marentah jaji raja kaꞌ sigana aiꞌ tanah man panuh kuasa.”Yesus ngomong man Musa man Elia
(Mat. 17:1-13; Luk. 9:28-36)
2 Anam ari lakaꞌ koa Yesus maba Petrus, Yakobus man Yohanes nakiꞌ kaꞌ bukit nang tingi. Kaꞌ tampat koa cuman ia kaꞌ koa ihan, inaꞌ ada urakng lain. Diꞌkoa ia kaꞌ koa neleꞌ Yesus barubah rupa, muhanya jaji basaho.a 3 Pakean-Nya jaji sidi putih man bakilat. Inaꞌ ada saurakng pun kaꞌ dunia nang pane nyasah pakean saputih koa. 4 Lalu katalu murit Yesus koa neleꞌ Nabi Elia man Nabi Musab ada kaꞌ diꞌkoa. Kaduanya tagah ngomong man Yesus. 5 Neleꞌ hal koa, Petrus bakata kaꞌ Yesus, “Paꞌ Guru, sidi reponya kami ada kaꞌ tampat nian. Lea mae kadeꞌ kami madiriatn talu buah kemah, sabuah untuꞌ Kitaꞌ, sabuah untuꞌ Musa, sabuah untuꞌ Elia.” 6 Sabatolnya Petrus inaꞌ nauꞌan ahe nang ia arus kataatn, tagal ia man kadua ayukngnya sidi kagaliꞌanan. 7 Lakaꞌ koa rahuꞌ turutn kaꞌ atas nya kaꞌ koa man nutupiꞌ nya. Ia kaꞌ koa nangngar suara kaluar dari dalapm rahuꞌ koa nang bakata lea nian, “Nianlah Anak-Ku, nang Ku-kasihiꞌ, kitaꞌ arus nangngaratn Ia.”c 8 Ia kaꞌ koa ganceh-ganceh neleꞌ sakulilikng nya, tapi inaꞌ neleꞌ sae pun agiꞌ kacoali Yesus babaro.
9 Waꞌtu ia kaꞌ koa turutn dari bukit koa, Yesus bapasatn kaꞌ ia kaꞌ koa, biar ia kaꞌ koa ame ngesahatn kaꞌ saurakng pun ahe nang dah di nya kaꞌ koa neleꞌ, sanapeꞌ Anak Manunsia mulakng idup dari antara urakng mati. 10 Ia kaꞌ koa naatiꞌ pasatn Yesus koa. Tapi nya talu koa kaja batanyaꞌ kaꞌ sekoꞌ man nang lainnya ahe maksut Yesus, “Mulakng idup dari antara urakng mati.” 11 Lalu ia kaꞌ koa batanyaꞌ kaꞌ Yesus, “Ngahe guru-guru agama bakata kadeꞌ Nabi Elia arus atakng labih doloꞌ?”d 12 Sahut Yesus, “Ingkaꞌ banar Nabi Elia arus atakng labih doloꞌ untuꞌ nyiapatn sigananya. Tapi ahe nang tacontenge kaꞌ dalapm Kitap Suci tentang Anak Manunsia? Bukeꞌ keꞌ di ngataatn kadeꞌ Anak Manunsia arus manyak singsara man urakng-urakng nginaaꞌ Ia? 13 Tapi ahe nang Aku ngataatn kaꞌ kitaꞌ nian sidi miah banar, Ingkaꞌ Elia dah atakng. Tapi basangahe urakng manjawat hal nang inaꞌ baik kaꞌ ia. Sasuai man ahe nang dah dinyontengan tentang ia.”
Yesus ngoser roh jahat nang ngarasukiꞌ saurakng kamudaꞌ nang awaꞌ
9:14-29
(Mat. 17:14-21; Luk. 9:37-43)
14 Takaꞌ Yesus man katalu murit-Nya turutn dari bukit man mulakng kaꞌ murit-murit nang lainnya. Kaꞌ waꞌtu koa ada rami urakng ngarumuniꞌ murit-murit diꞌkoa. Basangahe guru agama tagah badebat man murit-murit Yesus koa. 15 Lalu urakng rami koa neleꞌ Yesus, man ia kaꞌ koa sidi kaheranan. Ia kaꞌ koa batilamaꞌ notok Yesus untuꞌ nyambutaꞌ-Nya. 16 Lalu Yesus batanyaꞌ kaꞌ murit-murit-Nya, “Ahe nang kitaꞌ pasoꞌalatn man ia kaꞌ koa?” 17 Saurakng dari urakng rami koa nyahut, “Paꞌ Guru, anakku nian ku ngincakng kaꞌ Kitaꞌ, tagal ia di roh jahat ngarasukiꞌ nang manjawat ia awaꞌ. 18 Man tiap kali roh jahat koa nyarang ia, roh koa ngampasatnnya kaꞌ tanah; lalu molotnya bapopoꞌ, giginya bagarek man tubuhnya jaji karoꞌ. Aku dah mintaꞌ kaꞌ murit-murit Kitaꞌ, biar ia kaꞌ koa ngoser roh jahat koa, tapi ia kaꞌ koa inaꞌ bisa.” 19 Lalu jakata Yesus kaꞌ ia kaꞌ koa, “O kitaꞌ urakng-urakng nang inaꞌ sidi-sidi pucayaꞌ, sangahe lama agiꞌ Aku arus badiapm kaꞌ antara kitaꞌ? Sangahe lama agiꞌ Aku arus sabar man kitaꞌ? Incakng kamudaꞌ koa kaꞌ dian!”
20 Ia kaꞌ koa pun ngincakng kamudaꞌ koa kaꞌ Yesus, takaꞌ roh jahat koa neleꞌ Yesus, roh jahat koa manjawat tubuh kamudaꞌ koa karojakng-karojakng sampe kamudaꞌ koa tumakng kaꞌ tanah babarikng-barikng, man molotnya bapopoꞌ. 21 Lalu Yesus batanyaꞌ kaꞌ apaꞌ kamudaꞌ koa, “Dah sangahe lama ia lea nian?” Sahutnya, “Bamula ia giꞌ enek. 22 Roh jahat koa pancah nyeretnya kaꞌ dalapm api man kaꞌ dalapm aiꞌ untuꞌ munuhaꞌnya. Tagal koa bantoꞌlah man kasihatniꞌlah kami, kadeꞌ Kitaꞌ mampu nyamuhatn kamudaꞌ nian!” 23 Sahut Yesus, “Ahe kata nyu, kadeꞌ Kitaꞌ mampu? Inaꞌ ada nang mustahil untuꞌ urakng nang pucayaꞌ!” 24 Apaꞌ kamudaꞌ koa bakata, “Aku pucayaꞌ. Bantoꞌlah aku biar labih pucayaꞌ agiꞌ!” 25 Takaꞌ Yesus neleꞌ urakng rami siaꞌ bakarumun, Ia nagur roh jahat koa man nyuruh, “Roh bangal man awaꞌ kaluar kao dari kamudaꞌ nian man ame agiꞌ sakali-kali tamaꞌ kaꞌ kamudaꞌ koa!” 26 Roh jahat koa ngampak, lalu manjawat tubuh kamudaꞌ koa karojakng-karojakng, lalu roh jahat koa kaluar dari kamudaꞌ koa. Kamudaꞌ koa lea dah mati, sampe samua urakng bakata, “Ia dah mati.” 27 Tapi Yesus nyingiꞌiꞌ kokot kamudaꞌ koa man mantoꞌnya lumpat. Kamudaꞌ koa pun lumpat.
28 Yesus man murit-murit-Nya pun tamaꞌ kaꞌ sabuah rumah, takaꞌ inaꞌ ada urakng lain man ia kaꞌ koa. Murit-murit-Nya batanyaꞌ kaꞌ Yesus, “Ngahe kami inaꞌ mampu ngoser roh jahat koa?” 29 Yesus nyahut, “Roh jahat nang lea koa inaꞌ baya di oser man cara ahe pun, kacoali man doꞌa.”
Yesus ngomongan kadua kalinya kadeꞌ Ia di bunuhaꞌ man mulakngaꞌ idup agiꞌ
9:30-32
(Mat. 17:22-23; Luk. 9:43-45)
30 Yesus man murit-murit-Nya barangkat dari koa ngalewatiꞌ Galilea, man Yesus baiꞌ di urakng-urakng tauꞌatn kadeꞌ Ia ada dikoa; 31 Tagal Ia tagah ngajar murit-murit-Nya. Ia bakata kaꞌ murit-murit-Nya, “Anak Manunsia disarahatnnaꞌ kaꞌ kuasa talino, man urakng-urakng kaꞌ koa munuhaꞌ Ia, man talu ari lakaꞌ Ia di bunuh Ia mulakngaꞌ idup dari kamatiatn.” 32 Murit-murit Yesus inaꞌ ngarati pakataatn Yesus koa, tapi ia kaꞌ koa inaꞌ barani batanyaꞌ kaꞌ Yesus.
Murit-murit batangkar tentang sae nang paling panting kaꞌ antara murit
9:33-37
(Mat. 18:1-5; Luk. 9:46-48)
33 Yesus man murit-murit-Nya sampe kaꞌ Kapernaum. Takaꞌ ia kaꞌ koa tamaꞌ kaꞌ dalapm rumah, Yesus batanyaꞌ kaꞌ murit-murit-Nya tentang ahe nang di nya kaꞌ koa ngomongan waꞌtu ia kaꞌ koa kaꞌ dalapm pajalanan. 34 Tapi ia kaꞌ koa inaꞌ nyahut, tagal kaꞌ dalapm pajalanan tadi ia kaꞌ koa batangkar tentang sae nang paling tingi kaꞌ antara nya kaꞌ koa.f 35 Lalu Yesus duduk man nyaruꞌ kaduabalas murit-Nya. Yesus bakata kaꞌ ia kaꞌ koa, “Sae nang maoꞌ jaji nang paling tingi, ia arus naap tampat nang paling babah man arus jaji palayan untuꞌ samua.”g 36 Lalu Yesus nyingiꞌiꞌ kokot saurakng kamudaꞌ enek man nyuruh kamudaꞌ koa badiri kaꞌ adapatn nya kaꞌ koa samua. Yesus ngapakng kamudaꞌ koa man bakata kaꞌ murit-murit-Nya, 37 “Sae jaꞌ nang narimaꞌ saurakng kamudaꞌ lea nian tagal Aku, barati narimaꞌ Aku. Man urakng nang narimaꞌ Aku, ia bukeꞌ jaꞌ narimaꞌ Aku, tapi narimaꞌ ugaꞌ Ia nang ngiripm Aku.”h
Saurakng nang bukeꞌ murit Yesus ngoser setan
9:38-41
38 Lalu Yohanes bakata kaꞌ Yesus, “Paꞌ Guru, kami neleꞌ saurakng ngoser setan man nyabut dama Kitaꞌ. Kami nyuruh ia baranti manjawat lekoa, tagal ia bukeꞌ dari golongan diriꞌ.” 39 Tapi Yesus bakata, “Ame baiꞌatn ia, tagal inaꞌ saurakng pun nang manjawat hal-hal ajaip make dama-Ku, baya langsung majahat Aku. 40 Tagal sae nang inaꞌ ngalawan diriꞌ, barati ia bapihak kaꞌ diriꞌ. 41 Aku bakata kaꞌ kitaꞌ, Sabatolnya sae pun nang mareꞌ kitaꞌ sacawan aiꞌ cocok tagal kitaꞌ pangikut Raja Panyalamat, ia inaꞌ kailangan upahnya.”
Hal-hal nang jaji panyabab urakng babuat dosa
9:42-50
(Mat. 18:6-9; Luk. 17:1-2)
42 “Barang sae nyasatatn salah sekoꞌ dari kamudaꞌ-kamudaꞌ enek nang pucayaꞌ nian, labih baik kadeꞌ batu pangilingani diikatatn kaꞌ tageꞌnya, man ia di buakng kaꞌ dalapm laut. 43 Kadeꞌ kokot nyu panyabab kao babuat dosa, tataklah kokot nyu koa! Labih baik kao idup salamanya man Allah man soteꞌ kokot jaꞌ dari pada kao tatap man dua kokot, tapi tamaꞌ kaꞌ naraka, kaꞌ dalapm api nang nyala maꞌan salamanya.j 44 [Diꞌkoa ulat nang makatn tubuh urakng inaꞌ matiaꞌ man apinya inaꞌ padapmmaꞌ.] 45 Man kadeꞌ sabarakng paha nyu panyabab kao babuat dosa, tataklah paha nyu koa! Labih baik kao idup salamanya man Allah man sabarakng paha jaꞌ, daripada kao tatap man dua barakng paha, tapi tamaꞌ kaꞌ naraka. 46 [Diꞌkoa ulat nang makatn tubuh urakng inaꞌ matiaꞌ man apinya inaꞌ padapmmaꞌ.] 47 Man kadeꞌ mata nyu panyabab kao babuat dosa congkellah mata nyu koa! Labih baik kao tamaꞌ kaꞌ dalapm karajaan Allah man sabegeꞌ mata, daripada kao tatap man dua begeꞌ mata, tapi di buakng kaꞌ dalapm naraka.k 48 [Diꞌkoa ulat nang makatn tubuh urakng inaꞌ matiaꞌ man apinya inaꞌ padapmmaꞌ.]
49 Sabatolnya samua talino diujiaꞌ man kasusahatn nang rasanya lea angngatnya api.
50 Gareꞌ koa baik, tapi kadeꞌ gareꞌ koa dah panat, kitaꞌ inaꞌ baya nyajiatnnya padaꞌ agiꞌ.
Jadi, aruslah kitaꞌ jaji lea gareꞌ, iduplah basama-sama man akor.”l