Hal nang manjawat urakng babuat dosa
(Mat. 18:6-7, 21-22; Mrk. 9:42)
17
Jakata Yesus kanaꞌ murit-murit-Nya,
“Hal nang manjawat urakng babuat dosa pasti adaaꞌ,
tapi cilakalah urakng nang manjawat urakng lain babuat dosa.
2 Labih baik batu nang ayaꞌ diikatatn kaꞌ tageꞌnya lalu tabakatn kaꞌ tangah laut,
daripada ia nyasatatn salah saurakng nang lamah nian.
3 Tagal koa,
ati-ati boh kitaꞌ!
Kadeꞌ sodaranyu manjawat ahe nang inaꞌ banar,
taguratn ia boh.
Kadeꞌ ia nyasal,
amponiꞌlah ia koa.
4 Kadeꞌ ia babuat nang inaꞌ banar kaꞌ kao tujuh kali dalapm saari man tiap kali ia atakng kaꞌ kao man bakata,
‘Aku mintaꞌ ampon,’
amponiꞌlah ia.”
Hal kapucayaꞌatn
5 Naꞌ rasul koa bakata kaꞌ Tuhan Yesus,
“Paꞌ Guru,
kuatatnlah kapucayaꞌatn kami kaꞌ Tuhan Allah.”
6 Kata Tuhan Yesus,
“Kadeꞌ kitaꞌ ngampuꞌ iman saayaꞌ begeꞌ sawi ihan,
kitaꞌ dapat bakata kaꞌ puhutn kayu nang ayaꞌ nian,
‘Tababutlah kao man tumuhlah kaꞌ laut,’
pasti puhutn nian nurutaꞌ kaꞌ parentahnyu.”
Jajilah palayan nang baik
7 Lakaꞌ koa Yesus ngalanjutatn pangajaran-Nya,
“Saandainya saurakng dari kitaꞌ ngampuꞌ palayan nang bakaraja kaꞌ umanyu ato nang nyagaiꞌ dombanyu.
Kadeꞌ palayan koa pulakng kaꞌ rumah kitaꞌ tuannya,
inaꞌ mungkin kitaꞌ bakataaꞌ kaꞌ palayan koa,
‘Keatn capat makatn.’
8 Tapi sabaliknya kitaꞌ bakataaꞌ kaꞌ palayannyu koa,
‘Siapatn pamakananku.
Pakelah pakean nang baraseh man tunguiꞌlah aku tagah giꞌ makatn man nyocok;
lakaꞌ koa kao mulih makatn.’
9 Palayan koa inaꞌ palalu dipuji barang dah matuhiꞌ parentah tuannya,
kan?
10 Lekoa ugaꞌ kitaꞌ.
Kadeꞌ kitaꞌ udah manjawat nang di Tuhan Allah parentahatn kaꞌ kitaꞌ,
kataatnlah,
‘Kami hanya palayan ihan;
kami hanya manjawat ahe nang wajip kami panjawat.’”
Yesus nyamuhatn sapuluh urakng
11 Dalapm pajalanan kaꞌ Yerusalem,
Yesus ngalaluiꞌ daerah batas Samaria man Galilea.
12 Waꞌtu tamaꞌ kaꞌ sabuah kampokng,
Yesus di sapuluh urakng nang bapanyakit kulit nang miah ngatakngiꞌ.
Ia kaꞌ koa badiri dari jauh
13 lalu ngampak,
“Yesus!
Paꞌ Guru!
Kasihatniꞌlah kami supaya kami samuh!”
14 Waꞌtu Yesus neleꞌ ia kaꞌ koa,
Yesus bakata,
“Ampuslah kaꞌ imam-imam mintaꞌ kaꞌ ia kaꞌ koa mareksa tubuhnyu.”
Samintara ia kaꞌ koa bajalatn panyakitnya jaji samuh.
15 Takaꞌ saurakng dari ia kaꞌ koa sadar kadeꞌ ia dah samuh,
ia mulakng kaꞌ Yesus baati nang miah repo,
man basuara nyarikng muji Tuhan Allah.
16 Lalu ia sujud man batarimaꞌkasih kaꞌ depan Yesus.
Urakng koa urakng Samaria.
17 Lakaꞌ koa Yesus bakata,
“Inaꞌ geꞌ ada sapuluh urakng nang dinyamuhatn?
Kaꞌ mae nang sambilan urakng agiꞌ?
18 Ngahe hanya urakng nian nang bukeꞌ urakng Yahudi nang mulakng ngucapatn tarimaꞌ kasih kaꞌ Tuhan Allah?”
19 Lalu jakata Yesus kaꞌ urakng koa,
“Lumpatlah man pulaknglah.
Tagal kao pucayaꞌ kaꞌ Aku,
kao samuh.”
Waꞌtu Tuhan Allah atakng untuꞌ marentah
(Mat. 24:23-28, 37-41)
20 Basangahe urakng Parisi batanyaꞌ kaꞌ Yesus,
“Kamile Tuhan Allah atakngaꞌ untuꞌ marentah jaji Raja?”
Jakata Yesus nyahutiꞌnya,
“Waꞌtu Tuhan Allah atakng untuꞌ marentah jaji Raja inaꞌ dimulaiꞌ man tanda-tanda nang dapat diteleꞌ urakng.
21 Waꞌtu koa,
urakng-urakng inaꞌ baya bakataaꞌ,
‘Coba teleꞌ,
pamarentahan Tuhan Allah ada kaꞌ dian!’
ato geꞌ,
‘Pamarentahan Tuhan Allah ada kaꞌ naun!’
Tagal Tuhan Allah dah mulaiꞌ marentah jaji Raja kaꞌ tangah-tangah kitaꞌ kaꞌ dunia nian.”
22 Lakaꞌ koa Yesus bakata kaꞌ pangikut-pangikut-Nya,
“Atakngaꞌ waꞌtunya kitaꞌ maoꞌ marasa biargeꞌ hanya saari ihan,
dari waꞌtu kaatangan Anak Manunsia,
tapi kitaꞌ inaꞌ marasaaꞌnya.
23 Ana urakng bakataaꞌ kaꞌ kao,
‘Teleꞌ!
Anak Manunsia ada kaꞌ koa!’
ato geꞌ,
‘Anak Manunsia ada kaꞌ dian!’
Tapi amelah kitaꞌ ampus kaluas ngagoꞌiꞌ ia.
24 Kaꞌ ari Ia atakng ana,
Anak Manunsia kateleꞌatnnaꞌ jalas,
sama lea elak nang takaꞌ nya mancar man narakngiꞌ langit dari ujukng nang soteꞌ kaꞌ ujukng nang lain.
25 Tapi mula-mula Ia arus manyak mandarita man inaꞌ di urakng-urakng kaꞌ jaman nian tarimaꞌ.
26 Takaꞌ naꞌe Anak Manunsia atakngaꞌ,
kaadaannya samaaꞌ lea kaꞌ jaman Nuh sanapeꞌ ia tamaꞌ kaꞌ dalapm kapalnya.
27 Urakng makatn nyocok,
man bapangantenan;
lea biasanya sampe kaꞌ arinya Nuh tamaꞌ kaꞌ dalapm kapalnya.
Baruꞌ jajilah banjir nang ayaꞌ koa man sigana urakng kaꞌ koa bamatiatn.
28 Lea jaman Lot ugaꞌ.
Urakng makatn nyocok,
bajual man babali,
bakabon,
batanam,
man mangun rumah.
29 Tapi takaꞌ Lot kaluas dari Sodom,
kaꞌ ari koa api man balerang turutn dari langit man munuh sigana urakng-urakng kaꞌ kota Sodom koa.
30 Lekoa ugaꞌlah kaadaannya ana kaꞌ ari Anak Manunsia dinyataatn.
31 Kaꞌ ari koa urakng nang giꞌ tagah kaꞌ atas loteng rumahnya,
man pakakas-pakakasnya masih kaꞌ dalapm rumahnya,
amelah ia turutn naapnya.
Lekoa ugaꞌ urakng nang giꞌ tagah kaꞌ uma amelah pulakng kaꞌ rumahnya.
32 Ingat boh ahe nang dah jaji kaꞌ bini Lot!a
33 Jukut sae maan nang maoꞌ nyalamatatnnaꞌ idupnya kaꞌ dunia nian,
ia kailanganaꞌ idup nang salamanya.
Tapi sae maan nang kailangan idupnya tagal ia setia kaꞌ Aku,
namuaꞌ idup nang salamanya.
34 Pucayaꞌlah:
kaꞌ malam koa,
dua urakng tagah tidur kaꞌ soteꞌ tampat tidur,
saurakng diincakngaꞌ man saurakng agiꞌ ditingalatnnaꞌ.
35 Dua urakng nangbini tagah nutuk gandum,
saurakng diincakngaꞌ man saurakng agiꞌ ditingalatnnaꞌ.
36 Dua urakng tagah bakaraja kaꞌ uma,
saurakng diincakngaꞌ,
man saurakng agiꞌ ditingalatnnaꞌ.”
37 Naꞌ pangikut Yesus batanyaꞌ,
“Kaꞌ mae koa jajiaꞌ,
Tuhan?”
Yesus nyahut,
“Kaꞌ waꞌtu koa hal-hal koa jalasaꞌ untuꞌ kitaꞌ sama lea parumpamaan nian:
‘Diꞌmae ada burukng-burukng pamakatn bangke,
pasti ada bangke kaꞌ diꞌkoa.’”