Parumpamaan janda man hakim
18
Lakaꞌ koa Yesus ngesahatn soteꞌ parumpamaan untuꞌ ngajariꞌ murit-murit-Nya,
supaya ia kaꞌ koa kaja badoa man ame putus asa.
2 Jakata Yesus,
“Kaꞌ sabuah kota ada saurakng hakim nang inaꞌ galiꞌ kaꞌ Tuhan Allah,
man nanaꞌ paduli ugaꞌ kaꞌ sae maanpun.
3 Kaꞌ kota koa ada pulaꞌ saurakng janda nang baulang kali ngadap kaꞌ hakim koa,
ia mintaꞌ pakaranya dibela.
‘Bantoꞌlah aku ngadapiꞌ lawan ku,’
jakata janda koa.
4 Sangahe waꞌtu lamanya,
hakim koa baiꞌ mantoꞌ janda koa.
Tapi ahirnya hakim koa bapikir,
‘Biarpun aku inaꞌ galiꞌ kaꞌ Tuhan Allah man inaꞌ paduli kaꞌ sae maan,
5 tapi tagal janda nian ngangguꞌ aku maan,
labih baik aku mela pakaranya.
Kadeꞌ inaꞌ,
ia pasti tarus-tarusan atakngaꞌ man nyusahatnnaꞌ aku.’”
6 Lalu jakata Tuhan Yesus,
“Paratiatnlah,
ahe nang di hakim nang inaꞌ adil koa ngataatn!
7 Ahe agiꞌ Tuhan Allah pasti melaaꞌ pakara urakng nang pucayaꞌ kaꞌ Ia,
nang mintaꞌ bantoꞌ kaꞌ Ia siakng man malam.
Ia inaꞌ ngulur-ngulur waꞌtu untuꞌ mantoꞌaꞌ ia kaꞌ koa.
8 Pucayaꞌlah:
Tuhan Allah pasti gaceh melaaꞌ pakaranya kaꞌ koa!
Tapi kadeꞌ Anak Manunsia atakng,
ahe geꞌ Ia namuaꞌ urakng kaꞌ aiꞌ tanah nian nang pucayaꞌ kaꞌ Ia?”
Parumpamaan tentang urakng Parisi man panagih pajak
9 Yesus ngesahatn ugaꞌ parumpamaan nian,
nang di Nya nujuatn kaꞌ urakng nang nganggap diriꞌnya inaꞌ badosa man kaja ngina urakng lain.
10 Jakata Yesus,
“Ada dua urakng nang ampus kaꞌ Rumah Kudus Tuhan Allah untuꞌ badoaaꞌ.
Nang sekoꞌ urakng Parisi,
nang sekoꞌnya agiꞌ panagih pajak.
11 Urakng Parisi koa badiri nyababaro man badoa,
jakatanya,
‘Ya Tuhan Allah,
aku ngucapatn tarimaꞌ kasih kaꞌ Kitaꞌ,
tagal aku inaꞌ lea urakng lain,
nang sarakah,
ngakalatn,
man babayaꞌ.
Aku basukur tagal aku inaꞌ lea panagih pajak naun.
12 Aku puasa dua kali saminggu,
man aku mareꞌ kaꞌ Kitaꞌ persembahan pasapuluhatn dari sigana asil nang ku tamu.’
13 Tapi panagih pajak koa badiri jauh-jauh man sampe ia inaꞌ barani ningkadah kaꞌ langit.
Sambil ngapuyu dadanya nojokatn rasa nyasal,
ia bakata,
‘O Tuhan Allah,
kasihatniꞌlah aku urakng nang badosa nian!’”
14 “Pucayaꞌlah!”
Jakata Yesus,
“Kadeꞌ waꞌtu pulakng kaꞌ Rumah Kudus,
panagih pajak koalah nang di Tuhan Allah tarimaꞌ,
bukeꞌ urakng Parisi naun.
Jukut saepun nang ningian diriꞌnya,
Tuhan Allah ngarendahatnnaꞌ urakng koa.
Man saepun ngarendahatn diriꞌnya,
Tuhan Allah ningianaꞌ urakng koa.”
Yesus marakatiꞌ kamudaꞌ-kamudaꞌ enek
(Mat. 19:13-15; Mrk. 10:13-16)
15 Ada urakng-urakng nang ngincakng kamudaꞌ enek kaꞌ Yesus,
biar Yesus nyameh kapala kamudaꞌ kaꞌ koa man marakatiꞌnya.
Takaꞌ murit-murit Yesus neleꞌ hal koa,
ia kaꞌ koapun meraatn urakng-urakng nang ngincakng kamudaꞌnya koa kaꞌ Yesus.
16 Tapi Yesus nyaruꞌ kamudaꞌ-kamudaꞌ kaꞌ koa lalu bakata kaꞌ murit-murit-Nya,
“Biaratnlah kamudaꞌ-kamudaꞌ nian atakng kaꞌ Aku!
Ame dibaiꞌatn ia kaꞌ koa,
jukut urakng-urakng nang lea nianlah nang jaji anggota umat nang di Tuhan Allah marentah.
17 Dangar boh kata-kata-Ku nian!
Kitaꞌ arus narimaꞌ pamarentahan Tuhan Allah lea tabiat saurakng kamudaꞌ enek nian.
Kadeꞌ inaꞌ,
kitaꞌ inaꞌ jajiaꞌ anggota umat Tuhan Allah.”
Tentang urakng kaya
(Mat. 19:16-30; Mrk. 10:17-31)
18 Saurakng pamimpin Yahudi batanyaꞌ kaꞌ Yesus,
“Paꞌ Guru nang baik,
ahe geꞌ nang arus ku panjawat untuꞌ namu idup nang salamanya?”
19 Tapi Yesus mulakng batanyaꞌ kaꞌ ia,
“Ngahe kitaꞌ bakata kadeꞌ Aku baik?
Inaꞌ ada nang baik,
kahe Tuhan Allah ihan.
20 Kitaꞌ dah nauꞌan kaꞌ parentah-parentah Tuhan Allah:
‘Ame babayaꞌ,
ame munuh,
ame ngalit,
ame pangalok,
man hormatlah kaꞌ apaꞌ man uweꞌnyu.’”
21 “Sigana parentah koa dah ku nurutiꞌ dari giꞌ mudaꞌ,”
ja sahut urakng koa.
22 Nangar hal koa Yesus bakata,
“Masih ada soteꞌ hal nang arus kitaꞌ panjawat:
juallah sigana harata nang nyu ngampuꞌ,
bareꞌlah duitnya kaꞌ urakng kodo,
man kitaꞌ namuaꞌ harata kaꞌ saruga.
Lakaꞌ koa ataknglah tunaꞌan Aku.”
23 Tapi takaꞌ urakng koa nangar kata Yesus koa,
ia susah ati jukut ia sidi kaya.
24 Yesus nauꞌan kadeꞌ urakng koa susah ati,
tagal koa Ia bakata,
“Susah sidi untuꞌ urakng kaya jaji anggota umat nang di Tuhan Allah marentah!
25 Sidi mudah sekoꞌ onta tamaꞌ kaꞌ lubakng jarupm,
daripada urakng kaya jajiaꞌ anggota umat nang di Tuhan Allah marentah.”
26 Urakng-urakng nang nangar Yesus bakata lekoa tadi batanyaꞌ,
“Kadeꞌ lekoa,
sae nang bisa salamat?”
27 Yesus nyahut,
“Nang inaꞌ mungkin kaꞌ talino,
mungkin kaꞌ Tuhan Allah!”
28 Lalu Petrus bakata,
“Kami dah ningalatn sigana nang kami ngampuꞌ untuꞌ nunaꞌan Kitaꞌ.”
29 “Pucayaꞌboh!”
jakata Yesus.
“Urakng nang dah ningalatn rumahnya,
bininya,
sodaranya,
apaꞌ man uweꞌnya,
man anak-anaknya,
tagal jaji anggota umat Tuhan Allah,
30 urakng koa dibalasaꞌ balipat-lipat kaꞌ waꞌtu nian,
man kaꞌ jaman nang atakngaꞌ ana,
ia narimaꞌaꞌ idup nang salamanya.”
Yesus ngomong untuꞌ katalu kalinya tentang kamatiatn-Nya
(Mat. 20:17-19; Mrk. 10:32-34)
31 Yesus ngumpulatn kadua balas murit-Nya ihan,
lalu bakata,
“Dangar boh!
Diriꞌ ampeatn ampusaꞌ kaꞌ Yerusalem.
Diꞌnaun sigana nang di nabi-nabi nyonteng tentang Anak Manunsia jajiaꞌ.
32 Ia disarahatnnaꞌ kaꞌ urakng-urakng nang bukeꞌ urakng Yahudi,
nang ngoloꞌaꞌ,
nginaaꞌ,
man ngalujahiaꞌ Ia.
33 Ia kaꞌ koa nyiksaaꞌ man munuhaꞌ Ia,
tapi kaꞌ ari katalunya Ia mulakngaꞌ idup agiꞌ.”
34 Sigananya koa inaꞌ dingarati sabebetpun di murit-murit Yesus.
Arti dari kata-kata-Nya koa dinosokatn dari murit-murit-Nya.
Ia kaꞌ koa inaꞌ nauꞌan kaꞌ ahe nang di Yesus ngomongan.
Yesus nyamuhatn sekoꞌ urakng nang butaꞌ
(Mat. 20:29-34; Mrk. 10:46-52)
35 Waꞌtu Yesus amper sampe kaꞌ kota Yeriko,
sekoꞌ urakng nang butaꞌ giꞌ tagah duduk mintaꞌ-mintaꞌ kaꞌ sisi maraga.
36 Takaꞌ ia nangar urakng rami ngalintas kaꞌ maraga,
ia batanyaꞌ,
“Ada ahe?”
37 Jakata urakng kaꞌ koa,
“Yesus,
urakng Nasaret koa ngalintas.”
38 Lalu urakng nang butaꞌ koa nyaruꞌ Yesus,
“Yesus,
katurunan Raja Daut!
Kasihatniꞌlah aku!”
39 Urakng-urakng nang bajalatn kaꞌ depan koa,
meraatn urakng butaꞌ koa man nyuruhnya diapm.
Tapi ia nyaruꞌ Yesus siaꞌ nyarikng agiꞌ,
“Yesus katurunan Daut!
Kasihatniꞌlah aku!”
40 Yesus baranti bajalatn lalu nyuruh urakng butaꞌ koa diincakng kaꞌ Ia.
Takaꞌ urakng butaꞌ koa dah samak Yesus,
Yesus batanyaꞌ,
41 “Ahe nang kao maoꞌ nang Aku panjawataꞌ untuꞌnyu?”
“Tuan,”
sahut urakng butaꞌ koa,
“Aku maoꞌ bisa neleꞌ.”
42 Lalu jakata Yesus,
“Kadeꞌ lekoa,
neleꞌlah!
Tagal kao pucayaꞌ kaꞌ Aku,
kao samuh.”
43 Waꞌtu koa ugaꞌ urakng butaꞌ koa bisa neleꞌ,
lalu ia nunaꞌan Yesus sambil ngucapatn tarimaꞌ kasih kaꞌ Tuhan Allah.
Takaꞌ urakng manyak koa neleꞌ ahe nang dah jaji koa,
sigana urakng kaꞌ koa muji-muji Tuhan Allah.