Yesus man Sakeus
19
Waꞌtu Yesus tamaꞌ kaꞌ kota Yerikho,
Ia bajalatn ngalintasiꞌ kota koa.
2 Kaꞌ kota koa ugaꞌ ada saurakng kapalaꞌ panagih pajak nang kaya,
badama Sakeus.
3 Ia barusaha neleꞌaꞌ Yesus,
tapi tagal di urakng nang sidi miah rami,
man tubuhnya ugaꞌ babah,
ia naꞌ bisa neleꞌ Yesus.
4 Jaji,
ia batilamaꞌ nyintoloꞌiꞌ urakng rami koa,
lalu ia naik kaꞌ puhutn kayu,
biar ia bisa neleꞌ Yesus nang sabantar agiꞌ ngalintasiaꞌ abut koa.
5 Takaꞌ sampe kaꞌ samak puhutn kayu koa,
Yesus ningkadah man bakata,
“Sakeus,
capatiꞌ turutn!
Ari nian Aku arus bamalam kaꞌ rumahnyu.”
6 Lalu capat-capatlah Sakeus turutn dari puhutn kayu koa,
ia narimaꞌ Yesus kaꞌ rumahnya sidi karepoatn.
7 Waꞌtu neleꞌ hal koa,
urakng rami nang ada kaꞌ diꞌkoa bagarungut,
“Ih!
Ia bamalam kaꞌ rumah urakng nang inaꞌ taat kaꞌ ukum Tuhan Allah.”
8 Tapi takaꞌ kaꞌ rumahnya koa,
Sakeus badiri lalu bakata kaꞌ Yesus,
“Tuhan,
saparo harata kakayaatnku nian,
ku sumbangannaꞌ kaꞌ urakng kodo.
Man ugaꞌ urakng nang suah ku nipu,
ku pulanganaꞌ agiꞌ kaꞌ ia kaꞌ koa ampat kali lipat.”
9 Jakata Yesus,
“Ari nian ugaꞌ kao man sigana kaluarganyu dah di Tuhan Allah nyalamatatn.
Tagal kao koa ugaꞌ katurunan Abraham.
10 Jukut Anak Manunsia atakng untuꞌ ngagoꞌ man nyalamatatnnaꞌ urakng nang sasat maraga idupnya.”
Parumpamaan tentang palayan-palayan nang baik man nang jahat
(Mat. 25:14-30)
11 Waꞌtu koa Yesus dah samak Yerusalem,
man urakng rami nyangka kadeꞌ inaꞌ lama agiꞌ Tuhan Allah marentahaꞌ jaji Raja kaꞌ aiꞌ tanah.
Koa tagalnya,
Yesus ngesahatn parumpamaan lea nian takaꞌ urakng rami giꞌ tagah nangaratn-Nya ngomong.
12 Jakata-Nya,
“Ada sekoꞌ urakng katurunan raja nang ampus kaꞌ nagari jauh untuꞌ dilantik jaji raja,
lakaꞌ koa ia mulakngaꞌ agiꞌ.
13 Sanapeꞌ ampus,
ia nyaruꞌ sapuluh urakng palayannya,
lalu mareꞌ kaꞌ ia kaꞌ koa masing-masing sakapikng duit amas.
Katanya kaꞌ ia kaꞌ koa,
‘Pakelah duit nian untuꞌ modal badagakng sampe aku mulakng agiꞌ kaꞌ dian.’
14 Tapi urakng-urakng kaꞌ nagari katurunan raja koa teget kaꞌ ia.
Jaji,
lakaꞌ ia barangkat,
urakng kaꞌ koa ngutus urakng lain untuꞌ nyampeatn pasatn,
‘Kami baiꞌ kadeꞌ urakng nian jaji raja kami.’
15 Tapi katurunan raja koa dingalantik jaji raja,
lakaꞌ koa ia mulakng kaꞌ nagarinya.
Lalu ia nyaruꞌ palayan-palayannya nang dah nya mareꞌ duit koa ngadap ia,
untuꞌ mareꞌ nauꞌan sangahe kauntungan nang dah di nya kaꞌ koa narimaꞌ.
16 Palayan nang sekoꞌ atakng man bakata,
‘Tuan,
soteꞌ duit amas nang tuan mareꞌ koa,
dah ku nyajiatn sapuluh.’
17 ‘Gagas,’
jakata tuannya koa,
‘Kao palayan nang baik!
Tagal kaꞌ dalapm hal nang enek kao bisa dipucayaꞌ,
aku nyajiatnnaꞌ kao panguasa kaꞌ atas sapuluh kota.’
18 Palayan nang kadua atakng man bakata,
‘Tuan,
soteꞌ duit amas nang Tuan mareꞌ koa,
dah ku nyajiatn lima.’
19 Kaꞌ palayan koa raja koa bakata,
‘Kao jajiaꞌ panguasa kaꞌ atas lima kota.’
20 Palayan nang lain atakng man bakata,
‘Tuan,
nian duit Tuan;
ku norohiꞌ kaꞌ salamar saput nang enek.
21 Aku galiꞌ kaꞌ Tuan,
tagal Tuan urakng nang batabiat karas.
Tuan naap ahe nang bukeꞌ di Tuan ngampuꞌ,
man Tuan mungut asil kaꞌ tampat nang inaꞌ di Tuan tanamiꞌ.’
22 Raja koa bakata kaꞌ ia,
‘Kao palayan nang jahat!
Sasuai man kata-katanyu babaro aku ngukumaꞌ kao.
Kao nauꞌan aku urakng nang batabiat karas:
aku naap ahe nang bukeꞌ di ku ngampuꞌ man mungut asil kaꞌ tampat nang nanaꞌ di ku tanamiꞌ.
23 Tapi ngahe kao inaꞌ namaꞌan duit koa kaꞌ bank diꞌmae duit koa babungaaꞌ,
biar kadeꞌ aku mulakng,
aku bisa narimaꞌ duit koa man bunganya?’
24 Lakaꞌ koa raja koa bakata kaꞌ urakng-urakng nang badiri kaꞌ diꞌkoa,
‘Taap duit kaꞌ palayan nang jahat koa,
lalu bareꞌatnlah kaꞌ palayan nang ngampuꞌ sapuluh duit amas koa.’
25 Tapi urakng-urakng koa bakata,
‘Tuan,
ia dah ngampuꞌ sapuluh duit amas koa.’
26 Raja koa nyahut,
‘Dangar boh:
urakng nang dah ngampuꞌ labih,
kaꞌ ia dibareꞌaꞌ labih manyak agiꞌ.
Tapi urakng nang inaꞌ ngampuꞌ ahe-ahe,
nang ada kaꞌ ia ditaapaꞌ ugaꞌ dari ia.
27 Man ampeatn incaknglah kaꞌ keatn munsuh-munsuhku koa nang baiꞌ kadeꞌ aku jaji rajanya.
Bunuhlah ia kaꞌ koa kaꞌ adapatnku.’”
Yesus ampusaꞌ kaꞌ Yerusalem
(Mat. 21:1-11; Mrk. 11:1-11; Yoh. 12:12-19)
28 Dah lakaꞌ Yesus ngataatn sigana parumpamaan koa,
Yesus bajalatn kaꞌ depan narusatn pajalanan-Nya kaꞌ Yerusalem,
man urakng rami nunaꞌan-Nya.
29 Takaꞌ ia kaꞌ koa sampe kaꞌ samak kampokng Betpage man Betania kaꞌ bukit Jaitun,
Yesus nyuruh dua urakng dari murit-Nya ampus bajalatn doloꞌ.
30 Jakata Yesus kaꞌ nyadua koa,
“Ampuslah kaꞌ kampokng nang kaꞌ depan naun.
Takaꞌ kitaꞌ tamaꞌ,
kitaꞌ neleꞌaꞌ sekoꞌ keledai mudaꞌa nang dingikat.
Keledai koa giꞌ naꞌ suah di urakng pake.
Lapasatn keledai koa man incakng kaꞌ keatn.
31 Kadeꞌ ampuꞌnya batanyaꞌ kaꞌ kitaꞌ ngahe kitaꞌ ngalapasatn keledai koa,
padah jaꞌ kaꞌ ia,
Tuhan palalu makeaꞌ keledai koa.”
32 Jaji kadua murit Yesus koa tadi ampus,
ia kaꞌ koa neleꞌ pas lea ahe nang di Yesus ngataatn koa.
33 Takaꞌ ia kaꞌ koa ngalapasatn keledai mudaꞌ koa,
ampuꞌnya batanyaꞌ kaꞌ kadua murit Yesus,
“Ngahe kitaꞌ ngalapasatn keledaiku?”
34 Ia badua koa nyahut,
“Tuhan palalu makeaꞌnya.”
35 Jaji ia kaꞌ koa ngincakng keledai koa kaꞌ Yesus,
nyadua koa mukaꞌ baju panyakngnya ngalasiꞌ balikakng keledai koa.
Lalu mantoꞌ Yesus naik kaꞌ atas keledai koa.
36 Waꞌtu Yesus ngalintasiꞌ urakng rami sambil naikiꞌ keledai,
urakng rami kaꞌ koa mukaꞌ baju panyakngnya lalu ngamparnya kaꞌ maraga untuꞌ nyambutaꞌ Yesus.
37 Takaꞌ Yesus amper sampe kaꞌ Yerusalem,
giꞌ tagah nurutn dari bukit Jaitun,
sigana pangikut-pangikut-Nya koa mulaiꞌ bangampakatn muji Tuhan Allah man ngucapatn tarimakasih kaꞌ Ia,
tagal hal-hal nang ajaip nang dah di nya kaꞌ koa neleꞌ.
38 Ja kampaknya kaꞌ koa,
“Dipujilah Tuhan Allah man dibarakatiꞌlah Raja nang atakng atas dama Tuhan.
Mulaiꞌ ampeatn diriꞌ badameaꞌ man Tuhan Allah!”b
39 Waꞌtu koa sangahe urakng Parisi nang ada kaꞌ antara urakng rami koa bakata,
“Paꞌ Guru,
suruhlah pangikut-pangikut Kitaꞌ baranti bakata lekoa.”
40 Jakata Yesus nyahutiꞌnya kaꞌ koa,
“Pucayaꞌlah!
Kadeꞌ ia kaꞌ koa baranti bakata lekoa,
batu-batu nian pun nang bangampakatnnaꞌ muji Tuhan Allah.”
Yesus ngeak tagal nauꞌan Yerusalem ancuraꞌ
41 Takaꞌ Yesus dah samak kaꞌ Yerusalem,
man neleꞌ kota koa,
Ia ngeakiꞌnya.
42 Jakata-Nya,
“Kasihatn kitaꞌ urakng Yerusalem!
Gagas sidi ba kadeꞌnya ari nian kitaꞌ nauꞌanaꞌ lea mae kitaꞌ badameaꞌ man Tuhan Allah!
Tapi ampeatn kitaꞌ inaꞌ baya neleꞌnya.
43 Atakngaꞌ waꞌtunya diꞌmae munsuh-munsuhnyu manjawataꞌ pagar kaꞌ sakulilikng kota Yerusalem untuꞌ nya ngipongaꞌ kota koa.
Ia kaꞌ koa naꞌ baranti nyarangaꞌ kitaꞌ kaꞌ sigana arah.
44 Ia kaꞌ koa munuhaꞌ sigana panduduk kota kitaꞌ nian man ngancuratnnaꞌ sigana temboknyu sampe rata man tanah.
Inaꞌ soteꞌ batu pun nang dibiaratnnaꞌ tasusutn kaꞌ tampatnya.
Sigana koa jajiaꞌ tagal kitaꞌ inaꞌ maratiatn kadeꞌ Tuhan Allah atakng untuꞌ nyalamatatnnaꞌ kitaꞌ!”
Yesus tamaꞌ kaꞌ Rumah Kudus Tuhan Allah
(Mat. 21:12-17; Mrk. 11:15-19; Yoh. 2:13-22)
45 Lalu Yesus tamaꞌ kaꞌ Rumah Kudus Tuhan Allah man mulaiꞌ ngoser panjual-panjual nang ada kaꞌ diꞌkoa.
46 Jakata-Nya kaꞌ ia kaꞌ koa,
“Ada taconteng kaꞌ dalapm Alkitap:
‘Rumah-Ku nian Rumah doa.
Tapi kitaꞌ nyajiatnnya sarakng pangalit.’”c