Gawe panganten kaꞌ kota Kana
2:1-11
2
Dua ari lakaꞌ koa, ada gawe panganten kaꞌ kota Kana kaꞌ propinsi Galilea, man uweꞌ Yesus ada ugaꞌ kaꞌ diꞌkoa. 2 Yesus man murit-murit-Nya ugaꞌ dingundang kaꞌ gawe panganten koa. 3 Takaꞌ ia kaꞌ koa kaabisatn aiꞌ anggur, uweꞌ-Nya bakata kaꞌ Yesus: “Ia kaꞌ koa kaabisatn aiꞌ anggur.” 4 Kata Yesus kaꞌ ia: “Ahe nang kitaꞌ maoꞌ Ku-panjawat? Napeꞌ waꞌtunya Aku neleꞌatn koasa-Ku.” 5 Tapi uweꞌ Yesus bakata kaꞌ palayan-palayan koa: “Panjawat jaꞌ ahe nang di Nya ngataatn kaꞌ kitaꞌ.” 6 Diꞌkoa ada anam tapayatn nang dinyiapatn untuꞌ tampat aiꞌ sasah nurut adat urakng Yahudi. Masing-masing isiꞌnya lapan puluh ato saratus dua puluh liter. 7 Yesus bakata kaꞌ palayan-palayan koa: “Isiꞌ tapayatn-tapayatn koa binsiꞌatn man aiꞌ.” Ia kaꞌ koa pun ngisiꞌnya sampe binsiꞌ. 8 Lakaꞌ koa, Yesus bakata agiꞌ kaꞌ ia kaꞌ koa: “Ampeatn senoklah man centong lalu incakng kaꞌ kapalaꞌ gawe.” 9 Lalu kapalaꞌ gawe nyacapiꞌ aiꞌ nang dah jaji anggur koa. Ia inaꞌ nauꞌan dari mae atakngnya, tapi palayan-palayan, nang nyenok aiꞌ koa nauꞌan. Lalu kapalaꞌ gawe koa nyaruꞌ panganten nanglaki, 10 man bakata kaꞌ ia: “Biasanya urakng ngaluasatn aiꞌ anggur nang labih edoꞌ doloꞌ man kadeꞌ tamu-tamu dah puas nyocok, baruꞌlah aiꞌ anggur nang biasa. Tapi kitaꞌ norohiꞌ aiꞌ anggur nang labih edoꞌ sampe ampeatn.”11 Hal koa di Yesus manjawat kaꞌ kota Kana propinsi Galilea. Man hal ajaip nang pamulaꞌatn nang Yesus manjawat koa, Ia dah madahatn koasa-Nya nang miah tingngi, man murit-murit-Nya pucayaꞌ kaꞌ Ia.
Yesus kaꞌ kota Kapernaum
2:12
12 Lakaꞌ koa Yesus ampus kaꞌ kota Kapernaum man uwe-Nya, page samadiꞌatn-Nya, murit-murit-Nya ampus man Ia. Ia kaꞌ koa badiapm salamaꞌ sangahe ari ihan kaꞌ kota koa.a
Yesus nyuciatn Rumah Allah
(Mat. 21:12-13; Mrk. 11:15-17; Luk. 19:45-46)
13 Takaꞌ ari raya Paska urakng Yahudi dah samak, Yesus ampus kaꞌ Yerusalem. 14 Kaꞌ alaman Rumah Allah, Yesus neleꞌ panjual-panjual sapi, domba man merpati, man panukar-panukar duit duduk diꞌkoa. 15 Ia manjawat cambuk dari tali lalu ngoser nya kaꞌ koa man samua sapi man dombanya dari alaman Rumah Allah; meja-meja panukar duit koa Nya malik sampe duit-duit nya kaꞌ koa batahamburan. 16 Lalu Ia bakata kaꞌ panjual-panjual merpati kaꞌ koa: “Incakng kaluar samua burukng-burukng nian. Ame kitaꞌ jadiatn Rumah Apaꞌ-Ku jaji tampat untuꞌ badagakng!” 17 Lalu taringatlah murit-murit-Nya kaꞌ ayat Kitap Suci nian: “Cinta-Ku nang ayaꞌ kaꞌ Rumah Allah, ngancuratn ati Aku.”b 18 Lalu pamimpin-pamimpin Yahudi nantakng Yesus katanya: “Tojokatn kaꞌ kami hal-hal ajaip nang jaji tanda kadeꞌ Kitaꞌ bahak babuat lea nian!” 19 Sahut Yesus kaꞌ ia kaꞌ koa: “Bungkar Rumah Kudus Allah nian, Aku manjawataꞌnya agiꞌ dalapm waꞌtu talu ari.”c 20 Lalu kata pamimpin-pamimpin Yahudi koa kaꞌ Yesus: “Ampat puluh anam tahutn urakng manjawat Rumah Kudus Allah nian, inaꞌ mungkin Kitaꞌ baya manjawatnya dalapm waꞌtu talu ari!” 21 Tapi nang di Yesus maksut, Rumah Kudus Allah koa tubuh-Nya babaro. 22 Lakaꞌ Yesus mulakng idup dari kamatiatn, baruꞌlah murit-murit-Nya taringat kaꞌ pakataan Yesus nang dah suah Nya ngataatn nian. Jaji ia kaꞌ koa pucayaꞌ kaꞌ Kitap Suci man ugaꞌ pakataatn Yesus.
23 Yesus badiapm kaꞌ Yerusalem salamaꞌ gawe Paska, rami urakng nang pucayaꞌ kaꞌ Ia gara-gara hal-hal ajaip nang di-Nya manjawat. 24 Tapi Yesus babaro inaꞌ mucayaꞌatn diriꞌ-Nya kaꞌ ia kaꞌ koa, barang Yesus kanal kaꞌ samua urakng. 25 Inaꞌ palalu urakng nang bapadah kaꞌ Ia tentang sae pun, barang Ia babaro nauꞌan ahe nang ada kaꞌ dalapm ati talino.