Yesus tamaꞌ kaꞌ kota Yerusalem
11:1-11
(Mat. 21:1-9; Luk. 19:28-38; Yoh. 12:12-15)
11
Takaꞌ Yesus man murit-murit-Nya dah samak man kota Yerusalem, samak kampokng Betpage man kampokng Betania. Kadua kampokng koa kaꞌ Bukit Jaitun. Yesus nyuruh dua urakng murit-Nya bajalatn labih doloꞌ. 2 Kata Yesus, “Ampuslah kaꞌ kampokng nang kaꞌ depan naun, takaꞌ kitaꞌ tamaꞌ kaꞌ kampokng koa, kitaꞌ neleꞌaꞌ sekoꞌ anak keledai nang di nambat nang giꞌ naꞌ suah urakng taikiꞌ. Lapasatn keledai koa incakng kaꞌ keatn. 3 Man kadeꞌ ada urakng batanyaꞌ kaꞌ kitaꞌ: ngahe kitaꞌ ngalapasatn keledai koa, sahutiꞌlah: ‘Tuhan palalu. Ia mulangannya agiꞌ ganceh kaꞌ dian.’ ” 4 Kadua murit Yesus koa pun ampus, man namu sekoꞌ keledai mudaꞌ nang di nambat kaꞌ depan pintu rumah kaꞌ tapi maraga lalu ngalapasatnnya. 5 Man basangahe urakng nang ada kaꞌ diꞌkoa bakata kaꞌ nya dua koa, “Ngahe kitaꞌ ngalapasatn keledai koa?” 6 Lalu kadua murit Yesus koa nyahut lea nang di Yesus ngataꞌatn. Jaji urakng-urakng kaꞌ koa miaratn nya dua ngincakng keledai koa. 7 Lalu nya dua koa ngincakng keledai koa kaꞌ Yesus, ngalasiꞌnya man jubah nya kaꞌ koa, lalu Yesus naik kaꞌ atasnya. 8 Rami urakng ngampar jubahnya kaꞌ maraga, ada ugaꞌ nang ngampar rabaꞌ kayu nang badaukng ijo nang di nya ngagoꞌ kaꞌ uma. 9 Urakng-urakng nang bajalatn kaꞌ depan man nang nunaꞌan Yesus dari balakang bangampakatn,“Pujilah Tuhan!
Di barakatiꞌlah Ia nang atakngngaꞌ atas dama Allah,a
10 Dibarakatiꞌlah Pamarentahan-Nya nang atakngngaꞌ, lea Pamarentahan Daut eneꞌ moyang diriꞌ,
Pujilah Allah nang miah tingi!”
11 Sampenya kaꞌ Yerusalem Yesus tamaꞌ kaꞌ Rumah Allah. Diꞌkoa Ia maratiatn sakulilikng-Nya. Tapi tagal ari dah amper patakng, Yesus barangkat kaꞌ kampokng Betania man kaduabalas murit-Nya.
Yesus ngutuk puhutn araꞌ
11:12-14
(Mat. 21:18-19)
12 Alapm ampaginya lakaꞌ Yesus man kaduabalas murit-Nya ningalatn Betania, Yesus marasa kaparatn. 13 Dari jauh Ia neleꞌ puhutn araꞌ nang badaukng labat. Jaji Ia notok puhutn araꞌ koa untuꞌ neleꞌ ahe keꞌ ada buahnya. Tapi takaꞌ Ia sampe kaꞌ puhutn araꞌ koa, Ia inaꞌ namu buahnya cuman daukng-daukng ihan, tagal waꞌtu koa napeꞌ musim buah araꞌ. 14 Lalu Yesus bakata kaꞌ puhutn araꞌ koa, “Ame agiꞌ saurakngpun nang makatn buahnyu salama-lamanya!” Man murit-murit-Nya pun nangngarnya.
Yesus tamaꞌ kaꞌ Rumah Allah
11:15-19
(Mat. 21:12-17; Luk. 19:45-48; Yoh. 2:13-16)
15 Lalu sampelah Yesus man murit-murit-Nya kaꞌ Yerusalem. Yesus tamaꞌ agiꞌ kaꞌ Rumah Allah, mulaiꞌlah Ia ngoser samua urakng-urakng nang bajual bali kaꞌ alaman Rumah Allah. Meja-meja panukar duit man bangku-bangku panjual burukng dara di-Nya malik. 16 Man Ia inaꞌ ngijinan urakng-urakng ngincakng barang-barang ngalaluiꞌ Rumah Kudus Allah koa. 17 Lalu Yesus ngajar ia kaꞌ koa, “Bukeꞌ keꞌ ada taconteng, ‘Rumah-Ku di sabutaꞌ Rumah Doꞌa untuꞌ sigana bangsa?’ Tapi kitaꞌ nian dah nyajiatnnya tampat pangalit!”b 18 Imam-imam kapalaꞌ man guru-guru agama nangngar pakataatn koa. Ia kaꞌ koa mulaiꞌ ngagoꞌ maraga untuꞌ munuh Yesus tagal ia kaꞌ koa galiꞌ kaꞌ Yesus, barang samua urakng kagum nangngar ajaran-Nya. 19 Takaꞌ ari dah bamula patakng Yesus man murit-murit-Nya ningalatn kota koa.
Palajaran dari puhutn araꞌ
11:20-26
(Mat. 21:20-22)
20 Alapm-alapm ampaginya, waꞌtu ia kaꞌ koa ngalewatiꞌ puhutn araꞌ koa, ia kaꞌ koa neleꞌ puhutn araꞌ koa dah mati sampe kaꞌ urat-uratnya. 21 Lalu taringatlah Petrus kaꞌ ahe nang dah jadi, lalu ia bakata kaꞌ Yesus, “Paꞌ Guru, teleꞌlah puhutn araꞌ nang kitaꞌ ngutuk koa dah karikng.” 22 Yesus nyahut, “Pucayaꞌlah kaꞌ Allah! 23 Aku bakata kaꞌ kitaꞌ, Sabatolnya sae jaꞌ bakata kaꞌ panamukng nian, ‘Tarangkatlah man tabuaknglah kaꞌ dalapm laut!’ Sagaꞌ inaꞌ ragu-ragu atinya, tapi pucayaꞌ, kadeꞌ ahe nang di nya ngataatn koa tajajiaꞌ, pasti hal koa tajajiaꞌ kaꞌ ia.c 24 Tagal koa Aku bakata kaꞌ kitaꞌ, Ahe jaꞌ nang kitaꞌ mintaꞌ man doꞌaatn, pucayaꞌlah kadeꞌ kitaꞌ dah narimaꞌnya, jaji hal koa di bareꞌatnaꞌ kaꞌ kao. 25 Kadeꞌ kitaꞌ badoꞌa, amponiꞌlah doloꞌ sakiraꞌnya ada sakit ati kaꞌ urakng, biar Apaꞌnyu nang kaꞌ saruga ugaꞌ ngamponiꞌ dosa-dosanyu.”d 26 [Kadeꞌ kitaꞌ inaꞌ ngamponiꞌ urakng lain, Apaꞌ nyu nang kaꞌ saruga ugaꞌ inaꞌ ngamponiaꞌ dosa-dosanyu.]
Basangahe pamimpin Yahudi barusaha nyalahatn Yesus
11:27-33
(Mat. 21:23-27; Luk. 20:1-8)
27 Yesus man murit-murit-Nya mulakng agiꞌ kaꞌ Yerusalem. Man waꞌtu koa Yesus bajalatn kaꞌ alaman Rumah Allah, imam-imam kapalaꞌ, guru-guru agama man pamimpin-pamimpin Yahudi atakng kaꞌ Yesus. 28 Ia kaꞌ koa batanyaꞌ kaꞌ Yesus, “Ahe dasarnya Kitaꞌ manjawat samuanya nian? Man sae nang mareꞌ kuasa kaꞌ Kitaꞌ, sampe Kitaꞌ manjawat hal-hal nian?” 29 Sahut Yesus kaꞌ ia koa kaꞌ koa, “Aku ugaꞌ maoꞌ batanyaꞌ kaꞌ kitaꞌ. Kitaꞌ arus mareꞌ jawapannya, man Aku ugaꞌ bapadahaꞌ kaꞌ kitaꞌ man kuasa sae Aku manjawat hal-hal koa. 30 Baptisan Yohanes koa dari saruga ato dari talino?” 31 Lalu imam-imam kapalaꞌ man pamimpin-pamimpin Yahudi mulaiꞌ barunding, katanya kaꞌ koa, “Kadeꞌ diriꞌ bakata dari saruga, Ia bakataaꞌ, ‘Kadeꞌ lekoa ngahe kitaꞌ baiꞌ pucayaꞌ kaꞌ ia?’ 32 Tapi, inaꞌ mungkin diriꞌ bakata dari talino!” Tagal ia kaꞌ koa galiꞌ kaꞌ urakng rami, barang samua urakng nganggap kadeꞌ Yohanes batol-batol saurakng nabi. 33 Lalu ia kaꞌ koa nyahutiꞌ Yesus, “Kami inaꞌ nauꞌan.” Jaji kata Yesus kaꞌ ia kaꞌ koa, “Kadeꞌ lea koa, Aku ugaꞌ baiꞌ bapadahaꞌ kaꞌ kitaꞌ man kuasa sae Aku manjawat hal-hal koa.”