Parumpamaan tentang urakng-urakng nang karaja kaꞌ kabon anggur
12:1-12
(Mat. 21:33-46; Luk. 20:9-19)
12
Lalu Yesus mulaiꞌ agiꞌ ngesahatn kaꞌ ia kaꞌ koa parumpamaan, “Ada saurakng nang mukaꞌ kabon anggur man magar sakulilikng kabon koa. Ia manjawat lubakng kaꞌ tanah tampat ngalakaꞌatn bak untuꞌ marah anggurnya man madiri manara nyaga kabonnya koa. Lakaꞌ koa ia nyewaatn kabonnya koa kaꞌ urakng-urakng. Lalu ia ampus kaꞌ nagari lain.a 2 Takaꞌ dah musim mebet buah anggur, ampuꞌ kabon anggur koa nyuruh amba ulutnnnya ampus kaꞌ nang nyewa kabonnya, untuꞌ mintaꞌ tasih kabon koa. 3 Tapi panyewa kabon koa nangkap amba ulutn koa, ia kaꞌ koa mangkong man nyuruhnya pulakng inaꞌ ngincakng ahe-ahe. 4 Lalu ampuꞌ kabon koa nyuruh agiꞌ amba ulutnnya nang lain, lea koa ugaꞌ ia dimangkong sampe lukaꞌ kapalanya man sidi di masupeꞌiꞌ. 5 Ampuꞌ kabon koa nyuruh agiꞌ saurakng amba ulutnnya nang lain. Tapi ia kaꞌ koa munuh amba ulutn koa ugaꞌ, lea koa ugaꞌlah satarusnya kalakuannya kaꞌ koa kaꞌ amba ulutn nang lainnya. Ada nang dimangkong ada ugaꞌ nang dimunuh. 6 Ahirnya inaꞌ ada agiꞌ nang baya disuruh di ampuꞌ kabon koa, kacoali anak tungalnya nang sidi nya ngasihiꞌ. Jaji ia nyuruh anaknya koa ampus tagal ia bapikir, ‘Tantulah anakku nian dinya kaꞌ koa saganiꞌ.’ 7 Tapi panyewa kabon koa bakata kaꞌ sabayaatnnya, Ia nian ahli warisnya, injeꞌ diriꞌ munuhnya, naꞌe diriꞌ nang ngampuꞌ kabon nian. 8 Ia kaꞌ koa nangkapnya man munuhnya, lalu muang mayatnya kaꞌ luar kabon koa.”9 Lakaꞌ ngesahatn parumpamaan koa Yesus batanyaꞌ kaꞌ ia kaꞌ koa, “Coba kitaꞌ pikiriꞌ, kadeꞌ lea koa ahe nang maoꞌ di ampuꞌ kabon koa panjawataꞌ? Tantu ampuꞌ kabon koa atakngngaꞌ man munuh panyewa kabonnya koa, lalu nyarahatn kabonnya koa kaꞌ panyewa-panyewa nang lain. 10 Kitaꞌ tantunya dah maca ayat nian kaꞌ dalapm Kitap Suci:
‘Batu nang di tukang bangunan anggap inaꞌ baguna
dah jaji batu dasar nang paling panting.
11 Hal koalah nang jaji dari pihak Allah,
nang manjawat diriꞌ kaheranan.’ ”b
12 Lalu pamimpin-pamimpin agama Yahudi barusaha untuꞌ nangkap Yesus tagal ia kaꞌ koa nauꞌan, kadeꞌ parumpamaan koa Yesus nujuatn kaꞌ ia kaꞌ koa. Tapi ia kaꞌ koa galiꞌ kaꞌ urakng rami, jaji ia kaꞌ koa badariatn, ninggalatn Yesus.
Tentang mayar pajak kaꞌ Kaisar
12:13-17
(Mat. 22:15-22; Luk. 20:20-26)
13 Lakaꞌ koa basangahe urakng Parisi man golongan Herodes dinyuruh ampus kaꞌ Yesus untuꞌ nipuaꞌnya man pertanyaan. 14 Jaji urakng-urakng kaꞌ koa bakata kaꞌ Yesus, “Paꞌ Guru, kami nauꞌan kadeꞌ sigana nang di Kitaꞌ ngajaratn sidi banar. Kitaꞌ inaꞌ paduli kaꞌ kata urakng lain tagal Kitaꞌ ngomong inaꞌ bateleꞌ muha. Man Kitaꞌ ngajaratn nang jujur leamae urakng arus idup pas man parentah Allah. Jaji padahatn kaꞌ kami, kadeꞌ nurut paraturan agama, mulih ato inaꞌ diriꞌ mayar pajak kaꞌ Kaisar, kapalaꞌ pamarentah Roma?” 15 Tapi Yesus nauꞌan kadeꞌ ia kaꞌ koa batujuan jahat batanyaꞌ lea koa. Tagal koa Yesus bakata, “Ngahe kitaꞌ nyobaiꞌ aku? Incakng dian duit perak koa biar ku teleꞌ!” 16 Jaji ia kaꞌ koa mareꞌatn sakapikng duit perak kaꞌ Ia. Lalu Yesus batanyaꞌ, “Gambar man dama sae keꞌ nian?” Sahut nya kaꞌ koa, “Kaisar.”
17 Jakata Yesus kaꞌ ia kaꞌ koa, “Kadeꞌ lea koa, bareꞌlah kaꞌ Kaisar ahe nang di Kaisar ngampuꞌ, man bareꞌlah kaꞌ Allah ahe nang di Allah ngampuꞌ.” Ia kaꞌ koa pun kaheranan kaꞌ sahut Yesus.
Pertanyaan urakng Saduki tentang urakng mati mulakng idup
12:18-27
(Mat. 22:23-33; Luk. 20:27-40)
18 Sangahe urakng golongan Saduki atakng kaꞌ Yesus. Golongan urakng Saduki koa inaꞌ pucayaꞌ kadeꞌ urakng mati mulakngaꞌ idup agiꞌ. Ia kaꞌ koa batanyaꞌ kaꞌ Yesus.c 19 “Paꞌ Guru, Musa nyonteng ukum nian untuꞌ diriꞌ taatiꞌ, ‘Kadeꞌ saurakng nanglaki mati man ia inaꞌ baranak man bininya, jaji sodaranya arus panganten man jandanya koa. Biar mareꞌ katurunan kaꞌ sodaranya nang dah mati koa.’d 20 Saandainya ada tujuh urakng adiꞌ baradiꞌ. Nang tuha panganten lalu mati naꞌ bakaturunan. 21 Lalu nang kadua panganten man jandanya koa, man ia pun mati inaꞌ bakaturunan ugaꞌ lea koa ugaꞌ nang katalu. 22 Man lea koa ugaꞌ satarusnya, sampe man nang katujuh inaꞌ ugaꞌ bakaturunan. Ahirnya nangbini koa pun mati ugaꞌ. 23 Jaji katujuh adiꞌ baradiꞌnya koa dah panganten man nangbini koa. Kadeꞌ lea koa, takaꞌ urakng-urakng mati naꞌe mulakng idup agiꞌ sae kaꞌ antara katujuh adiꞌ baradiꞌ koa tadi nang jajiaꞌ laki nangbini koa?” 24 Jakata Yesus nyahutiꞌnya, “Kitaꞌ sasat, justru tagal kitaꞌ inaꞌ ngarati kaꞌ Kitap Suci maoꞌ pun kuasa Allah. 25 Tagal urakng nang mati mulakng idup inaꞌ panganten man inaꞌ di pangantenan tapi idup lea malaekat kaꞌ saruga. 26 Lea koa ugaꞌ urakng-urakng nang mulakng idup dari kamatiatn. Nanaꞌ keꞌ kitaꞌ maca kaꞌ dalapm kitap nabi Musa? Kaꞌ dalapm gesah rompoꞌ nang nyala koa, Allah bakata, ‘Akulah Allah nang di Abraham nyambah, nang di Isak nyambah, man nang di Yakup nyambah.’e 27 Allah koa bukeꞌlah Allah untuꞌ urakng mati, tapi Allah untuꞌ urakng-urakng nang idup. Kitaꞌ banar-banar sasat!”
Ukum nang paling panting
12:28-34
(Mat. 22:34-40; Luk. 10:25-28)
28 Lalu saurakng guru agama Yahudi nangngar Yesus man urakng-urakng Saduki basoꞌal jawap, ia nauꞌan kadeꞌ Yesus mareꞌ jawapan nang banar kaꞌ urakng-urakng koa, jaji guru agama koa notok-Nya man batanyaꞌ, “Ukum nang mae keꞌ nang paling panting dari samua ukum?” 29 Sahut Yesus, “Nianlah ukum nang paling panting, Dangngarlah o urakng Israel, Allah diriꞌ koa tungal.f 30 Kasihiꞌlah Allahnyu, man sigana atinyu man sigana jiwanyu, man sigana akalnyu man sigana kakuatannyu. 31 Ukum nang kadua koa, Kasihiꞌ sabayaatnnyu talino, lea kao ngasihiꞌ diriꞌnyu babaro. Inaꞌ ada ukum lain nang labih panting dari pada kaꞌ kadua ukum nian.”g 32 Lalu guru agama Yahudi koa nyahutiꞌ Yesus, “Batol kata Kitaꞌ Paꞌ Guru, Allah diriꞌ tungal, ingkaꞌ inaꞌ nang lain kacoali Ia ihan.h 33 Memang talino arus ngasihiꞌ Allah man sigana ati man pangaratian man kakuatan, man ugaꞌ ngasihiꞌ sabaya talino lea diriꞌ babaro. Koa jauh labih panting daripada paremahan nang dinunu man paremahan nang lainnya, untuꞌ diparemahan kaꞌ Allah.”i 34 Yesus neleꞌ lemae bijaksananya sahut urakng koa, lalu kata-Nya kaꞌ urakng koa, “Kao inaꞌ jauh dari Karajaan Allah!” Man saurakng pun inaꞌ barani agiꞌ batanyaꞌ kaꞌ Yesus.
Yesus labih bakuasa dari raja Daut
12:35-37
(Mat. 22:41-46; Luk. 20:41-44)
35 Kaꞌ soteꞌ ari takaꞌ Yesus ngajar kaꞌ Rumah Allah, Ia bakata, “Lea mae guru-guru agama baya ngataatn, kadeꞌ Raja Panyalamat koa katurunan raja Daut? 36 Daut babaro di Roh Kudus mimpin man bakata,
‘Tuhan dah bapirman kaꞌ Tuanku:
duduk kaꞌ sabalah kanan-Ku
sampe Aku manjawat munsuh-munsuh-Nyu tunduk kaꞌ Kao.’j
37 Jaji kadeꞌ Daut nyabut Raja Panyalamat koa Tuannya, lemae Ia jaji katurunan Daut?” Urakng rami nang nangngar-Nya sidi suka.
Yesus nasehatiꞌ biar ati-ati kaꞌ guru agama Yahudi
12:38-40
(Mat. 23:5-7; Luk. 20:45-47)
38 Kaꞌ dalapm pangajaran-Nya Yesus bakata, “Ati-atilah kaꞌ guru agama Yahudi nang suka bajalatn-jalatn make jubah nang panyakng man suka dihormatiꞌ kaꞌ pasar-pasar.k 39 Ia kaꞌ koa suka tampat nang kaꞌ depan kaꞌ tampat tahormat rumah sumbayang man kaꞌ gawe-gawe. 40 Ia kaꞌ koa nipu janda-janda man ngarampas rumahnya. Untuꞌ nutupiꞌ kajahatatnnya, ia kaꞌ koa badoꞌa lama! Tapi ia kaꞌ koa bapuraꞌ-puraꞌ ihan. Tagal koa Allah pasti ngukum ia kaꞌ koa labih barat.”
Persembahan saurakng janda kodo
12:41-44
41 Kaꞌ teras Rumah Kudus Allah Yesus duduk ngadapiꞌ kotak tampat mareꞌ persembahan, Ia maratiatnniꞌ urakng-urakng namaꞌan duit kaꞌ dalapm tampat persembahan koa. Urakng kaya kaꞌ koa mareꞌ manyak duitnya untuꞌ persembahan. 42 Ia neleꞌ ugaꞌ saurakng janda kodo namaꞌan dua kapikng duit nang nilainya miah damuk kaꞌ dalapm tampat persembahan koa. 43 Lalu Yesus nyaruꞌ murit-murit-Nya man bakata, “Dangngar boh, sabatolnya janda kodo nian mareꞌ jauh labih manyak dari pada sigana urakng-urakng kaꞌ kea. 44 Tagal urakng kaꞌ kea mareꞌ man haratanya nang dah labih. Biarpun ia inaꞌ bakaheatn tapi janda nang miah kodo nian, mareꞌ man ahe nang ada kaꞌ diriꞌnya.”