Yesus ngutus tujuh puluh murit
10
Lakaꞌ koa Tuhan Yesus milih tujuh puluh murit agiꞌ,
lalu ngutus ia kaꞌ koa badua-badua ampus doloꞌ dari Yesus.
Ia kaꞌ koa arus ampus kaꞌ tiap kota man kampokng nang maoꞌ diampusiaꞌ Yesus.
2 Jakata Yesus kaꞌ ia kaꞌ koa,
“Urakng nang dah siap untuꞌ narimaꞌ Kabar nang Gagas nang mpat kaꞌ Tuhan Allah,
urakng koa lea padi nang dah masak nang siap untuꞌ dianyiꞌ.
Tapi urakng nang nganyiaꞌnya koa sabebet.
Tagal koa,
mintaꞌlah kaꞌ Tuhan Allah pangampuꞌ uma koa supaya Ia ngiriman urakng untuꞌ nganyiꞌ asil uma-Nya.a
3 Ampuslah!
Aku ngutus kitaꞌ lea domba nang giꞌ enek kaꞌ teaꞌ legoh.
4 Ame ngincakng dompet ato geꞌ tas,
man ame ngincakng dua pasang sandal.
Ame badiapm lama kadeꞌ nagur dangan kaꞌ maraga.
5 Kadeꞌ kitaꞌ tamaꞌ kaꞌ sabuah rumah omonganlah doloꞌ pakataatn lea nian,
‘Baati nang damelah kiraꞌnya kitaꞌ nang badiapm kaꞌ rumah nian.’
6 Kadeꞌ diꞌkoa ada urakng nang suka dame,
damenyu koa badiapmaꞌ kaꞌ ia koa;
tapi kadeꞌ urakng nang inaꞌ suka dame,
dame koa inaꞌ badiapmaꞌ kaꞌ ia.
7 Diapmlah kaꞌ soteꞌ rumah maan.
Tarimalah ahe nang dah dinyiapatn kaꞌ diꞌkoa untuꞌ kitaꞌ,
tagal urakng nang bakaraja bahak narimaꞌ upahnya.
Ame bapindah-pindah dari soteꞌ rumah kaꞌ rumah nang lain.
8 Kadeꞌ kitaꞌ atakng kaꞌ sabuah kota man diꞌkoa kitaꞌ ditarimaꞌ nang edoꞌ,
makatn jaꞌ ahe nang dah dinyiapatn diꞌkoa untuꞌnyu.
9 Samuhatnlah urakng-urakng nang sakit kaꞌ kota koa,
man gesahatnlah kaꞌ urakng-urakng diꞌkoa,
kadeꞌ inaꞌ lama agiꞌ Tuhan Allah marentah jaji Raja kaꞌ tangah-tangah ia kaꞌ koa.”
10 Jakata Yesus agiꞌ,
“Tapi kadeꞌ kitaꞌ atakng kaꞌ soteꞌ kota man diꞌkoa kitaꞌ inaꞌ ditarimaꞌ,
kaluaslah kaꞌ maraga tampat karamian urakng kaꞌ kota koa man omonganlah lea nian:
11 ‘Kami kiboatn dabu kota kitaꞌ nang malakat kaꞌ paha kami.
Nian jaji paringatan untuꞌ kitaꞌ kadeꞌ Tuhan Allah ngukumaꞌ kitaꞌ.
Tapi dangar boh,
inaꞌ lama agiꞌ waꞌtunya Tuhan Allah mulaiꞌaꞌ marentah jaji Raja kaꞌ tangah-tangah kitaꞌ!’
12 Dangar boh,
waꞌtu Ahir Jaman,
ukuman atas urakng-urakng kaꞌ kota koa labih barataꞌ daripada ukuman urakng kaꞌ kota Sodom nang miah jahatb!”
Kota-kota nang urakngnya inaꞌ pucayaꞌ
(Mat. 11:20-24)
13 “Singsaralah kitaꞌ,
urakng-urakng kaꞌ kota Korasim!
Man singsaralah kitaꞌ,
urakng-urakng kaꞌ kota Betsaida!
Tagal aku dah manjawat tanda-tanda nang ajaip kaꞌ tangah-tangah kitaꞌ,
tapi kitaꞌ baiꞌ baranti babuat dosa.
Padahal kadeꞌ jaman deꞌe urakng kaꞌ kota Tirus man Sidon neleꞌ tanda-tanda ajaip nang lekoa,
pasti ia kaꞌ koa baranti babuat dosa man nojokatn kadeꞌ ia kaꞌ koa dah nyasal.
14 Waꞌtu ari kiamat,
ukuman atas urakng-urakng kaꞌ kota koa labih barataꞌ daripada ukuman urakng kaꞌ kota Tirus man kota Sidon.
15 Man kitaꞌ,
urakng-urakng kota Kapernaum!
Kitaꞌ pikir,
kitaꞌ ditingianaꞌ sampe kaꞌ saruga?
Tapi sabaliknya kitaꞌ dibuakngaꞌ kaꞌ naraka!”
16 Lalu Yesus bakata kanaꞌ murit-Nya,
“Urakng nang nangar kitaꞌ,
nangar Aku.
Urakng nang nolak kitaꞌ,
nolak Aku.
Man urakng nang nolak Aku,
nolak Ia ugaꞌ nang ngutus Aku.”
Mulakngnya tujuh puluh murit
17 Katujuh puluh murit koa mulakng man ati nang sidi repo.
Jakatanya kaꞌ koa,
“Tuhan,
setan-setanpun taat kaꞌ kami kadeꞌ kami mareꞌ parentah kaꞌ ia koa man dama Kitaꞌ!”
18 Jakata Yesus,
“Aku neleꞌ Ibalis pamimpin setan-setan jantuꞌ mpat kaꞌ langit lea elak.
19 Dangar boh,
Aku dah mareꞌ kuasa kaꞌ kitaꞌ biar kitaꞌ bisa ninyak ular man kala,
man ugaꞌ matahatn sigana kakuatatn munsuh,
sampe inaꞌ ada nang nyilakaiaꞌ kitaꞌ.
20 Sakalipun lekoa ame boh kao karepoatn tagal setan-setan taat kaꞌ kitaꞌ.
Labih baik kitaꞌ barepo-repo tagal damanyu taconteng kaꞌ saruga.”
Yesus basukur kaꞌ Tuhan Allah
(Mat. 11:25-27; 13:16-17)
21 Ari koa ugaꞌ Yesus sidi repo,
barang Ia di Roh Tuhan Allah nguasaiꞌ.
Jakata Yesus,
“Apaꞌ,
Kitaꞌ nang nguasaiꞌ langit man aiꞌ tanah!
Aku batarimaꞌkasih kaꞌ Kitaꞌ,
jukut sigana koa inaꞌ Kitaꞌ padahatn kaꞌ urakng-urakng nang pane.
Tapi Kitaꞌ madahatnnya kaꞌ urakng-urakng nang lea kamudaꞌ enek.
Nang koalah nang Apaꞌ maoꞌiꞌ.”
22 Jakata Yesus agiꞌ,
“Apaꞌ-Ku dah mareꞌatn sigana ahe pun kaꞌ Aku.
Inaꞌ sekoꞌpun nang nganal Anak,
kahe Apaꞌ ihan.
Inaꞌ ada ugaꞌ nang nganal Apaꞌ kahe Anak ihan man urakng-urakng nang di Anak milih untuꞌ nganal Apaꞌ.”
23 Yesus malek man bakata kanaꞌ murit-Nya ihan,
“Sidi repo kitaꞌ tagal dah neleꞌ sigana ahe nang kitaꞌ neleꞌ ampeatn nian.
24 Dangar boh,
manyak nabi man raja nang maoꞌ neleꞌ ahe nang kitaꞌ teleꞌ ampeatn nian,
tapi ia kaꞌ koa inaꞌ neleꞌnya.
Ia kaꞌ koa maoꞌ nangar ahe nang kitaꞌ dangar ampeatn nian,
tapi ia kaꞌ koa inaꞌ nangarnya.”
Urakng Samaria nang baik ati
25 Lakaꞌ koa ada sekoꞌ urakng guru agama Yahudi.
Ia langsung badiri man bakata nyobaiaꞌ Yesus jakatanya,
“Paꞌ Guru,
ampahe aku baya namu idup nang salamanya?”
26 Jakata Yesus kaꞌ guru agama Yahudi koa,
“Ahe nang taconteng kaꞌ parentah Tuhan Allah?
Ahe nang kitaꞌ malajariꞌ?”
27 Jakata guru agama Yahudi koa nyahutiꞌ Yesus,
“Kasihiꞌ boh Tuhan Allahnyu man sigana atinyu man sigana tabiatnyu man sigana kakuatatnnyu man sigana pamikirannyu,
man ugaꞌ kasihiꞌ boh sabayaatnnyu talino lea diriꞌnyu babaro.”
28 Jakata Yesus nyahutiꞌ guru agama Yahudi koa tadi,
“Ahe jakata kitaꞌ koa sidi batol,
lekoa ugaꞌ kitaꞌ arus panjawat,
biar kitaꞌ namu idup nang salamanya.”
29 Tapi guru agama Yahudi nian mabanaraꞌ diriꞌnya.
Ia batanyaꞌ agiꞌ kaꞌ Yesus,
“Saeba sabayaatn ku talino koa?”
30 Jakata Yesus nyahutiꞌnya,
“Ada sekoꞌ urakng mpat kaꞌ Yerusalem ampusaꞌ kaꞌ Yerikho.
Kaꞌ tangah maraga urakng nian di parampok nyarang naapaꞌ haratanya.
Bukeꞌ ihan ngarampok nya tapi ugaꞌ nya mangkong,
baruꞌ nya ningalatn kaꞌ tangah maraga urakng nian satangah mati.
31 Inaꞌ lama lakaꞌ koa daꞌ ngalintas imam agama Yahudi.
Nya neleꞌ urakng koa nang dah satangah mati diparampok tadi,
tapi nanaꞌ ugaꞌ nya bantoꞌ,
nya ngalintas ihan bajalatn kaꞌ sabarang maraga.
32 Baruꞌ ngalintas agiꞌ urakng Lewi,
nya neleꞌ,
nanaꞌ ugaꞌ nya bantoꞌ,
nya ngalintas ugaꞌ bajalatn nyabarang maraga.
33 Lakaꞌ koa ngalintas agiꞌ urakng Samaria nang bajalatn ampusaꞌ kaꞌ soteꞌ tampat,
nya neleꞌ urakng nang kana rampok nian tadi tasantuk atinya.
34 Ia nyamakiꞌ urakng koa,
lalu marasehatn lukanya man aiꞌ anggur,
nya more make binyak jaitun,
udah koa nya ngikat lukanya.
Baruꞌ nya naikatn kaꞌ atas keledainya,
lakaꞌ koa nya ngincakng kaꞌ rumah panginapatn ngurusaꞌ nya.
35 Ampaginya urakng Samaria koa mareꞌatn duit dua dinarc kaꞌ ampuꞌ panginapatn koa,
jakatanya,
‘Kao urus boh urakng nian sampe ia baik,
kadeꞌnya kurang duit nian naꞌe aku mulakngaꞌ kaꞌ dian agiꞌ baruꞌ aku mayaraꞌnya.’”
36 Udah koa jakata Yesus kaꞌ guru agama Yahudi koa,
“Kadeꞌ manurut kitaꞌ,
saelah dari katalu urakng nian tadi nang jaji sabayaatnnya talino dari urakng nang kana rampok koa?”
37 Sahut guru agama Yahudi koa,
“Urakng nang tasantuk atinya,
nang mantoꞌ urakng nang kana rampok koa tadi.”
Jakata Yesus kaꞌ guru agama Yahudi nian tadi,
“Kadeꞌ lekoa panjawatlah kaꞌ kaidupatnnyu nang mpakoa ugaꞌ.”
Marta man Maria
38 Takaꞌ Yesus man naꞌ murit-Nya kaꞌ pajalanan,
ia kaꞌ koa tamaꞌ kaꞌ sabuah kampokng.
Kaꞌ kampokng koa ada sekoꞌ nangbini,
nang badama Marta.
Marta maba Yesus kaꞌ rumahnya.
39 Marta ada baadiꞌ kandung nang badama Maria.
Maria nian duduk kaꞌ samak Tuhan Yesus sambil nangaratn ajaran-Nya.
40 Tapi Marta sidi sibuk batipara.
Ia notok Yesus man bakata,
“Tuhan,
ahe geꞌ Kitaꞌ inaꞌ paduli kaꞌ aku?
Adiꞌku miaratn aku bakaraja babaro ihan.
Suruh ba ia mantoꞌ aku!”