Pamimpin-pamimpin Yahudi nanyaꞌan kuasa Yesus
(Mat. 21:23-27; Mrk. 11:27-33)
20
Kaꞌ soteꞌ ari,
Yesus giꞌ tagah ngajar man ngesahatn Kabar nang Gagas mpat kaꞌ Tuhan Allah kaꞌ urakng-urakng kaꞌ dalapm Rumah Kudus Tuhan Allah.
Atakng ugaꞌ imam-imam kapalaꞌ man guru-guru agama Yahudi,
man ugaꞌ pamimpin-pamimpin Yahudi.
2 Ia kaꞌ koa atakng man bakata kaꞌ Yesus,
“Ahe kuasa Kitaꞌ manjawat sigananya koa?
Sae nang mareꞌ kuasa koa kaꞌ Kitaꞌ?”
3 Jakata Yesus nyahutiꞌnya,
“Aku ugaꞌ batanyaꞌaꞌ kaꞌ kitaꞌ,
coba padah kaꞌ Aku:
4 Sae geꞌ nang mareꞌ kuasa kaꞌ Yohanes untuꞌ maptis urakng?
Ahe geꞌ Tuhan Allah ato geꞌ talino?”
5 Lalu naꞌ guru agama Yahudi,
pamimpin Yahudi man imam-imam kapalaꞌ koa barunding sabayaatnnya,
jakatanya kaꞌ koa,
“Kadeꞌ diriꞌ padahatn kuasa Yohanes koa dari Tuhan Allah,
Yesus pasti bakataaꞌ kaꞌ diriꞌ,
‘Kadeꞌ lekoa ngahe kitaꞌ inaꞌ pucayaꞌ kaꞌ ia?’
6 Tapi kadeꞌ diriꞌ padahatn Yohanes maptis urakng man kuasa talino,
sigana urakng pasti nabakiꞌ diriꞌ man batu,
jukut urakng rami koa pucayaꞌ kadeꞌ Yohanes koa saurakng nabi.”
7 Lalu ia kaꞌ koa nyahut,
“Kami inaꞌ nauꞌan sae nang mareꞌ kuasa kaꞌ Yohanes untuꞌ maptis.”
8 Yesus pun ugaꞌ bakata kaꞌ ia kaꞌ koa,
“Kadeꞌ lekoa Aku pun baiꞌ ugaꞌ bapadahaꞌ kaꞌ kitaꞌ,
man kuasa sae Aku manjawat sigananya nian.”
Parumpamaan panyewa kabon anggur nang jahat
(Mat. 21:33-46; Mrk. 12:1-12)
9 Yesus ngesahatn agiꞌ parumpamaan kaꞌ urakng rami kaꞌ koa lea nian,
“Ada urakng nang bakabon anggur.
Lalu nya nyewaatn kabon anggurnya koa kaꞌ sangahe urakng lain baruꞌ ia barangkat kaꞌ nagari nang jauh untuꞌ waꞌtu nang lama.
10 Takaꞌ dah musimnya mebet buah anggur,
ampuꞌ kabon anggur koa nyuruh amba ulutnnya untuꞌ mintaꞌ bagiatn sewanya kaꞌ urakng nang nyewa koa tadi.
Tapi urakng nang nyewa koa tadi mangkong amba ulutn koa man nyuruhnya pulakng inaꞌ ngincakng ahe-ahe.
11 Lakaꞌ koa ampuꞌ kabon anggur koa nyuruh agiꞌ amba ulutnnya nang lain untuꞌ mintaꞌ bagiatn sewanya.
Tapi amba ulutnnya koapun ugaꞌ di naꞌ panyewa kaꞌ koa mangkong,
nya ngina lalu nya nyuruh pulakng inaꞌ ugaꞌ ngincakng ahe-ahe.
12 Lalu ampuꞌ kabon anggur koa nyuruh agiꞌ amba ulutn nang katalu mintaꞌ sewanya.
Tapi amba ulutnnya koa ugaꞌ pun di naꞌ panyewa kaꞌ koa mangkong satangah mati lalu nya narikatn kaluas kabon.
13 Ahirnya ampuꞌ kabon anggur koa bakata,
‘Ahe agiꞌ nang arus aku panjawat?
Aku nyuruhaꞌ anakku nang sidi ku ngasihiꞌ,
pasti naꞌ panyewa kaꞌ koa saukng kaꞌ ia.’
14 Tapi takaꞌ naꞌ panyewa kabon anggur koa neleꞌ anak ampuꞌ kabon koa,
ia kaꞌ koa bakata kaꞌ sabayaatnnya,
‘Ia nian ahli warisnya.
Jeh diriꞌ munuhnya,
biar diriꞌ ngampuꞌ kabon anggurnya nian.’
15 Jaji ia kaꞌ koa narikatn anak ampuꞌ kabon koa kaluas kabon lalu nya munuh.”
Lalu Yesus batanyaꞌ kaꞌ urakng nang nangar parumpamaan koa,
“Nah,
kadeꞌ ampuꞌ kabon koa pulakng,
ahe nang nya panjawataꞌ kaꞌ panyewa-panyewa kabon koa?
16 Dangar boh kitaꞌ,”
jakata Yesus,
“Pasti ia atakngaꞌ untuꞌ munuh panyewa-panyewa koa lalu nyarahatn kabonnya koa kaꞌ panyewa-panyewa nang lain.”
Nangar kata Yesus koa,
urakng rami bakata,
“Hal koa ame sampe jaji!”
17 Yesus neleꞌ kaꞌ ia kaꞌ koa lalu bakata,
“Kadeꞌ lekoa ahe rati ayat Alkitap nian?
‘Batu nang di tukang bangunan anggap naꞌ baguna dah jaji batu dasar.’
18 Sigana urakng nang jantuꞌ kaꞌ batu koa pasti ancuraꞌ;
man urakng nang di batu koa nyantuꞌiꞌ pasti ancuraꞌ jaji dabu.”
Hal mayar pajak kaꞌ pamarentahan Roma
(Mat. 22:15-22; Mrk. 12:13-17)
19 Guru-guru agama Yahudi man imam-imam kapalaꞌ nauꞌan kadeꞌ parumpamaan koa,
Yesus nujuatn kaꞌ ia kaꞌ koa.
Tagal koa ia kaꞌ koa maoꞌ nangkap Yesus waꞌtu koa ugaꞌ,
tapi ia kaꞌ koa galiꞌ kaꞌ urakng rami.
20 Tagal koa ia kaꞌ koa ngawasi Yesus,
lalu mayar sangahe urakng untuꞌ bapuraꞌ-puraꞌ jaji urakng baik.
Guru-guru agama Yahudi man imam-imam kapalaꞌ koa nyuruh urakng-urakng koa batanyaꞌ kaꞌ Yesus untuꞌ nyebak Yesus.
Ia kaꞌ koa maoꞌ nyarahatnnaꞌ Yesus kaꞌ kuasa pamarentahan Roma untuꞌ diadiliaꞌ man diukumaꞌ.
21 Jaji urakng-urakng kaꞌ koa bakata kaꞌ Yesus,
“Paꞌ Guru,
kami nauꞌan kadeꞌ sigana nang di kitaꞌ ngajaratn koa sidi banar.
Kitaꞌ ngomong kaꞌ urakng inaꞌ bateleꞌ muha,
man ngajaratn nang jujur,
lemae urakng arus idup pas man parentah Tuhan Allah.
22 Jaji,
padahatn kaꞌ kami,
kadeꞌ nurut paraturan agama mulih geꞌ inaꞌ diriꞌ mayar pajak kaꞌ Kaisar?”
23 Tapi Yesus nauꞌan kadeꞌ ia kaꞌ koa batujuan jahat batanyaꞌ lekoa.
Tagal koa Ia bakata,
24 “Coba teleꞌatn kaꞌ Aku sakapikng duit perak.
Gambar man dama sae kaꞌ duit perak nian?”
“Kaisar,”
jakatanya kaꞌ koa.
25 “Kadeꞌ lekoa,
bareꞌlah kaꞌ Kaisar ahe nang di Kaisar ngampuꞌ,
man bareꞌlah kaꞌ Tuhan Allah ahe nang di Tuhan Allah ngampuꞌ,”
jakata Yesus kaꞌ ia kaꞌ koa.
26 Ia kaꞌ koapun inaꞌ bisa nyalahatn Yesus man pakataatn nang di Yesus ngomongan.
Ia kaꞌ koa diapm ihan man kagum kaꞌ sahut Yesus koa.
Ajaran Yesus tentang urakng mati nang naꞌe mulakngaꞌ idup agiꞌ
(Mat. 22:23-33; Mrk. 12:18-27)
27 Sangahe urakng golongan Saduki atakng kaꞌ Yesus.
Golongan urakng Saduki koa inaꞌ pucayaꞌ kadeꞌ urakng mati mulakngaꞌ idup agiꞌ.
Ia kaꞌ koa batanyaꞌ kaꞌ Yesus,
28 “Paꞌ Guru,
Musa nyonteng ukum nian untuꞌ diriꞌ taatiꞌ:
Kadeꞌ sekoꞌ urakng nanglaki mati man ia inaꞌ baranak man bininya,
jaji sodaranya arus panganten man jandanya koa.
Biar mareꞌ katurunan kaꞌ sodaranya nang dah mati koa.
29 Saandainya ada tujuh urakng adiꞌ baradiꞌ.
Nang tuha panganten lalu mati nanaꞌ bakaturunan.
30 Lalu nang kadua panganten man jandanya,
man ia pun mati nanaꞌ bakaturunan ugaꞌ.
31 Lekoa ugaꞌ nang jaji kaꞌ sodaranya nang katalu sampe nang katujuh.
32 Ahirnya nangbini koa mati ugaꞌ.
33 Jaji katujuh basodara koa dah panganten man nangbini koa.
Kadeꞌ lekoa,
takaꞌ urakng-urakng mati naꞌe mulakng idup agiꞌ,
sae kaꞌ antara katujuh basodara koa tadi nang jajiaꞌ laki nangbini koa?”
34 Jakata Yesus nyahutiꞌnya,
“Urakng-urakng nang idup kaꞌ dunia nian panganten man dipangantenan,
35 tapi kaꞌ dalapm dunia baharu nang atakngaꞌ inaꞌ lekoa.
Tuhan Allah ngidupatnnaꞌ urakng-urakng nang di Nya nganggap pantas,
tapi ia kaꞌ koa inaꞌ panganten ato pun dipangantenan.
36 Jukut ia kaꞌ koa lea malaekat,
nang inaꞌ pane mati agiꞌ.
Ia kaꞌ koa anak-anak Tuhan Allah,
jukut Tuhan Allah ngidupatn ia kaꞌ koa dari kamatiatn.”
37 Jakata Yesus agiꞌ,
“Tapi tentang talino mulakng idup agiꞌ dari kamatiatn,
koa dah dinyataatn dalapm gesah rompoꞌ nang nyala.
Jukut Tuhan Allah bakata kaꞌ nabi Musa,
‘Akulah Tuhan Allah Abraham,
man Tuhan Allah Isak,
man Tuhan Allah Yakup.’
38 Tuhan Allah bukeꞌlah Tuhan Allah urakng mati!
Ia Tuhan Allah urakng-urakng nang idup.
Barang kaꞌ adapatn Tuhan Allah,
sigana urakng idup.”
39 Nangar sahut Yesus koa basangahe urakng guru agama Yahudi bakata,
“Paꞌ Guru,
sahut Kitaꞌ koa sidi pas.”
40 Mulaiꞌ waꞌtu koa inaꞌ ada agiꞌ nang barani batanyaꞌ kaꞌ Yesus.
Soal Raja Panyalamat
(Mat. 22:41-46; Mrk. 12:35-37)
41 Lalu Yesus batanyaꞌ kaꞌ ia kaꞌ koa,
“Ngahe urakng bakata kadeꞌ Raja Panyalamat katurunan Raja Daut?
42 Padahal Daut babaro bakata kaꞌ dalapm kitap Masmur,
‘Tuhan Allah bakata kaꞌ Tuanku:
Duduklah kaꞌ sabalah kanan-Ku,
43 sampe Aku manjawat munsuh-munsuh-Nyu
tunduk kaꞌ Kao.’a
44 Jaji kadeꞌ Daut nyabut Raja Panyalamat koa ‘Tuan,’
lemae Ia katurunan Daut?”
Ati-atilah kaꞌ guru-guru agama Yahudi
(Mat. 23:1-36; Mrk. 12:38-40)
45 Waꞌtu urakng-urakng giꞌ tagah nangar Yesus ngomong,
Ia bakata kaꞌ murit-murit-Nya,
46 “Ati-atilah kaꞌ guru-guru agama Yahudi.
Ia kaꞌ koa suka bajalatn-jalatn man pakean nang mewah,
man suka dihormatiꞌ kaꞌ pasar-pasar.
Ia kaꞌ koa suka tampat-tampat nang tahormat kaꞌ dalapm rumah tampat sumbayang man kaꞌ gawe-gawe.
47 Ia kaꞌ koa nipu janda-janda man ngarampas rumahnya.
Untuꞌ nutupiꞌ kajahatatnnya,
ia kaꞌ koa badoa lama!
Tapi ia kaꞌ koa bapuraꞌ-puraꞌ ihan.
Tagal koa,
Tuhan Allah pasti ngukumaꞌ ia kaꞌ koa labih barat!”