Yesus mareꞌ makatn ampat ribu urakng
8:1-10
(Mat. 15:32-39)
8
Inaꞌ sangahe lama lakaꞌ koa, ada agiꞌ sakalompok urakng rami bakomoꞌ. Tagal ia kaꞌ koa inaꞌ bapamakanan, Yesus nyaruꞌ murit-murit-Nya man bakata, 2 “Aku kasihatn kaꞌ urakng rami nian. Dah talu ari ia kaꞌ kea sama-sama man Aku, tapi ampeatn dah naꞌ ada agiꞌ pamakanan. 3 Kadeꞌ Aku nyuruh ia kaꞌ kea pulakng man parut kosong, jangan-jangan ia kaꞌ kea pingsan kaꞌ tangah maraga. Ahe agiꞌ kaꞌ antaranya kaꞌ kea ada nang atakng dari jauh.” 4 Murit-murit Yesus nyahut, “Kaꞌ tampat nian tampat nang sunyiꞌ, Kaꞌ mae urakng bisa namu pamakanan nang cukup untuꞌ samua urakng nian?” 5 Yesus batanyaꞌ kaꞌ ia kaꞌ koa, “Sangahe manyak roti nang ada kaꞌ kitaꞌ?” Sahutnya kaꞌ koa, “Tujuh eteꞌ” 6 Lalu Yesus nyuruh urakng rami koa duduk kaꞌ atas tanah, baruꞌ Ia naap tujuh eteꞌ roti koa man basukur kaꞌ Allah. Lakaꞌ koa Ia nyempak-nyempak roti koa man kokot-Nya man mareꞌatnnya kaꞌ murit-muritnya-Nya untuꞌ di bagi-bagi kaꞌ urakng-urakng rami koa. Lalu murit-murit-Nya magi-magiatn roti koa. 7 Kaꞌ ia kaꞌ koa ugaꞌ ada sangahe ekoꞌ ikatn-ikatn nang enek. Yesus basukur kaꞌ Allah untuꞌ ikatn-ikatn koa, lalu nyuruh murit-murit-Nya magi-magiatn ikatn koa ugaꞌ. 8 Ia kaꞌ koa pun makatn sampe kanyang. Lakaꞌ koa urakng ngomoꞌan sempakatn-sempakatn roti nang basisa, manyaknya tujuh bakul. 9 Nang makatn koa ada kurang labih ampat ribu urakng. Lalu Yesus nyuruh ia kaꞌ koa pulakng. 10 Yesus pun naik kaꞌ parahu man murit-murit-Nya ampus kaꞌ daꞌerah Dalmanuta.Urakng Parisi mintaꞌ tanda
8:11-13
(Mat. 16:1-4)
11 Lalu sangahe urakng Parisi atakng basoꞌal jawap man Yesus. Untuꞌ nyobai-Nya, ia kaꞌ koa mintaꞌ Yesus manjawat hal nang ajaip tanda dari langit kadeꞌ Ia atakng dari Allah. 12 Yesus mansengat lanuꞌ, kasal man bakata, “Ngahe urakng-urakng kaꞌ jaman nian mintaꞌ tanda? Aku bakata kaꞌ kitaꞌ, sabatolnya urakng-urakng koa sakali-kali inaꞌ di bareꞌaꞌ tanda.” 13 Lalu Yesus ningalatn ia kaꞌ koa; Ia naik kaꞌ parahu man batulak kaꞌ sabarang.
Tentang ragi urakng Parisi man ragi Herodes
8:14-21
(Mat. 16:5-12)
14 Takaꞌ ia kaꞌ koa tagah balayar rupanya pangikut-pangikut Yesus lupa ngincakng roti nang cukup. Nang ada cuman soteꞌ ihan kaꞌ ia kaꞌ koa kaꞌ dalapm parahu. 15 Lalu Yesus ngingatiꞌ ia kaꞌ koa, kata-Nya, “Ati-atilah kaꞌ ragi urakng Parisi man ragi Herodes.”a 16 Jaji pangikut-pangikut Yesus ngomongan hal koa. Ia kaꞌ koa bakata kaꞌ sekoꞌ man nang lainnya, “Ia bakata lekoa mungkin tagal diriꞌ inaꞌ ada cukup roti.” 17 Yesus nauꞌan ahe nang di nya kaꞌ koa masoꞌalatn. Tagal koa Yesus batanyaꞌ kaꞌ ia kaꞌ koa, “Ngahe kitaꞌ masoꞌalatn tentang inaꞌ baroti? Ahe keꞌ kitaꞌ inaꞌ nauꞌan man napeꞌ ngarati ugaꞌ? Sidi bodonya pikiran kitaꞌ? 18 Kitaꞌ bamata ngahe inaꞌ neleꞌ? Kitaꞌ batarenyekng ngahe inaꞌ nangngar? Inaꞌ keꞌ kitaꞌ ingat agiꞌ,b 19 Kaꞌ waꞌtu Aku nyempak-nyempak lima eteꞌ roti untuꞌ lima ribu urakng koa, sangahe bakul binsiꞌ sempakatn roti kitaꞌ ngomoꞌan?” Sahut nya kaꞌ koa, “Dua balas bakul.” 20 “Man kaꞌ waꞌtu tujuh roti untuꞌ ampat ribu urakng koa, sangahe bakul binsiꞌ sempakatn roti kitaꞌ ngomoꞌan?” Sahut nya kaꞌ koa, “Tujuh bakul.” 21 Lalu kata Yesus kaꞌ ia kaꞌ koa, “Masih keꞌ kitaꞌ napeꞌ ngarati?”
Yesus nyamuhatn urakng butaꞌ kaꞌ Betsaida
8:22-26
22 Lakaꞌ koa Yesus man murit-murit-Nya atakng kaꞌ Betsaida. Kaꞌ diꞌkoa urakng ngincakng kaꞌ Yesus saurakng butaꞌ man ia kaꞌ koa mintaꞌ biar Yesus nyantuh urakng butaꞌ koa. 23 Yesus nyangiꞌiꞌ kokot urakng butaꞌ koa man ngincakngnya kaluar kampokng. Lalu Ia ngalujahiꞌ mata urakng koa man nyangkam kadua matanya, Yesus batanyaꞌ, “Udah keꞌ kao neleꞌ?” 24 Urakng koa neleꞌ kaꞌ depan, lalu bakata, “Aku neleꞌ urakng bajalatn-jalatn, tapi lea puhutn-puhutn kayu.” 25 Yesus nyangkam agiꞌ kadua mata urakng koa, lalu urakng koa sidi-sidi neleꞌ man dah samuh, sampe ia baya neleꞌ samuanya sidi jelas. 26 Lalu Yesus nyuruh ia pulakng kaꞌ rumahnya man bakata, “Ame tamaꞌ kaꞌ kampokng koa agiꞌ!”
Petrus ngakoꞌiꞌ kadeꞌ Yesus Raja Panyalamat
8:27-30
(Mat. 16:13-20; Luk. 9:18-21)
27 Lakaꞌ koa Yesus man murid-murid-Nya barangkat kaꞌ kampokng-kampokng kaꞌ gunar Kaisarea Pilipi. Kaꞌ tangah maraga Yesus batanyaꞌ kaꞌ ia kaꞌ koa, “Jakata urakng, sae Aku nian?” 28 Sahutnya kaꞌ koa, “Ada nang bakata, Yohanes Pamaptis; ada ugaꞌ nang bakata, Elia, man nang lain agiꞌ bakata, salah saurakng dari nabi.”c 29 “Tapi kadeꞌ nurut kitaꞌ, sae Aku nian?” tanya Yesus. Petrus nyahut, “Kitaꞌ Raja Panyalamat!”d 30 Lalu Yesus maiꞌan ia kaꞌ koa bapadah kaꞌ sae pun tentang diriꞌ-Nya.
Yesus ngomongan tentang kasingsaraatn-Nya nang pamulaꞌatn
8:31-9:1
(Mat. 16:21-28; Luk. 9:22-27)
31 Lakaꞌ koa, Yesus mulaiꞌ ngajar murit-murit-Nya, kadeꞌ Anak Manunsia arus nanggong manyak kasingsaraatn man inaꞌ di tarimaꞌ di pamimpin-pamimpin Yahudi, imam-imam kapalaꞌ Yahudi, man guru-guru agama. Ia di bunuhaꞌ, tapi ari nang katalu Ia mulakngaꞌ idup agiꞌ. 32 Yesus narangkatn hal koa kaꞌ murit-murit-Nya sidi jelas. Lalu Petrus maba Yesus kaꞌ samping man bakata kaꞌ Ia, “Ame ngomong lekoa!” 33 Tapi Yesus malek man neleꞌ murit-murit-Nya, lalu nagur Petrus, “Dari kao Ibalis, tagal kao bukeꞌ mikiriꞌ ahe nang di Allah mikiriꞌ, tapi mikiriꞌ ahe nang di talino mikiriꞌ.”
34 Lalu Yesus nyaruꞌ urakng rami man murit-murit-Nya man bakata kaꞌ ia kaꞌ koa, “Tiap urakng nang maoꞌ nunaꞌ Aku, ia inaꞌ maduliatn kapantingannya babaro, mikut salipnya lalu nunaꞌan Aku.e 35 Barang sae nang maoꞌ nyalamatatn tali sengatnya, ia kailangan tali sengatnya; Tapi sae pun nang kailangan tali sengatnya tagal Aku man Kabar Baik dari Allah, ia namuaꞌ idup nang salamanya.f 36 Inaꞌ ada gunanya urakng ngampuꞌ kakayaan kaꞌ dunia nian, tapi ia inaꞌ namuaꞌ idup nang salama-lamanya. 37 Tagal urakng inaꞌ mampu mali idup nang salama-lamanya man haratanya koa.
38 Barang sae nang supeꞌ ngakoꞌiꞌ Aku man pakataatn-Ku kaꞌ antara urakng-urakng nang inaꞌ satia man badosa nian, Anak Manunsia pun ugaꞌ supeꞌaꞌ ngakoꞌiꞌ urakng koa, kaꞌ waꞌtu Ia atakngngaꞌ ana man kuasa Apa-Nya, sama-sama man malaekat-malaekat nang Kudus dari saruga.”