Yesus mareꞌ makatn lima ribu urakng
6:1-15
(Mat. 14:13-21; Mrk. 6:32-44; Luk. 9:10-17)
6
Lakaꞌ koa Yesus ampus kaꞌ sabarang dano Galilea, nang ugaꞌ dinyabut dano Tiberias. 2 Rami urakng nang barujut-rujut nunaꞌan Ia, jukut ia kaꞌ koa dah neleꞌ hal-hal ajaip nang Nya manjawat untuꞌ nyamuhatn urakng-urakng nang sakit. 3 Lalu Yesus naik kaꞌ atas bukit, man duduk diꞌkoa man pangikut-pangikut-Nya. 4 Kaꞌ waꞌtu koa, gawe Paska, ari raya urakng Yahudi dah samak. 5 Takaꞌ Yesus neleꞌ kaꞌ sakulilikng-Nya, Ia neleꞌ urakng barujut-rujut atakng kaꞌ Ia. Ia bakata kaꞌ Pilipus: “Kaꞌ mae diriꞌ baya mali makanan, biar samua urakng nian bisa makatn?” 6 Yesus dah nauꞌan ahe nang Nya panjawataꞌ, tapi Ia bakata lekoa barang maoꞌ nguji Pilipus. 7 Sahut Pilipus: “Kahepun kami mali roti saraga dua ratus perak pun inaꞌ cukupaꞌ untuꞌ ia kaꞌ kea, sakali pun namu kajah sabebet.” 8 Saurakng dari murit-murit-Nya, ia koa Andreas, sodara Simon Petrus bakata: 9 “Kaꞌ dian ada saurakng kamudaꞌ nanglaki nang ngampuꞌ lima eteꞌ roti man dua ekoꞌ ikatn. Tapi koa inaꞌ cukupaꞌ untuꞌ urakng nang samanyak nian.” 10 Yesus bakata kaꞌ pangikut-pangikut-Nya: “Suruhlah urakng-urakng kaꞌ koa duduk,” kaꞌ tampat koa manyak rumput. Lalu samua urakng kaꞌ koa pun duduk kaꞌ atas rumput koa, kira-kira lima ribu urakng nanglaki. 11 Lakaꞌ koa Yesus naap roti koa, basukur kaꞌ Allah lalu mareꞌatnnya kaꞌ murit-murit-Nya, untuꞌ magi-magiatn roti koa kaꞌ ia kaꞌ koa nang duduk diꞌkoa. Lekoa ugaꞌ nang Nya manjawat man ikatn koa, man ia kaꞌ koa makatn sapuas-puasnya. 12 Lakaꞌ samuanya makatn sampe kanyang, Yesus bakata kaꞌ murit-murit-Nya: “Komoꞌanlah loaꞌ makanan koa, ame sampe disera-sera.” 13 Lalu ia kaꞌ koa ngomoꞌan loaꞌ makanan koa, dua balas bakul panuh loaꞌ dari lima roti nang dimakatn di urakng rami koa. 14 Takaꞌ urakng rami neleꞌ hal ajaip nang di Yesus manjawat, ia kaꞌ koa bakata: “Ia nian banar-banar Nabi nang deꞌe dimadahatn atakngaꞌ kaꞌ dalapm dunia.”15 Yesus nauꞌan kadeꞌ ia kaꞌ koa maoꞌ atakng untuꞌ maksa Ia jaji raja nya kaꞌ koa. Jaji Ia babaro ampus kaꞌ daꞌerah nang babukit ngelaꞌatn urakng rami koa.
Yesus bajalatn kaꞌ atas aiꞌ
6:16-21
(Mat. 14:22-33; Mrk. 6:45-52)
16 Takaꞌ ari dah patakng parimpasa, murit-murit Yesus ampus kaꞌ dano Galilea. 17 Tapi Yesus napeꞌ ugaꞌ atakng kaꞌ ia kaꞌ koa. Ari pun dah siaꞌ patakng, jaji ia kaꞌ koa naik parahu man mulaiꞌ nyabarangngiꞌ dano notok kota Kapernaum. 18 Lalu nyaru nyiup siaꞌ kuat sampe-sampe galombang dano koa jaji ayaꞌ. 19 Waꞌtu ia kaꞌ koa balayar kira-kira lima ato anam kilo meter, ia kaꞌ koa neleꞌ Yesus bajalatn kaꞌ atas aiꞌ nyamakiꞌ parahu nya kaꞌ koa. Ia kaꞌ koa pun sidi kagaliꞌanan. 20 Tapi Yesus bakata kaꞌ ia kaꞌ koa: “Ame galiꞌ, nian Aku!” 21 Lalu sidi repo ati nya kaꞌ koa narimaꞌ Ia kaꞌ dalapm parahu, man waꞌtu koa ugaꞌ parahu nya kaꞌ koa sampe kaꞌ tampat nang di nya kaꞌ koa nuju.
Urakng rami ngagoꞌiꞌ Yesus
6:22-24
22 Ampaginya urakng rami nang masih badiapm kaꞌ sabarang dano Galilea ngagoꞌiꞌ Yesus. Ia kaꞌ koa sadar kadeꞌ tadinya kahe sabuah parahu diꞌkoa. Man Ia kaꞌ koa nauꞌan kadeꞌ pangikut-pangikut Yesus dah barangkat man parahu koa, tapi Yesus inaꞌ ampus man ia kaꞌ koa. 23 Samintara koa sangahe buah parahu lain atakng dari kota Tiberias batambat kaꞌ samak tampat urakng rami koa makatn roti lakaꞌ Tuhan Yesus basukur kaꞌ makanan koa. 24 Takaꞌ urakng rami koa neleꞌ kadeꞌ Yesus man murit-murit-Nya inaꞌ diꞌkoa, ia kaꞌ koa naik parahu-parahu koa lalu barangkat kaꞌ kota Kapernaum ngagoꞌiꞌ Yesus.
Yesus roti idup
6:25-59
25 Takaꞌ urakng-urakng kaꞌ koa batamu man Yesus kaꞌ sabarang dano, ia kaꞌ koa batanyaꞌ kaꞌ Yesus: “Paꞌ Guru, kamile Kitaꞌ sampe kaꞌ keatn?” 26 Sahut Yesus: “Aku bakata kaꞌ kitaꞌ sasidinya ampeatn nian, kitaꞌ ngaggoiꞌ Aku gara-gara kitaꞌ dah makatn roti koa sampe kanyang. Bukeꞌ tagal kitaꞌ dah neleꞌ hal-hal ajaip. 27 Bakarajalah bukeꞌ untuꞌ makanan nang baya abis man buruk. Tapi bakarajalah untuꞌ makanan nang batahan sampe kaꞌ kaidupatn nang salamanya. Makanan koalah nang di-Ku Anak Manunsia bareꞌatnnaꞌ kaꞌ kitaꞌ. Jukut Akulah nang di Allah Apaꞌ, natapatn.” 28 Lalu ia kaꞌ koa batanyaꞌ kaꞌ Yesus: “Pakarajaatn ahe nang Allah maoꞌiꞌ nang arus kami panjawat?” 29 Sahut Yesus kaꞌ ia kaꞌ koa: “Nianlah pakarajaatn nang di Allah maoꞌiꞌ, pucayaꞌlah kaꞌ Ia nang di Allah ngiripm.”
30 Jaji urakng-urakng koa batanyaꞌ agiꞌ kaꞌ Yesus: “Hal ajaip ahe nang Kitaꞌ panjawat, biar kami neleꞌnya man pucayaꞌ kaꞌ Kitaꞌ? Ahe keꞌ nang di Kitaꞌ karajaatnnaꞌ? 31 Eneꞌ uyut kami makatn makanan nang dinyabut manna kaꞌ padang paser, lea nang taconteng kaꞌ dalapm Kitap Suci: ‘Ia nang mareꞌ ia kaꞌ koa biar makatn roti dari saruga.’”a
32 Lalu Yesus bakata kaꞌ ia kaꞌ koa: “Sasidinya Aku bakata kaꞌ kitaꞌ, bukeꞌ Nabi Musa nang dah mareꞌ kitaꞌ roti dari saruga, tapi Apaꞌ-Kulah nang ampeatn mareꞌ kitaꞌ roti nang sabatolnya dari saruga.’’ 33 Jukut Akulah roti nang turutn dari saruga nang mareꞌ idup kaꞌ sigana talino, roti koalah nang di Allah mareꞌ. 34 Lalu kata nya kaꞌ koa: “Paꞌ, bareꞌlah roti koa kaꞌ kami tiap ari.” 35 Jakata Yesus kaꞌ ia kaꞌ koa: “Akulah roti nang mareꞌ kaidupatn; sae jaꞌ nang atakng kaꞌ Aku, ia inaꞌ suah kaiparatnnaꞌ agiꞌ, man sae jaꞌ nang pucayaꞌ kaꞌ Aku, ia inaꞌ suah ausaꞌ agiꞌ. 36 Aku dah bakata kaꞌ kitaꞌ: kitaꞌ dah neleꞌ Aku, tapi kitaꞌ inaꞌ pucayaꞌ. 37 Samua urakng nang di Apaꞌ mareꞌatn kaꞌ Aku atakngaꞌ kaꞌ Aku. Sae jaꞌ nang atakng kaꞌ Aku, pasti inaꞌ Ku-buakngngaꞌ. 38 Barang Aku turutn dari saruga, bukeꞌ untuꞌ manjawat kamaoꞌan-Ku babaro, tapi kamaoꞌan Allah nang ngiripm Aku. 39 Nianlah kamaoꞌan-Nya nang ngiripm Aku biar dari samua urakng nang dah di-Nya mareꞌatn kaꞌ Aku, ame sampe ada nang ilang tapi biar Ku-idupatnnaꞌ agiꞌ kaꞌ pangabisatn dunia. 40 Barang nianlah kamaoꞌan Apaꞌ-Ku, biar samua urakng nang neleꞌ Anak man pucayaꞌ kaꞌ Ia namu idup nang salamanya, man biar Aku ngidupatnnya agiꞌ kaꞌ ari pangabisatn dunia.”
41 Urakng-urakng Yahudi mulaiꞌ garungut-garungut kaꞌ Yesus, barang Ia dah bakata: “Akulah roti idup nang dah turutn dari saruga.” 42 Ia kaꞌ koa bakata: “Ia nianlah Yesus anak Yusup. Apaꞌ uweꞌ-Nya diriꞌ kanal! Lemae ampeatn Ia baya bakata kadeꞌ Ia dah turutn dari saruga?” 43 Sahut Yesus kaꞌ ia kaꞌ koa: “Ame kitaꞌ garungut-garungut.
44 Inaꞌ ada saurakng pun baya atakng kaꞌ Aku kadeꞌ bukeꞌ Allah Apaꞌ nang ngiripm Aku ngincakng urakng koa kaꞌ Aku. Sae jaꞌ nang atakng kaꞌ Aku, Ku-idupatnnaꞌ agiꞌ kaꞌ ari pangabisatn dunia. 45 Kaꞌ dalapm kitap nabi Yesaya ada taconteng lea nian: ‘Samua urakng di Allah ajaraꞌ.’ Samua urakng nang dah nangngar man balajar dari Apaꞌ, ia kaꞌ koa atakng kaꞌ Aku.b 46 Hal koa inaꞌ barati ada urakng nang dah neleꞌ Apaꞌ. Cuman Ia nang atakng dari Allah, Ia lah nang dah neleꞌ Apaꞌ. 47 Aku bakata kaꞌ kitaꞌ sasidinya sae jaꞌ nang pucayaꞌ kaꞌ Aku, ia namu idup nang salamanya.
48 Akulah roti nang mareꞌ idup. 49 Eneꞌ uyutnyu makatn manna kaꞌ abut bapaser luas nang babatu-batu man ia kaꞌ koa dah mati. 50 Tapi nianlah roti nang turutn dari saruga; tiap urakng nang makatn roti koa ia inaꞌ matiaꞌ. 51 Akulah roti kaidupatn nang dah turutn dari saruga. Kadeꞌ saurakng makatn roti nian, ia idupaꞌ salama-lamanya. Man roti nang Ku-bareꞌatn koalah insiꞌ tubuh-Ku, nang Ku-bareꞌatnnaꞌ untuꞌ idup sigana talino.”
52 Nangngar koa, urakng-urakng Yahudi batangkar saurakng man nang lain, kata nya kaꞌ koa: “Lemae Urakng nian baya mareꞌatn insiꞌ tubuh-Nya kaꞌ diriꞌ untuꞌ dimakatn?” 53 Kata Yesus kaꞌ ia kaꞌ koa: “Sabatolnya kadeꞌ kitaꞌ inaꞌ makatn insiꞌ tubuh Anak Manunsia man nyocok darah-Nya, kitaꞌ inaꞌ ngampuꞌ kaidupatn dalapm diriꞌ kitaꞌ. 54 Sae jaꞌ nang makatn insiꞌ tubuh-Ku man nyocok darah-Ku, ia ngampuꞌ idup nang salamanya man Aku ngidupatnnaꞌ ia kaꞌ ari pangabisatn dunia. 55 Jukut insiꞌ tubuh-Ku banar-banar makanan man darah-Ku banar-banar cocokatn. 56 Sae jaꞌ nang makatn insiꞌ tubuh-Ku man nyocok darah-Ku, ia idup kaꞌ dalapm-Ku, man Aku idup kaꞌ dalapm ia koa. 57 Lea Apaꞌ nang idup koa, ngiripm Aku man Aku pun idup dari Apaꞌ. Lekoa ugaꞌ urakng nang makatn insiꞌ tubuh-Ku idupaꞌ dari Aku. 58 Nianlah roti nang dah turutn dari saruga koa, bukeꞌ roti nang lea di eneꞌ uyutnyu makatn man ia kaꞌ koa dah mati. Sae jaꞌ nang makatn roti nian, ia idupaꞌ salama-lamanya.”
59 Yesus ngataatn samuanya nian takaꞌ Ia ngajar kaꞌ rumah tampat sumbayang kaꞌ kota Kapernaum.
Pangikut-pangikut nang ningalatn Yesus
6:60-66
60 Lakaꞌ nangngar pangajaran Yesus koa, manyak kaꞌ antara pangikut-pangikut-Nya nang bakata: “Pakataatn nian sidi miah barat, sae nang sanggup nangngarnya?” 61 Yesus dah nauꞌan kadeꞌ pangikut-pangikut-Nya garungut-garungut tentang hal koa. Jaji Ia bakata: “Ahe keꞌ ajaran tadi jaji masalah kaꞌ kitaꞌ? 62 Kadeꞌ lekoa ahe pandapat kitaꞌ, kadeꞌ kitaꞌ neleꞌ Aku Anak Manunsia naik agiꞌ kaꞌ tampat asal-Ku? 63 Ajaran-Ku nianlah makanan rohani, man ajaran-Ku koa mareꞌ kaidupatn. Tapi hal-hal jasmani inaꞌ baguna untuꞌ nian. Roh Kuduslah nang mareꞌ kaidupatn. 64 Tapi kaꞌ antara kitaꞌ ada nang inaꞌ pucayaꞌ.” Barang Yesus nauꞌan dari pamulaꞌatn sae nang inaꞌ pucayaꞌ man sae nang ngianatiaꞌ Ia. 65 Lalu Ia bakata agiꞌ: “Koalah tagalnya Aku dah bakata kaꞌ kitaꞌ: ‘Tiap urakng kadeꞌ inaꞌ di Allah Apaꞌ bantoꞌ untuꞌ atakng kaꞌ Aku, ia inaꞌ baya atakng kaꞌ Aku.’” 66 Lakaꞌ Yesus ngataatn hal koa manyak pangikut-Nya ningalatn Ia man baiꞌ agiꞌ nunaꞌan-Nya.
Pangakuan Petrus
6:67-71
67 Lalu Yesus batanyaꞌ kaꞌ kadua balas murit-Nya: “Ahe keꞌ kitaꞌ ugaꞌ maoꞌ ningalatnnaꞌ Aku?” 68 Sahut Simon Petrus kaꞌ Ia: “Tuhan, kaꞌ sae kami ampusaꞌ? Kitaꞌlah nang ngampuꞌ ajaran nang mareꞌ idup nang salamanya.c 69 Kami pucayaꞌ kaꞌ Kitaꞌ. Kami nauꞌan kadeꞌ Kitaꞌlah Ia nang Kudus mpat kaꞌ Allah.” 70 Lalu sahut Yesus: “Aku babaro nang milih kitaꞌ samua nang kadua balas murit nian. Banarkan? Tapi saurakng dari antara kitaꞌ di Ibalis ngoasaiꞌ!” 71 Nang di Yesus maksut nian Yudas, anak Simon Iskariot. Yudas nian saurakng dari kadua balas murit Yesus, tapi ialah ngianatiaꞌ Yesus.