Yesus man adiꞌ baradiꞌ-Nya
7:1-13
7
Lakaꞌ koa Yesus bajalatn ngulilikngiꞌ Galilea, Ia inaꞌ dapat ampus kaꞌ gunar Yudea barang naꞌ pamimpin Yahudi barusaha munuhaꞌ-Nya. 2 Kaꞌ waꞌtu koa dah samak ari raya urakng Yahudi, ia koa ari raya Pondok Daun.a 3 Lalu kata adiꞌ baradiꞌ Yesus kaꞌ Ia: “Barangkatlah dari tampat nian man ampus kaꞌ Yudea, biar pangikut-pangikut Kitaꞌ dapat neleꞌ hal-hal ahe nang Kitaꞌ panjawat. 4 Barang inaꞌ ada urakng nang nosokatn ahe nang di nya manjawat, kadeꞌ ia maoꞌ diakoꞌiꞌ kaꞌ depan umum. Kadeꞌ Kitaꞌ manjawat hal-hal lekoa, biarlah sigana talino kaꞌ dunia neleꞌ Kitaꞌ!” 5 Barang adiꞌ baradiꞌ-Nya babaro pun inaꞌ pucayaꞌ kaꞌ Ia. 6 Sahut Yesus kaꞌ ia kaꞌ koa: “Waꞌtu-Ku napeꞌ sampe, tapi kitaꞌ bisa ampus tiap waꞌtu. 7 Talino kaꞌ aiꞌ tanah inaꞌ mungkin teget kaꞌ kitaꞌ. Tapi ia teget kaꞌ Aku, barang Aku basaksi tentang dunia kadeꞌ pakarajaatn-pakarajaatnnya jahat. 8 Ampuslah kitaꞌ kaꞌ ari raya koa. Aku inaꞌ ampusaꞌ kaꞌ koa, barang waꞌtu-Ku napeꞌ sampe.” 9 Lakaꞌ Yesus bakata lekoa, Ia pun badiapm kaꞌ Galilea.10 Tapi lakaꞌ adiꞌ baradiꞌ-Nya barangkat kaꞌ ari raya koa, Ia pun ampus ugaꞌ kaꞌ ari raya koa tapi nosok-nosok. 11 Salamaꞌ ari raya koa, pamimpin-pamimpin Yahudi ngagoꞌiꞌ Yesus man batanyaꞌ-tanyaꞌ: “Kaꞌ mae Ia?” 12 Manyak urakng mulaiꞌ ngomongan Yesus nosok-nosok. Ada nang bakata: “Ia urakng baik.” Ada pulaꞌ nang bakata: “Inaꞌ! Ia nyasatatn urakng rami.” 13 Tapi inaꞌ saurakng pun nang barani ngomong tarang-tarangan tentang Ia jukut ia kaꞌ koa galiꞌ kaꞌ pamimpin-pamimpin urakng Yahudi.
Kasaksian Yesus tentang diriꞌ-Nya babaro
7:14-24
14 Waꞌtu ari raya koa tagah bajalatn, Yesus tamaꞌ kaꞌ alaman Rumah Allah, lalu mulaiꞌ ngajar. 15 Pamimpin-pamimpin urakng Yahudi pun marasa heran man bakata: “Lemae keꞌ urakng nian nauꞌan manyak hal, padahal inaꞌ suah balajar?” 16 Sahut Yesus kaꞌ ia kaꞌ koa: “Ajaran-Ku inaꞌ barasal dari diriꞌ-Ku babaro, tapi dari Allah nang dah ngiripm Aku. 17 Kadeꞌ sae jaꞌ nang maoꞌ nurutiꞌ kamaoꞌan Allah, ia nauꞌanaꞌ ajaran-Ku barasal dari Allah ato dari diriꞌ-Ku babaro. 18 Sae jaꞌ nang bakata-kata dari diriꞌnya babaro, ia ngagoꞌ hormat untuꞌ diriꞌnya babaro. Sae jaꞌ nang ngagoꞌ hormat untuꞌ Allah nang ngiripm-Nya, ia banar man inaꞌ ada nang inaꞌ banar kaꞌ ia. 19 Bukeꞌ keꞌ Musa dah mareꞌatn ukum Torat kaꞌ kitaꞌ? Tapi inaꞌ saurakng pun kaꞌ antara kitaꞌ nang ngasiꞌ kaꞌ ukum Torat koa. Ngahe kitaꞌ barusaha munuhaꞌ Aku?” 20 Urakng rami koa nyahut: “Kao katamaꞌan roh jahat! Sae nang munuhaꞌ Kao?” 21 Sahut Yesus kaꞌ ia kaꞌ koa: “Aku manjawat soteꞌ jaꞌ hal ajaip man kitaꞌ dah kaheranan. 22 Nabi Musa mareꞌ kitaꞌ paraturan babalak, biarpun babalak koa sabatolnya bukeꞌ dari nabi Musa, tapi dari eneꞌ uyut diriꞌ nang sanapeꞌ nabi Musa. Man kaꞌ ari Sabat pun kitaꞌ malak urakng.b 23 Kadeꞌ kitaꞌ manjawatnya koa biar ame ngalanggar paraturan nabi Musa tentang babalak, ngahe kitaꞌ bera kaꞌ Aku tagal Aku nyambuhatn sigana tubuh urakng kaꞌ ari Sabat?c 24 Ame ngakimiꞌ urakng badasar man ahe nang kateleꞌatn, tapi akimiꞌlah man adil.”
Pertanyaꞌan tentang asal usul Yesus
7:25-36
25 Lakaꞌ koa basangahe urakng nang badiapm kaꞌ Yerusalem bakata: “Bukeꞌ keꞌ Ia nian nang maoꞌ di nya kaꞌ koa bunuh? 26 Tapi teleꞌlah Ia tagah ngajar kaꞌ tampat diꞌmae urakng-urakng baya neleꞌ man nangngaratn Ia. Man inaꞌ ada saurakng pun nang nyoba maiꞌan Ia. Mungkin pamimpin-pamimpin Yahudi dah banar-banar nauꞌan kadeꞌ Ia nian Karistus, Raja Panyalamat? 27 Tapi tentang Urakng nian diriꞌ nauꞌan dari mae asal-Nya, sabaliknya kadeꞌ Raja Panyalamat koa atakng, inaꞌ saurakng pun nauꞌan dari mae asal-Nya.” 28 Waꞌtu Yesus ngajar kaꞌ alaman Rumah Allah, Ia bakata man suara nang nyarikng: “Memang Aku kitaꞌ kanal man kitaꞌ nauꞌan dari mae asal-Ku; Aku atakng bukeꞌ atas kamaoꞌan-Ku babaro, tapi Aku di-Nya nang banar ngiripm nang inaꞌ kitaꞌ kanal. 29 Aku kanal kaꞌ Ia, barang Aku atakng mpat kaꞌ Ia man Ialah nang ngiripm Aku.”
30 Ia kaꞌ koa barusaha nangkapaꞌ Yesus, tapi inaꞌ ada saurakng pun nang nyantuh Ia, barang napeꞌ waꞌtunya untuꞌ nangkap Yesus.
31 Tapi kaꞌ antara urakng-urakng koa ada manyak nang pucayaꞌ kaꞌ Ia, man ia kaꞌ koa bakata: “Kadeꞌ Karistus, Raja Panyalamat atakng, Ia inaꞌ mungkin manjawataꞌ labih manyak hal-hal ajaip dari pada nang dah di-Nya nian manjawat” 32 Urakng-urakng Parisi nangngar urakng rami ngomongan tentang Yesus. Jaji imam-imam kapalaꞌ man urakng Parisi nyuruh panjaga-panjaga Rumah Kudus Allah untuꞌ nangkap Yesus. 33 Lalu Yesus bakata: “Tingngal sabebet waꞌtu jaꞌ Aku ada man kitaꞌ, lakaꞌ koa Aku ampusaꞌ kaꞌ Ia nang dah ngiripm Aku. 34 Kitaꞌ ngagoiꞌaꞌ Aku, tapi inaꞌ namuannaꞌ Aku; barang kitaꞌ inaꞌ dapat atakng kaꞌ tampat diꞌmae Aku ada.” 35 Urakng-urakng Yahudi koa bakata sekoꞌ kaꞌ nang lainnya: “Kaꞌ mae keꞌ Ia ampusaꞌ, sampe diriꞌ inaꞌ baya batamu man Ia? Ahe keꞌ Ia bamaksut untuꞌ ampus kaꞌ ia kaꞌ koa nang badiapm kaꞌ parantoan, kaꞌ antara urakng Yunani untuꞌ ngajar urakng Yunani? 36 Ahe maksut pakataatn nang di-Nya ngomongan nian? Jukut tadi Ia bakata lea nian: ‘Kitaꞌ ngagoꞌiꞌaꞌ Aku, tapi kitaꞌ inaꞌ namuannaꞌ Aku, man kitaꞌ inaꞌ baya atakng kaꞌ tampat diꞌmae Aku ada’”
Aiꞌ nang mareꞌ idup
7:37-44
37 Kaꞌ ari pangabisatn dari ari raya koa, ari nang paling panting, Yesus badiri kaꞌ alaman Rumah Kudus Allah lalu ngomong man suara nang nyarikng: “Sae nang aus, baiklah ia atakng kaꞌ Aku man nyocok.d 38 Sae jaꞌ nang pucayaꞌ kaꞌ Aku, lea nang di Kitap Suci ngataatn: ‘Dari dalapm atinya ngaliraꞌ aliran-aliran aiꞌ nang mareꞌ idup.’”e 39 Nang di Yesus maksut Roh Kudus nang ditarimaꞌaꞌ di nya kaꞌ koa nang pucayaꞌ kaꞌ Ia; jukut Roh koa napeꞌ atakng, barang Yesus napeꞌ dimuliaatn.
40 Basangahe urakng kaꞌ antara urakng rami nang nangngar pakataatn Yesus koa, bakata: “Ia nian banar-banar nabi nang diriꞌ nunggu koa!” 41 Nang lain bakata: “Ia nian Raja Panyalamat.” Saduaꞌ agiꞌ bakata: “Bukeꞌ, Raja Panyalamat inaꞌ atakng dari Galilea! 42 Kitap Suci bakata kadeꞌ Raja Panyalamat barasal dari katurunan Daut, dari desa Betlehem, tampat Daut deꞌe badiapm.”f 43 Lalu timullah patangkaratn kaꞌ antara urakng rami koa, saduaꞌ nukung Yesus saduaꞌ agiꞌ nantakng-Nya. 44 Basangahe urakng kaꞌ antara nya kaꞌ koa maoꞌ nangkap Ia, tapi inaꞌ ada saurakng pun nang nyantuh Ia.
Pamimpin-pamimpin Yahudi baiꞌ pucayaꞌ
7:45-52
45 Panjaga-panjaga Rumah Kudus Allah koa mulakng agiꞌ kaꞌ imam-imam kapalaꞌ man urakng-urakng Parisi. Lalu imam-imam kapalaꞌ man urakng-urakng Parisi koa batanyaꞌ kaꞌ ia kaꞌ koa: “Ngahe kitaꞌ inaꞌ ngincakng Ia kaꞌ keatn?” 46 Panjaga-panjaga kaꞌ koa nyahut: “Giꞌ naꞌ suah ada urakng nang ngajar lea Ia koa!” 47 Lalu sahut urakng-urakng Parisi koa kaꞌ panjaga-panjaga koa: “Ahe keꞌ kitaꞌ ugaꞌ dinyasatatn? 48 Ada keꞌ kaꞌ antara pamimpin-pamimpin Yahudi nang pucayaꞌ kaꞌ Ia, ato saurakng kaꞌ antara urakng-urakng Parisi? 49 Tapi urakng rami nian, nang inaꞌ nganal ukum Torat, Allah ngukum ia kaꞌ koa!” 50 Nikodemus, saurakng kaꞌ antara urakng-urakng Parisi nang deꞌe nya atakng kaꞌ Yesus, bakata kaꞌ ia kaꞌ koa: g 51 “Manurut ukum Torat, urakng inaꞌ mulih diukum sanapeꞌ pakaranya didangngar man kalakuannya dipariksa.” 52 Sahut nya kaꞌ koa kaꞌ Nikodemus: “Kitaꞌ kan bukeꞌ urakng Galilea. Pareksalah Kitap Suci, kitaꞌ nauꞌanaꞌ kadeꞌ inaꞌ ada nabi nang atakng dari Galilea.”
Nangbini nang babayaꞌ
7:53–8:11
53 [Lalu ia kaꞌ koa pulakng kajah kaꞌ rumahnya.