8
Tapi Yesus ampus kaꞌ bukit Jaitun2 Ampagi alapm-alapm sidi Yesus ada agiꞌ kaꞌ alaman Rumah Allah, man rami urakng atakng kaꞌ Ia. Ia duduk lalu mulaiꞌ ngajar ia kaꞌ koa. 3 Samintara koa guru-guru agama man urakng-urakng Parisi ngincakng kaꞌ Yesus, saurakng nangbini nang kadapatatn babayaꞌ. Ia kaꞌ koa nyuruh nangbini koa badiri kaꞌ tangah-tangah, 4 lalu bakata kaꞌ Yesus: “Paꞌ Guru, nangbini nian kadapatatn tagah babayaꞌ. 5 Musa dalapm ukum Torat marentahatn diriꞌ untuꞌ nabakiꞌ nangbini-nangbini nang mpa koa man batu. Lemae pandapat Kitaꞌ tentang hal koa?”a 6 Ia kaꞌ koa batanyaꞌ lekoa untuꞌ nyebak Ia, biar ia kaꞌ koa baya nyalahatn-Nya. Tapi Yesus ngogoꞌ kaꞌ babah sambil nulis man jari-Nya kaꞌ tanah. 7 Takaꞌ guru-guru agama man urakng-urakng Parisi koa batanyaꞌ maꞌan kaꞌ Yesus, Ia badiri man bakata: “Sae kaꞌ antara kitaꞌ nang inaꞌ badosa, biarlah ia nang doloꞌ nabak nangbini nian man batu.” 8 Lalu Yesus ngogoꞌ agiꞌ man nulis kaꞌ tanah. 9 Tapi lakaꞌ ia kaꞌ koa nangngar pakataatn koa, sekoꞌ-sekoꞌ ia kaꞌ koa badariatn mulaiꞌ dari nang miah tuha. Ahirnya kahelah Yesus man nangbini koa nang tatap badiri kaꞌ tampatnya. 10 Lalu Yesus badiri man bakata kaꞌ ia: “Kaꞌ mae ia kaꞌ koa tadi? Inaꞌ keꞌ ada saurakng pun nang ngukum kitaꞌ?” 11 Sahut nangbini koa: “Inaꞌ ada, Tuan.” Lalu kata Yesus agiꞌ: “Aku pun inaꞌ ngukum kitaꞌ. Pulaknglah man mulaiꞌ ampeatn, ame manjawat dosa agiꞌ.”]
Yesus panarakng dunia
8:12-20
12 Yesus bakata agiꞌ kaꞌ urakng-urakng Yahudi koa: “Akulah tarakng duniab); sae jaꞌ nang nunaꞌan Aku, ia inaꞌ bajalatnnaꞌ kaꞌ dalapm nang patakng, tapi ia ngampuꞌaꞌ kaidupatn nang salamanya.” 13 Lalu kata urakng-urakng Parisi kaꞌ Ia: “Kitaꞌ mareꞌ kesaksian tentang diriꞌ Kitaꞌ babaro, kasaksian Kitaꞌ inaꞌ banar.”c 14 Kata Yesus kaꞌ ia kaꞌ koa: “Biarpun Aku mareꞌ kesaksian tentang diriꞌ-Ku babaro, kesaksian-Ku koa banar, barang Aku nauꞌan dari mae Aku atakng man kaꞌ mae Aku ampus. Tapi kitaꞌ inaꞌ nauꞌan dari mae Aku atakng man kaꞌ mae Aku ampus. 15 Kitaꞌ ngakimiꞌ urakng nurut ukuran talino, Aku inaꞌ ngakimiꞌ saurakng pun. 16 Man kadeꞌ Aku ngakimiꞌ, pangakiman-Ku koa banar, jukut Aku bukeꞌ babaro, tapi sama-sama man Apaꞌ nang ngiripm Aku. 17 Kaꞌ dalapm kitap Torat kitaꞌ ada taconteng kadeꞌ kasaksian dua urakng banar; 18 Akulah nang basaksi tentang diriꞌ-Ku babaro, man ugaꞌ Apaꞌ nang ngiripm Aku, basaksi tentang Aku.” 19 Lalu kata urakng-urakng Parisi koa kaꞌ Yesus: “Kaꞌ mae keꞌ Apaꞌ-Nyu?” Sahut Yesus: “Baik Aku maoꞌ pun Apaꞌ-Ku inaꞌ kitaꞌ kanal. Sakiraꞌnya kitaꞌ kanal kaꞌ Aku, kitaꞌ kanal ugaꞌ kaꞌ Apaꞌ-Ku.”
20 Yesus ngomongan samua hal nian takaꞌ Ia tagah ngajar kaꞌ alaman Rumah Kudus Allah samak kotak persembahan. Tapi inaꞌ ada saurakng pun nang nangkap Ia, barang napeꞌ namus waꞌtunya Yesus untuꞌ ditangkap.
Yesus bukeꞌ dari dunia nian
8:21-29
21 Lalu Yesus bakata agiꞌ kaꞌ urakng-urakng Yahudi koa: “Aku ampusaꞌ man kitaꞌ ngagoꞌiaꞌ Aku, tapi kitaꞌ matiaꞌ kaꞌ dalapm dosa kitaꞌ. Kaꞌ tampat diꞌmae Aku ampusaꞌ, kitaꞌ inaꞌ baya atakng.” 22 Lalu naꞌ pamimpin Yahudi batanyaꞌ-tanyaꞌ sekoꞌ man nang lain: “Ahe keꞌ Ia maoꞌ munuhaꞌ diriꞌ-Nya barang Ia bakata: ‘Kaꞌ tampat Aku ampus, kitaꞌ inaꞌ baya atakng?’” 23 Lalu Yesus bakata kaꞌ ia kaꞌ koa: “Kitaꞌ barasal dari babah, Aku dari atas; kitaꞌ dari dunia; Aku bukeꞌ dari dunia. 24 Tadi Aku bakata kaꞌ kitaꞌ, kadeꞌ kitaꞌ matiaꞌ dalapm dosa kitaꞌ; barang kadeꞌ kitaꞌ inaꞌ pucayaꞌ kadeꞌ Akulah Ia, kao matiaꞌ dalapm dosa-dosa nyu.” 25 Lalu kata pamimpin-pamimpin Yahudi koa kaꞌ Ia: “Sae keꞌ Kitaꞌ?” Sahut Yesus kaꞌ ia kaꞌ koa: “Ahe nang dah Ku-ngataatn kaꞌ kitaꞌ dari samula? 26 Manyak nang arus Ku-kataatn man Ku-akimiꞌ tentang kitaꞌ; tapi Ia nang ngiripm Aku banar, man ahe nang Ku-dangngar dari Nya, koalah nang Ku-ngataatn kaꞌ dunia.” 27 Ia kaꞌ koa inaꞌ ngarati kadeꞌ Yesus tagah ngomong kaꞌ ia kaꞌ koa tentang Allah Apaꞌ. 28 Jaji kata Yesus: “Kadeꞌ kitaꞌ dah ningian Aku Anak Manunsia, baruꞌlah kitaꞌ nauꞌan Akulah Ia. Man kadeꞌ Aku inaꞌ manjawat ahe-ahe dari diriꞌ-Ku babaro, tapi Aku ngomongan hal-hal lea nang di Apaꞌ ngajaratn kaꞌ Aku. 29 Apaꞌ nang dah ngiripm Aku, nyarataiꞌ Aku. Ia inaꞌ miaratn Aku babaro, barang Aku kaja manjawat ahe nang ngarepoatn Ia.”
30 Takaꞌ Yesus tagah ngataatn samuanya koa, rami urakng nang pucayaꞌ kaꞌ Ia.
Allah nang banar mebasatn diriꞌ
8:30-36
31 Lalu Yesus bakata kaꞌ urakng-urakng Yahudi nang dah pucayaꞌ kaꞌ Ia: “Kadeꞌ kitaꞌ idup kaꞌ dalapm ajaran-Ku, kitaꞌ sidi-sidi jajiaꞌ murit-Ku, 32 man kitaꞌ nauꞌanaꞌ kabanaran, man kabanaran koa mebasatnnaꞌ kitaꞌ.” 33 Sahut nya kaꞌ koa: “Kami nian katurunan Abraham. Man inaꞌ suah jaji amba sae pun. Lemae Kitaꞌ baya bakata: ‘Kitaꞌ bebasaꞌ?’”d 34 Kata Yesus kaꞌ ia kaꞌ koa: “Sasidinya Aku bakata kaꞌ kitaꞌ, tiap urakng nang manjawat dosa jaji amba dosa. 35 Amba inaꞌ tatap badiapm kaꞌ dalapm rumah, tapi anak badiapm dalapm rumah salama-lamanya. 36 Jaji kadeꞌ Anak koa mebasatn kitaꞌ, kitaꞌ pun sidi-sidi bebas.
Jujuhant Abraham nang inaꞌ barasal dari Allah
8:37-47
37 Aku nauꞌan kadeꞌ kitaꞌ nian katurunan Abraham, tapi kitaꞌ barusaha munuh Aku, barang pakataatn-Ku inaꞌ namu tampat kaꞌ dalapm kitaꞌ. 38 Ahe nang Ku-neleꞌ kaꞌ Apaꞌ, koalah nang Ku-ngataꞌatn, lekoa ugaꞌ kitaꞌ panjawat tentang ahe nang kitaꞌ dangngar dari apaꞌ kitaꞌ.”
39 Sahut urakng-urakng Yahudi nang pucayaꞌ tadi kaꞌ Ia: “Apaꞌ kami Abraham.” Kata Yesus kaꞌ ia kaꞌ koa: “Kadeꞌ sakiraꞌnya kitaꞌ anak-anak Abraham, tantulah kitaꞌ ngarajaatn pakarajaatn nang di Abraham ngarajaatn. 40 Tapi ampeatn kitaꞌ barusaha munuhaꞌ Aku, saurakng nang ngataatn kabanaran kaꞌ kitaꞌ, kabanaran nang Ku-nangngar dari Allah; man Abraham inaꞌ suah manjawat lea nang di kitaꞌ panjawat koa. 41 Kitaꞌ ngarajaatn pakarajaatn apaꞌ kitaꞌ babaro.” Sahut nya kaꞌ koa: “Kami anak-anak Allah nang sah. Kami inaꞌ baapaꞌ nang lain, Allah ihan Apaꞌ kami.” 42 Kata Yesus kaꞌ ia kaꞌ koa: “Kadeꞌ Allah Apaꞌnyu, kitaꞌ ngasihiaꞌ Aku, jukut Aku atakng dari Allah man ampeatn Aku ada kaꞌ dian. Agiꞌnya Aku atakng bukeꞌ atas kamaoꞌan-Ku babaro, tapi Ia nang ngiripm Aku. 43 Ngahe kitaꞌ inaꞌ ngarati kaꞌ pakataatn-Ku? Jukut kitaꞌ baiꞌ narimaꞌ ajaran-Ku. 44 Ibalislah apaꞌ kitaꞌ man kitaꞌ maoꞌ manjawat kamaoꞌan apaꞌ kitaꞌ. Ialah nang munuh talino dari samula man inaꞌ idup kaꞌ dalapm kabanaran, barang kaꞌ dalapm ia inaꞌ ada kabanaran. Kadeꞌ ia bakata alok ia bakata dari diriꞌnya babaro, jukut ia pangalok man apaꞌ dari sigana nang alok. 45 Tapi Aku ngataatn kabanaran kaꞌ kitaꞌ, kitaꞌ inaꞌ pucayaꞌ. 46 Sae keꞌ kaꞌ antara kitaꞌ nang muktiatn kadeꞌ Aku manjawat dosa? Kadeꞌ Aku ngataatn kabanaran, ngahe kitaꞌ inaꞌ pucayaꞌ kaꞌ Aku? 47 Sae jaꞌ nang asalnya dari Allah, ia nangngaratn pakataatn Allah; koalah tagalnya kitaꞌ inaꞌ nangngaratnnya, barang kitaꞌ bukeꞌ barasal dari Allah.”
Yesus dah ada sanapeꞌ Abraham
8:48-59
48 Pamimpin-pamimpin Yahudi nyahutiꞌ Yesus: “Banar kadeꞌ kami bakata, Kitaꞌ urakng Samaria nang katamaꞌan setan” 49 Sahut Yesus: “Aku inaꞌ katamaꞌan setan, Aku hormat kaꞌ Apaꞌ-Ku, tapi kitaꞌ inaꞌ hormat kaꞌ Aku. 50 Aku inaꞌ ngagoꞌ kahormatan untuꞌ diriꞌ-Ku babaro. Tapi ada Apaꞌ-Ku nang barusaha biar Aku dihormatiꞌ, man Ialah nang jaji Akimnya. 51 Pucayaꞌlah, sasidinya Aku bakata kaꞌ kitaꞌ: sae jaꞌ nurutiꞌ pakataatn-Ku, ia pasti inaꞌ ngalamiaꞌ kamatiatn sampe salama-lamanya.” 52 Lalu pamimpin-pamimpin Yahudi koa bakata kaꞌ Yesus: “Ampeatn kami nauꞌan, Kitaꞌ nian banar-banar katamaꞌan setan! Abraham babaro dah mati, lekoa ugaꞌ samua nabi. Tapi Kitaꞌ bakata: ‘Urakng nang nurutiꞌ pakataatn-Ku, pasti inaꞌ matiaꞌ salama-lamanya.’ 53 Kitaꞌ inaꞌ labih hebat dari pada apaꞌ diriꞌ Abraham, nang dah mati! Nabi-nabi pun dah mati; man sae Kitaꞌ nyamaꞌannaꞌ diriꞌ Kitaꞌ?” 54 Sahut Yesus: “Kadeꞌ Aku muliaatn diriꞌ-Ku babaro, kamuliaatn-Ku koa sabebet pun inaꞌ ada artinya. Apaꞌ-Kulah nang muliaatn Aku, tentang sae kitaꞌ tadi bakata: Allahlah Apaꞌ kami, 55 padahal kitaꞌ inaꞌ kanal kaꞌ Ia. Tapi Aku kanal kaꞌ Ia. Kadeꞌ Aku bakata: Aku inaꞌ kanal kaꞌ Ia, Aku pangalok, sama lea kitaꞌ. Tapi Aku kanal Ia, man Aku nurutiꞌ pakataatn-Nya. 56 Apaꞌnyu Abraham sidi karepoatn kadeꞌ ia dah neleꞌ ari kaatangan-Ku kaꞌ aiꞌ tanah. Ia dah neleꞌnya man ia karepoatn!” 57 Lalu pamimpin-pamimpin Yahudi bakata kaꞌ Yesus: “Umur Kitaꞌ napeꞌ lima puluh tahutn, man Kitaꞌ dah neleꞌ Abraham?” 58 Kata Yesus kaꞌ ia kaꞌ koa: “Pucayaꞌ boh sasidinya Aku bakata kaꞌ kitaꞌ, sanapeꞌ Abraham ada, Aku dah ada.” 59 Lalu pamimpin-pamimpin Yahudi naap batu nabakaꞌ-Nya; tapi Yesus dah inaꞌ agiꞌ kateleꞌatn kaꞌ tangah-tangah nya kaꞌ koa man ningalatn alaman Rumah Allah.