Yesus nyamuhatn urakng nang butaꞌ dari lahir
9:1-41
9
Waꞌtu Yesus tagah bajalatn, Ia neleꞌ urakng butaꞌ dari ia dimaranakatn. 2 Murit-murit-Nya batanyaꞌ kaꞌ Ia: “Paꞌ Guru, ngahe urakng nian dimaranakatn butaꞌ? Ahe keꞌ ia nang badosa ato uweꞌ apaꞌnya nang badosa?” 3 Sahut Yesus: “Ia butaꞌ bukeꞌ tagal dosanya man bukeꞌ ugaꞌ dosa urakng tuhanya, tapi biar pakarajaatn-pakarajaatn Allah dinyataatn lewat urakng butaꞌ nian. 4 Diriꞌ arus ngarajaatn pakarajaatn Allah nang ngiripm Aku, salamaꞌ masih siakng; atakngngaꞌ malam diꞌmae inaꞌ ada saurakng pun nang baya karaja. 5 Salamaꞌ Aku kaꞌ dalapm dunia, Akulah tarakng dunia.”a 6 Lakaꞌ Yesus ngataatn samuanya koa, Ia ngalujah kaꞌ tanah, man ngaduk lujah-Nya koa kaꞌ tanah. Lalu Yesus nolesatn kaꞌ mata urakng koa, 7 man bakata kaꞌ urakng koa: “Ampuslah sasah muhanyu kaꞌ kolam Siloam.” Siloam ratinya: “Nang dingiripm.” Urakng koa pun ampus nyasah muhanya lalu ia mulakng man neleꞌ.8 Tapi tetanggaꞌ-tetanggaꞌnya man urakng-urakng nang deꞌenya nganal ia saurakng pamintaꞌ-mintaꞌ bakata: “Inaꞌ keꞌ ia nian, nang kaja duduk mintaꞌ-mintaꞌ?” 9 Ada nang bakata: “Banar, ialah nian.” Ada pulaꞌ nang bakata: “Bukeꞌ, tapi ia sarupa man urakng koa.” Tapi urakng nang tadinya butaꞌ koa bakata: “Nian ingkaꞌ aku.” 10 Lalu tetanggaꞌ-tetanggaꞌnya man urakng-urakng nang deꞌenya nganal ia bakata agiꞌ kaꞌ ia: “Lemae matanyu jaji neleꞌ?” 11 Sahutnya: “Urakng nang badama Yesus koa ngalujah kaꞌ tanah, lalu nolesatnnya kaꞌ mataku man bakata kaꞌ aku: ‘Ampuslah kaꞌ kolam Siloam sasah muhanyu!’ Lalu aku ampus nyasah muhaku, aku neleꞌ.” 12 Lalu urakng-urakng koa batanyaꞌ kaꞌ ia: “Kaꞌ mae Urakng koa?” Sahutnya: “Aku inaꞌ nauꞌan.”
13 Lalu tetanggaꞌ-tetanggaꞌnya man urakng-urakng nang deꞌenya nganal urakng nang tadinya butaꞌ koa ngincakngnya kaꞌ urakng-urakng Parisi. 14 Ari koa ari Sabat waꞌtu Yesus ngalujah kaꞌ tanah man nyamuhatn urakng nang butaꞌ koa. 15 Jaji urakng-urakng Parisi batanyaꞌ agiꞌ kaꞌ ia, lemae matanya baya neleꞌ. Sahutnya: “Ia nolesatn lotak kaꞌ mataku, lalu aku maresahatnnya man ampeatn aku neleꞌ.” 16 Sangahe urakng kaꞌ antara urakng-urakng Parisi koa bakata: “Naꞌ mungkin urakng nang manjawat hal nian dari Allah, jukut Ia inaꞌ mihara ari Sabat.” Tapi saduaꞌ urakng Parisi nang lain bakata: “Mae mungkin urakng badosa manjawat hal-hal ajaip lea nian.” Lalu timullah perbedaan pandapat kaꞌ antara nya kaꞌ koa. 17 Kata nya kaꞌ koa agiꞌ kaꞌ urakng nang tadinya butaꞌ koa: “Ahe pandapatnyu tentang Ia nang dah manjawat kao baya neleꞌ?” Sahut nya: “Ia saurakng nabi.” 18 Tapi pamimpin-pamimpin Yahudi koa baiꞌ pucayaꞌ kadeꞌ tadinya urakng koa butaꞌ man ampeatn baya neleꞌ. Sampe ia kaꞌ koa nyaruꞌ urakng tuhanya 19 man batanyaꞌ kaꞌ urakng tuhanya: “Nian keꞌ kamudaꞌ kitaꞌ, nang kitaꞌ madah kadeꞌ ia nian butaꞌ dari lahir? Lemae ia baya neleꞌ ampeatn?” 20 Lalu sahut urakng tuhanya: “Nang kami tauꞌatn ia nian anak kami dari ia dimaranakatn ia dah butaꞌ. 21 Tapi lemae ia baya neleꞌ ampeatn, kami naꞌ nauꞌan. Man sae nang manjawat matanya baya neleꞌ kami pun inaꞌ nauꞌan. Tanyaꞌanlah kaꞌ ia, ia kan dah ayaꞌ; ia pane nyahut babaro.” 22 Urakng tuha kamudaꞌ koa bakata lea koa jukut ia koa galiꞌ kaꞌ pamimpin-pamimpin Yahudi. Barang pamimpin-pamimpin Yahudi koa dah bapakat, kadeꞌ tiap urakng nang ngakoꞌiꞌ Yesus Raja Panyalamat, inaꞌ mulih agiꞌ tamaꞌ kaꞌ rumah tampat sumbayangb. 23 Koalah tagalnya urakng tuhanya koa bakata: “Ia dah ayaꞌ tanyaꞌanlah kaꞌ ia babaro.”
24 Lalu urakng-urakng Parisi koa nyaruꞌ urakng nang dah samuh dari kabutaatnnya koa tadi sakali agiꞌ man bakata kaꞌ ia: “Basumpahlah kaꞌ adapatn Allah kadeꞌ kao bakataaꞌ banar; kami nauꞌan kadeꞌ Urakng koa Urakng badosa.” 25 Sahut urakng nang tadinya butaꞌ koa: “Ahe keꞌ Ia badosa ato inaꞌ, aku inaꞌ nauꞌan; tapi soteꞌ hal nang aku nauꞌan, kadeꞌ deꞌenya aku butaꞌ, ampeatn aku baya neleꞌ.” 26 Lalu urakng-urakng Parisi kaꞌ koa batanyaꞌ agiꞌ ia: “Ahe keꞌ nang dah-Nya manjawat kaꞌ kao sampe kao baya neleꞌ?” 27 Sahutnya kaꞌ urakng-urakng Parisi koa: “Dah kumadahatn kaꞌ kitaꞌ, tapi kitaꞌ baiꞌ nangngaratnnya; ngahe kitaꞌ maoꞌ nangngarnya agiꞌ? Arah-arah kitaꞌ maoꞌ jaji murit-Nya ugaꞌ?” 28 Lalu urakng-urakng Parisi koa ngina urakng nang tadinya butaꞌ koa man bakata: “Kao murit Urakng koa, tapi kami murit-murit Musa. 29 Kami nauꞌan kadeꞌ Allah dah bapirman kaꞌ Musa, tapi tentang Urakng koa kami inaꞌ nauꞌan dari mae Ia atakng.” 30 Sahut urakng nang tadinya butaꞌ koa: “Aneh ugaꞌ, kitaꞌ inaꞌ nauꞌan dari mae Ia atakng, padahal Ia dah manjawat mataku baya neleꞌ. 31 Kitaꞌ nauꞌan kadeꞌ Allah inaꞌ nangngaratn urakng-urakng badosa, tapi Allah nangngaratn urakng-urakng nang hormat kaꞌ Allah, man nang manjawat kamaoꞌan-Nya. 32 Dari deꞌe sampe ampeatn inaꞌ suah didangngar, kadeꞌ ada urakng nang baya nyajiatn urakng nang dari lahir butaꞌ baya neleꞌ. 33 Urakng nian atakng dari Allah. Jaji Ia baya nyamuhatn mataku nang butaꞌ nian.” 34 Sahut urakng-urakng Parisi koa kaꞌ ia: “Kao nian dimaranakatn dalapm dosa man kao maoꞌ ngajar kami?” Lalu ia kaꞌ koa ngosernya kaluar.
35 Yesus nangngar kadeꞌ urakng Yahudi dah ngoser urakng nang dah samuh dari kabutaatnnya koa tadi kaluar dari pakomoꞌannya kaꞌ koa. Lalu Yesus batamu man ia man bakata: “Pucayaꞌ keꞌ kao kaꞌ Anak Manunsia?” 36 Sahut urakng koa: “Sae Ia koa Paꞌ guru? Biar aku pucayaꞌ kaꞌ Ia.” 37 Kata Yesus kaꞌ ia: “Kao bukeꞌ jaꞌ dah neleꞌ-Nya; tapi Ia tagah ngomong man kao, Ialah koa!” 38 Kata urakng koa: “Aku pucayaꞌ, Tuhan!” Lalu ia pun balutut nyambah-Nya. 39 Kata Yesus: “Aku atakng kaꞌ dunia nian untuꞌ ngakimiꞌ, biar sae jaꞌ nang inaꞌ neleꞌ baya neleꞌ, man biar sae jaꞌ nang baya neleꞌ jaji butaꞌ.”